TITUS
Svan (Lashx) Texts ed. A. Oniani
Part No. 6
Previous part

Text: 6 
Page: 15 
Line: 7 
VI. ზომხა ლა̄შხისა.


Line: 8       მჷლა̄შხ მა̄რე ზომხას მუჟღორნეშ ხემა̄რა̄ლ, იბნეხ დო̄სგ მუჟღორ
Line: 9    ლეზო̄მახ ხამი ლინე̄შყეს, ზომხაჲს ხაყლეხ. მუჟღორჷნღო ხა̄მნეხ
Line: 10    ზომხა̄ სგობნე ლადეღნუნ. ჲერჳა̄ჲს ხოლგჳარა ხამ ხეყე̄ნი ლა̄ნშყა, ეჯი
Line: 11    ხოშა ჟახე ლი მიჩა ჴეჳისა. ზომხა̄ სგობნე ლადეღს შუშხვამ ხა̄ჲშხა
Line: 12    ლჷლა̄შხუდ. ეჯ ლადეღ ქორთე ლიჴედ მა̄ შიდ ნაქა̄მიშ. ზომხაჲ ხამს
Line: 13    ჩჳადძი̄ნეხ ძინარს მე̄ჳარ დო̄სგ. სგა̄შურე̄მიშს კეპლარს ანსყე̄ნნეხ ი
Line: 14    ჩჳადშხუნნეხ. ნაქა̄მს ერე̄ს ხეწდენიხ, ეჩქა̀ უშხვა̄რ ხომზჷრიხ ამჟი:
Line: 15    "ხოჩა შუშხჳამჳ აჯშხჳა̄მე̄ნა". ეჩქა̀ მე̄რმე მა̄რე ხე̄ქჳნე: "სი̄ ხოჩაჳ
Line: 16    აჯშხჳა̄მე̄ნა". ნებოზს ზომხა̄ჲ თხუმ-აყბას ჟანჯაბნეხ, თხუმს ჩჳადშხუნნეხ
Line: 17    ი აყბას შუშხჳამ ლე̄თ ჳახშამდ ჟი ლახმეზჷრიხ ი სემი კოჭო̄ლ
Line: 18    ტაბლარს აყბა̄ცახან. ტაბლარს ლანჷყენჟი ზომხა̄ჲ სგა̄შურე̄მი ბადი
Line: 19    ნაგილუ̄ლს ლოხკჳანნეხ ი ეჯჟი ლახმეზრიხ აყბაცახან. ჳახშამდ ალჲარს
Line: 20    ჩულეჲზობნეხ ქორს მერდე̄ლ. ნაქა̄მი ლე̄მნად მა̄დ შიდ. ლამზჷრა̄ლჟი ამჟი
Line: 21    ყჷლეხ: "ჯგჷრა̄გ შუშხჳმიშ სი ლო̄გვეშდ, ხოჩა შუშხჳამ ოგშხჳა̄მ, ხჳაჲ
Line: 22    ლადი̄ ლადეღ ოგჳაჲ კუმშიშ ი მა̄რე̄მი ნაშჳდობოშ". ჳახშმი ლიზობჷნღო
Line: 23    ზურა̄ლე̄ლ ანყეხ ნაჭხურას, სგა ხოჩდიხ ჭუ̄რუ კჳეცნა დჲარს
Line: 24    ხამი ღჳესას ზომხა̄ჲშს, ნატფჷნია̄ქ მეტხე კჳეცნადჲარ ხუღჳახ მო̄შ,
Line: 25    ქა̄ხტეფნეხ ეჯის ი ქა̄ნნაყნეხ კერჲაჲჟი, ძღჷდ ხეკჳეს ლე̄სეს. ემოშ
Line: 26    ანჴჷრჴნეხ კერჲაჲჟი ლინყეს, ხა̄ლ მო̄შ ძღჲჷდ ი̄რი ეჯი ხოჩა, მარა̀ აშ
Line: 27    დიარდ ხოშა ეში̄ ხეკჳეს ძღჷდჳშ ლე̄სეს. ხოჩა̀ ერე გობზუმ ლე̄სეს
Line: 28    ნაჭშხურა. ნაჳახშმობე̀ნ ნაჭშხურას სგე̄სდე̄სხ ცხიკო̄ლთეჲსა, ეჩის თხუმჟი
Line: 29    ესდე̄სხ ზომხა̄ჲ თხუმს. ეშხუ ლაფექ კჳეცნა ფექს სგა უდ ესგემხ
Line: 30    ცხიკო̄ლთე, ჟიქა̄ნ ესდე̄სხ უსკჳარს, უსკჳთეჲსა ესჩიხნიხ თეთრს, ჟესდე̄სხ
Line: 31    წერქჳა ნინჩორს, ზომხა̄ჲ ლერსგჳენ ჭიშხს, ეშხუ სტამა̄ნ არაყს ი
Line: 32    ალეს ამჟი ლჷმა̄რად ჩჳესგემხ. ცხიკო̄ლთე ჩი̄ს ერ სგე̄სდე̄სხ, მა̄ჲ სგა
Page: 16  Line: 1    ლედე̄ს ლი, ჩი̄ს, ეჯჲარს თხუმჟი ხეკჳეს ხა̄ზდეს ფუსნა ლემზჷრ.
Line: 2    ე̀ჯი ლი ფუსნაბუა̄სდია̄ჲ ტაბჷლ, მუჭჳარ ხა̄რ ტაბჷლს ჯჳარი კალიბდ.
Line: 3    შუშხვამ ლე̄თ ღჳაჟარ შდიხჷ̄ნდი კჳედლარს ჴჷდეხ ლჷკჳჲრხილდ ი
Line: 4    ბალარჳშ ლჷფო̄მფას. ეჯ კჳედლარშჳ ასყიხ გუზჳარს ი ჩჳაშხჳნიხ ეჯ ლე̄თ
Line: 5    ქორს. ზომხა სგობნე ლადეღ შუშხჳამ ლე̄თ სეჳ ჲეზჳჲსა ლჷმა̄რე
Line: 6    ხეკჳეს ლჷ̄გე̄ნდეს ზომხა̄ ძინრიშჳდ. ზომხა̄ ძინარს ლირჳა̄ლნუნ ჟენგენიხ,
Line: 7    ლჷმა̄რე ცხიკო̄ლს ჟენცჳემხ შიყჟი, ქა̄დინეხ კირაჳთე, ეშხუ ხოჩა
Line: 8    ჴანსი̄ ქა̄დჲესხ ცხიკო̄ლცახან ყო̄რქა ი სგა ანტხენი კირაჳხენ, ჴანსი̄
Line: 9    მიჩაცახან ანჲეს ი სგა ლეხგენი ქორა ყო̄რალს ი ესტუ̄ლნე. ალ მა̄რას
Line: 10    ხა̄ჲშხა მჷჭშხი. მჷჭშხი ლახტუ̄ლნე ქორთე კჷ̄ლთხიდ: "ყო̄რ მჷკარ
Line: 11    ბედნჲერ!" ქორხენისა (|kორხენ) ლახტიხეხ: "მა̄ჲ ეჯღჳა ბედნჲერ?"
Line: 12    მჷჭშხი ლახტუ̄ლნე: "თხუმდ ფუსნაბუა̄სდია̄ ჟჷრ ემღჳა, ცხემა̄ჲ
Line: 13    ქემა, ბე̄დ ი ბარაქ, მა̄რე̄მი ნაშჳდობი, კუმში ნაფშირი, ლაჩა̄ჟი̄რ
Line: 14    ჩა̄რშჳ გჳა̄რ გოში, ლაჴნი̄რ ჴანარშჳ, ლაფჳრა̄ლ ფურალშჳ, ლახმი̄რ
Line: 15    ხამარშჳ, ლაბტი̄რ ბატარშჳ, ლაქთალა̄რ ქათლარშჳ, ლაღჳლჲა̄ქ
Line: 16    ღოლჲაქარშჳ, კიდბონარ კეთილშჳ, კეცარ ღჳინელშჳ, ზანდუკ
Line: 17    თეთრშჳ". ალჲარჷნღო აჯაღ ესტუ̄ლნე: "ყო̄რ მჷკარ ბედნჲერ!"
Line: 18    აჯაღ ლახტიხეხ ქორხენ: "მა̄ჲ ეჯღჳა ბედნჲერ?" მჷჭშხი ქა უდ
Line: 19    ენშჷლდანნე ეჩქა̀დ ერ ლე̄ქჳ ჩი̄ს ეჯჲარს ი ამკალიბდ ლე̄ქჳნეხ სუმინ
Line: 20    მჷჭშხი მიჩა ლე̄ქჳი̄სს ი ქორხენ მუტუ̄ლი მიჩას. სუმინ ერ ქა ყჷლეხ,
Line: 21    ეჩჷნღო ჩუ ხოკრენიხ ყო̄რალს ი მჷჭშხი სგა ღჷრი ქორთე. ჩჳეხჭემნი
Line: 22    ქორს მერდა̄ლას ჩი̄ს ი ხე̄ქჳნე: "ხჳაჲ ზომხა̄ჳ აჯჲე̄ნახ ჩი̄ს!"
Line: 23    ი მაგ სგა̄დქჳიჭნე თჳითჟი ტოტარს ცხიკოლთეჲსა. მჷჭშხი ქა̄ტხენი
Line: 24    ყო̄რქა, ქა̄დჲეს გუზჳარს ი ჩჳესლაჯნე კალისა, გირგჷტანდ მუსს
Line: 25    ლახშიდე ხჳა̄ჲს ი ლე̄ქჳნე: "ა̄მჟი ლჷშო̄ნშა ი ლჷფო̄მფა ზაჲსუ ლოხგენე̄ნად
Line: 26    ცხემაჳშ, ქემაჳშ, ბედჳშ ი ბარაქჳშ". ეჩჷნღო სგა̄ნტხენი ქორთე ი
Line: 27    ჩჳადშია̄შნე მჷჭშხი ქორს მერდე̄ლს ჩი̄ს. ხე̄ქჳნე ჩი̄ს თჳჲთო̄ლაჟი:
Line: 28    "ა̄მჟი ლჷშო̄ნშა-ლჷფო̄მფა ზაჲსჳ ლახგენე̄ნახ ცხემაჳშ, ქემაჳშ, ბედშჳ
Line: 29    ი ბარაქჳშ!" ი ქალახბიშნე წერექჳს კოჭო̄ლ ნინჩორი̄ლს ი ხე̄ქჳნინე:
Line: 30    "ჳოშა̄ჲ ალეს ჳედ ხაბჷდე̄ნა, ეჩშელდ ზაჲუ ხარი უმზიგა̄რჳად!" ალეს
Line: 31    ხა̄ჲშხა ლიშია̄ში. ალია̀რს ერ ჩი̄ს ჩუ იჩოხ, ეჩჷნღო ჩჳესსგურიხ მაგ
Line: 32    ქორისა ეშხუდ ი ენბინნე̀ხ ლიდჲარა̄`ლს, ითრეხ არაყს ი ამზჷრიხ
Line: 33    უშხჳა̄`რ: "ხჳა̀ჲ ზომხა̄`ჳ ლოქ აჯჲე̄ნა შჳჲდობდ ჲეხჳშ ი გეზალშჳ!" ლოქ.
Line: 34    ეჩანღო ჟენგენიხ, ქა̄`ნჴდენიხ ყო̄რქა ი ნა̄`თჳარალს ერ ლეხხჳიხ,
Page: 17  Line: 1    ოხმეზჷრიხ ხჳაჲ ზომხას უშხჳა̄რ. ზექჳშ მჷსყე სეჳს ჴანარს ლოხბემხ
Line: 2    ი ქე̄სზელა̄ლჳნიხ კოჭო̄ლჟი ჴანარს ლჷსეჳდ ი ალე ი̄რი ჴანარე ლიშია̄ში.
Line: 3    ლამზჳრა̄ლჟი ზომხა ლადეღ ჩიგარ ბასილ-ძუღჳა კალანდა̄შჲას
Line: 4    ხეჴჷ̄რა̄ლხ. ზომხა ფუსნ ბასილ-ძუღჳა კალანდა̄შიაშ ლი ი ეჯღა
Line: 5    ხეჴჷ̄რა̄ლხ ეჯის. ზომხა ლადეღ ჳარ დე̄მშა შიდ, იმჳა̄`ჲ ე̄რ იშგჷმინნე.
Line: 6    ზომხა მახეზა̄ჲ ლიგნა̄ლ ლი ი ეჯღა მა̄ შიდ ჳარ ერე მახა ზაჲჟი
Line: 7    ლახ ჳარს ლახგენნე მა̄რას, სერ ჲედურდ ჩიგარ ზაჲსა ჳარა ზაჲ
Line: 8    ხერი ი ამღა მა̄ შიდ ზომხა ლადეღ ჳარა ლი̄ქჳი̄ს. ლაშია̄შენჟი
Line: 9    ლიშჩუქრი̄ ხოხალხ ლა̄შხისა. მჷშია̄შის ხოჩაშიე მა̄რას ითში, მაგ ჩუ ხეკჳეს
Line: 10    ჯითრო̄ნდეს, ეჩქა̀დ მჷშია̄ში მა̄რე მაგჳარ შიეშ ლი ი ეჩჷნღო
Line: 11    ათშია̄შა̄ლჳნა თხუმ მჷშია̄შენის. მჷშია̄ში ე ხოჩა შიეშ ეჯჷთხანი, ჲედურდ
Line: 12    ზაჲ ხოჩა ჯე̄რი მე̄რმა ზომხანუნ, დო̄რიღო̄ჲ მჷშია̄ში ე ხოლა შიეშ
Line: 13    ეჯხჳი, ეჩქა̀ ჲედურდ ზაჲსა მაგ ხოლა გარ ხელკი მა̄რას ჩინოჳშ ი
Line: 14    ამღა გჳიცხა ერე მჷშია̄ში მა̄რე ჩინოჳშ ხოჩა ლე̄სეს, ხოჩა ალალ გუეშ
Line: 15    ი ეჩქა̀ მაგ ხოჩე̄რობა გარ ხელკი მა̄რას ეჯ ზაჲსა ჳოკერნუნ მეჲად.
Line: 16    სა̄ციქჳჲ ლიჳდი̄ მა̄ შიდ ზომხჲერ ეჯღა ერე ქა ლოქ ხაყა შის ჲედ
Line: 17    სოჲ ჲედ ბედ ჲედ ბარაქ ჲედ იღბალ ი ამღა ხოკჳიბდ საციქჳჲ
Line: 18    ლიჳდის ზომხჲე̀რმჷყქა ჲედ ნაზო̄მახს. მჷჭშხინქა მე̄რმა მა̄რე̄მი
Line: 19    ლიჴედი̄ მა̄ შიდ ზომხჲერ ი ერ ანჴეს, მა̄მა ლეხსჲამიხ ქორშალს უდროჲ
Line: 20    მუშგჳრი. ეჩქა̀ მაგ მინე მინეშჳდ ხეკჳეს ა̄რდეხ მინე მინე ქორალისა.
Line: 21    ჩი̄ს მიჩაშჳდ ხა̄რ ლხინობ ი ლიმზჷრ. ზომხჲერ ლითოფი̄ მე̄ჳარ ხაზნახ
Line: 22    ლა̄შხარს. მა̄ჲმა ხოჩა ლერე̀ქჳ ხეღჳე̄ნიხ, ეჯ ლადეღ ჩიემ ხეკჳეს სგა
Line: 23    ლეჲქჳას, ოდო ეჯურ მა̄ შიდ. მახა ლერექჳისა ხეკჳეს ეთშია̄შე̄ნდე ი
Line: 24    ჩიგა̀რ ხოჩა გუჟი ხეკჳეს ხა̄რდე ზომხჲე̀რ ი მეჲად ზაჲ ხოჩა გუჟი
Line: 25    ხი̄რდი ეჩქა̀, დო̄რიღო̄ჲ მა̄მა ღო. მა̄ჲმა ხოჩე̄რობა ჯეღჳე̄ნი, მაგ ეჩქა̀
Line: 26    ხეკჳეს ენქუთნე̄ნდეს, ღო ხოჩა ზა̄ჲს ეჯცა̄დნე, ეჩქა̀ ღე̄რბეთ ი ზომხა̄
Line: 27    ყერ-ი̀ ანგლო̀ზ. მაგჳარდი̄ წესარს დო̄მ ეთი̄შდნი ი ჩი̄ს ხიჩო, ზაჲსი̄
Line: 28    ეჯგჳარს ახღელის. ნაზო̄მახს ზაჲა მჷცა̄დი ყერს-ი ანგლო̀ზს ლეხჴჷრიხ
Line: 29    ი ლეხე̄რიხ მინე ლეშდაბ-ლეჩომ გჳეშარს. ამჟი ამკალიბდ ხჳიმშგჳა̄ნედ
Line: 30    ლა̄შხარ ზომხჲერალს.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.