TITUS
Svan (Lashx) Texts ed. A. Oniani
Part No. 5
Previous part

Text: 5 
Page: 9 
Line: 6 
V. მაყალ-ლიმყა̄ლჳა̄ლ შჳანრეშ.


Line: 7       მუშჳან მა̄რას ძღჷდ მაყალ ხა̄რ ჩი̄მიშ. ჩინ მაშე̄ნე ღერთალეშდ ხაყლუ̄ნიხ,
Line: 8    ღერთალ ფიშირ ხანწამხ ლა̄შხარს. ჩინ მაშე̄ნე ხა̄რხ ფუსნაბუა̄სდია,
Line: 9    ღო ჯგჷრა̄გ, ღო თა̄რიძელ, ღო ლამრჲა. აშ ღერთალ ხაბჟახ
Line: 10    მო̄შ მო̄შ გჳეშიშ. არყი ღე̄რბეთდ სოლომ ხა̄რხ. ერ ა̄ჲრაყიხ, ეჩქა̀
Line: 11    მა̄ნკჳი̄ ცხჳადს ჳოდ ხაგმჷდეხ, ტაბლე̄ლარს ანყეხ ი ნათხუმ ერ ქა̄ნჴდენი
Line: 12    ცხჳადხენქა, მა̄ნკჳი ეშხუ კათხს ნათხუმს-ი̀ ტაბლე̄ლარს ჟი ლახმეზრიხ
Line: 13    არყი მუმურჯე მუფსჳნი ღერთალს: სოლომ ლოქ ოგმურჯ ლე̄ჲრაყი
Line: 14    ი მადილ ლოქ ჯე̄რი. აშ ლიმზჷრ ერ ხაჭკჷ̄რახ ხოშა დღესასწაულ
Line: 15    ლადღარჟი, ეჩქა̀ ხოშა ნაღალდ ფურსნაბუა̄სდჲას ხემზჷრხ. ლალგენე̄ლი̄ მიჩა
Line: 16    მიჩა ღერთალე ჟახე̄ლჟი ხაყახ. ფუსნაბუა̄სდჲას ერ ხოლგენიხ ჴანს, ეჯ
Line: 17    ჴანს მიშლადღურ დე̄მ აძჲენიხ. მა̄ შიდ მიშლადღურ ეჩა ლიძჲენი.
Line: 18    ლალგენჟი თხუმს ხოცხჳლიხ ჴანს მუტჳარშჳ სგობინისა, ღოლერსგჳენ
Line: 19    ბარჯხენ ი ღო ლერთენხენი ბარჯხენ ი ალეს ერ ჩუ იჩოხ, სერ
Line: 20    ჟილჷლგენე ლი ფუსნაბუა̄სდია̄შჳდ. ეჯ ჴანს ფუსნაჲ ხა̄იშხა ჟახად. ჳოდ ჩუ
Line: 21    დო ედმეჩი ფუსნაჲ, ეჩქა̀დ ეჩა ლიძჲენის დე̄მ იჩოხ, დე ქალეჳდიდ
Line: 22    შიდ ქორხენქა, მიჩაჳშ ედო̄მ ედდაგრი, აშ ხეყე̄ნიხ ერე დე ქა ჳოდიხ ი
Line: 23    ლუგჳნჲანდი̄ ხოშა ხაყახ. შომა̄ჲ ერ ჩჳედმეჩი ფუსნაჲ ჴან, ხაბჟი̄ნნეხ
Line: 24    ბაპს, წირ ლოქ გჳაყრ, ჲედ ხე̄ქჳნეხ ერე ჩუ ლოქ გჳიტბჷლ ლადი,
Line: 25    ფუსნაჲს ლოქ ხჳაძჲენიდ ი მაჲ საკჳრელ ლი ერე ბაპ ჩუხოტბჷლი ეჯ
Line: 26    ლადღიშდ. ლადეღ მიშლადეღ ი̄რი. ერ ანჴდენი მჷტბჷლი ბაპ, ჟი
Line: 27    ლახმეზრი საღჷრბეთ ტაბაგს. ეჯ ტაბაგჟი ი̄რდიხ: ფუსნა̄ჲ გუ, ეშხუ ჭიქ
Line: 28    არაყ-ი̀ ტაბლარ. ჩჳადჯგირნე ალჲარს ბაპ, არყი ჭიქს ჟენკედ ი ქა
Line: 29    ლახბიშნე მასძელს ი ხე̄ქჳნე: ფუსნაბუა̄სდჲა̄ ჟჷრ ლოქ სი̄ ისგჳა ჳოჯახს.
Line: 30    ჟენკედ ბაპ ტაბლარს შიართე, ჟი ლე̀ჲჩოქჳიხ ბაპ ი მასძელარ მაგ ი სგა
Line: 31    ლეხჴჷ̄რიხ ფუსნაბუა̄სდჲას ერე ჩჳეთმურჯე̄ნდეს ლადი̄ ღერთა დიდებ
Line: 32    ი მაშედ ხა̄დეს ფუსნაბუა̄სდჲა. სერ ჟენგენიხ ი ჩჳესგემხ ლალხნია
Page: 10  Line: 1    ტაბაგს ი ილხნჷნიხ, ჳოდ მე̄ჳარ დო ედშდჷმიხ ბაპ ი ჲერ მაგ.
Line: 2    ლი̄ზა̄ლს ბაპარს ჴანი ბარჯს ქა ლახო̄დნე აგითე ლეჲესდ ი ანჲეს ბაპა
Line: 3    საროსტა ბაპა ქორთე. ბარჯცახან ლახო̄დნეხ აჯაღ ტაბლარს ჲერჳს
Line: 4    ჲერუ შჳეთს, ეშხუ ლაგაფ მჷჯაბ ფუსნა̄ჲ ლეღჳს, ხოშა ნაღალდ
Line: 5    სათბილს ი ეშხუ ბოთ არაყს. მე̄ჳარ მჷხე̄რ ხეკჳეს აჩეს მჷტბჷლა
Line: 6    ბაპ, ოდო აშმა̄რ ემო̄დ ი̄რი, ეჲჟი მაჲ მაშედ ხე̄რი ლოქ ეჩა ლიტბელი.
Line: 7    ათხა̀დ მაგ აშ აჭკჳარდა ი ალ წესს დეშერ აჟჳმა, მარა̀ ათხე̀ ჟი
Line: 8    ლო̄ხკჳიდხ ზჷმჷ̄ლშჳ, მამჭირჳალდ ხა̄ჳდიხ ფუსნა̄ჲ ბარჯს ბაპს.

Line: 9       ქორს ერ მაყალ ხაშდჷ̄ნი ჲედ ლეგლირდეჳშ ჲედ დაგრაჳშ
Line: 10    ჲედ ისნაჳშ ე̄მამ იმჴერიხ ჲედ მეცარ ი მელობჲოჳა̄ლ ხე̄ქჳნეხ ერე
Line: 11    ფუსნაჲ ლოქ ჯა̄რს ლელგენი, ეჩქა̀ ხოლგენიხ ფუსნაჲს ი ამჟი ხა̄რხ
Line: 12    ეჩჷნღო̄ წესარ. ფუსნა̄ჲჷ̄ნქა ხოლგენიხ აჯაღ არჳიცაჲს. არჳიცაჲს
Line: 13    ეჩქა̀ ხოლგენიხ ერე მო̄ ხეხლიხ, მა̄ჲღენ ღერთალ ხენუკოჳხ ლალგენას
Line: 14    ი ჲედ ნამზურუნს, დე ეჩა ლიჳდი შიდ ქორხენქა. ეჩა ლაძჲენჟი̄ იტბჷლიხ
Line: 15    ბაპს ი ეჲჟი იჩოს ჩი̄ს გჳეშარს, იმჟი̄ ფუსნა̄ჲ ლაძჲენჟი ჩომინხ,
Line: 16    მარა̀ არჳიცა̄ჲ დე̄მ ხა̄ჳდიხ ბაპს.

Line: 17       ხაზნახ ლალგენა თა̄რიძელიშდ ჴანარეშ, მარა̀ ხოშა ნაღალდ
Line: 18    ღოლჲა̄ქარს ხოლგენიხ თა̄რიძელს. თა̄რიძელი ლალგენას თა̄რიძელაჲს
Line: 19    დე̄მამ ხაყლეხ.

Line: 20       ლამრიას ხოლგენიხ ფურალს, ჟახადი̄ ლამრჲა̀ჲ ხე̄იშხი ეჯ ფურს.
Line: 21    ეჩა ლაძჲენჟი̄ ლიტბჷლი ხე̄რიხ ბაპაშ ბარჯი უჳდად. ბარჯ ფუსნა̄ჲშ
Line: 22    გარ ლი ბაპაშ.

Line: 23       ხოხალხ აჯაღ ლალგენად ლიფშჳდე ლალგენე̄მიშ ჟახა უდად, მაჲღენ
Line: 24    ღერთალ ჲედ ანგლოზ ლოქ ხენკოჳდეს ლიმზჷრ-ლიჴჷ̄რა̄ლს ი
Line: 25    ლალგენას ი მინ ჩუ დოშ ათხჳე̄ნხ, ეჯ ღერთემ ჲედ ანგლოზდუ იპრიანე
Line: 26    ალ მინე ლალგენა. ლალგე̄ნელ ხოხალხ მე̄ჳარ ლეგმერდაჟი, საშჳელ ერ
Line: 27    დო̄მნოჳშ ხოჴდენი -- დო ლიმზურშჳ დო ლიტბჷლიჳშ დო მეცარა
Line: 28    ნათორ ჟაგარშჳ, ეჩქა̀ ჩი ნუკჳი ლალგენე̄ლს აკჳჲა̄ლჳნეხ, ნო̄თი ლო
Line: 29    ლეხშეს ხედ ანგლოზი̄ ინკოჳ მიჩა დიდებს ი ჟანფუშდუ̄რას ლეგმერდოლ
Line: 30    ნამუსრან კჳედელშა̄ლ ი ეჩა ლირდო̄ლ ლოქ ხა̄ჲჯი̄ნახ ღერთემ.

Line: 31       ჲესიჲეს ხაკფჷნეხ მეცრალ მე̄რმა-მე̄რმა შუმი ლიმზჷრ-ლიჴჷ̄რა̄ლს.
Line: 32    ეჯ კალიბ ჯო̄დჲა̄ ხატთე აჲესხ ნამზურუნს ერე ეჩქა̀დ ეშერ მო̄ ხასმახ
Line: 33    ეჩა ჟახე. ლობიოდ ლოქ აქჳიც ეჩხაჳ ი ღჷრიხ სერ ი იჩოხ ეჲჟი ჩი̄ს,
Line: 34    იმჟი̄ მეცარ ხათჳრიხ.


Page: 11 
Line: 1       ჲერხის კუმაშ ერ ე̄სა ხოხჳტენი ჟი თჳთო̄ლაჟი, ეშხუ ზა̄ჲსა ეშხუ
Line: 2    ერ ეთდაგრი, მე̄რმა ზა̄ჲსა მე̄რმე, მესმაჲსა მესმე, ეჩქა̀ ხაყლეხ
Line: 3    მეცრალ ერე ქორ ლოქ ერ ოთგა ალ მა̄რას, ეჩა ბალჳერ ლოქ ე̄რეს
Line: 4    ოთჟაგა მეზჳბელს, ჲედ ხე̄ქჳნეხ ერე ხოლა თეჳშ ლოქ ე̄რეს
Line: 5    ლოხსინჯჳა ქორა ხუნი ლაქჳცაჟი ი ეჯ ქორისა ლოქ ჳოდ ხი̄რდი,
Line: 6    ჩიგარ ხოლა ლოქ გარ ჯელკო̄ლნი. ბაც ლოქ მა̄მა ლი შჳელა ლოქ ერ
Line: 7    ესა ეჯჴჷდიხ ეჯ ქორისა მერდას ე ლოქ დო̄მამ ხოწა̄ხი. ჲერხის მინ
Line: 8    მეცრალ ხა̄ჳდიხ ჟაგ ნაჟგუნჳარს ი ჲერხის აზზიხ მე̄რმა მე̄რმა
Line: 9    აგითე ჲედ ნამზურუნი მჷჴდად ი ჲედ მინე ნათორ სახმახი მუჩუმდ.
Line: 10    ლაშხხენ ხოშა ნაღალდ ურჲალთე იზელა̄ლხ ლამცერთე. ჲეს ეშხჳს
Line: 11    აფშჳდიხ, ალე ლოქ ლი ათხე̀ ხოჩა მეცარ ი ჲეს მე̄რმას ერე ალე ლოქ
Line: 12    ეჩჷნ ხოჩულ ლი. ჲადურდ ერ დო̄სამა გჳეშ ხჷჭკჷ̄რი იშგენ, მეცართე
Line: 13    ეში̄ ღჷრიხ ამგჳარ, მა̄ჲ ჯო̄დჲას ლესეს მეცარ. ჲერუ, სემი ლადღი
Line: 14    ლე̄ზნას ღჷრიხ მეცართე მაგ, ეჯჟი ხოჯრაჳიხ მეცარს ნა̄ქჳი̄სს.
Line: 15    ხჳა̄ჲდინ ქუთა̄შთეჲ ღჳრიხ მეცარი გუ̄ნღა გარ ლაჭჳდჲელა̄ლთე. მეცართე
Line: 16    მაგ მუგჳიდ ითჲა̄ლ ლი̄ზის ხოლაჲ ხოჩა, ღარიბ ი დიდარ. ესყედნიხ
Line: 17    ლეზჷზს, თეთრს მეცარი ლეჳდიდ ნამცერუ̄ლ-ი̀ ღჷრიხ ჯო̄დჲას
Line: 18    ირჲა̄ ფე̄დჲას. ეჩა შუა მა̄მა ხა̄რხ, ხოჩა მეცარ ჩუჳუ ლი, ოდო ლი̄ზის
Line: 19    ი ხარჯს ჲარ ღალ აზა̄რე, დე ნაჴდუნს ე̄რ აზა̄რე მეცართე. მინეშდ
Line: 20    ჩაფულს დე̄მ იდე̄სხ ნაღრიბუშ, მეცართე ლა̄ზჟი ჩაფლარ შიყისა ხოჩხინა
Line: 21    ლა̄რტყლექჳა, დე̄მ ისრე შუკჟი ლედე̄სდ, ჩუ ლოქ ემჴეჩნი ბატო̄ლუ ი
Line: 22    მა̄მა ლოქ მეღჳე̄ნი ეჩჷნღო, ლჷზორისა ლედე̄სდ ი ხჳაჲ მა̄რაცახან დეშ
Line: 23    ლოქ ოხთენი ქა ჭიშხა გარ-ი̀ მეცარიშთე ოსღჳა ჲერუ სემი მანათ.
Line: 24    მიშგჳა თეჳშ მიწჳახ ამშა მჷ̄ჲრენის ერე ლა̄შხხენ ფიშირ აჩად მეცართე
Line: 25    ნე̄სგა რაჭთე, ჲერუ ლადღი ლე̄ზჳნაჟი ლა̄შხხენ: ჲერუ ლადეღ
Line: 26    ეჩხა̄ჳ ახკუხ, ჲერჳს ამხა̄ჳ აგითეშა̄ლ ი ქა ჴედნიხ ჲერხი ლჷხი̄დე მეცარი
Line: 27    ნა̄მბჳალშჳ ი ჲერხი ღალ მე̄ჳარ ლჷმჯა̄რჳე, მარა̀ ხოშა ნაღალდ მეცრალ
Line: 28    ლახი̄და̄რ ამბჳარს ხაყლეხ ერე მაგ ხოჩე̄რობა ლოქ ჯა̄რ ანღელს
Line: 29    ამუნღო. მეცარხენ ნაჴდჳარ აგის ა̄მბჳიხ, ეჯ მეცარ ლოქ ღერთალე
Line: 30    ლჷგნე ლი გაცხაჲდ, ჲადურდ ჩი̄ს ლა̄ჲრაკს ლოქ ი̄მბჳა̄ლ. მა̄ჲმა ლოქ
Line: 31    ჩუ ჯაყრა იჳალადეღ ჲედ ლოქ ჩუ ე̄რ ჯადგარა ქორისა, შიშდ ლოქ ჟი
Line: 32    ხათერ ი ქა ლოქ ჯი̄მბჳი მიჩაჳშ, ჲედ ჳოშა გეზალ ჯეყე̄ნი ლოქ ჲედ
Line: 33    დი̄ მუ ჯაყა̄ დო̄სა ლუჳარ ათხე̀ ჲედ ლჷ̄ჲხჳე ხია̄ მა̄დე, ალეს ლოქ ჩი̄ს
Line: 34    ქა ჯიშჷლდანი სგობინჩუ. ეჩთა̄ნ სპარს მჷგჷრგალი მეცარ მა̄ ლოქ
Page: 12  Line: 1    ხოწჳახ ჩიქე მინს, ამზუმ შდიქი მა̄რე̄ლ ლოქ ლიხ მინ-ი̀ ჩიქე ლოქ
Line: 2    ხათხნე̄ნახ ეჯკალიბ სპარსდ მჷგჷრგალი მეცარს მინე დგმა̄ჲსა. ამ
Line: 3    ლი̄მბჳის ძღჷდ ლჷხი̄დად იჳნარიხ მესჳფელ ი მეზჳბელ მაგ ი სგა ხა̄
Line: 4    ღჷრიხ ქორთე მინე აგჲართე, შიშდ ჩუ სკჷბეხ ერე მინი̄ აჩეხ ეჯ მეცართე
Line: 5    ლაჭჳდჲელა̄ლდ. მეცრალე ლუ̄ქჳჟი ხჳა̄ჲ ღალ ხაცჳრე მიჩა ქორს
Line: 6    ი ლირდეს ი, ჟი ი̄ყრა̄ლ ი ქა იზგა̄ლ მე̄რმა აგითე, ლაზგა გიმ ლოქ
Line: 7    ლი ლჷდა̄ჳშე, ეჯის-ე̀ ხე̄ქჳნე მეცარ.

Line: 8       გეზლურ ჲერჳა̄ჲ ლიხ, მაშე̄ნე ეჯჲარ ღჷრიხ მეცართე, ეჩა ლამჴერდ
Line: 9    ერე იმშა̄ჲღენ ტარშჳ ი ბრალშჳ გეზალ მო̄ ლეხჳოდა̄ნ მინს
Line: 10    ეჯჲარს ხათჳრი მეცარ ერე ალ ხატიშ ი ალ ხატი ტარ ლოქ ჯა̄რ
Line: 11    ნამზჷრუნს ლოქ ინუკოჳ ეჯ ხატ ისგჳა̄ხენ. ხა̄ლ ანჴდენი აგითე, შიშდ
Line: 12    ესთჲა̄ლჲელნე ღალ ეჩა ლიჩომს, მა̄ჲ მეცარხენ ხა̄რ ნა̄ქჳი̄ს. სოფლარისა
Line: 13    ხენჩჷდიხ ჲეს-ჲესინ თჳით ი მე̄რმე მჷმცერი ზურა̄ლ ი ჲედ
Line: 14    ღჳაჟმა̄რე. მა̄ჲთჳა ლეგლირდე ერ ხეზგუნიხ ჲედ ეჩქა̀ გარგლი
Line: 15    მეცარშა̄ლ ლეგმერდე̄ლ. ჟი ი̀ხჳრჲელიხ ეჯ ლეგმერდე̄მი ქორისა
Line: 16    ზურა̄ლაშ ი ღჳაჟმა̄რე̄მი ჯარ ი ხეჭჳდჲელა̄ლხ ლეგმერდას: იმ ლოქ
Line: 17    ხისგდინე ბატო, ქა ლოქ გჳე̄ქარ ნაჲ. ჲედ გუშგჳე ლჷდგარუ ლოქ
Line: 18    ჯეწჳე̄ნიხ ე̄სა ბატო, ნომა ლოქ გჳიჳმი, ბატო. ქა ლოქ ოგჳი̄მბაჳ მაგ.
Line: 19    ჲერხი ლეგმერდე ჟი იბნე გაცხაჲდ ლი̄მბჳის, ალ ლჷდგარუ ლოქ
Line: 20    ლახწჳე̄ნე̄ნახ მიჩ ი ამჟი̄ ამჟი ლოქ ხო̄ქჳახ ეჯჲარს მიჩაშჳდ. ხჳა̄ჲდინ
Line: 21    ამკალიბ მე̄მბჳა̄ლ ლეგმერდე ჩუ იდგარი-ი̀, ხჳა̄ჲდინ ჟი იხჩოვი. ეჩქა̀
Line: 22    ლჷხჩოჳან ხოჩა̄მდ მერდას ხეჭჳდჲელა̄ლხ. მა̄ჲღენ ლოქ ოხსგიდნა მინე
Line: 23    ბედჟი ხოლა̄ ხოჩა, მაგ ქა̄ჳუ ხე̄ქჳ, ნო̄მუ ლოქ ხოჳმი ბატო̄ლუ ლოქ
Line: 24    ჯეჲ. ჟანშგუ̄რი̄ნეხ ეჯ კალიბდ ერე დამაშ ხა̄რ ი ა̄მბჳი სერ ხეხლი მა̄ლე
Line: 25    ა̄ მა̄მა. მეცრალთე̀ ხოშა ნაღალდ მაყალ ერ ე̄სამა ხაშჷ̄დნიხ (ჲედ
Line: 26    კუმში ბერაჳშ ჲედ მა̄რემი ლეგლირდეჳშ ჲედ ხოლა კუმატ ერ ე̄სამა
Line: 27    ეთლაკი ჲედ გეზლურ ლისედდ ხეყლუ̄ნი) ე̀ჩქა ღჷრიხ ი იმჴერა̄ლიხ
Line: 28    მინე თხუმე ამბაჳს, მა̄ჲღენ ლაშედ ე̄მხენ ხე̄რი. ალეს ჩი̄ს მაყალ
Line: 29    ხაჩმუ̄ნნდჳნე, ოდო აშ უმყა̄ლჳა̄ლად ჲერჳა̄ჲ არი, ხოლა ერ დო̄სამა
Line: 30    ხალკე̄ნა ი ჩინოჳშ აშმა̄რ ლი მიჩა ბედიშ, ეჯკალიბარს ეშჲეში̄ მა̄მა
Line: 31    სერდე-მერდე ხა̄რხ დე მეცრალეშ ი დე იშგნე̄მიშ ე̄მშა, მე̄ჳარ ჩუ
Line: 32    ლეტრჷზჷნე ლიხ ი შუას დე̄მშა აჲესხ.

Line: 33       ამკალიბ მაყალჷნქა მუშჳან მა̄რას ხა̄რ ლემყა̄ლჳა̄ლ მე̄რმა-მე̄რმა
Line: 34    სახკაფი ლემყალიშდ: ლახჳს-ი̀ თანაღს ხაყლუ̄ნიხ დალიშდ-ი̀ ალიშდ.


Page: 13 
Line: 1       დალ ლოქ ზურა̄ლა სახდ ხეწჳე̄ნი მა̄რას ი ჩუ ლოქ აქდუნე მიჩაცახან
Line: 2    ი ღო ქა ლოქ იღროჳი ცხეკთე ი ჩუ ლოქ ადა̄ჳშე ღალ ამსჳა̄ლდს. ჩუ
Line: 3    ლოქ ასო̄ყე დალ მა̄რას, ემოშ ლოქ ჩჳაქდუნე მიჩაცახან მეყჳნად.
Line: 4    დო̄რიღოჲ შდაშჳდ ერ ეთწედნი თანაღჟი მა̄რე დალს, ეში̄ ჩუ ისო̄ყი
Line: 5    მაყალაშჳ, ჩუ ერე მო̄დ ეთქადე̄ნს ეჩაცახან. ეში̄ დალი ნაწედჷნღო აგითე
Line: 6    ემოშ ლოხჩიშ ლიჴედს ლუჳარდ, ღო აგის ჩუ ისო̄ყი-ი̀, იბდერ ცხეკთე,
Line: 7    ჩულებემდ ჴედნი თეკჳშ, ოდო ქა ხო̄ზიხ ქორხენ ცხეკთე, ხა̄ტუ̄ლი
Line: 8    ეჟის-ი̀ თე̄რალს ქა̄შტრაჳი, იბდერ ქა ლაჩედდ ყო̄რქა, ტოტარშჳ
Line: 9    ხერეწჳანა̄ლ მჷრა̄მ. ამკალიბ ჩიქა ჴჷდეხ ბაპს ი ნანადი ლოცს
Line: 10    ხაჩმუ̄ნდჳნეხ ი ზეთი ლიჯგრის ფიშირ ბაპარს. ამკალიბ ლეგლირდე

Line: 11       ლენტხე̄ლს ხაზნახ ხოფშირე̄მინ. ლა̄შხს ხოშა ძჳირდ გარ. ღელე-ღულე̄ჲსა
Line: 12    ლოქ იზგეხ ლენტხელ ი ეჯღა ლოქ ხეყრენიხ ხოფშირე̄მინ,
Line: 13    ამჟი ყჷლეხ ლა̄შხარ. დალს აში̄ ჩუ ხა̄ჲმედა ამსჳა̄ლდა ლიდა̄ჳშე, ჟი ლახ
Line: 14    ენუნდუნნე. მეთხჳჲარას ღალ მე̄ჳარ ხაყლუ̄ნიხ დალიშ.

Line: 15       ალ წჷრნი ფერიშ ლოქ ლი. ალ ლახ იკჩი, ჩუ ლოქ აშგჳდი ღალ
Line: 16    ამსჳა̄ლდს. ალ ლოქ მე̄რე̄ლისა არი ჩიგარ. ჟი ლოქ ხერღჳენი ეშხუ
Line: 17    აგის მე̄რე, ეჯის ალ ლოქ ხონჴრი ი ჩუ ლოქ აშხი, მა̄ჲ ლოქ ი̄რი
Line: 18    ჩი̄ს. ალ ხამთქჳა ლა̄შხისა სტა̄რუნი̄ში ზაგარჟი. შომა̄ჲ ჟი ე̄სა
Line: 19    იმე̄რა̄ლ ლახჳარე ზაგრალჟი ლირდეს, ძჳირდ გარ მოშერ აბდაჳი ალი
Line: 20    მაყალშჳ. ალს მე̄რმა ჟახად გირგალაჲს ხაყლეხ. გირგალაჲ ლოქ
Line: 21    ანსიპდა ი ჩუ ლოქ ღო̄თაშდ ოგშიხა̄ლე მაგ, ამჟი ხოხალხ ლი̄ქჳის ალ
Line: 22    ერ იკჩი ეჩქა̀. მეხდ მა̄ ხაყლუ̄ნიხ ეჲჟი, ალდ ერ ხაყლუ̄ნიხ. დალ ი ალ
Line: 23    სურუ ლემყალ ლიხ.

Line: 24       ეჯჲარცახან დე̄სამა ლოქ გაჳა დე ნალჴმაში დე ნამურჯი დე ლიმარგ
Line: 25    ი დე დე̄სამა. ნაჳბედრი ი̄რი̄ ალ ჟენკაჩი ი მა̄რას ხოჲხენი, ამგჳარ
Line: 26    მაჲ აფსა̄თ მა̄რე ლე̄სეს, დეშსამამ მოშ იჩო ი ჩჳაშხი ღალ შიშდ.
Line: 27    ალჲარჷნქა ხაყლუნიხ ცხეკს ი ჳელს ი ღელს მე̄რმა-მე̄რმა სახი ლემყალიშდ.
Line: 28    ალ ლემყალარ ლიხ: და̄ჳარ, თანუშიო̄ლარ, ქჳესროლჲოლარ ი ჭიმკა̄რ.
Line: 29    ალჲარ იზელა̄ლხ ი არიხ ცხეკარისა-ი̀ ღელარისა. ჭიმკა̄რ ლიგე̄რგი̄
Line: 30    თო̄ჲსა გარ არიხ. ჲენურდ მა̄დე.

Line: 31       და̄ჳ ჩინ მაშე̄ნე ლი, ჩინ ხოშა მაბცუან, და̄ჳზუმ ლჷჴმაშ ღერთალეშ
Line: 32    ი ჯგჷრა̄გჷნჩუ დე̄სამა ლოქ არი დეცეშ ი გიმე ნე̄სგა. ტანდი̄
Line: 33    დე̄სამა ლოქ ლი და̄ჳზუმ. ჳიდრობა ხოლა სახიშ ლოქ მჷრ ლი.
Line: 34    ქალიწედ მაყალს ლოქ ხაშდე მა̄რას, მარა̀ ხოჩა̀ ლამარგ მა̄რე დე̄მ
Page: 14  Line: 1    ლოქ იდა̄ჳში ეშჲეში̄ ეჩა ლითხნეჳშ. ციგინისა ამსჳა̄ლდ გმირ მა̄რე̄ლ
Line: 2    ხჳა̄ჲდინ ხაწნე̄ნახ და̄ჳარს, ამირან ხაწი̄ნდა, ბეჟან ხაწიი̄ნდა, ბელხანჯარ
Line: 3    ხაწი̄ნდა ი ფი̄შირ ამკალიბარ, მარა̀ ათხე̀ მა̄რე̄ დეშერ ხობდაჳი
Line: 4    სგა ლითხნეს ი ლიცჳა̄ლს, შიშდ მაყალ ხაშჷ̄დნი ი ჩუ იდა̄ჳში ღალ.
Line: 5    და̄ჳაშჳდ ლადეღჳშ მა̄ ხაყლუ̄ნიხ ეჲჟი, ლე̄თჳშ ერ ხაყლუ̄ნიხ. ხჳაჲ მა̄რე
Line: 6    ხოდა̄ჳშა და̄ჳს ლე̄თჳშ. ხოხალ ლირდე ხოშა ჳიდრობა ამსჳა̄ლდა უ̄ზჳნა
Line: 7    ღელარისა ი ცხეკარისა. და̄ჳარს ლიეხჳ-ლიჭაშ ლოქ ხა̄რხ, იმჟი̄
Line: 8    ამსჳა̄ლდს, ეჯჟი.

Line: 9       თანუშჲაჲ და̄ჳ ლი, მარა̀ ზურა̄ლ და̄ჳ ლი. ტანდ ხოხრა ლი თანუშჲაჲ
Line: 10    და̄ჳაშდ. ხოჩა̀ ლამარგ მა̄რე ჟი იმარგ, თანუშჲაჲს ერ ლახხჳი̄დეს
Line: 11    ჩუ დე̄მ იდა̄ჳში ლამარგ მახე ღჳაჟ ეჩა ლიხჳჲეჳშ. აშ მეთხჳჲარას
Line: 12    ერ ლეხჭოდდე̀, ფი̄შირს ლოქ ჩუ ხოწჳახ მინს თანუშჲაჲ ლე̄თჳშ ქა̄მ
Line: 13    ქჳაბისა ლალგენჟი.

Line: 14       ქჳესროლჲაჲ ხოხრა უდ ლი თანუშჲა̄ჲშდ ტანდ. ზჷმჳშ ჭიმკაჲდ
Line: 15    ხოშულე̄ლ ლოქ ლი. ქჳესროლჲაჲს ხამთქჳა ბეჩარე ლიფე̄შჳდანა̄ლ
Line: 16    ღელარქა ლა̄ზ-ლაჩედჟი ი კოჯარქა შუკს ლა̄ზჟი. ლეგჳე̄რალისა
Line: 17    მეგნა მულგჳე̄რა̄ლას ლოქ ფი̄შირს ხოწჳახ ქჳესროლჲაჲ. ლეგჳე̄რი
Line: 18    ლჷყა̄რთეჟი ხოხალ ბეჩრე ლიფშჳდან-ი̀ ლიყა̄ლჳე მა̄რე̄მიშ. ქჳესროლჲაჲ
Line: 19    ჩუ დეშ ადა̄ჳშე მა̄რას, დემოშ ლოქ ჟი ხაწრე მა̄რას, მარა̀ აშ
Line: 20    ლიყა̄ლჳე გარ ლოქ ხამთქჳა მა̄რე̄მიშ. ქჳესროლჲაჲდ ძჳირდ გარ
Line: 21    ხაყლუ̄ნიხ ლამარგ ღჳაჟარს, იმედ ხა̄რხ ჟი ლიწნე̄მიშ.

Line: 22       ჭიმკა̄რ თელდ კოჭო̄ლუ̄ლარ ლოქ ლიხ. ეჯჲარ ფიშირ ლო
Line: 23    ხეჭჳა̄დიხ მა̄რას, ოდო ჲერუ, სემი დეშსამამ ლოქ ხეჩოხ მა̄რას, მარა̀
Line: 24    ფიშირს ლოქ ხოხალხ ეშხუდ ლირდე, აშირს, ჲერუ აშირს ეშხუდ.
Line: 25    ლემესი̄ლარე ლიჭკი̄ჳი̄ნე ხამთქჳახ მჷჭკი̄ჳო̄ლშა̄ლ. ჭიმკა̄რ ლიგე̄რგი̄
Line: 26    თო̄ჲსა არიხ ი ეჯ თო̄ჲს საშიშ ხა̄ჲშხა ჟახად. ლე̄თჳშ მე̄ჳარ
Line: 27    ხაყლუ̄ნიხ შუკს ლი̄ზი, ჭიმკა̄რ ლოქ ემჭჳა̄დიხ. აშ ეშხუ ი ჲერუ ჭიმკაჲდ
Line: 28    და̄ს ხაყლუ̄ნი, მარა̄ ფიშირ ლიხ ეშხუდ-ი̀ ჲერხი ლოქ ჟი ხეცჳიხ
Line: 29    შიყჟი, ჲერხი ბარჯა̄ლთეჟი ლოქ ხეგნიხ, ჲერხი მეჴრა̄ლ ლექჳა ლოქ
Line: 30    ხონჴრიხ ლოქ მა̄რას ამჟი, ჳოდ ჩუ დო აბჭკჳეხ მინე ნაქაფ. ხჳა̄ჲ ა̄მბჳი
Line: 31    გუშგჳეურა ერე მიჩ ლოქ ჩა̄ჟთეჟი ლახთქებნე̄ნახ ჭიმკა̄რ-ი̀ აგინუნ
Line: 32    ახჷნჴერნე̄ნახ. ლიგე̄რგი̄ თო̄ჲსა ქა̄მ მეფშჳდე ჩა̄რს ერ ფაფალ ხეძჷრხანი
Line: 33    უშხჳა̄რთე ეჲჟი ერე ჩუ დეშ ფხჷჟე მა̄რე ძღჷდ გარჯულ, ეჯი
Line: 34    ჭიმკა̄რე ნასდუგ ლოქ ლი. ჩა̄რს ჩუ ლოქ ბუჭკჳეხ ნაჭმუ̄ნდჳნა̄ლ
Page: 15  Line: 1    ლე̄თჳშ. იმე̄ჲ ჭიმკა̄რ ხასდგომახ ლე̄თჳშ, ეჩხენ მჷჭკამე̄ლარშა̄ლ აჭკი̄ჳი̄ნეხ
Line: 2    ი ეჩქა̀ ყჷლეხ ერე ეჩეჩუ ლოქ ჭიმკა̄რ არიხ. ეშხუ ლე̄თ ლიგე̄რგი̄
Line: 3    თო̄ჲსა საშშობა ქალი̄ზა̄ლს ხაყლეხ. ეჯ ლე̄თ ხეკჳეს ედქარჳე̄ნდეხ მაგ
Line: 4    ჭიმკა̄რ. კოჯს ლოქ-ე̀ აშჷ̄დნიხ ჭიმკა̄რ, ღო დარობ ლოქ ი̄რი ჳო̄ბა
Line: 5    ხანს-ი̀ ლიცთე ლოქ-ე̀ აშჷ̄დნიხ, ღო აჳდრობ ლოქ ხეჭყრი მეჲად ქა
Line: 6    ლიგე̄რგი̄ თო̄ჲსა. ამჟი ნასჷმ იჳასჷნღო გუშგჳემჷყ ხაჯრაჳახ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.