TITUS
Svan (Lashx) Texts ed. A. Oniani
Part No. 3
Previous part

Text: 3 
Page: 5 
Line: 7 
III. ლა̄შგ-ლაყე̄ლა̄ სახმახარ ლა̄შხისა.


Line: 8       მჷლა̄შხს ფურ ჲედ ეშხუჲ ჲედ ხოფშირა ჩი̄ს ჩუ ხორი. მაგ ეჩა
Line: 9    მოთჲა̄ლ ლი ერე ხოფშირა ფურალ ედურდუნას მოშ მიჩა ქორისა. ნენი
Line: 10    აგი̄ დაბრეშ ედოშ ხა̄რ, ღო ღალ ლახჳარხენ ითჲა̄ლჲელ. აჭმე ლახჳს,
Line: 11    ჩუ მასარდ ითხი ლეჭმე, მარა̀ ლიჴდე ღალ ლი გარჯ ეჩხენ. სურუ
Line: 12    ჯო̄დჲა ლეჴდე ლი, ოდო ჭემ ლუ̄ლხუ ჩი ჭემს ხოჩა კუმში ლე̄მნად
Line: 13    ლუნთისა. ჳოდ ლა̄შგ ლაყე̄ლა ჟი ხებნიხ, ზურა̄ლე̄ლს ეჩქა̀დ ძღჷდ დო̄სგნეშ
Line: 14    ხემა̄რა̄ლხ ეჩა გჳეშარს. ჩიქე ლუნთისა ლაძჲე̄ლს ერ აძჲენა̄ლიხ. ეჩა
Line: 15    მაჭკარს აჯმიხ ჩუ, ქა ხორკინეხ ცხჳენს ლეფრად ი ჩუ ხუღჳახ ამჟი
Line: 16    ქალჷრკინე ჳოდ თამფჲერალნუნ. მაჭიკს ჩი̄მიშს იჴმარიხ ლალდჷ̄რთე
Line: 17    ლედე̄სდ, ხამიშს, ნეღეშტიშს, ღუნიშს, ფურიშსი̄ ჩუ ხაყა. მაჭიკჷნქა ლორი
Line: 18    ჯიჯჳარს ახჳრჲელა̄ლიხ ი იშხჳნიხ ზურა̄ლე̄ლ. მაჩე̄ნე ხაბჟახ ღუნი
Line: 19    მაჭიკ, ეჩე̄ჲსა ლჷჴ ლოქ არი̄, ეჯღა ხოცხახ ლჷლჷჴ მაჭიკ. შომა̄ჲ
Line: 20    ლუნთისა ლიმზჷრ ე̄სა ჩუ ლი, ჩიგარ ხეჴჷ̄რა̄ლხ ღერთალს ერე ლაშგ-ლაყე̄ლა
Line: 21    ლოქ ოგღუ̄ზ ჩუ, მადილ ლოქ ჯე̄რი მადილშ გოში ღერთალ.
Line: 22    თამფა სგობნე მი̄შს ხოშა თამფა მი̄შს ხაყლეხ. ეჯ ნაგზაჲსა ერ
Line: 23    ხოშა ცა̄შ ჴედნი, ეჩქა̀ ლირჳალთე ნაღალდ მე̄ჳარ დო̄სგ იგნა̄ლხ
Line: 24    ზურა̄ლე̄ლ ი ეშხუ მჷ̄შგ-მჷყე̄ლე ზურა̄ლ, ხედი̄ ი̄რი, ადინე ჩუ მე̄ზი
Line: 25    ლიცთე, ლა̄შხარ ლა̄შხურთე ჩუ ღჷრიხ. ლიცე პილჟი რიყისა
Line: 26    უშკჳს ლეჟა იჩოხ მჷ̄შგ-მჷყე̄ლე ზურა̄ლე̄ლ ი ამჟი ლე̄ქჳნეხ: ალ ლა̄შხურ
Line: 27    ლოქ ერ დო̄სა იშჳში ჩუ ი̀ვა ლადეღ, ეჩა ნაზუმსერ გუშგჳე
Line: 28    ლა̄შგ-ლაყე̄ლა ლოქ ნომა ათშუშა ბატო ლოქ ღერთალ. მჷდღჷრჲალი
Line: 29    ლა̄შგ-ლაყე̄ლაუ ლოქ გჳა̄რ ალზა̄ჲსა ნაჲ. ქა ალ ამბაჳს გარ ლე̄ქჳნეხ ლიცე
Line: 30    პილჟი, სერ მა̄ შიდ გარგლა. ძინარს ერ ენგენო̄ლხ, ეჩქაი̄ მა̄ შიდ
Line: 31    გარგლა, ქა ხეკჳეს დო̄სა ენშდაჲე̄ნდეს ი ეჯჟი ხეკჳეს აჩეს ჩუ უშკუბარდ
Line: 32    ლიცე პილთეჟი, დე უშხჳა̄რ ხაგჷრგალიხ უშკუბარ ზურა̄ლე̄ლ, ოდო ჩუ̄ბ
Page: 6  Line: 1    ლიცჟი ფი̄შირ ზურა̄ლ ხეთხნი უშხჳა̄რ. მარა̀ უშხჳა̄რე ქა ლიშდა̄ლ
Line: 2    მა̄შიდ. ჲედ ქორა-მა̄რე ერ ლახხჳი̄დეს, ეჩქა̀ უშკუბარ ზურა̄ლს ჲედ
Line: 3    ნაქა̄მ ჲედ გზა̄ჳრ, ქა ეში̄ და̄ს ხეშდა̄ლხ ამგჳარ, მა̄ჲ ლესეს ეში̄. რიყისა
Line: 4    ენფა̄ნდნეხ თჳეთჳნა მუქოხს, ხა̄ლ ხონგრა ი̄რი ეჯი ხოცხახ ერე ამშაშზუმ
Line: 5    ლა̄შგ-ლაყე̄ლაჟი̄ნ ქიჳარ ლოქუ ოხყე̄ლახ მინს. ხა̄ლ მოშ ძღჷჲდ
Line: 6    ირი გრო̄ნჭა თჳეთჳნე მუქოხ, ღო ეჯზუმს ახღელიხ ძღჷდ ქიჳსი̄, ჟი
Line: 7    ჴჷდეხ მუქოხს, ხოშა გრო̄ნჭას თჳეთჳნა ფერიშს-ი̀ სგა̄ნჴდეხ-ი̀
Line: 8    ჩჳესდე̄სხ ბუჯერჟი, ა̄მჟი აჯაღუდ უშკუბარდ ქაუშდა̄ლად. ჲერჳა̄ჲდ ლოქ
Line: 9    გუშგჳე ლა̄შგ-ლაყე̄ლას ხოლა თეჳშ ლახსინჯჳას ჲედ ლოქ გუშგჳეჳ
Line: 10    ლახშო̄ნდეს ხოშა-ხოშა ქიჳარ, ეჯის ლოქ ალ ხოშა თჳეთჳნე გრო̄ნჭა
Line: 11    მუქოხუ ლოქ ოთუნტყჳა ჩუ ერე გუშგჳე ლა̄შგ-ლაყე̄ლს დოშმა ლოქ
Line: 12    ხოშურას ეჩა თედ ი აყბად ი მუქოხს გარ ესა̄გე̄ნდეს ეჩა შდიქარ
Line: 13    მუშჳრჲად. ქორთე ერ ანჴდეხ თჳეთჳნა მუქჳხარს, ჲერხის ქა̄მხენისა
Line: 14    ყო̄რა თხუმჟი ესდე̄სხ, ჲერხის კალისა̄ ი კარპანისა̄ ერე ხოლა თე̄`ჲაყბა̀
Line: 15    მუქჳხარს ლოქ ლეხგენი̄, ნაჲ ლოქ დეშმამ გჳიშჳრინე ი დემოშ
Line: 16    ლა̄შგ-ლაყე̄ლს მოშსა̄მამ ხოშჳრინე ხოლა თე̄`ჲაყბა. ამჷნქა ჲერხის
Line: 17    ფურალეშდ სგა ხო̄ბხ მუჭჳამჷყ ლჷმზჷრე ნათჳალყხენ კოჭო̄ლუ̄ლ
Line: 18    თელდ მუქოხი̄ლ, ეჯის ქა̄მენქა ჳიჯი გარჳა̄შა ხაჭო̄ნა. ჳიჯი გარჳა̄შას
Line: 19    ჲერხი ჳიჯი ფატანს ხაყლეხ. მუქოხი̄ლ-ი̀ ჳიჯე გარჳა̄შა ხაჭო̄ნა̄ხ
Line: 20    ტუფუ̄ლისა ი ქალჷშხებ ლი ტუფუ̄ლ ქა̄მენქა. ეჯის ხაბ თასმო̄ლ ი ჲედ
Line: 21    ბჷგი ნეცინ თეკუ̄ლი̄ლ ი სგა ხა̄ბ მუჭჳარს ეჩჟი ერე ტუფუ̄ლისა
Line: 22    ლჷჭონო̄ლარ სგობინ ნიგბალექჳა ხოწებეს მანკჳი̄ ლაწედდ ერე თე̄`ჲაყბა
Line: 23    ფურს მო̄ ხოჲეხეს ი მანკჳი̄ ჩულჷწებ ლჷმზჷრას ხოჲეხეს. ალეს ხა̄ჲშხა
Line: 24    ჩუ ლჷრკინას ცინციბურ. ამკალიბე̄ლარს ხოჩა ჴანარსი̄ ხაბემხ. ლეკჳებ
Line: 25    ერ ი̄რი ეშთა̄ნ ერე თე̄ჲაყბა ხოშრუნი. ჩა̄ჟსი̄ ხაბემხ ამკალიბე̄ლს.
Line: 26    ხჳა̄ჲდინ ამსჳა̄ლდს ხა̄ბ ხოშა ნაღალდ ლიბობშჟი ი ხოფშირე̄მინ
Line: 27    ზურა̄ლე̄ლს. ხოლა̄მ დე მანგერს ხაბემხ ი დე ჩა̄ჟს ი დე ამსჳა̄ლდს.
Line: 28    ხოლა̄მ ლოქ მა̄ ხეგნი თე̄ჲაყბა ი დეთა̄ჲ ლოქ ე̄სა̄მა ხოშჳრი. თე̄ჲაყბა
Line: 29    სურუ მე̄ჳარ ხანწამ ჩი̄ს ლა̄შხს მა̄დე ი, თელდ ლემშჳანჲერა̄ჲსა. ხეჩდა
Line: 30    ლოქ ეჩთა̄ნ თე ერე ხოჩა მე̄ზი ჩა̄ჟს შიშდ ლოქ ჩჳაჩრაჳი, ბა̄ჴს ლოქ
Line: 31    დეშ იგემ დე სგობდ ი დე ღოშდ, ჲერხის ლოქ ეჩთა̄ნ მუქჳცია̄ნ თე
Line: 32    ხა̄რ. ფი̄შირს იშჷლდანიხ ჩი სოფელისა მა̄რას ი ზურა̄ლსი̄, ალეს ლოქ
Line: 33    გჳეფი თე ხა̄რ ი მე̄ჳარ ხოკჳიბხ შუკჳისა ლიხჳჲეს ეჯკალიბარეშს. ქა
Line: 34    ცხაჲ დე̄სა ხაწჳენეხ ხოჩა ქუნლჷმგენას ეჯჲარს, მარა̀ აშ ლახ ლეხხჳიხ
Page: 7  Line: 1    უმბულდ შუკჟი ჲედ ქორთე ლეხჳე̄დუნი მა̄ლა გჳეშჟი, ეჩა მეჩდან
Line: 2    ხატბჷნეხ ეჯის, ფუჰ მუქოხს ლოქ ისგჳი თე. მუქჳხარს ლოქ ესაგ
Line: 3    ი ხეჳუ̄რის ლოქ ეჯჲარს გუშგჳე უშჳრა უდა̄ჳშად. ქა̄მ ჲეზჳისა
Line: 4    ძჳირდ გარ ე̄სა ი̄შგიხ ფურალს, ქა ლოქ დორ ხეწეს ნა̄შგეჲს
Line: 5    სეგდა̄ჲსა ი დო̄სა ლოქ ხოშურის გორა. ლა̄შგს ერ ე̄სა ლახთერხ ერე
Line: 6    ნაკჳიდ ი̄რი, ძღჷდს დოშ ი̄შგჷნიხ ფურალ, არგებს ხოლა ლაჩეხი ტარ
Line: 7    ე̄სა ლე̄სეს ეჯი, მარა̀ ზურა̄ლე̄ლ შიშდ თეს ი აყბას ხაბრალიხ ი ყჷლეხ
Line: 8    ერე ეჲ დედე გორე̄ლარ, ემგჷგნეხ ლოქ საბრა ფურო̄ლარ ი მაჲ ლოქ
Line: 9    მეშდენი სერ, იტბჷნა̄ლხ სერ ეჩქა̀: ფუჲ ლოქ გჳეფს ი მიჩა ფურო̄ლარე
Line: 10    მეშო̄ნა̄ლს ი მჷგგჷნას ხოშა მუქჳხარ შდიქარისა ი თე̄რალისა ლოქ
Line: 11    ჲელჲა ლემეს. მიჩა ნა̄შგი-ნაყე̄ლი მეშო̄ნა̄ლს ი ხოლა თეჟი მჷსგდის
Line: 12    ჲელჲა ლემეს ლოქ თე̄რალისა; ენთხე̄ლნეხ მჷმზჷრალის ი ხე̄რიხ უქჳიცად
Line: 13    ცა̄ქჳა-მა̄ქჳა სერ ამ ბედჟი̄ ი ლიმზჷრა̄ლი. ერ ი̄შგიხ ფურალს, ეჩქა̀
Line: 14    ნაქა̄მ მა̄დე ი ქორს მერდეჲ, მამ ხოცხახ ქამეწედდ ნა̄შგიშ, დო̄სა ლოქ
Line: 15    ლახშო̄ნდეს ნა̄შგ ი დო̄სა ლოქ ადგჷგნას ფურალ, ლაპეჟჳ აგითე არკალიხ
Line: 16    ფურალს ი ეჩეჩუ ი̄შგიხ. ჩულჷ̄შგჷნღო კალთაჲს ესლაფრიხ სეგდას
Line: 17    ი ეჯჟი ადჲესხ სგა ქორთე, დოშერ ლოქ ხეწეს ნა̄შგს დო ქორაშ ი
Line: 18    დო ნაქა̄მ მჷ̄შგა̄ლინქა იშგენ. ნა̄შგს ლაპეჟჳ აგის სგე̄სგოშნეხ სეგდახენ
Line: 19    ცხჳადთე ი ანჴდეხ ლალდჷ̄რს, სგე̄სგოშნეხ ეჩხენქა ნაჳდინუნს ი ამჟი
Line: 20    სერ ჩულუჳდინე ლი, დჷ̄რ სგა ხა̄რ ლჷჯას ი ჩჳესგემხ ლემსგა პილს ჩუ
Line: 21    ლჷლფარს, ქა ლოქ დო̄რდ ლახსინჯჳას ი ეჩჷნღო ჟენყე̄ლნეხ-ჟენი̄ყნეხ
Line: 22    თაშს ი სგე̄სდე̄სხ ლჷყე̄ლას სერ ზერდო̄ლთე̄ჲსა. ზე̄რდო̄ლ შდიხჷ̄ნდი
Line: 23    კჳედლი ტკიცარხენქა ისყი ი ეჩე̄ჲსა ჩუ ინწჷ̄რდი თაშ ი ნებჳზა პილთე
Line: 24    ქე̄ნკედხ, ეჩხენქა ი სგე̄სდე̄სხ შიგელთე̄ჲსა. ითჲალხ ერე შომა̄ჲ ლა̄შგ-ლაყე̄ლა̄
Line: 25    გჳეშარს ხაშდბახ ჲედ თაშო̄რას ხეფდა̄ლხ მინეშჷნქა (მოშდაბჷნქა),
Line: 26    დოშერ ხეწეს, მა̄ ხოცხახ ფიშირ თე̄მი ლითხპინე ამკალიბარე
Line: 27    ლაშდაბჟი. ქიჳი ლიწედი̄ მა̄ ხოცხახ მე̄რმახენქა. ეშხუ ღჳე̄ნთი̄ლ
Line: 28    ხეკჳეს მო̄დ ოთბჷ̄დეხ, ეჩჟი. მეკჳბად არიხ ლა̄შგ-ლაყე̄ლჟი, ოდო შიშდ
Line: 29    ლოქ ჩუ იშჳშიხ, ეჩქა̀ ფურო̄ლარ გორა ჲედ თაში ნაფიცხუ̄ლ ერ ე̄სა
Line: 30    ოთშყეხ, ეჯისი̄ ფურო̄ლარე ლიშჳშე ლოქ ხოხალ გორა. ჯიმაშ, ჳობიშ
Line: 31    თაშო̄რა̄ ლიქთუნე მა̄ შიდ. ფურალს ლოქ ხოჴდენი ხოლა̄მდ. მარხჳი
Line: 32    ბედშჳ დე̄მ იჩოხ ალეს, ლეღჳო̄რას იზბიხ მახჲადა̄რ ჯიმაშ, ჳობიშ,
Line: 33    მარა̀ თაშო̄რა̄ ლიფდა̄ლ ფურალეშდ ლოქ მა̄შიდ საბრა ი ეჯღა ლი ჟი
Line: 34    ლჷკაბ ჯიმაშ, ჳობიშ თაშო̄რა̄ ლიფდა̄ლ, დე მუშგჳრის ხა̄მნეხ, ამგჳარ
Page: 8  Line: 1    მა̄ჲ ლე̄სს ი დე მასძელს. თაშდ ქა ჳოდის ლჷჯმარას ი ლჷჯად ლიჳდი
Line: 2    მე̄ჳარ ხამჭირხ. ათხად ჲადურდ და̄რ ჳოდდა ლჷჯას, მანათ ერ ლეჯჳოდე̄ნ
Line: 3    ეშხუ ბოთლისა ეში̄, მარა̀ ათხე სგა ხემთქჳა̄ლხ ლექჳა̄ ლა̄შხარ ი ქა
Line: 4    ჳოდიხ, მარა̀ სურუ ძჳირდ ჳოდიხ. მა̄ შიდჷ̄ნ ათხად ლოქ ქორხენქა
Line: 5    ლიჲეს ლჷჯად, მარა̀ ათხე̀ ქა ქა ხა̄ჳდიხ, მარა̀ ძღჷდ მამჭირშჳ. ერ
Line: 6    ხეღჳჭარა̄ლხ ძღჷდ, მამჭირჳა̄ლდ იქთუნა̄ლხ ზურა̄ლე̄ლ ლჷჯე̄მი ლაჳოდთე,
Line: 7    მამჭირ ლოქ გორა ლჷჯო̄ლა ლიჳდი, მარა̀ მაჲ ლოქ ჩომნა, სურუ მჷწჷხ
Line: 8    ლოქ ხა̄რ გორა თეთრი̄ლაშ-ი̀ ეჯღა ლოქ ხელი̄ ქა ლჷჯას, ოდო აშ
Line: 9    ლოქ ჲარ ლეხლი̄ საბრა ლჷჯას ლეჳდიდ. ამჟი გარგლა ხაზნახ ზურა̄ლე̄ლს
Line: 10    ლჷჯე̄მიშ ი თაშო̄რა̄ ლაღჳჭარა̄ლჟი. ეშხუ აბაზდ ერ ლჷჯმარას
Line: 11    ჳოდიხ, ეჯის ჳო̄შთხჳ, ჳოხუშდ ბოთ ლჷჯე ჟი ხაკუჩ ი ლჷჯე ეშხუ ბოთ
Line: 12    ბაც მა̄მა ლი ერე აბზურ ქა ლაჯო̄მახ. ეჩა ანგარიშ დეშ ხოხალხ ერე
Line: 13    აბზიან ლჷჯმარას ჳოხუშდ ბოთ ლჷჯე ხაწჷხ-ი̀ ეში̄ აბაზდ ჳოდიხ ეჯ
Line: 14    ლჷჯმარას. ლუფხჳისა ფურალს ლახჳთე აჲესხ ი ლა̄შგ-ლაყე̄ლი̄ ეჩე ხა̄რხ
Line: 15    მესყე ზურა̄ლე̄ლს. ხჳაჲდინ აჲესხ ნამზჷრუნდ თაშს ი ანყეხ კოჭო̄ლ
Line: 16    ტაბლე̄ლარს ი ჟი ხამზჷრიხ ფურალხენ ლახჳა ზაგარჟი იმჳა̄ლე, იმე̄ჲ
Line: 17    ლჷგად ხე̄რიხ ლიმზერი ლიჩომ. ტაბლე̄ლარსი̄ ეჩეჩუ ანყა̄ლიხ. კალაკონს
Line: 18    იგემხ ზურა̄ლე̄ლ ი ეჩეჟი ირბიელხ ტაბლე̄ლარს თაშა̄რილარს.
Line: 19    ამგჳარ მა̄ჲ ძღჷდ ლა̄შგობ ხა̄დეხ, ქა ეში̄ დე̄მ აჳშხიხ ხოჩა
Line: 20    ლა̄შგობს იშგნაცახან, თედ, ლოქ, დო̄სა ადგჷგნახ ფურალ ი ლა̄შგემ
Line: 21    ლოქ დო̄სა ედკუდის ჩუ. ერ ლეხჭოდნიხ ღჳაჟარ ერე ჯიყე̄ლა ლოქ
Line: 22    ე̄სა ჩიქე, ზურა̄ლე̄ლ ხექჳნეხ ერე ჩუ ლოქ ოთჳოდინ, ხიად,
Line: 23    ცჳარილო̄ლ ი ჟი ლოქ ოხყე̄ლ, ხიად.

Line: 24       ამჟი ლი ლა̄შხისა ლა̄შგ-ლაყე̄ლი სახმახარ ი წესარ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.