TITUS
Vetus testamentum iberice: Exodus (rec. AK)
Part No. 5
Previous part

Chapter: 5 
თავი V


Verse: 1  Link to oskijerLink to mcatLink to sept   და ამისა შემდგომად შევიდეს მოსე და აჰრონ და ჰრქუეს ფარაოს: ამას იტყჳს უფალი ღმერთი ისრაელისა: გამოავლინე ერი ჩემი, რათა მსახურებდენ მე უდაბნოსა ზედა.

Verse: 2  Link to oskijerLink to mcatLink to sept   და ჰრქუა ფარაო: ვინ არს, რომლისა ვისმინო ჴმისა მისისა, ვითარმედ განუტევე ძენი ისრაელისანი? არა ვიცი უფალი, არცა განუტეო ისრაელი.

Verse: 3  Link to oskijerLink to mcatLink to sept   და ჰრქუეს მას: ღმერთი ებრაელთა მიწესს ჩუენ, განვიდეთ გზასა სამისა დღისასა უდაბნოდ, რათა მსხუერპლი შევწიროთ უფლისა ღმრთისა ჩუენისა, ნუუკუე შემემთხჳოს ჩუენ სიკუდილი, გინა მახჳლი.

Verse: 4  Link to oskijerLink to mcatLink to sept   ჰრქუა მათ მეფემან ეგჳპტისამან: რასათჳს თქუენ, მოსე და აჰრონ, გარდააქცევთ ერსა საქმისაგან მათისა? წარვედით კაცად-კაცადი თქუენი საქმესა თჳსსა.

Verse: 5  Link to oskijerLink to mcatLink to sept   და თქუა ფარაო: აჰა ესერა, აწ განმრავლებულ არს ერი ესე ქუეყანისა. არღარა შეუნდოთ მათ საქმისა მისგან.

Verse: 6  Link to oskijerLink to mcatLink to sept   და უბრძანა ფარაო მას დღესა შინა საქმის მაწუეველთა მათ ერისათა და მწიგნობართა და ჰრქუა:

Verse: 7  Link to oskijerLink to mcatLink to sept   ნუღარა შესძინებთ ცემად ბზესა ალიზისა საქმედ რად, ვითარცა გუშინ და ძუღან. იგინი წარვიდედ და შეიკრიბედ თავისა თჳსისა ბზე.

Verse: 8  Link to oskijerLink to mcatLink to sept   და ბრძანებული იგი ალიზი, რომელსა იქმან დღითი-დღედ, იგივე დასდევით მათ, ნუმცა რას დააკლებე; რამეთუ სცალს და ამისთჳს ღაღადებენ და იტყჳან: განვიდეთ და შევწიროთ უფლისა ღმრთისა ჩუენისა.

Verse: 9  Link to oskijerLink to mcatLink to sept   დაუმძიმდინ საქმე კაცთა ამათ და მას ზრუნვიდენ, და ნუ ზრუნევდ სიტყუასა ცუდსა.

Verse: 10  Link to oskijerLink to mcatLink to sept   ასწრაფდეს მათ საქმის მაწუეველნი იგი ერისანი და მწიგნობარნი იგი და ეტყოდეს: ამას იტყჳს ფარაო: არღარა გცემ თქუენ ბზესა.

Verse: 11  Link to oskijerLink to mcatLink to sept   წარვედით თქუენ და შეკრიბეთ ბზე, სადაცა ჰპოოთ და არარაჲ დააკლოთ თქუენ დაწესებულსა მას არცაღა ერთ.

Verse: 12  Link to oskijerLink to mcatLink to sept   და განიბნია ერი იგი ყოველსა ქუეყანასა ეგჳპტისასა შეკრებად წუელისა ბზედ.

Verse: 13  Link to oskijerLink to mcatLink to sept   ხოლო საქმის მ[ა]წუეველნი იგი ასწრაფებდეს მათ და ეტყოდეს: აღასრულეთ საქმე დაწესებული თქუენი დღითი-დღედ, ვითარცა-იგი რაჟამს ბზე გეცემებოდა თქუენ.

Verse: 14  Link to oskijerLink to mcatLink to sept   და იტანჯნენ მწიგნობარნი იგი ნათესავისა მის ძეთა ისრაელისათანი, რომელნი-იგი დაედგინნეს მათ ზედა ზედამდგომელთა მათ ფარაოს თანა და ეტყოდეს: რასათჳს არა აღასრულეთ დაწესებული იგი ალიზისა საქმე თქუენი გუშინდელისა და ძუღანდელისა დღისა დღესცა ეგრევე?

Verse: 15  Link to oskijerLink to mcatLink to sept   შევიდეს მწიგნობარნი იგი ძეთა ისრაელისათანი, ღაღადებდეს წინაშე ფარაოსა და იტყოდეს: რასათჳს ესრეთ უყოფ მონათა შენთა?

Verse: 16  Link to oskijerLink to mcatLink to sept   ბზესა არა გუცემენ მონათა შენთა და ალიზსა მასვე გუეტყჳან საქმედ? და აჰა ესერა, მონანი შენნი ტანჯულ არიან; ავნებ ეგრე ერსა შენსა.

Verse: 17  Link to oskijerLink to mcatLink to sept   ჰრქუა მათ ფარაო: გცალს, მოცალე ხართ და მისთჳს იტყჳთ: განვიდეთ და ვჰმსახუროთ უფალსა ღმერთსა ჩუენსა.

Verse: 18  Link to oskijerLink to mcatLink to sept   აწ უკუე წარვედით და იქმოდეთ. ხოლო ბზე არა გეცეს თქუენ და დაწესებული იგი ალიზი მოსცეთ.

Verse: 19  Link to oskijerLink to mcatLink to sept   ვითარცა აღიხილნეს თავნი თჳსნი მწიგნობართა მათ ძეთა ისრაელისათა, რამეთუ ბოროტსა შინა არიან, ვითარ-იგი ეტყოდეს, ვითარმედ: არა დააკლოთ თქუენ განწესებულსა მას მდღევარსა.

Verse: 20  Link to oskijerLink to mcatLink to sept   და შეემთხჳნეს მოსეს და არონს, მო-რა-ვიდოდეს მათა, ვითარ-იგი გამო-ოდენ-ვიდოდეს ფარაოსგან.

Verse: 21  Link to oskijerLink to mcatLink to sept   და ჰრქუეს მათ: იხილენ ღმერთმან თქუენი და საჯენ, რამეთუ საძაგელ ჰქმენით სულნელება ჩუენი წინაშე ფარაოსა და წინაშე მსახურთა მისთა მიცემად მახჳლი ჴელთა მისთა და მოკლვად ჩუენდა.

Verse: 22  Link to oskijerLink to mcatLink to sept   მოიქცა მოსე უფლისა და ჰრქუა: უფალო, რასათჳს განაბოროტე ერი ესე, რასა მომავლინე მე?

Verse: 23  Link to oskijerLink to mcatLink to sept   და ვინათგან შევედ მე ფარაოსა სიტყუად სახელითა შენითა, ბოროტსა უყოფს ერსა შენსა, და არა იჴსენ ერი შენი.



Next part


This text is part of the TITUS edition of Vetus testamentum iberice: Exodus (rec. AK).

Copyright TITUS Project, Frankfurt a/M, 19.11.2023. No parts of this document may be republished in any form without prior permission by the copyright holder.