a) Accented text:

रो॑हण्यसि॒ रो॑हण्य॒स्थ्नश्छि॒न्नस्य॒ रो॑हणी । रो॒हये॒दम॑रुन्धति ॥१॥
यत्ते॑ रि॒ष्टं यत्ते॑ द्यु॒त्तमस्ति॒ पेष्ट्रं॑ त आ॒त्मनि॑ ।
धा॒ता तद्भ॒द्रया॒ पुनः॒ सं द॑ध॒त्प॑रुषा प॑रुः ॥२॥
सं ते॑ म॒ज्जा मज्ज्ञा भ॑वतु॒ समु॑ ते॒ प॑रुषा॒ प॑रुः ।
सं ते॑ मां॒सस्य॒ विस्र॑स्तं॒ समस्थ्यपि॑ रोहतु ॥३॥
म॒ज्जा म॒ज्ज्ञा सं धी॑यतां॒ चर्म॑णा॒ चर्म॑ रोहतु ।
अमृ॑क्ते॒ अस्थि॑ रोहतु मां॒सं मां॒सेन॑ रोहतु ॥४॥
लोम॒ लोम्ना॒ सं क॑ल्पया त्व॒चा सं क॑ल्पया त्वच॑म् ।
अमृ॑क्ते॒ अस्थि॑ रोहतु छि॒नं सं धे॑ह्योषधे ॥५॥
स उक्ति॑ष्ट॒ प्रेहि॒ प्र द्र॑व॒ रथः॒ सुच॒क्रः सुप॒विः । सु॒नाभिः प्रति॑ तिष्ठोर्ध्वः ॥६॥
यदि॑ कर्तं प॑ति॒त्वा सं॑श॒श्रे यदि॒ वाश्मा॒ प्र॑हृतो ज॒घान॑ ।
ऋ॒भू रथ॑स्ये॒वाङ्गा॑नि॒ सं द॑ध॒त्प॑रुषा॒ प॑रुः ॥७॥

b) Transcription:

róhaṇy asi róhaṇy	asthnáś chinnásya róhaṇī	roháyedám arundhati
yát te riṣṭáṃ yát te dyuttám		ásti péṣṭraṃ ta ātmáni
dhātā́ tád bhadráyā púnaḥ		sáṃ dadhat páruṣā páruḥ
sáṃ te majjā́ majjñā́ bhavatu		sám u te páruṣā páruḥ
sáṃ te māṃsásya vísrastaṃ		sám ásthy ápi rohatu
majjā́ majjñā́ sáṃ dhīyatāṃ		cármaṇā cárma rohatu
ásṛk te ásthi rohatu		māṃsáṃ māṃséna rohatu
lóma lómnā sáṃ kalpayā		tvacā́ sáṃ kalpáyā tvácaṃ
ásṛk te ásthi rohatu		chinnáṃ sáṃ dhehy oṣadhe
sá úttiṣṭha préhi prá drava	ráthaḥ sucakráḥ supavíḥ	sunā́bhiḥ práti tiṣṭhordhváḥ
yádi kartáṃ patitvā́ saṃśaśré		yádi vā́śmā práhṛto jaghā́na
ṛbhū́ ráthasyevā́ṇgāni		sáṃ dadhat páruṣā páruḥ