TITUS
Pahlavi Rivayat
Part No. 13
Previous part

Chapter: 13 
Ch. 13
(a)


Paragraph: a1    en-iz paydāg kū zarduxšt az ohrmazd pursīd ku wāšag +wiyāzag +pad kār +āyēd šnōšag ham-ēdōn

Paragraph: a2    ud ohrmazd guft kū ka kār kardan ahreman ud dēwān zindagīh kustan rāy āyēd

Paragraph: a3    zarduxšt guft kū-š bešazēnišnīh čē

Paragraph: a4    ohrmazd guft kū ka-š yaϑā ahū vairiiō-ē ud aṣ̌əm vohū-ē abar be gōwēnd ā-š tis-iz wināh ud zyān kardan nē tuwān u-š sūd nāmčištīg aziš bawēd

Paragraph: a5    čē was tis bawēd +ī ahreman ī druwand ā-š zyān ī dāmān ī man rāy dād u-š man ān aziš būd u-š sūd aziš be āwurd dāmān ī man was sūd ud ayārīh aziš būrd u-š dāmān ī ahreman garān wizand ud zyān aziš

Paragraph: a6    čē paydāg kū ahreman sē tis garāntar pad ēd dāšt kū pad dāmān ī ohrmazd hamē kunēm ī ohrmazd +bešišn aziš wēš

Paragraph: a7    agar-iš ān tis nē dād hē ō ō<y> druwand ahreman sūdōmandtar būd hē dāmān ī man aziš garān +wizend būd +hē

Paragraph: a8    ēk ān ka-š margīh dād mardōm murd hēnd čē paydāg <kū> ka āz niyāz drōzīh ud kōxšišn dād būd ud mardōm nē +murd +hē zarmānīh rāy be ōzad abāyist hē ud hamāg mardōm ēk abāg did pad hamāg rōzgār kōxšišn ud kārezār kard hē u-šān ēd guft hē kū ka nē mīrēm ā-mān xwāstag wēš abāyēd ud pas harw mardōm bīm ī ōy ī did rāy pad kōf +dašt sūrāg abāyist hē zīwist ud dāmān garān anāgīh būd hē

Paragraph: a9    ēk ān ka-š āb be <hōšēnīd čē agar āb> hōšēnišn nē hē hamāg ēn zamīg be estād hē u-š aziš garān anāgīh hē

Paragraph: a10    ēk ān ka-š ātaxš be afsārd čē agar ātaxš ōh sōxt hē be nē afsārd hē hamāg ēn gēhān ātaxš ēdōn be estād hē +ā harw kas sōzišn bīm būd hād u-š az-iš garān anāgīh ud dušxwārīh būd hād


(b)


Paragraph: b1    ēn-iz paydāg kū ohrmazd be ō zarduxšt guft kū hamāg mardōm ī andar gēhān tā zindag hēnd ā-šān abāyist sē ēwēnag bawēd

Paragraph: b2    ka +drust bawend u-šān wēmārīh-ē ud pādifrāh-ē nēst ēg-išān hamāg nēkīh ī gētīg ōh abāyēd

Paragraph: b3    ka-šān tangīh-ē ud dušxwārīh-ē bawēd ā-šan ān abāyēd ka-šān gyān az tan be šawēd

Paragraph: b4    ud ka-šān gyān be ō kirrēnišn estād ud az gētīg an-ummēd be būd hēnd ā-šān pas ahlāyīh ī ruwān az harw tis kāmagtar


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.