TITUS
Wirnt von Grafenberg, Wigalois
Part No. 64
Previous part

Verse group: (64) 
Verse: 2117    der rîter ouch erbeizet was
Verse: 2118    zuo zim ûf daz grüene gras

Verse: 2119    und liefen beide einander an.
Verse: 2120    si wârn zwêne bereite man

Verse: 2121    des muotes sam der kraft;
Verse: 2122    daz schein wol an ir rîterschaft.

Verse: 2123    der rise mit dem aste
Verse: 2124    treip in harte vaste

Verse: 2125    hinder sich in ein dickez hac,
Verse: 2126    daz dâ nâhen bi im lac;

Verse: 2127    dâ entweich der edel rîter in.
Verse: 2128    daz tet er niwan durch den sin

Verse: 2129    daz er in slüege ân sinen schaden:
Verse: 2130    sô kunde er in ze hûse laden.

Verse: 2131    dô enpfie der rise wunden vil.
Verse: 2132    sus spilten si des tôdes spil

Verse: 2133    unz daz der tac ûf gie.
Verse: 2134    eine wunden dô der rise enpfie

Verse: 2135    von im, diu nam im sine kraft;
Verse: 2136    des wart der rîter sigehaft.

Verse: 2137    in sîn gewalt muos er sich geben
Verse: 2138    durch daz er in lieze leben;

Verse: 2139    dar über swuor er einen eit
Verse: 2140    daz er die maget âne leit

Verse: 2141    bræhte dem künige Artûs
Verse: 2142    ze Karidôl wider in sin hûs,

Verse: 2143    unde sîn dar inne bît
Verse: 2144    unz er dar nâch im rît;

Verse: 2145    hie was er gevangen mit.
Verse: 2146    Bi den zîten was der sit:

Verse: 2147    dâ behielten si ir triuwe mit
Verse: 2148    swer deheinen eit zebrach,

Verse: 2149    swâ man den immer mê gesach,
Verse: 2150    der was ungenæme,

Verse: 2151    den liuten widerzæme,
Verse: 2152    als der tôtsieche man

Verse: 2153    der von der werlte wirt getân.
Verse: 2154    des muosen si ir sicherheit,

Verse: 2155    ez wær in liep ode leit,
Verse: 2156    behalten, als man in gebôt,

Verse: 2157    od an den êren ligen tôt;
Verse: 2158    des wær ouch noch der werlte nôt.

Verse: 2159    Nu hêt sich diu reine maget
Verse: 2160    beidiu verweinet und verklaget

Verse: 2161    daz si vil kûme mohte geleben.
Verse: 2162    dô wart ir ein trôst gegeben

Verse: 2163    daz si wider solde varn.
Verse: 2164    den tôten mohtens niht bewarn;

Verse: 2165    der lac dâ als im gezam.
Verse: 2166    der rise die juncvrouwen nam,

Verse: 2167    als der rîter im gebôt.
Verse: 2168    sins lieben gesellen tôt

Verse: 2169    klagte er âne mâze.
Verse: 2170    sus vuorens âne strâze

Verse: 2171    unz er die juncvrouwen vant;
Verse: 2172    diu begunde sâ zehant

Verse: 2173    ûf ir wec rîten:
Verse: 2174    sine wolde sîn niht bîten.

Verse: 2175    der rise nam urloup [von im] dâ;
Verse: 2176    engegen Britanje gienc er sâ

Verse: 2177    und brâhte die maget hêre
Verse: 2178    der küniginne Ginovêre

Verse: 2179    und dem künige Artûs
Verse: 2180    ze Karidôl wider in sîn hûs.

Verse: 2181    des wart diu mässenîe vrô;
Verse: 2182    dem edeln rîter gnâdetens dô

Verse: 2183    der triuwen und der êren.
Verse: 2184    der [rîter] begunde kêren

Verse: 2185    sîner juncvrouwen nâch.
Verse: 2186    der was von im harte gâch,

Verse: 2187    wand ez was ir vil leit
Verse: 2188    daz er iender mit ir reit.

Verse: 2189    swaz er manheit begie,
Verse: 2190    die wolde si geprîsen nie:

Verse: 2191    ez dûhte si allez kleine
Verse: 2192    wider die al eine

Verse: 2193    diu im ze tuone sît geschach.
Verse: 2194    gezogenlîche der rîter sprach

Verse: 2195    "edliu maget, hoeret mich!
Verse: 2196    erloubet mir, vrouwe, daz ich

Verse: 2197    mit iu rîte disen tac."
Verse: 2198    wand er solher zühte pflac

Verse: 2199    daz er daz bewarte ie
Verse: 2200    daz er wider ir willen nie

Verse: 2201    deheiner slahte dinc getet
Verse: 2202    ern erwürbez ê mit siner bet;
Verse: 2203    daz bescheinder ir an manger stet.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.