TITUS
Wirnt von Grafenberg, Wigalois
Part No. 58
Previous part

Verse group: (58) 
Verse: 1958    Er sprach "vruowe, nein durch got!
Verse: 1959    Ich will allez iuwer gebot

Verse: 1960    leisten an dingen;
Verse: 1961    mir muoz hie gelingen,

Verse: 1962    od ich verliuse swaz ich hân."
Verse: 1963    Er was des muotes gar ein man,

Verse: 1964    wand er daz nie bevlôch
Verse: 1965    swaz ze manheit gezôch

Verse: 1966    dâne wære er starke gerne mit;
Verse: 1967    daz was von kinde ie sîn sit.

Verse: 1968    Daz hûs was om sô nâhen
Verse: 1969    daz si dar abe sâhen

Verse: 1970    den gast gewâfent rîten.
Verse: 1971    Der wirt wolde niht bîten;

Verse: 1972    sînen harnasch hiez er bringen.
Verse: 1973    Er wânde im solde gelingen

Verse: 1974    als im ofte ê was getân.
Verse: 1975    Leider, dô truoc in sîn wân!

Verse: 1976    Im was ze gâch an die vart.
Verse: 1977    Zehant als er gwwâfent wart,

Verse: 1978    dô brâhten im die knappen dar
Verse: 1979    ein ors, daz was bedecket gar

Verse: 1980    mit einer grôpiere.
Verse: 1981    Der wirt was vil schiere

Verse: 1982    ûf daz ors gesprungen.
Verse: 1983    Die garzûn nâch im dungen;

Verse: 1984    die truogen schilt unde sper.
Verse: 1985    Si liefen ûz nâch im her

Verse: 1986    vaste vür den burcgraben.
Verse: 1987    Si wolden daz gewis haben

Verse: 1988    si würden alle rîche;
Verse: 1989    dô geriet ez mislîche.

Verse: 1990    Der gast den helm ûf bant;
Verse: 1991    von der straze kêrt er zehant

Verse: 1992    gegen dem wirte ûf die plân.
Verse: 1993    Si liezen zuo einander gân

Verse: 1994    swaz diu ors mohten gevarn.
Verse: 1995    Si kunden sich beide wol bewarn;

Verse: 1996    iedoch sô stach der junge gast
Verse: 1997    sîn sper daz ez durch in brast

Verse: 1998    ander halbe eins klâfters lanc.
Verse: 1999    Ez geschach ein teil ân sînen danc

Verse: 2000    daz er in alsô hêt erslagen;
Verse: 2001    daz wil ich iu vür wâr sagen,
Verse: 2002    wand er begundez von herzen klagen.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.