TITUS
Wirnt von Grafenberg, Wigalois
Part No. 51
Previous part

Verse group: (51) 
Verse: 1661    Dô sich der buhurt zerlie,
Verse: 1662    der künic ûf den sal gie,

Verse: 1663    mit im der junge swertdegen
Verse: 1664    der kunde wol der êren pflegen,

Verse: 1665    dar nâch die rîter über al.
Verse: 1666    sich huop dar inne grôzer schal

Verse: 1667    und manger hande seitspil;
Verse: 1668    floiten und tambûren vil

Verse: 1669    die hullen wider ein ander dâ.
Verse: 1670    der milte künic vuorte in sâ

Verse: 1671    zuo der tavelrunde
Verse: 1672    und gap im an der stunde

Verse: 1673    der taveln reht unde stat,
Verse: 1674    als in diu mässenie bat.

Verse: 1675    ouch gap er im ze gesellen sâ
Verse: 1676    den aller tiursten rîter dâ:

Verse: 1677    daz was mîn herre Gâwein,
Verse: 1678    der ie gar âne wandel schein;

Verse: 1679    des wurdens beide harte vrô.
Verse: 1680    den spilliuten gap man dô

Verse: 1681    pfärit, silber und gewant;
Verse: 1682    si wurden alle sâ zehant

Verse: 1683    von den gâben rîche
Verse: 1684    und lobten alle gelîche

Verse: 1685    den rîter und die hôchzît.
Verse: 1686    si spilten alle en widerstrît

Verse: 1687    vor der tavelrunde,
Verse: 1688    iegelîcher als er kunde.

Verse: 1689    man gap in allen wirtschaft
Verse: 1690    und alle des die überkraft

Verse: 1691    des man zem lîbe gerte.
Verse: 1692    diu hôchzît diu werte

Verse: 1693    mit vreuden dâ, als ich iu sage,
Verse: 1694    nâch pfingesten vierzehen tage.

Verse: 1695    dô diu ende hêt genomen,
Verse: 1696    die geste die dar wâren komen

Verse: 1697    die nâmen alle urloup dâ
Verse: 1698    ze hove und ouch anderswâ.

Verse: 1699    dô hiez der künic Artûs
Verse: 1700    tragen in sîn muoshûs

Verse: 1701    die pfelle ungeschrôten,
Verse: 1702    mangen samît rôten,

Verse: 1703    grâ, härmîn unde bunt;
Verse: 1704    dar zuo gap er manic pfunt

Verse: 1705    und schoeniu ros den gesten;
Verse: 1706    er kunde wol enbresten

Verse: 1707    ieglîchem nâch sîner werdichkeit;
Verse: 1708    sîn guot was dô der werlt bereit,
Verse: 1709    als man noch hiute von im seit.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.