TITUS
Author: Herr.Wild. 
Herrand von Wildonie
Book: Kone 
Diu getriu kone

On the basis of the edition
Herrand von Wildonie,
Vier Erzählungen.
Hrsg. v. Hans Fischer.
2., rev.Aufl. besorgt von Paul Sappler.
Tübingen: Niemeyer 1969.
(= Altdeutsche Textbibliothek. 51.)
entered by Andrea Hofmeister-Winter,
Graz 2006;
TITUS version by Jost Gippert
Frankfurt a/M, 26.11.2008



Verse: 1    Wir suln von lieben dingen sagen
Verse: 2    und leider mære gar gedagen,
Verse: 3    wan sî tuont wê dem herzen gar.
Verse: 4    ich hân alliu mîniu jâr
Verse: 5    mit leiden mæren her verzert,
Verse: 6    dâ von ich freuden bin behert.
Verse: 7    wan guotiu mære machent frô;
Verse: 8    diu leiden hânt getân mir sô,
Verse: 9    daz ich ir williclîche enbir.
Verse: 10    swâ diu wal stât an mir,
Verse: 11    dâ wel ich, daz mir rehte kumt
Verse: 12    und mich an mînen freuden frumt.
Verse: 13    nu ist daz mîn meistez leit,
Verse: 14    daz mir diu wal ist gar verseit.
Verse: 15    sît mir nieman niht wil sagen,
Verse: 16    daz mir von rehte müge behagen,
Verse: 17    sô bin aber ich sô wolgemuot,
Verse: 18    daz ich vil lieber sage guot,
Verse: 19    dan daz mir niht gezæme
Verse: 20    und ieman freude næme.
Verse: 21    dâ von wil ich ein mære sagen,
Verse: 22    daz iu von rehte muoz behagen.
Verse: 23    Ein ritter het ein schoene wîp,
Verse: 24    diu was im liep als sîn lîp.
Verse: 25    daz was billîch: ir schoene was
Verse: 26    durchliuhtic als ein spiegelglas;
Verse: 27    dar zuo was sî den vollen guot.
Verse: 28    swâ ein wîp ist sô gemuot,
Verse: 29    daz sî bî schoene güete hât,
Verse: 30    der lîp billîch ze loben stât.
Verse: 31    diu reine was sô êrbære,
Verse: 32    daz ir man kein herzenswære
Verse: 33    von den dingen nie gewan;
Verse: 34    dâ von mohte er sî gerne hân.
Verse: 35    sî was an zühten sô volkomen,
Verse: 36    daz nie niht wart von ir vernomen,
Verse: 37    daz man für unzuht möhte hân;
Verse: 38    dar umb was sî ouch liep ir man.
Verse: 39    sî bôt ez sînen friunden wol,
Verse: 40    den gesten, als ein frum wîp sol.
Verse: 41    ir wirt was an dem lîbe ein man,
Verse: 42    daz er was niht sô wolgetân,
Verse: 43    als er ez gerne het gesehen.
Verse: 44    von im wil ich der wârheit jehen:
Verse: 45    er was gerumphen unde klein.
Verse: 46    der ritter vor den liuten schein,
Verse: 47    als er wær hundert jâr alt;
Verse: 48    des er doch niht gên ir entgalt:
Verse: 49    er dûhte sî schoene als Absolôn
Verse: 50    und sterker danne Sampsôn.
Verse: 51    in ir herzen wart nie man,
Verse: 52    den sî für in wolte hân.
Verse: 53    daz machte ir grôziu frümikeit,
Verse: 54    daz ander: er was gar bereit
Verse: 55    ze alle diu, daz iemer man
Verse: 56    an allen êren mac begân.
Verse: 57    daz tet er allez völliclîch,
Verse: 58    als ob er wære ein keiser rîch
Verse: 59    gewesen und ein der schoenste man,
Verse: 60    den al diu werlt ie gewan.
Verse: 61    willic sînes muotes,
Verse: 62    sînes lîbes, sînes guotes,
Verse: 63    was er gar den undertân,
Verse: 64    an den er êre solte begân.
Verse: 65    dâ von wart sîn unflætikeit
Verse: 66    in allen landen hingeleit.
Verse: 67    Nu kam ez nâch gewonheit,
Verse: 68    daz dem ritter wart geseit
Verse: 69    von einem urlouge grôz.
Verse: 70    dar fuor vil manic sîn genôz;
Verse: 71    dar fuor ouch er durch sînen muot
Verse: 72    und tet ez dâ sô rehte guot,
Verse: 73    daz man im dâ des prîses jach
Verse: 74    für alle die, die man dâ sach
Verse: 75    (und wære er dâ heime beliben,
Verse: 76    sô müeset ir iuch hân verzigen,
Verse: 77    daz ich iu niemer het geseit
Verse: 78    von aller sîner frümikeit).
Verse: 79    dô er daz beste het getân,
Verse: 80    dô muose ouch er aldâ enphân
Verse: 81    etelîchez herzenleit,
Verse: 82    daz manigem was vil unbereit,
Verse: 83    der ze hinderst was dâ bî
Verse: 84    (von dem bin ich der sage frî).
Verse: 85    ein ouge im ûzgestochen wart
Verse: 86    von einem, der sich ûf in spart
Verse: 87    al die zît und in dô neit
Verse: 88    umbe alle sîne frümikeit.
Verse: 89    dem ritter tet sîn smerze wê,
Verse: 90    iedoch klagte er daz michels mê,
Verse: 91    als er sîn wîp an solte sehen,
Verse: 92    daz ir wær leit an im geschehen.
Verse: 93    wan ir leit daz was daz sîn,
Verse: 94    sîn leit was ouch ir leides pîn.
Verse: 95    Siner swester sun der wart
Verse: 96    sîn gereise ûf dirre vart;
Verse: 97    er was im ouch durch zuht verlân.
Verse: 98    den nam er von den liuten dan
Verse: 99    und sprach: "getriuwer friunt, nu var
Verse: 100    und sage der reinen süezen klâr,
Verse: 101    mîn dinc sich habe gefüeget sô,
Verse: 102    daz ich sî iemer mêr unfrô.
Verse: 103    ich was ê nicht ein flætic man;
Verse: 104    nu habe mir got alsô getân,
Verse: 105    daz ich mich schame, daz sî billîch,
Verse: 106    und welle ouch alliu tiutschiu rîch
Verse: 107    rûmen und alliu diu lant,
Verse: 108    dâ ich bî namen bin bekant.
Verse: 109    und sage der süezen, daz ir bî
Verse: 110    mîn herze in allen landen sî,
Verse: 111    swar ich iemer mêr süle komen.
Verse: 112    ich habe dâ nie von ir vernomen
Verse: 113    offenbâr noch heimlîch,
Verse: 114    dâ mit sî habe versmæhet mich.
Verse: 115    ir zuht sî habe des niht erlân,
Verse: 116    sî habe die êre mir getân,
Verse: 117    daz ir diu werlt sol dester baz
Verse: 118    sprechen. friunt, nu sage ir daz,
Verse: 119    ich müge sî niemer mêr gesehen.
Verse: 120    du solt ir des von mir verjehen:
Verse: 121    ir schoenem lîbe, ir varwe klâr,
Verse: 122    den müese ich sîn ein marter gar,
Verse: 123    solte ich ir fürbaz wonen bî.
Verse: 124    der marter sol sî wesen frî.
Verse: 125    sît ich ir niht gedienen mac,
Verse: 126    sô sol ouch sî deheinen tac
Verse: 127    von mir gewinnen niemer leit."
Verse: 128    Der bote weinent von im reit
Verse: 129    und kam hin, dar er wart gesant.
Verse: 130    diu frouwe gienc gên im zehant;
Verse: 131    sî vienc in zuo ir unde sprach:
Verse: 132    "vor maniger zît ich nie gesach
Verse: 133    deheinen boten alse gern,
Verse: 134    und wilt du lieber mære wern
Verse: 135    mich, friunt, von dem neven dîn.
Verse: 136    sage an: ist frô der hêrre mîn?"
Verse: 137    daz kindel weinent sprach gên ir:
Verse: 138    "er hât enboten, frouwe, dir,
Verse: 139    sîn dienest, unde swâ er sî,
Verse: 140    sô wone dir doch sîn herze bî.
Verse: 141    daz hâst du wol gên im versolt.
Verse: 142    ez habe nie schoene wîp gedolt
Verse: 143    mit solhen zühten keinen man,
Verse: 144    und der als übel wær getân.
Verse: 145    sîn lîp wær dir ievor ze swach;
Verse: 146    nu sî ein solher ungemach
Verse: 147    im geschehen, daz er dir bî
Verse: 148    ze smæhe an dînem bette sî
Verse: 149    und müge dich niemer mêr gesehen."
Verse: 150    diu reine sprach: "waz ist geschehen
Verse: 151    im, an dem mîn freude stât?"
Verse: 152    der bote sprach: "ein ouge er hât
Verse: 153    verlorn und doch vil ritterlîch."
Verse: 154    diu guote sprach: "friunt triuwen rîch,
Verse: 155    nu renne balde und bite in komen,
Verse: 156    und ich habe von im vernomen,
Verse: 157    daz mir fürwâr gevalle niht.
Verse: 158    des smerzen habe ich mit im phliht
Verse: 159    billîchen, wan ez ist ein lîp.
Verse: 160    ich bin ouch sô gemuot ein wîp,
Verse: 161    daz mir ist als liep mîn man:
Verse: 162    und solte er tûsent ougen hân
Verse: 163    (und daz im diu stüenden wol),
Verse: 164    sô wil ich unde billîch sol
Verse: 165    sîn einic ouge hân sô zart,
Verse: 166    daz mîn herze daz bewart,
Verse: 167    daz ez gedenken müge dar an,
Verse: 168    ob ez im übel süle stân."
Verse: 169    "frouwe, ich sol dich triegen niht:
Verse: 170    mîn reise diu ist gar enwiht.
Verse: 171    dâ von lâ mich belîben hie.
Verse: 172    nu weist du wol, daz er daz nie
Verse: 173    gegen dir kein zît gebrach,
Verse: 174    swaz er ernestlîchen sprach."
Verse: 175    "nu wolte got", diu reine jach,
Verse: 176    "daz an mir al sîn ungemach
Verse: 177    læge, und daz er wære ein man
Verse: 178    als schoene, als er sich wolte hân.
Verse: 179    ich hoere daz wol, ich muoz enbern
Verse: 180    sîn, den ich doch hete gern.
Verse: 181    daz ist ein jæmerlîchiu nôt,
Verse: 182    wan âne in sô bin ich tôt.
Verse: 183    nu bitte ich, lieber friunt, dich,
Verse: 184    daz du in sehest noch durch mich
Verse: 185    und füerest im mîn kleinât hin.
Verse: 186    nu warte mîn, unlange ich bin."
Verse: 187    diu guote gienc von im zehant
Verse: 188    in ir kemenâten, dâ sî vant
Verse: 189    ein schære, und stach vil balde dar
Verse: 190    ir selben ûz ein ouge gar,
Verse: 191    daz ez ir über ir wengel ran.
Verse: 192    alsô bluotic gie sî dan
Verse: 193    für den boten. der enkam;
Verse: 194    mit beiden handen er sich nam
Verse: 195    ze hâre und schrei: "wê iemer ach,
Verse: 196    sô grôziu dinc ich nie gesach!
Verse: 197    frouwe guot, waz sol daz sîn?"
Verse: 198    sî sprach: "nu sage dem hêrren dîn,
Verse: 199    daz er her kume und sehe mich an:
Verse: 200    dunke ich in noch ze wolgetân,
Verse: 201    ich neme dem andern sînen schîn
Verse: 202    (sô liep ist er dem herzen mîn);
Verse: 203    und welle ich im verwîzen iht,
Verse: 204    daz er mit einem ougen siht,
Verse: 205    sô müge er wol von wârheit jehen,
Verse: 206    ich müge ouch wan mit einem sehen."
Verse: 207    sî sprach: "var hin, vil lieber knabe,
Verse: 208    und bite in des, daz er sî abe
Verse: 209    solhes muotes und her kome,
Verse: 210    daz sî im iemer an mir frome."
Verse: 211    Der knabe weinent von ir gie,
Verse: 212    wan im wart sô leide nie.
Verse: 213    er saz ûf, im was vil gâch.
Verse: 214    als er den hêrren sîn ansach,
Verse: 215    weinent lief er gên im dar
Verse: 216    und sagte im allez daz vil gar,
Verse: 217    daz er dâ heime het gesehen;
Verse: 218    und swes diu guote het verjehen,
Verse: 219    des selben er aldâ gewuoc.
Verse: 220    der ritter sich zen brüsten sluoc.
Verse: 221    er sprach: "owê mir iemer wê!
Verse: 222    ich het dar baz geriten ê.
Verse: 223    ach, daz ich ie wart geborn!
Verse: 224    wie hât mîn schoene wîp verlorn
Verse: 225    ir ouge. wê daz ich ie wart!"
Verse: 226    der hêrre von der swarten zart
Verse: 227    sîn hâr. ein ritter zuo im spranc,
Verse: 228    der sprach: "nu habe sî iemer danc;
Verse: 229    sî hât iu daz erzeiget wol,
Verse: 230    daz sî ist gen iu triuwen vol."
Verse: 231    daz wort im alse nâhen gie,
Verse: 232    daz er ein kraft dâ von gevie
Verse: 233    und dâhte: "mir sagt wâr der man.
Verse: 234    ich wil sî dester lieber hân.
Verse: 235    wan sî hât erzeiget mir,
Verse: 236    daz sî hât gên mir friundes gir."
Verse: 237    er sprach zem boten: "balde var,
Verse: 238    vil lieber friunt, und bewar,
Verse: 239    daz sî ir mêr iht schaden tuo
Verse: 240    (ich strîche spâte unde fruo
Verse: 241    zuo der vil reinen wandels frî),
Verse: 242    und sage ir, daz ich iemer sî
Verse: 243    nâch ir willen umb die tât,
Verse: 244    die sî an mir erzeiget hât."
Verse: 245    Er îlte nâch im, im was gâch.
Verse: 246    als er die minniclîchen sach,
Verse: 247    vor liebe weinent lief er dar.
Verse: 248    diu reine minniclîche klâr
Verse: 249    sprach: "friunt, lieber hêrre mîn,
Verse: 250    du solt mir willekomen sîn."
Verse: 251    der hêrre sprach: "owê, wie sol
Verse: 252    ich, liebiu, dich ergetzen wol
Verse: 253    dînes smerzen, den dîn lîp
Verse: 254    hât durch mich, vil wîplich wîp,
Verse: 255    enphangen? wê der mînen tât,
Verse: 256    die mîn lîp begangen hât!"
Verse: 257    diu guote sprach: "und wilt du mich
Verse: 258    ergetzen wol, daz lêre ich dich,
Verse: 259    sô solt du des getrouwen mir,
Verse: 260    daz niuwan gên dir stê mîn gir;
Verse: 261    und lâz ouch mich dir wol behagen.
Verse: 262    und solte ich tûsent ougen tragen
Verse: 263    und gevielen dir diu niht,
Verse: 264    sô solten sî mir sîn enwiht."
Verse: 265    Swer vor die frouwen gerne sach
Verse: 266    durch die schoene, der man ir jach,
Verse: 267    der sach sî nu vil lieber an
Verse: 268    durch die triuwe, die sî ir man
Verse: 269    erzeiget het; daz was billîch,
Verse: 270    wan sî was schoene und triuwen rîch.
Verse: 271    dâ von sî baz ze loben stât
Verse: 272    dan manigiu, diu zwei ougen hât.
Verse: 273    Swaz noch getriuwer konen sî,
Verse: 274    die tuo got alles leides frî.
Verse: 275    den allen sol ich sîn bekant
Verse: 276    von Wildonie Herrant.


This text is part of the TITUS edition of Herrand von Wildonie, Diu getriu kone.

Copyright TITUS Project, Frankfurt a/M, 27.11.2008. No parts of this document may be republished in any form without prior permission by the copyright holder.