TITUS
Hartmann von Aue, Erec
Part No. 34
Previous part

Verse group: (34) 
Verse: 3300    ein geselleschaft under in
Verse: 3301    und daz si teilten ir gewin

Verse: 3302    mit den die Êrec hete erslagen.
Verse: 3303    der eine begundez den andern sagen.

Verse: 3304    dise vünve und jene drî man
Verse: 3305    von den ich iu vor gesaget han,

Verse: 3306    die heten den walt in ir phlege
Verse: 3307    unde lâgen bî dem wege,

Verse: 3308    swer die einen vermite,
Verse: 3309    daz er den andern gerite.

Verse: 3310    Êrec was vür die drîe komen
Verse: 3311    mit êren, als ir habet vernomen.

Verse: 3312    als er dô disen sô nâhen kam
Verse: 3313    daz sîn der eine war genam,

Verse: 3314    der verre von den andern lac
Verse: 3315    und der schiltwahte phlac,

Verse: 3316    sîns zuorîtens was er vrô.
Verse: 3317    ze sînen gesellen sprach er dô:

Verse: 3318    ʽgehabet iuch vrœlîche:
Verse: 3319    wir werden alle rîche.

Verse: 3320    ich sihe liute rîten
Verse: 3321    den wir wol gestrîten.

Verse: 3322    ez ist niuwan ein man,
Verse: 3323    als ich ez kiesen kan.

Verse: 3324    er vüeret ein ritterlîchez wîp:
Verse: 3325    der ist bekumbert ir lîp.

Verse: 3326    si vüeret driu ros an der hant:
Verse: 3327    si ist, hân ich ez rehte erkant,

Verse: 3328    dem ambet ungezæme.
Verse: 3329    mich wundert wâ er næme

Verse: 3330    sô seltsænen schiltkneht.
Verse: 3331    man sol si im nemen, daz ist reht.

Verse: 3332    als ich ez verre mac gespehen,
Verse: 3333    ich enhân nie schœner wîp gesehen.

Verse: 3334    ir herren, die sult ir mir lân,
Verse: 3335    wan ich si von êrste ersehen hân.'

Verse: 3336    dô sprâchen si alle gelîche,
Verse: 3337    si würde im billîche.

Verse: 3338    ʽvernemet', sprach sîn geselle,
Verse: 3339    ʽwaz ich des roubes welle:

Verse: 3340    niuwan sîn îsengewant.'
Verse: 3341    die andern teilten dâ zehant

Verse: 3342    diu vünf ros under sich.
Verse: 3343    daz was doch ungenædeclich,

Verse: 3344    wan ez diente von rehte
Verse: 3345    Êrecke dem guoten knehte:

Verse: 3346    er kundes wol geniezen.
Verse: 3347    ouch vluren si ir liezen.

Verse: 3348    Êrecke was diu rede unkunt.
Verse: 3349    nû bereite sich einer dâ zestunt

Verse: 3350    engegen im dâ er in sach.
Verse: 3351    vil sorclîchen ungemach

Verse: 3352    vrouwe ênîte gewan.
Verse: 3353    si gedâhte: ʽwarne ich mînen man,

Verse: 3354    sô briche ich aber sîn gebot.
Verse: 3355    er enlâtz durch êre noch durch got,

Verse: 3356    er enneme mir den lîp.
Verse: 3357    ouwê ich sældenlôsez wîp!

Verse: 3358    wære ich nû niuwan tôt,
Verse: 3359    daz næme ich vür dise nôt:

Verse: 3360    sô wære mir verre baz geschehen.
Verse: 3361    sol ich den slahen sehen

Verse: 3362    der mich von grôzer armuot
Verse: 3363    ze vrouwen schuof über michel guot

Verse: 3364    dâ von ich schône gêret bin
Verse: 3365    (ich heize ein rîchiu künegin),

Verse: 3366    daz sol mich geriuwen:
Verse: 3367    wan sô muoz von untriuwen

Verse: 3368    mîn sêle verderben
Verse: 3369    und von rehte ersterben

Verse: 3370    gelîche mit dem lîbe.
Verse: 3371    got rât mir armen wîbe

Verse: 3372    wie ich ez ane vâhe
Verse: 3373    daz ich mich niht vergâhe.

Verse: 3374    ich wæne ez solde verdagen.
Verse: 3375    entriuwen niht, ich sol imz sagen:

Verse: 3376    ze swelher nôt ez mir ergê,
Verse: 3377    ez wirt gewâget alsam ê.'

Verse: 3378    vil drâte si hin umbe sach,
Verse: 3379    zÊrecke si mit vorhten sprach:

Verse: 3380    ʽherre, durch got vernim mich:
Verse: 3381    bewar ez oder man sleht dich.

Verse: 3382    ich sihe vünf gesellen
Verse: 3383    die dich slahen wellen.'

Verse: 3384    als schiere si imz seite,
Verse: 3385    ze wer er sich bereite.

Verse: 3386    ir einer hete sich ûz genomen
Verse: 3387    und was den andern vür komen,

Verse: 3388    daz er tjostierte wider in,
Verse: 3389    ûf sîn selbes ungewin,

Verse: 3390    wan in stach Êrec fil de roi lac
Verse: 3391    daz er underm rosse tôt lac.

Verse: 3392    dannoch wâren ir viere.
Verse: 3393    der einen er schiere

Verse: 3394    ouch tôten von dem rosse stach
Verse: 3395    unde daz sîn sper zebrach.

Verse: 3396    dô enblient erz dem swerte.
Verse: 3397    der strît unlange werte:

Verse: 3398    er begunde vellen
Verse: 3399    die drîe zir gesellen.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.