TITUS
Ulrich von Eschenbach, Alexander
Part No. 123
Previous part

Chapter: 145  
Prolog


Verse: 17367    Die werlt und des gelackes rat
Verse: 17368    gelîche ordenunge hât:

Verse: 17369    die daʒ wellen vernemen
Verse: 17370    die lâʒen sich dirre rede zemen.

Verse: 17371    gelücke niemans schônet,
Verse: 17372    die werlt sûre lônet;

Verse: 17373    gelückes rat wil umbegân,
Verse: 17374    die werlt wil vil dienstes hân.

Verse: 17375    die wîle der mensch ist mugende
Verse: 17376    und ir ze dienste tugende,

Verse: 17377    sô hât sie in wert unde liep,
Verse: 17378    den menschen; wenn so komet der diep,

Verse: 17379    der sich bî dem menschen hilt
Verse: 17380    und im alle tage stilt

Verse: 17381    lîp, kraft unde sin,
Verse: 17382    zehant sô ist ir liebe hin:

Verse: 17383    den sie ê hielt in schœner phlege,
Verse: 17384    den lât sie werfen von dem wege

Verse: 17385    in irn kerkære.
Verse: 17386    mich fröwen niht die mære.

Verse: 17387    sie giht daʒ er dâ müeʒe
Verse: 17388    fûlen. ei werlt, dîn süeʒe

Verse: 17389    uns ie an dem ende gît
Verse: 17390    swære siuftenbære zît.

Verse: 17391    sît man dir der krancheit giht,
Verse: 17392    daʒ dîn hulde erbet niht,

Verse: 17393    waʒ man dir gedienen kan,
Verse: 17394    wer sol sich ze dir verlân?

Verse: 17395    ei werlt, wie manic bœser site
Verse: 17396    muoʒ dir immer volgen mite.

Verse: 17397    ein ietslich man sich des versinne,
Verse: 17398    waʒ er an dir minne.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.