TITUS
Lamprecht, Alexander (Basler Bearbeitung)
Part No. 67
Previous part

Chapter: 139  
Darius übergibt seine Herrschaft an Alexander


Verse: 2764    ze hand mit sinem her breit

Verse: 2765    in die stat er reit,
Verse: 2766    uf den palas er do kam,

Verse: 2767    do vand er Daryum
Verse: 2768    wunden in dem bluͦt;

Verse: 2769    des ward betrüebet sin muͦt
Verse: 2770    daz er weinte mit grim.

Verse: 2771    er sprach mit lutter stim
Verse: 2772    'o küng, werest du gesunt

Verse: 2773    .............................
Verse: 2774    es ist do har ungehort

Verse: 2775    von sinen manen künges mort'.
Verse: 2776    nun sprach [der] durlich degen

Verse: 2777    'machtu lebens noch pflegen,
Verse: 2778    ich las dir ledig din lant

Verse: 2779    ..............................
Verse: 2780    und dir niemer me geschad.

Verse: 2781    ..............................
Verse: 2782    sage mir, wer sy sin,

Verse: 2783    die dir sluͦgen die wunden din ?
Verse: 2784    rech ich dich niut ze hand,

Verse: 2785    so kum ich niemer in min land'.
Verse: 2786    Als Alexander daz sprach,

Verse: 2787    mit unkrefften er uff sach,
Verse: 2788    Daryus der krefftelos.

Verse: 2789    Alexander leit in [in] sin schos.
Verse: 2790    Daryus kust im die hant

Verse: 2791    ..............................
Verse: 2792    und empfeing in wirdenklich

Verse: 2793    'gedenk, küng rich,
Verse: 2794    daz ich ein gewaltig küng was

Verse: 2795    und mich der minen has
Verse: 2796    also ermordet hat.

Verse: 2797    hüet dich, daz ist min rat.
Verse: 2798    mich müegen min wunden so ser

Verse: 2799    daz ich niut mag gereden mer.
Verse: 2800    nun stat, helt, in diner hant

Verse: 2801    Kreichen und mine land;
Verse: 2802    die bring in ein mit suͦn,

Verse: 2803    so mag dir nieman niut getuͦn.
Verse: 2804    ich man dich durch alle wip:

Verse: 2805    und miner muͦtter lip
Verse: 2806    las in dinen gnaden stan.

Verse: 2807    min tochter solt du ze wibe han,
Verse: 2808    die ist von adel geborn;

Verse: 2809    ze iedem han ich dich erkorn,
Verse: 2810    nun la din triuwe werden schin,

Verse: 2811    getriuwe was daz geslechte din'.
Verse: 2812    sus sweig der krefftelos man,

Verse: 2813    der dot gesigte im da an.



Next part


This text is part of the TITUS edition of Lamprecht, Alexander (Basler Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.