TITUS
Lamprecht, Alexander (Basler Bearbeitung)
Part No. 48
Previous part

Chapter: 83  
Mordversuch durch einen verkleideten Perser


Verse: 2096    do kam einer Daryus man,

Verse: 2097    kreichschy waffen truͦg er an,
Verse: 2098    er drang gar muͦttes vest,

Verse: 2099    da er Allexander wiest;
Verse: 2100    als er in etwas wissen wolt

Verse: 2101    oder im mer sagen solt,
Verse: 2102    hinder sinen ruken er kam,

Verse: 2103    sin swert er ze beden henden nam,
Verse: 2104    er sluͦg in durch den stahel huͦt,

Verse: 2105    daz dar nach gieng daz bluͦt.
Verse: 2106    er hette im gerne me getan,

Verse: 2107    do fiengen in sin man.
Verse: 2108    Allexander hinder sich gesach,

Verse: 2109    zuͦ dem helden er do sprach
Verse: 2110    'war umb, doͤrlicher degen,

Verse: 2111    wolttest du mich dot legen?
Verse: 2112    was han ich wider dich getan?'

Verse: 2113    do sprach Daryus man
Verse: 2114    'here, bis des wanes fry,

Verse: 2115    daz ich der diner einer sy;
Verse: 2116    ich bin von Persya geborn,

Verse: 2117    Daryus hat mich us erkorn
Verse: 2118    ze einem der besten an siner schar,

Verse: 2119    er sprach, brecht ich im din huͦbt dar
Verse: 2120    oder den dot fromte dir:

Verse: 2121    sin rich geb er halbes mir
Verse: 2122    ..............................

Verse: 2123    und sin tochtter schon.
Verse: 2124    die gabe duchte mich so guͦt,

Verse: 2125    daz mir kan in minen muͦt,
Verse: 2126    ich wolte sy erwerben

Verse: 2127    oder degenlichen sterben.
Verse: 2128    nun mag das niut gewessen,

Verse: 2129    und ob ich niut mag genessen,
Verse: 2130    so riuwet mich daz schone wib

Verse: 2131    hartter den min eigen lip.
Verse: 2132    doch der erst ich niut bin,

Verse: 2133    der lip und guͦt durch hochen sin
Verse: 2134    an die wage hat geleit.

Verse: 2135    es duche mich gnade und gros heil,
Verse: 2136    daz ich noch die jungfruͦwen

Verse: 2137    vor minem ende moͤchte schuͦwen.'
Verse: 2138    Allexander lies in gon

Verse: 2139    alle rache und sorgen on,
Verse: 2140    er hies im fride banen

Verse: 2141    von allen sinen manen
Verse: 2142    bis er keme in sin her,

Verse: 2143    und solt sin jemer dank han.
Verse: 2144    sin schuld gab er im ze hant,

Verse: 2145    sin jüngling er mant,
Verse: 2146    er sprach 'soͤliche vermessenheit

Verse: 2147    macht der helden lob breit;
Verse: 2148    wo mans seit, do wirt in über land

Verse: 2149    ... gesant
Verse: 2150    von werden fruͦwen hab dank

Verse: 2151    und in ir oͮgen swank
Verse: 2152    für ander degenlichen sehen

Verse: 2153    und in alle fürsten lobes jehen;'
Verse: 2154    da mit er in den strit reit.





Next part


This text is part of the TITUS edition of Lamprecht, Alexander (Basler Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.