TITUS
Johannes Fischart, Geschichtsklitterung
Part No. 69
Previous part

Paragraph: 16      Aber37 dise Liffkindecken sterben wie sie wöllen, sie sind nicht des minder gemacht : vnnd bescheinet gleichwol auß oberzehltem38, wie ein seltzam gekocht Pludermuß hie vnten sey vnter Gevatter vnd Vatter : vnnd daß mancher ist hoch geboren, aber nicht hoch erkoren, vnd mancher hoch erkoren, aber nider geboren. Vnd daß ich mich, der ich jetzund red, allein zu eim exempel auffwerffe39, so glaube ich gäntzlich, daß ich etwann von eim reichen König oder Fürsten auß der alten Welt auff dise werckstatt kommen seie. Dann jhr habt ewer lebenlang kein Menschen gesehen, der lieber ein König vnd reich wer als ich : auff daß ich neben andern gut vergurgelern auch könnt im sauß leben, vnnd nicht schwer arbeyten, noch den rucken bucken, mich vor jedem ducken, noch vil sorgen, vnd könt meinen Freunden vil schencken vnnd borgen, auch sonst fromm vnd geschickt Leut reich machen (welchs doch manche Scharrhansen nicht achten) des möcht vnser genad gelachen : Aber ich tröst mich dessen, ist es nicht hie, so ist es dort, vnnd villeicht mehr als ich mir inn ein hand wünschen solt. Auff solche oder auch ein bessere weiß solt jhr allzeyt ewerm vnglück mit trost wissen zubegegnen, daß noch morgen Taler könten regnen : Trinckts fein frisch, wann jhrs habt, dann im trincken mag man vil vnmuts versincken.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.