TITUS
Otfrid von Weissenburg, Evangelienbuch
Part No. 38
Previous part

Chapter: 5  
p. 48r    

V. SPIRITALITER.


Verse: 1     Wir scúlun uns zi gúate   \   nu kéren thaz zi múate,
Verse: 2     mit wiu ther díufal so frám   \   bisueih then ériston man;
Verse: 3     Wir sculun dráhton bi tház,   \   thaz wir giwárten uns thiu báz,
Verse: 4     joh wir iz giwárilicho   \   bimíden iogilícho.


p. 48v    


Manuscript page: 48v 
Verse: 5     Ádaman then álton   \   bisuéih er mit then wórton,
Verse: 6     ther júngo joh ther gúato   \   giréh inan gimúato.
Verse: 7     Spúan er io zi nóti   \   jénan zi úbarmuati,
Verse: 8     zi gíri ioh zi rúame,   \   zi suaremo ríchiduame.
Verse: 9     Níazan sah er inan tház,   \   thaz ímo ju gisuás was;
Verse: 10     tho irbónth er imo io thés sindes   \   thes skonen héiminges.
Verse: 11     Fiang er thó, so er then giwán,   \   mit thíu zi themo ándremo man;
Verse: 12     er bifánd, theiz was niwíht,   \   ni záweta imo es níawiht.
Verse: 13     Er wolta in thémo ana wánk   \   duan so sámalichan skránk;
Verse: 14     génan so bifált er,   \   hiar wárd er filu scánter.
Verse: 15     Themo álten det er súazi,   \   thaz er thaz óbaz azi,
Verse: 16     gispuan thaz ér ouh thaz firlíaz,   \   thaz drúhtin inan dúan hiaz;
Verse: 17     Gilih quad góton warin,   \   in thíu sie iz ni firbárin;
Verse: 18     quad gúat joh úbil wessin,   \   thes gúates thoh ni míssin.
Verse: 19     Bat thésan ouh zi nóti,   \   thóh er mes ni hórti,
Verse: 20     (ni dét er iz bi gúate!)   \   thia stéina duan zi bróte;
Verse: 21     Er síh ouh fon ther hóhi   \   thes huses nídarliazi;
Verse: 22     quad, hérduames irfúlti,   \   in thiu er nan béton wolti.
Verse: 23     In selben wórton er then mán   \   tho then ériston giwán,
Verse: 24     so ward er híar (thes was nót!)   \   fon thésemo firdámnot;
Verse: 25     Thaz ér theru sélbun ferti   \   fon uns firdríban wurti,


p. 49r    


Manuscript page: 49r 
Verse: 26     ther unsih érist bisuéih   \   joh zi hérzen gisléih;
Verse: 27     In thémo pade ouh fíali   \   joh sálidon ingíangi,
Verse: 28     ther únsih ju biskránkta,   \   fon hímilriche irwánta.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.