TITUS
Biblia Udica, Versio Nizhensis: Vetus Testamentum
Part No. 162
Previous part

Chapter: 32 

32-ǯi ω͑vel mä͑ġ
32-ci Ǐvel mə̌ğ



Davidi ögüd-näsyät tadala ω͑vel mä͑ġ.
Davidi ögüd-nəsyət tadala Ǐvel mə̌ğ.


Verse: 1    Izi günaxxo oc̣eci taciyo,
   
İzi günaxxo os'eśi taśiyo,
   
Izi taxsərxo baġəšlayinšakiyo
   
İzi taxsırxo bağışlayinşakiyo
   
He bäxṭäväre!
   
He bəxt'əvəre!

Verse: 2    
Bäxṭäväre Q̣ONƷ́UĠON günaxa šoṭo äšṗesṭiṭay ozane nu efalo,
   
Bəxt'əvəre Q'ONČUĞON günaxa şot'o əşp'est'it'ay ozane nu efalo,
   
Bäxṭäväre iz üḳe bič̣luġ nu bakalo!
   
Bəxt'əvəre iz ük'e bic'luğ nu bakalo!

Verse: 3    
Bezi günaxkär baksuna bez ozane exṭamin
   
Bezi günaxkər baksuna bez ozane ext'amin
   
Dirisṭ ġi bez bo͑ġo͑ltin säse eysay:
   
Dirist' ği bez bǒğǒltin səse eysay:
   
Bez säse iramecey, halnuxunez bitey zu.
   
Bez səse irameśey, halnuxunez bitey zu.

Verse: 4    
Bezi šiṗ čurpsuni ǯazinaz zaṗey zu üše-ġena,
   
Bezi şip' çurpsuni cazinaz zap'ey zu üşe-ğena,
   
Be͑ġe ćoyel q̇aribaki xazal ḳinäḳ q̇aribakezuy.
   
Běğe ç̌oyel q'aribaki xazal k'inək' q'aribakezuy.

Verse: 5    
Mone, ṭe vädä bez günaxxo bez ozane hazq̇i,
   
Mone, t'e vədə bez günaxxo bez ozane hazq'i,
   
"Barta Q̣ONƷ́UĠOXUN hiḳḳal č̣aṗ maq̇an mandi" pi
   
"Barta Q'ONČUĞOXUN hik'k'al c'ap' maq'an mandi" pi
   
Moṭoġoy bez źomon taysuni ǯaza baksuna q̇abulezbi.
   
Mot'oğoy bez ǰomon taysuni caza baksuna q'abulezbi.
   
Hunal bez günaxxo baġəšlayinšenbi, bez taxsərxo bez ozane ten efi.
   
Hunal bez günaxxo bağışlayinşenbi, bez taxsırxo bez ozane ten efi.

Verse: 6    
Barta Vi yaq̇en taġalṭin heq̇ädär ki ǯügünu, Va afərəpi ḳalpeq̇an,
   
Barta Vi yaq'en tağalt'in heq'ədər ki cügünu, Va afırıpi k'alpeq'an,
   
Ṭe vädä bito ganu selenal ćaxḳayin
   
T'e vədə bito ganu selenal ç̌axk'ayin
   
Šoṭay turin ṭo͑ġä͑l tene šäyinbakon.
   
Şot'ay turin t'ǒğə̌l tene şəyinbakon.

Verse: 7    
Hunnu bez bać̣an,
   
Hunnu bez bač'an,
   
Hunnu za bälinäxun q̇oriši
   
Hunnu za bəlinəxun q'orişi
   
Čarḳesunen ečala mu͑qluġi säsurxo za q̇əsmat balo.
   
Çark'esunen eçala mǔqluği səsurxo za q'ısmat balo.

Verse: 8    
Q̣ONƷ́UĠON za metäre pi: "Va zomboz,
   
Q'ONČUĞON za metəre pi: "Va zomboz,
   
Va düz yaq̇ manunesa, šoṭo aḳesṭoz.
   
Va düz yaq' manunesa, şot'o ak'est'oz.
   
Va ögüd-näsyät tadoz,
   
Va ögüd-nəsyət tadoz,
   
Bez kula vaxun tez zaṗḳal.
   
Bez kula vaxun tez zap'k'al.

Verse: 9    
Oć̣ina ṭä͑q̇eci elem ḳinäḳ,
   
Oč'ina t'ə̌q'eśi elem k'inək',
   
Biq̇i efes nu bakala e͑k ḳinäḳ haq̇əlsuz ma bakanan.
   
Biq'i efes nu bakala ěk k'inək' haq'ılsuz ma bakanan.
   
Šorox sayǯä sunṭay bać̣anen ḳoval käyiṭuxun oša,
   
Şorox saycə sunt'ay bač'anen k'oval kəyit'uxun oşa,
   
Ṭe sunṭayal ozanen kändür aḳiṭuxun ošane haq̇ullayinšaksa".
   
T'e sunt'ayal ozanen kəndür ak'it'uxun oşane haq'ullayinşaksa".

Verse: 10    
Pisṭoġoy bel nu eġala äš tene mandon,
   
Pist'oğoy bel nu eğala əş tene mandon,
   
Q̣ONƷ́UĠO umudbakalṭoġoxun isä Šoṭin Iz nu badalbakala čuresuna kamtenebon.
   
Q'ONČUĞO umudbakalt'oğoxun isə Şot'in İz nu badalbakala çuresuna kamtenebon.

Verse: 11    
Barta Q̣ONƷ́UĠON düzgün bakalṭoġo mu͑qṭeq̇an,
   
Barta Q'ONČUĞON düzgün bakalt'oğo mǔqt'eq'an,
   
Barta šoṭoġoy ćoyen axśumpeq̇an!
   
Barta şot'oğoy ç̌oyen axšumpeq'an!
   
Šoṭay c̣iya alabala mä͑ġur mä͑ġpanan, ay üḳ tämiz bakalorox!
   
Şot'ay s'iya alabala mə̌ğur mə̌ğpanan, ay ük' təmiz bakalorox!



Next part



This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.