)
)
Q̣ONƷ́UĠON Moiseya pine:
"Be͑ġa, Iuday tayfinaxun Xure nävä bakala Urin ġar Besalelaz č̣äḳṗi.
Šoṭo Buxaʒ́uġoy Urufen, müdrikluġen, q̇amišaksunen, haq̇əlen saal här sa ǯürä bašaraġen buyezbi ki,
q̇əzəlen, gümüšen saal misen äšbsuna bašarbeq̇an,
toyexlu źe͑ ḳac̣ṗi pul laxsuna, duruṭ kišpsuna, här ǯürä bašaraġa aḳesṭeq̇an.
Hamal Dane tayfinaxun bakala Ahisamaxi ġar Oholiaba šoṭaynaḳ kömäyčiz täyinbe. Zu usṭoġoyal bütümṭu ṭetär bašaraġez tadi ki, Zu va ämirbi šeyurxo Bez pi ḳinäḳ bes bakeq̇aṭun:
ə͑vel čadəra, iräziluġi sanduġa q̇a iz loxol bakala baġəšlayinšbsuni q̇apaġa, čadəri bütüm šeyurxo,
isṭola saal šoṭay q̇av-q̇aǯaġa, tämiz q̇əzəlaxun bakala pisosa saal šoṭay bütüm lazəm bakala šeyurxo, buxur boḳospseynaḳ q̇urban ečala ganu,
boḳospsuni q̇urbaneynaḳ bakala q̇urban ečala ganu saal šoṭay bütüm šeyurxo, läänä saal šoṭay laxala ganu.
Be͑yinś Aaroneynaḳ q̇a iz ġarmoġoynaḳ bakala be͑yinśluġi ä͑leci ə͑vel paltarxoval,
lä͑ä͑msṭeynaḳ bakala \ č̣äyinä q̇a ə͑vel ganeynaḳ bakala adeġala buxural Zu va hetärez ämirbesa, haṭe ǯüräl düzbeq̇aṭun".
Q̣ONƷ́UĠON Moiseya pine:
"Hun israilluġo metär upa: "Bezi ə͑vel Šamaṭ ġimxo efanan. Šoṭaynaḳ ki, mo Zaynaḳ, hamal israilluġoynaḳ näsiläxun näsilä č̣ovaksunen sa niśan bakale, vä͑nal avabakalnan ki, vä͑x ə͑velbala Q̣ONƷ́UX Zuzu.
Metärluġen, ə͑vel Šamaṭ ġina efanan, šoṭaynaḳ ki, šo vä͑ynaḳ ə͑vele. Šoṭo ə͑vel nu hesabbalo biyalane. Ṭe ġi äšṗalṭaynaḳ azuḳi arane ga butene.
U͑q ġi äšṗeq̇aṭun. Vu͑ġu͑mǯi ġi isä Q̣ONƷ́UĠON täyinbi ḳinäḳ, sal sa äš nu biq̇ala, ə͑vel bakala Šamaṭ ġiq̇an baki. Ṭe ġi äš biq̇alo biyalane. *
Israilluġon me ġina näsiläxun näsilä č̣ovakesṭunen hämišäluġ sa iräziluġ ḳinäḳ efalaṭun.
Mo Bezi q̇a israilluġoy arane laxeci hämišäluġ sa niśane. Me niśanenal Q̣ONƷ́UĠOY göyä q̇a oćala u͑q ġiin boš yaratmišbsuna, vu͑ġu͑mǯi ġine isä dinǯäyinšäksunane aḳesṭa". *
Q̣ONƷ́UĠON Moiseyaxun Sinay buruġo exlätṗi čarḳiṭuxun oša Iz kiin cameci ṗä͑ ṭä͑ṗä͑ḳ źe͑na Moiseyane tadi.
