TITUS
Biblia Udica, Versio Nizhensis: Vetus Testamentum
Part No. 58
Previous part

Chapter: 8 

P̣ä͑mǯi ǯaza: be͑dalaq̇xo
P'ə̌mci caza: bědalaq'xo


Verse: 1  Link to rat Oša Q̣ONƷ́UĠON Moiseya pine: "Faraoni ṭo͑ġo͑l taci šoṭo upa: "Q̣ONƷ́UĠON metäre nex: <Bezi azuḳa tärba ki, Za bul ḳoc̣bane!
   Oşa Q'ONČUĞON Moiseya pine: "Faraoni t'ǒğǒl taśi şot'o upa: "Q'ONČUĞON metəre nex: <Bezi azuk'a tərba ki, Za bul k'os'bane!

Verse: 2  Link to rat Ägär hun Bezi azuḳa tärbsun nu čureġayin, Zu dirisṭ vi oćala be͑dalaq̇xon buyboz.
   Əgər hun Bezi azuk'a tərbsun nu çureğayin, Zu dirist' vi oç̌ala bědalaq'xon buyboz.

Verse: 3  Link to rat Oq be͑dalaq̇xon q̇aynayinšale, ṭeṭiin č̣eri vi saraya, basḳala otaġa, basḳala gala taraḳalṭun, sarayi amdarxoy q̇a vi azuḳi ḳožurxo, vi tarinxoy q̇a boq̇oyin ṭaṗaḳi boš baġalṭun.
   Oq bědalaq'xon q'aynayinşale, t'et'iin c'eri vi saraya, bask'ala otağa, bask'ala gala tarak'alt'un, sarayi amdarxoy q'a vi azuk'i k'ojurxo, vi tarinxoy q'a boq'oyin t'ap'ak'i boş bağalt'un.

Verse: 4  Link to rat Vi, vi azuḳi saal bütüm vi sarayi amdarxoy loxol be͑dalaq̇xo laġale>".
   Vi, vi azuk'i saal bütüm vi sarayi amdarxoy loxol bědalaq'xo lağale>".

Verse: 5  Link to rat Q̣ONƷ́UĠON saal Moiseya pine: "Aarona metär upa: čombaġa exṭa, vi kula oqe loxol, arxurxoy saal gölürxoy loxol boxoda. Barta Misiri oćal be͑dalaq̇xon buybakeq̇an".
   Q'ONČUĞON saal Moiseya pine: "Aarona metər upa: çombağa ext'a, vi kula oqe loxol, arxurxoy saal gölürxoy loxol boxoda. Barta Misiri oç̌al bědalaq'xon buybakeq'an".

Verse: 6  Link to rat Aaronen iz kula Misiri oćala bakala xenurxoy loxol boxonedi, ṭeṭiinal be͑dalaq̇xone č̣eri. Dirisṭ Misiri oćal šoṭoġoxun buyebaki.
   Aaronen iz kula Misiri oç̌ala bakala xenurxoy loxol boxonedi, t'et'iinal bědalaq'xone c'eri. Dirist' Misiri oç̌al şot'oğoxun buyebaki.

Verse: 7  Link to rat Ama sehirbazxonal ičoġoy sehirbazluġen hametärṭun bi. Šoṭoġonal Misiri loxol be͑dalaq̇xoṭun ečeri.
   Ama sehirbazxonal içoğoy sehirbazluğen hametərt'un bi. Şot'oğonal Misiri loxol bědalaq'xot'un eçeri.

Verse: 8  Link to rat Faraonen Moiseya q̇a Aarona ḳalpi pine: "Q̣ONƷ́UĠO xoyinśbanan ki, bezi q̇a bez azuḳi belxun be͑dalaq̇xo iradbeq̇an, ṭe vädä zuval ef azuḳa Q̣ONƷ́UĠOYNAḲ q̇urban ešṭa tärezbon".
   Faraonen Moiseya q'a Aarona k'alpi pine: "Q'ONČUĞO xoyinšbanan ki, bezi q'a bez azuk'i belxun bědalaq'xo iradbeq'an, t'e vədə zuval ef azuk'a Q'ONČUĞOYNAK' q'urban eşt'a tərezbon".

Verse: 9  Link to rat Moiseyen faraona pine: "Upa be͑yn vi üḳen hevaxṭe čuresa ki, zu beš Buxaʒ́uġoxun xoyinśbi va, vi sarayi amdarxo saal vi azuḳa me be͑dalaq̇xoxun čarḳesṭaz? Moṭoxun oša sayǯä oqe boš bakala be͑dalaq̇xo mandale".
   Moiseyen faraona pine: "Upa běyn vi ük'en hevaxt'e çuresa ki, zu beş Buxačuğoxun xoyinšbi va, vi sarayi amdarxo saal vi azuk'a me bědalaq'xoxun çark'est'az? Mot'oxun oşa saycə oqe boş bakala bědalaq'xo mandale".

Verse: 10  Link to rat Faraonen pine: "Äyč̣ä". Moiseyenal ǯoġabe tadi: "Vi pi ḳinäḳ bakale. Koṭoxun avabakalnu ki, Buxaʒ́ux Q̣ONƷ́UX ḳinäḳo butene!
   Faraonen pine: "Əyc'ə". Moiseyenal coğabe tadi: "Vi pi k'inək' bakale. Kot'oxun avabakalnu ki, Buxačux Q'ONČUX k'inək'o butene!

Verse: 11  Link to rat Be͑dalaq̇xo vaxun, vi ḳožurxoxun, vi sarayaxun saal vi azuḳaxun ä͑xilbakalṭun, šorox sayǯä oqe boš mandalṭun".
   Bědalaq'xo vaxun, vi k'ojurxoxun, vi sarayaxun saal vi azuk'axun ə̌xilbakalt'un, şorox saycə oqe boş mandalt'un".

Verse: 12  Link to rat Moisey q̇a Aaron faraoni ṭo͑o͑xun č̣erṭun. \ Moiseyen Q̣ONƷ́UĠO faraoni loxol yaq̇abi be͑dalaq̇xo äfčibseynaḳ xoyinśebi.
   Moisey q'a Aaron faraoni t'ǒǒxun c'ert'un. \ Moiseyen Q'ONČUĞO faraoni loxol yaq'abi bědalaq'xo əfçibseynak' xoyinšebi.

Verse: 13  Link to rat Q̣ONƷ́UĠONAL Moiseyi xoyinśa inebaki. Ḳožurxo, määloġo, čöle bakala bütüm be͑dalaq̇xo ḳac̣eci.
   Q'ONČUĞONAL Moiseyi xoyinša inebaki. K'ojurxo, məəloğo, çöle bakala bütüm bědalaq'xo k'as'eśi.

Verse: 14  Link to rat Mundarbay be͑dalaq̇xo girbi topṭunbsay, dirisṭ ölkäl adebafṭi.
   Mundarbay bědalaq'xo girbi topt'unbsay, dirist' ölkəl adebaft'i.

Verse: 15  Link to rat Ama faraonen aḳaṭan ki, me bälinäxun iz elmux čareḳi, šoṭin Q̣ONƷ́UĠON pi ḳinäḳäl Moiseya q̇a Aarona nu u͑mu͑xlaxi ṗurum inadkärluġebi
   Ama faraonen ak'at'an ki, me bəlinəxun iz elmux çarek'i, şot'in Q'ONČUĞON pi k'inək'əl Moiseya q'a Aarona nu ǔmǔxlaxi p'urum inadkərluğebi



Xibimǯi ǯaza: moc̣aḳxo
Xibimci caza: mos'ak'xo


Verse: 16  Link to rat Ṭe vädä Q̣ONƷ́UĠON Moiseya pine: "Aarona upa ki, čombaġa boxodi oćali toza duġeq̇an. Bütüm Misiri oćali tozal fərəpi moc̣aḳ bakale.".
   T'e vədə Q'ONČUĞON Moiseya pine: "Aarona upa ki, çombağa boxodi oç̌ali toza duğeq'an. Bütüm Misiri oç̌ali tozal fırıpi mos'ak' bakale.".

Verse: 17  Link to rat Šoṭoġon haṭetäräl biṭun. Aaronen iz kiyel bakala čombaġa boxodi oćali toza duneġi, moc̣aḳxoval amdarxoy q̇a heyvanxoy loxole lavabaki. Bütüm \ Misiri ölkinä oćali toz fərəpi moc̣aḳe baki.
   Şot'oğon hat'etərəl bit'un. Aaronen iz kiyel bakala çombağa boxodi oç̌ali toza duneği, mos'ak'xoval amdarxoy q'a heyvanxoy loxole lavabaki. Bütüm \ Misiri ölkinə oç̌ali toz fırıpi mos'ak'e baki.

Verse: 18  Link to rat Sehirbazxonal ičoġoy sehirbazluġen moc̣aḳxoṭun ešṭun čureci, ama moṭo teṭun bašarbi. Moc̣aḳxon amdarxo q̇a heyvanxo haq̇layinšebsay.
   Sehirbazxonal içoğoy sehirbazluğen mos'ak'xot'un eşt'un çureśi, ama mot'o tet'un başarbi. Mos'ak'xon amdarxo q'a heyvanxo haq'layinşebsay.

Verse: 19  Link to rat Ṭe vädä sehirbazxon faraona piṭun: "Me äšläsṭa Buxaʒ́uġoy kulo". Ama Q̣ONƷ́UĠON pi ḳinäḳ faraonen ṗurum inadkärluġbi u͑mu͑x tene laxi.
   T'e vədə sehirbazxon faraona pit'un: "Me əşləst'a Buxačuğoy kulo". Ama Q'ONČUĞON pi k'inək' faraonen p'urum inadkərluğbi ǔmǔx tene laxi.



Biṗimǯi ǯaza: ṭaṭurxo
Bip'imci caza: t'at'urxo


Verse: 20  Link to rat Ṭe vädä Q̣ONƷ́UĠON Moiseya pine: "Savaxṭan üšenen hayza. Faraon oqe täräf taġaṭan ṗurum šoṭay be͑ś č̣eri metär upa: "Q̣ONƷ́UĠON metäre nex: Bezi azuḳa tärba ki, Za bul ḳoc̣bane!
   T'e vədə Q'ONČUĞON Moiseya pine: "Savaxt'an üşenen hayza. Faraon oqe tərəf tağat'an p'urum şot'ay běš c'eri metər upa: "Q'ONČUĞON metəre nex: Bezi azuk'a tərba ki, Za bul k'os'bane!

Verse: 21  Link to rat Ägär hun šoṭoġo nu tärbayin, vi, vi sarayi amdarxoy, vi azuḳi loxol saal ḳožurxoy boš sürünen ṭaṭurxo yaq̇aboz. Misirluġoy ḳožurxo, dirisṭ oćalal ṭaṭurxon buybakale.
   Əgər hun şot'oğo nu tərbayin, vi, vi sarayi amdarxoy, vi azuk'i loxol saal k'ojurxoy boş sürünen t'at'urxo yaq'aboz. Misirluğoy k'ojurxo, dirist' oç̌alal t'at'urxon buybakale.

Verse: 22  Link to rat Ama ṭe ġi Bezi azuḳ yäšäyinšala Gošen oćala sa ṭaṭal tene bakal! Moṭoxun avabakalnu ki, me ölkinä Q̣ONƷ́UX Zuzu.
   Ama t'e ği Bezi azuk' yəşəyinşala Goşen oç̌ala sa t'at'al tene bakal! Mot'oxun avabakalnu ki, me ölkinə Q'ONČUX Zuzu.

Verse: 23  Link to rat Vi azuḳi q̇a Bezi azuḳi arane färg laxoz. Me möǯüzä äyč̣ä bakale".
   Vi azuk'i q'a Bezi azuk'i arane fərg laxoz. Me möcüzə əyc'ə bakale".

Verse: 24  Link to rat Q̣ONƷ́UĠON hametäräl bine. Faraoni saraya, sarayi amdarxoy ḳožurxo, bütüm Misiri oćala ṭaṭurxoy sürünen ćaxepi. Ṭaṭe sürün kiyexun ölkä väräne baksay.
   Q'ONČUĞON hametərəl bine. Faraoni saraya, sarayi amdarxoy k'ojurxo, bütüm Misiri oç̌ala t'at'urxoy sürünen ç̌axepi. T'at'e sürün kiyexun ölkə vərəne baksay.

Verse: 25  Link to rat Faraonen Moiseya saal Aarona iz ṭo͑ġo͑l ḳalpi pine: "Takinan, ef Buxaʒ́uġoynaḳ q̇urban ečanan, ama me ölkinä - Misirä".
   Faraonen Moiseya saal Aarona iz t'ǒğǒl k'alpi pine: "Takinan, ef Buxačuğoynak' q'urban eçanan, ama me ölkinə - Misirə".

Verse: 26  Link to rat Moiseyen isä pine: "Yan metär bes teyan bakon. Axəri beši Buxaʒ́ux bakala Q̣ONƷ́UĠOYNAḲ q̇urban śampsun misirluġoynaḳ iriṭṗun sa šeye! Misirluġoy piin be͑ś me q̇urbana śamḳayan, yax źe͑layinšalṭun.
   Moiseyen isə pine: "Yan metər bes teyan bakon. Axıri beşi Buxačux bakala Q'ONČUĞOYNAK' q'urban šampsun misirluğoynak' irit'p'un sa şeye! Misirluğoy piin běš me q'urbana šamk'ayan, yax ǰělayinşalt'un.

Verse: 27  Link to rat Tää, yan beši Buxaʒ́ux bakala Q̣ONƷ́UĠOYNAḲ Iz pi ḳinäḳ, memiin č̣eri amc̣i oćala xib ġiluġ yaq̇ taci ṭeṭiya q̇urban ečalayan".
   Təə, yan beşi Buxačux bakala Q'ONČUĞOYNAK' İz pi k'inək', memiin c'eri ams'i oç̌ala xib ğiluğ yaq' taśi t'et'iya q'urban eçalayan".

Verse: 28  Link to rat Faraonen pine: "Zu vä͑x ef buxaʒ́ux bakala Q̣ONƷ́UĠOYNAḲ q̇urban ešṭeynaḳ tärboz! Ama gele ä͑xil ma takinan. Zaynaḳal xoyinśbanan!"
   Faraonen pine: "Zu və̌x ef buxačux bakala Q'ONČUĞOYNAK' q'urban eşt'eynak' tərboz! Ama gele ə̌xil ma takinan. Zaynak'al xoyinšbanan!"

Verse: 29  Link to rat Moiseyen pine: "Zu vi ṭo͑o͑xun č̣eġala ḳinäḳ afərəḳoz ki, Q̣ONƷ́UĠON äyč̣ä va, vi sarayi amdarxo saal vi azuḳa me ṭaṭurxoxun čarḳesṭane. Ama barta faraonenal ene ǯamaata q̇a yax "takinan, Q̣ONƷ́UĠOYNAḲ q̇urban ečanan" pi, oša äfči maq̇an duġi".
   Moiseyen pine: "Zu vi t'ǒǒxun c'eğala k'inək' afırık'oz ki, Q'ONČUĞON əyc'ə va, vi sarayi amdarxo saal vi azuk'a me t'at'urxoxun çark'est'ane. Ama barta faraonenal ene camaata q'a yax "takinan, Q'ONČUĞOYNAK' q'urban eçanan" pi, oşa əfçi maq'an duği".

Verse: 30  Link to rat Hametär, Moiseyen faraoni ṭo͑o͑xun č̣eri Q̣ONƷ́UĠO xoyinśebi.
   Hametər, Moiseyen faraoni t'ǒǒxun c'eri Q'ONČUĞO xoyinšebi.

Verse: 31  Link to rat Q̣ONƷ́UĠONAL Moiseyi xaišä bex ṗaṗesebi. Šoṭin faraona, šoṭay sarayi amdarxo saal šoṭay azuḳa ṭaṭurxoxun čarḳesedi. Sa dänäl ṭaṭ tene mandi.
   Q'ONČUĞONAL Moiseyi xaişə bex p'ap'esebi. Şot'in faraona, şot'ay sarayi amdarxo saal şot'ay azuk'a t'at'urxoxun çark'esedi. Sa dənəl t'at' tene mandi.

Verse: 32  Link to rat Ama me dönäl faraonen ṗurum inadkärluġebi, azuḳa tene tärbi.
   Ama me dönəl faraonen p'urum inadkərluğebi, azuk'a tene tərbi.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.