Moiseyen ṭe vädä iz q̇ayinba, Midyani be͑yinś bakala Yeṭroni * sürünäne otarišbsay. Sa käräm šoṭin sürünä amc̣i oćali lap ṭe bel tašeri hari Buxaʒ́uġoy burux bakala Xorevi * ṭo͑ġo͑le č̣eri.
Bürdän Q̣ONƷ́UĠOY * \ angel sa lämbin boš arux ḳinäḳ aḳeci. Aruġoy boš lämbin bäč̣üḳeci nu boksuna aḳala
Moiseyen ičin ičeynaḳ fikirebi: "Sa be͑ġaz be͑yn, mo hetär bakala šeya! Me lämbä heṭu görä boḳi tene čarksa?"
Q̣ONƷ́UĠON Moiseyi be͑ġsa eysuna aḳi lämbin bošṭan šoṭo ḳalpi pine: "Moisey, Moisey!" Šoṭinal "zu memiyazu" pine.
Buxaʒ́uġon pine: "Memiya ma ə͑śalayinšaka. Vi turexun toroḳala č̣evḳa, šoṭaynaḳ ki, vi čurpi ga ə͑vele". *
Oša pine: "Zu vi bavoġoy Buxaʒ́uxzu: Avrahami Buxaʒ́uxzu, Isaaḳi Buxaʒ́uxzu saal Iaḳovi Buxaʒ́uxzu". * Moṭo ibaki Moiseyen iz ćoya buṭeḳi, šoṭaynaḳ ki, Buxaʒ́uġoy loxol be͑ġsuna q̇ə͑nebsay.
Q̣ONƷ́UĠON pine: "Mone, Zu Misirä bakala Bezi azuḳi äzyätä azḳi, näzärätbalxoy kiyexun šoṭoġoy šivana ibaki ičoġoy därdä avazbaki.
Zu šoṭo göräz ciri ki, šoṭoġo misirluġoy kiyexun čarḳesṭi me ölkinäxun č̣evḳaz. Šoṭoġo geng, barlu sa oćala, muć̣anaq̇ saal uć̣ barala oćala - känanluġoy, xeṭluġoy, emorluġoy, ṗerizluġoy, xivluġoy saal yevusluġoy oćala tašaz.
Häysä isä \ israilluġoy šivan Za ṗaneṗi, misirluġon šoṭoġo bala zülümä azḳi.
Koṭo göräl taki! Va faraoni ṭo͑ġo͑l yaq̇azbsa ki, Bezi azuḳ bakala israilluġo Misiräxun č̣evḳavax!" *
Moiseyen isä Buxaʒ́uġo pine: "Axəri zu šuzu ki, faraoni ṭo͑ġo͑l taci israilluġo Misiräxun č̣evḳaz?"
Buxaʒ́uġon pine: "Zu vaxunzu. Hun azuḳa Misiräxun č̣evḳiṭuxun oša me ganu Za bul ḳoc̣balnan. Moval vä͑ynaḳ niśan bakale ki, va yaq̇abiyo Zuzu".
Moiseyen Buxaʒ́uġo pine: "Israilluġoy ṭo͑ġo͑l taci "za ef ṭo͑ġo͑l yaq̇abiyo ef bavoġoy Buxaʒ́uxe" uḳayiz, šoṭoġonal zaxun xavar haq̇es baṭunkon ki, "ṗoy Šoṭay c̣i hiḳä?" Ṭe vädä zu ḳä uḳaz?" *
Buxaʒ́uġon Moiseya pine: "Zu Hämišä Bakalozu". Oša pine: "Israilluġo upa ki, "Hämišä Bakalo" c̣iyen bakalṭine ef ṭo͑ġo͑l za yaq̇abe". *
Buxaʒ́uġon Moiseya saal pine: "Israilluġo upa: "Hämišä Bakalṭin, ef bavoġoy Buxaʒ́uġon - Avrahami Buxaʒ́uġon, Isaaḳi Buxaʒ́uġon saal Iaḳovi Buxaʒ́uġone za ef ṭo͑ġo͑l yaq̇abe". Mo Bezi hämišäluġ c̣ine. Barta Za näsiläxun näsilä metärq̇aṭun čalxi. *
Taki, israilluġoy aġsaq̇q̇alxo girba, šoṭoġo metär upa: "Hämišä Bakalṭin, ef bavoġoy Buxaʒ́uġon - Avrahami Buxaʒ́uġon, Isaaḳi Buxaʒ́uġon saal Iaḳovi Buxaʒ́uġon, za aḳeci moṭoġone pi: "Vä͑x saal Misirä ef bel me äšurxo ečalṭoġo bitova azaksa.
Äyitez tasṭa ki, vä͑x Misirä bakala äzyätäxun čarḳesṭi känanluġoy, xeṭluġoy, emorluġoy, ṗerizluġoy, xivluġoy saal yevusluġoy ölkinä - muć̣anaq̇ saal uć̣ barala oćala tašoz".
Israili aġsaq̇q̇alxon vi äyitä u͑mu͑xlaxalṭun. Hun šoṭoġoxun sagala Misiri padčaġi ṭo͑ġo͑l taci uḳalnu: "Yax äbraniġoy Buxaʒ́ux bakala Hämišä Bakalone aḳece. Barta yan amc̣i oćala xib ġiluġ yaq̇ taci ṭeṭiya beš Buxaʒ́ux Hämišä Bakalṭaynaḳ q̇urban ečen".
Ama avazu ki, Misiri padčaġa Zu Bez zorba kiin nu mäǯburbayiz, ef taysuna tene barḳal.
Šoṭo göräl Zu Bezi kula boxodi Misirä Bezi aḳesṭala möǯüzoġon duġoz, koṭoxun oša Misiri padčaġen vä͑x tärbale.
Zu ṭetär boz ki, vä͑n misirluġoy piyes šaaṭ aḳeġalnan, šoṭoġonal vä͑x yaq̇ č̣eġaṭan kulamc̣i teṭun tärbal.
Barta här čuġon iz q̇onšinaxun, iz q̇onšin ḳoya yäšäyinšalṭuxun q̇əzəl-gümüš saal paltarq̇an čureci. Vä͑nal šoṭoġon ef ġarmoġo saal xuyärmoġo \ bäzäyinšalnan, metärluġen misirluġo fu͑q̇ḳalnan". *
