Iosifen ḳoc̣ṗaki izi bavay meyidä mučepi, izi loxol bitiyal bureqi o͑nepsa.
Oša hayzeri izi kiin oq̇a äšṗala doxṭurxo ämirebi ki, ečeri izi bavay meyidä misirluġoy ädäten mumiyalayinšeq̇aṭun. Doxṭurxonal burṭunqi Israili ṗuri bädänä oyurxoxun häzirbaki därmänxo q̇a č̣äyin lä͑ä͑mdi šoṭo mumiyalayinšpsa.
Düz q̇ərx ġi doxṭurxon meyidi loxol äšṭunbi, šoṭo görä ki, tam mumiyalayinšbseynaḳ meq̇ädär vaxṭe taysay. Düz yetmiš ġiyal misirluġon Israileynaḳ yasṭun efi.
Yas efala ġimxo hari č̣ovakiṭuxun oša, Iosifen faraoni sarayi amdarxo girbi metäre pi: "Bezi xätirä čurnansasa, takinan faraona bezi c̣iyen upanan ki,
bezi bavan elmoġoy loxol bakaṭan za väsyänebe. "Bezi ga Känan oćala häzire" pi za elasṗesede ki, šoṭo tašeri izi pi ganu ḳula tapšurboz. * Faraona upanan barḳayin taci bezi bava oćalaxṗi ezġoy".
Faraonenal moṭo ibakaṭan qaybaki metäre pi: "Barta tadi äyiti loxol čurpi taci izi bava oćalaxṗi hareq̇an".
Iosifal hayzeri izi bava oćalaxpseynaḳ Känan oćala yaq̇ane bafṭi, sarayal faraoni ṭo͑ġo͑l čurpi šoṭo maslaat tadalorox šu buneysa hari gärṭunbaki šoṭo. Faraoni äšurxo tašalṭoġoy q̇a Misirä bakala aġsaq̇q̇alxoy bito Iosifi ṭo͑ġo͑ley.
Iosifi izi külfät, izi bavay külfät, vičimux -- bito hayzeri taṭunci, Gošen oćala sayǯä äylux q̇a ičoġoy sürüġo bakala heyvanxone mandi.
Turin bakalṭoġoxun ǯöy, e͑ken taġalo manuvay, arabina arci taġalo manuvay -- yaq̇e ṭe bul-me bul amdarey.
Iordan oqa ə͑śa Atad uḳala gane buy, miya arumṭun ečeri ciney, hari ṭiya ṗaṗaṭan amdarxon Iaḳovi loxol hönkür-hönkür o͑nepsaṭun burqi. Iosifen miya čurpi izi bavaynaḳ düz vu͑ġ ġi o͑neḳa yase efi.
Ṭiya yäšäyinšala känanluġonal Atad uḳala eč̣nuxun eġala me o͑nena ibaki piṭun: "Misirluġoy šivane mo, ičoġoy ṗurin loxolṭun o͑nene šoṭoġon!" Oša ṭe gane c̣i haṭetäräl manedi -- Avel-Micrayim. *
Iaḳovi ġarmoġon ičoġoy bavan väsiyäbi ḳinäḳäl biṭun:
tašeri šoṭo Känan oćala, Maxṗela uḳala q̇oruġi boš bakala maġarina oćalaxṭunbi. Mamreni mä͑xluġ uḳala ganu ə͑śa bakala me q̇oruġa q̇a maġarina Avrahamen xeṭlu Efronaxun tängä tadi haneq̇ey ki, izi ṗuriġo oćalaxpseynaḳ gaq̇an baki. *
Izi bava oćalaxṗiṭuxun oša Iosif qaybaki Misiräne hari. Vičimux q̇a ičuxun taciyoroxal bito qaybaki harṭun.
Bava ṗuriṭuxun oša vičimoġon fikirṭunbi ki, ägär Iosif hälä ičoġoy loxol äǯuxlunesa, isä č̣evḳale ičoġoxun ṭe äǯuġo.
Šoṭo göräl Iosifeynaḳ xavar yaq̇abi piṭun ki, ṗoy bavan biyalṭuxun be͑ś ičoġo metäre tapšurbe:
"Iosifa upanan ki, bavan nexe izi vičimoġo baġəšlayinšeq̇an, eyexun č̣evḳeq̇an šoṭoġoy iču bi pisluġa q̇a äšṗesṭi ṭe günaxa". Ičoġoy c̣iyen isä me äyitmoġo piṭun xavar yaq̇abi: "Isä mone, va xoyinśyanbsa, baġəšlayinša vi bavay bul ḳoc̣ṗala Buxaʒ́uġoy me ḳulurxo!" Iosifen me äyitmoġo ibakaṭan o͑nenepi.
Oša vičimux ičanṭun hari Iosifi ṭo͑ġo͑l, šoṭay turin oq̇a bitiyal piṭun: "Vi ḳulurxoyan yan meyin ṭaġay!"
Iosifen isä qaybaki izi vičimoġo metäre pi: "Zaxun q̇ə͑mabanan, zu šuzu ki? Buxaʒ́uġoxune q̇ə͑bsun lazəm, q̇eräz šuḳḳalaxun.
Za pisluġbsuney efi niyät, ama Buxaʒ́uġon ṭetäre bi ki, efi pisluġbsuni c̣iyen biṭoġon xeyire ečeri. Be͑ġanan heq̇ädär amdarxoz busaluġaxun čarḳesṭi zu!
Šoṭo göräl, efi üḳä buz ḳinäḳ efanan: heq̇ädär ki zu buzu, nä vä͑n, nä efi äyloġon hiḳḳalaxun koruġ aḳalatenan". Iosifi me äyitmoġon q̇a ošal arci ičoġoxun muć̣a exlätpsunen vičimoġo arxayinebi.
Hametär, Iosifen izi bavay külfätä izi ṭo͑ġo͑lxun tene tärbi, hariyal bito sagala Misirä arṭunci. Iosif düz sabać vic̣ usen yäšäyinšebi,
šoṭin izi nävoġoy äyloġol ciriḳ aḳi ošane ṗuri. Efraimi nävoġoval, Menaššeni Maxir uḳala ġaraxun baki äyloġoval nanaxun bakala ḳinäḳ ečeri Iosifi q̇uželṭun tadey.
Iosif lap q̇ožabakeney, sa ġi vičimoġo izi ṭo͑ġo͑l ḳalpi pine: "Zaynaḳ male mande, ama avazu ki, Buxaʒ́uġon vä͑x eyexun tene č̣evḳal. Ġi eġale Šoṭin vä͑x me oćalaxun č̣evḳi tašeri Avrahama, Isaaḳa saal Iaḳova elasṗi äyit tadi oćala arcevḳale".
Oša Iosifen Israilaxun töräyinšakiṭoġo elasṗesedi ki, ič ṗuriṭuxun oša Buxaʒ́uġon Izi äyiti loxol čurpi šoṭoġo Känan oćala tašaṭan ičuval č̣evḳi tašereq̇aṭun. *
Iosif biyaṭan izi sabać vic̣ yäše buy. Šoṭo haṭiya, Misirä mumiyalayinšṭunbi, usenxon mandala sanduġi boš laxiyal eṭunfi.
