TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 49

Chapter: 49

Iaḳoven iz ġarmoġo tadi xeyir-bäräkät
İak'oven iz ğarmoğo tadi xeyir-bərəkət

Verse: 1

Iaḳoven ġarmoġo izi ṭo͑ġo͑l ečesṭi pine: "Ekinan čurpanan miya bezi härrämine, häysä exlätṗoz vä͑ynaḳ efi bel ḳä eġalesa bitova.
İak'oven ğarmoğo izi t'ǒğǒl eçest'i pine: «Ekinan çurpanan miya bezi hərrəmine, həysə exlətp'oz və̌ynak' efi bel k'ə eğalesa bitova.

Verse: 2

Ekinan gireynan bezi bel, ay Iaḳovi ġarmux, efi u͑mu͑xxo qaypanan ibakanan efi bava Israilen ḳä nex:
Ekinan gireynan bezi bel, ay İak'ovi ğarmux, efi ǔmǔxxo qaypanan ibakanan efi bava İsrailen k'ə nex:

Verse: 3

   Ruven, kalo hunnu bezi äyloġoy boš,
   Ruven, kalo hunnu bezi əyloğoy boş,
   Bezi hetär sa zore q̇onʒ́ux baksunan ćoyel č̣evḳi hun,
   Bezi hetər sa zore q'ončux baksunan ç̌oyel c'evk'i hun,
   Bavaluġi ṭadaz avabaki zu hun nanaxun bakaṭan.
   Bavaluği t'adaz avabaki zu hun nanaxun bakat'an.
   Bə͑hine vi ga, šuḳḳalenal va sakes batenekon.
   Bǐhine vi ga, şuk'k'alenal va sakes batenekon.

Verse: 4

   Ama efes ten baki hun va, posṗi taġala xena efes nu bakala ḳinäḳ,
   Ama efes ten baki hun va, posp'i tağala xena efes nu bakala k'inək',
   Vi bavaynaḳ čuuxluġbalṭuxunen basḳi,
   Vi bavaynak' çuuxluğbalt'uxunen bask'i,
   Bezi ganun murdarlayinši hun.
   Bezi ganun murdarlayinşi hun.
   Šoṭo göräl meyin oša ḳožin kala ġar uḳaṭan vi c̣i tene ṭaṗeġal.
   Şot'o görəl meyin oşa k'ojin kala ğar uk'at'an vi s'i tene t'ap'eğal.

Verse: 5

   Simeon q̇a Levi -- ṗä͑ vičiṭun šorox,
   Simeon q'a Levi -- p'ə̌ viçit'un şorox,
   Q̣äddarluġbseynaḳṭun äšṗesṭi šoṭoġon ičoġoy q̇ələnǯxo.
   Q'əddarluğbseynak't'un əşp'est'i şot'oğon içoğoy q'ılıncxo.

Verse: 6

   Sa tene bakal bezi äyit šoṭoġoxun,
   Sa tene bakal bezi əyit şot'oğoxun,
   Gärtezbakal zu šoṭoġo.
   Gərtezbakal zu şot'oğo.
   Äǯuġon biq̇i amdar besṗalorox,
   Əcuğon biq'i amdar besp'alorox,
   Araḳxoy tura kütṗi, ošal ičoġoy biq̇i äšlin loxol axśumḳaloroxe šorox.
   Arak'xoy tura kütp'i, oşal içoğoy biq'i əşlin loxol axšumk'aloroxe şorox.

Verse: 7

   Q̣arġiši q̇onʒ́uxe bi vä͑x efi me äǯuġon q̇a hirsen,
   Q'arğişi q'ončuxe bi və̌x efi me əcuğon q'a hirsen,
   Carpi ciḳala äǯuġ, duġi besṗala hirse šo!
   Śarpi śik'ala əcuğ, duği besp'ala hirse şo!
   Aći batḳalnan vä͑n Iaḳovaxun töräyinšakiṭoġoy boš,
   Aç̌i batk'alnan və̌n İak'ovaxun törəyinşakit'oğoy boş,
   Israili ġarmoġoy ṭo͑ġo͑l arcala bakalnan.
   İsraili ğarmoğoy t'ǒğǒl arśala bakalnan.

Verse: 8

   Iuda, vi c̣iya duġalṭun vičimoġon alxəšṗaṭan,
   İuda, vi s'iya duğalt'un viçimoğon alxışp'at'an,
   Ozana č̣urumpi bosalnu hun vi düšmänxoy,
   Ozana c'urumpi bosalnu hun vi düşmənxoy,
   Vi bavaxun sa vičimoġonal hari va bać̣an ḳoc̣ṗalṭun.
   Vi bavaxun sa viçimoğonal hari va bač'an k'os'p'alt'un.

Verse: 9

   O͑xä͑läxun qaybakala sa ǯäyil aslan ḳinäḳnu hun, Iuda,
   Ǒxə̌ləxun qaybakala sa cəyil aslan k'inək'nu hun, İuda,
   Busq̇una čurpi širäsṭa bakala zore bu vasṭa,
   Busq'una çurpi şirəst'a bakala zore bu vast'a,
   Šuva ə͑śa bites bakon me aslana? ^*
   Şuva ı̌ša bites bakon me aslana? ^*

Verse: 10

   Padčaġluġbale Iudaxun bakiṭoġon hämišä,
   Padçağluğbale İudaxun bakit'oğon həmişə,
   Taxṭe loxol arci ämirbalṭun šoṭoxun töräyinšakiṭoġon.
   Taxt'e loxol arśi əmirbalt'un şot'oxun törəyinşakit'oğon.
   Eġale ṭe taxṭe q̇onʒ́ux,
   Eğale t'e taxt'e q'ončux,
   Hariyal bul ḳoc̣ṗalṭun Šoṭo oćali ćoyel bakala millätxoy bitoṭin.
   Hariyal bul k'os'p'alt'un Şot'o oç̌ali ç̌oyel bakala millətxoy bitot'in.

Verse: 11

   Č̣aṗaxun ġaćḳale šoṭin izi elema,
   C'ap'axun ğaç̌k'ale şot'in izi elema,
   Zorapalayinši taymoġoy än šaaṭṭuxun örügbale izi elemi balina.
   Zorapalayinşi taymoğoy ən şaat't'uxun örügbale izi elemi balina.
   Finen oc̣ḳale šoṭin izi paltara,
   Finen os'k'ale şot'in izi paltara,
   Täzä c̣orobi noć̣e boš badi č̣evḳale izi loxolxun laḳalṭoġo.
   Təzə s'orobi noč'e boş badi c'evk'ale izi loxolxun lak'alt'oğo.

Verse: 12

   Izi ṭulluġen tadala fi ṭeq̇ädär bakale ki, ṗi ḳaṭḳale šoṭay ćoyexun,
   İzi t'ulluğen tadala fi t'eq'ədər bakale ki, p'i k'at'k'ale şot'ay ç̌oyexun,
   Uluxxo mac̣ibakale šoṭay muć̣anaq̇ u͑ġsunaxun.
   Uluxxo mas'ibakale şot'ay muč'anaq' ǔğsunaxun.

Verse: 13

   Zevulun isä dänizi börine,
   Zevulun isə dənizi börine,
   Gämiġoy hari čurḳala gala yäšäyinšale.
   Gəmiğoy hari çurk'ala gala yəşəyinşale.
   Sidonal ciriḳ taġale šoṭay oćalxo.
   Sidonal śirik' tağale şot'ay oç̌alxo.

Verse: 14

   Issaḳar -- izi bać̣ane yük xorḳala sa elem ḳinäḳe šo,
   İssak'ar -- izi bač'ane yük xork'ala sa elem k'inək'e şo,
   Zorbane, izi kiyelxun nu ayeġala äš tene bu šoṭay.
   Zorbane, izi kiyelxun nu ayeğala əş tene bu şot'ay.

Verse: 15

   Dinǯluġe qä͑vesa šoṭin,
   Dincluğe qə̌vesa şot'in,
   Bezi äšṗala oćalq̇an šaaṭ baki nexe.
   Bezi əşp'ala oç̌alq'an şaat' baki nexe.
   Iräzine šo bać̣an ḳoc̣psuna,
   İrəzine şo bač'an k'os'psuna,
   Q̣erṭay loxol äšṗi yük xorpsuna.
   Q'ert'ay loxol əşp'i yük xorpsuna.

Verse: 16

   Divanbal bakale Dan izi näsileynaḳ,
   Divanbal bakale Dan izi nəsileynak',
   Israilaxun ämälä hari azuḳxoy ǯörginä bakale šoṭoxun töräyinšakiyorox.
   İsrailaxun əmələ hari azuk'xoy cörginə bakale şot'oxun törəyinşakiyorox.

Verse: 17

   Yaq̇e boš basḳi diziḳ,
   Yaq'e boş bask'i dizik',
   Ǯəġəren taġaṭan be͑ś č̣eġala gürzä ḳinäḳ bakale Dan.
   Cığıren tağat'an běš c'eğala gürzə k'inək' bakale Dan.
   E͑ke tura duġi,
   Ěke tura duği,
   Šoṭay loxol arciṭu bać̣ani loxol sakalo bakale.
   Şot'ay loxol arśit'u bač'ani loxol sakalo bakale.

Verse: 18

Vi za čarḳesṭunane bezi umud, ay Q̣ONƷ́UX! ^*
Vi za çark'est'unane bezi umud, ay Q'ONČUX! ^*

Verse: 19

   Gade loxol lavabaki šoṭo fu͑q̇psun čureġalṭun,
   Gade loxol lavabaki şot'o fǔq'psun çureğalt'un,
   Ama ṭetär bakale ki, ičan sunay dabana ćaxćuxpsun ṭiṭala bakalṭun.
   Ama t'etər bakale ki, içan sunay dabana ç̌axç̌uxpsun t'it'ala bakalt'un.

Verse: 20

   Nu biṭi beǯärišala šey tene bakal Ašeren izi oćalxo,
   Nu bit'i becərişala şey tene bakal Aşeren izi oç̌alxo,
   Padčaġxoy be͑ś ečeri laxalṭun šoṭin toydala neymätxo.
   Padçağxoy běš eçeri laxalt'un şot'in toydala neymətxo.

Verse: 21

   Biq̇i efes nu bakala marali gözälluġe bu Nafṭalinasṭa,
   Biq'i efes nu bakala marali gözəlluğe bu Naft'alinast'a,
   Izi ečala baloġoy loxole bitoṭay pul. ^* bitoṭay pul nääl: Šeir ḳinäḳe šoṭay źomoxun č̣eġala här äyit
   İzi eçala baloğoy loxole bitot'ay pul. ^* bitot'ay pul nəəl: Şeir k'inək'e şot'ay ǰomoxun c'eğala hər əyit

Verse: 22

   Č̣epi ġumoġoy kiyexun basḳala č̣aṗ ḳinäḳe Iosif,
   C'epi ğumoğoy kiyexun bask'ala c'ap' k'inək'e İosif,
   Orayini ṭo͑ġo͑l biṭeci šaaṭ č̣eḳala sa č̣aṗ ḳinäḳ,
   Orayini t'ǒğǒl bit'eśi şaat' c'ek'ala sa c'ap' k'inək',
   Izi taymux barinen tik alane
   İzi taymux barinen tik alane
   laysa šoṭay.
   laysa şot'ay.

Verse: 23

   Elmux haq̇ala düšmänxone šoṭay loxol hari,
   Elmux haq'ala düşmənxone şot'ay loxol hari,
   Än šaaṭ oxbosalxone ičuxun davina č̣eri.
   Ən şaat' oxbosalxone içuxun davina c'eri.

Verse: 24

   Ama sakes teṭun baki šoṭoġon Iosifa,
   Ama sakes tet'un baki şot'oğon İosifa,
   Šoṭo görä ki, Zorba Bakalṭine šoṭo Izi zoraxun tasṭay,
   Şot'o görə ki, Zorba Bakalt'ine şot'o İzi zoraxun tast'ay,
   Iaḳoven bul ḳoc̣ṗala Buxaʒ́uġone šoṭay ä͑mä zorba efsay.
   İak'oven bul k'os'p'ala Buxačuğone şot'ay ə̌mə zorba efsay.
   Bać̣ane baki šoṭaynaḳ Israileynaḳ Bać̣an bakiyo,
   Bač'ane baki şot'aynak' İsraileynak' Bač'an bakiyo,
   Enefi šoṭo čobanen izi sürünä efala ḳinäḳ.
   Enefi şot'o çobanen izi sürünə efala k'inək'.

Verse: 25

   Vi bavay bul ḳoc̣ṗala Buxaʒ́uxe va kul biq̇i Buxaʒ́ux, Bitova Bašarbalone Šo!
   Vi bavay bul k'os'p'ala Buxačuxe va kul biq'i Buxačux, Bitova Başarbalone Şo!
   Šone göynuxun aġala yaq̇abi va xeyir-bäräkät tadalo,
   Şone göynuxun ağala yaq'abi va xeyir-bərəkət tadalo,
   Šone oćali oq̇a bakala xeyurxo duġi ćoyel č̣evḳalo.
   Şone oç̌ali oq'a bakala xeyurxo duği ç̌oyel c'evk'alo.
   Vi saya avuzbaloval,
   Vi saya avuzbaloval,
   Vi sürünä bakala heyvanxo balalayinšesṭaloval Šone,
   Vi sürünə bakala heyvanxo balalayinşest'aloval Şone,
   Šoṭoxune eysa xeyir-bäräkät.
   Şot'oxune eysa xeyir-bərəkət.

Verse: 26

   Vi bavay xeyir-bäräkätä ṗaṗala xeyir-bäräkät butene,
   Vi bavay xeyir-bərəkətə p'ap'ala xeyir-bərəkət butene,
   Än alloy buruxmoġoxun üsṭüne šo,
   Ən alloy buruxmoğoxun üst'üne şo,
   Burqesunasṭa laxeci täpoġon tades bakalorox hiḳḳale šoṭay ṭo͑ġo͑l!
   Burqesunast'a laxeśi təpoğon tades bakalorox hik'k'ale şot'ay t'ǒğǒl!
   Barta Iosifi belq̇an bari me xeyir-bäräkät,
   Barta İosifi belq'an bari me xeyir-bərəkət,
   Barta izi vičimoġoxun üsṭün bakalṭay ḳodoġoq̇an cameci me bezi piyorox.
   Barta izi viçimoğoxun üst'ün bakalt'ay k'odoğoq'an śameśi me bezi piyorox.

Verse: 27

   Busa ǯanavar ḳinäḳe Binyamin:
   Busa canavar k'inək'e Binyamin:
   Savaxṭan izi kiyexun haq̇es ten bakon o͑xä͑lbi ečeriṭu,
   Savaxt'an izi kiyexun haq'es ten bakon ǒxə̌lbi eçerit'u,
   Biyäsin isä efi taneġon izi be͑śṭan mandiṭoġo".
   Biyəsin isə efi taneğon izi běšt'an mandit'oğo».

Verse: 28

Moval Israilen ičuxun ämälä eġala ṗac̣c̣e tayfin barada saturbe͑ś piyorox, me äyitmoġo pine xeyir-bäräkät tadey šoṭoġo. Här ġarenal iču göräne izi xeyir-bäräkätä haq̇ey.
Moval İsrailen içuxun əmələ eğala p'as's'e tayfin barada saturběš piyorox, me əyitmoğo pine xeyir-bərəkət tadey şot'oğo. Hər ğarenal içu görəne izi xeyir-bərəkətə haq'ey.

Iaḳovi bisun
İak'ovi bisun

Verse: 29

Oša Iaḳoven izi ġarmoġo me äyitmoġo pi väsyänebi: "Mone, bezi pula q̇ič̣ṗi tazsa zu ṭe dünyäne. Za tašeri bezi bavoġoy ṭo͑ġo͑l, xeṭlu Efroni q̇oruġa bakala maġarinanan oćalaxpsa.
Oşa İak'oven izi ğarmoğo me əyitmoğo pi vəsyənebi: «Mone, bezi pula q'ic'p'i tazsa zu t'e dünyəne. Za taşeri bezi bavoğoy t'ǒğǒl, xet'lu Efroni q'oruğa bakala mağarinanan oç̌alaxpsa.

Verse: 30

Känan oćalane ṭe maġara: Mamreni mä͑xluġa ə͑śa, Maxṗela uḳala q̇oruġi boš. Avrahamen ṭe maġarina q̇oruġaxun sagala tängä tadi haneq̇ey xeṭlu Efronaxun. Izi ṗuriġo oćalaxpseynaḳe haq̇ey šoṭin ṭe maġarina.
Kənan oç̌alane t'e mağara: Mamreni mə̌xluğa ı̌ša, Maxp'ela uk'ala q'oruği boş. Avrahamen t'e mağarina q'oruğaxun sagala təngə tadi haneq'ey xet'lu Efronaxun. İzi p'uriğo oç̌alaxpseynak'e haq'ey şot'in t'e mağarina.

Verse: 31

Avrahama ičuval ṭiyaṭun oćalaxṗey, izi čuux Saral, Isaaḳa q̇a Rebeḳal. Leal ṭiyaz oćalaxṗe zu. ^*
Avrahama içuval t'iyat'un oç̌alaxp'ey, izi çuux Saral, İsaak'a q'a Rebek'al. Leal t'iyaz oç̌alaxp'e zu. ^*

Verse: 32

Ṭe q̇oruġal, izi boš bakala maġarinal Avrahamen xeṭluġoxune haq̇ey".
T'e q'oruğal, izi boş bakala mağarinal Avrahamen xet'luğoxune haq'ey».

Verse: 33

Hametär, Iaḳoven izi axərənǯi äyitä pi izi bula lanexi, izi elmuxal haṭiya č̣ere. Šoṭin izi pula q̇ič̣ṗi ṭe dünyäne, izi bavoġoy ṭo͑ġo͑le taci. ^*
Hametər, İak'oven izi axırınci əyitə pi izi bula lanexi, izi elmuxal hat'iya c'ere. Şot'in izi pula q'ic'p'i t'e dünyəne, izi bavoğoy t'ǒğǒle taśi. ^*

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.