ისმინეთ სიტყუაჲ, რომელ თქუა უფალმან თქუენ ზედა, სახლო ისრაჱლისაო.
ესრე იტყჳს უფალი, მსგავსად გზათა წარმართთა-ებრ ნუ ისწავებთ, და სასწაულთაგან ცისათა ნუ გეშინინ, რამეთუ ეშინის მათ პირისაგან Page of ms. J: A110r მათისა.
რამეთუ შჯული წარმართთაჲ ცუდ არს,/ ძელი მაღნარისაგან მოკუეთილი, ქმნული ხუროჲსაჲ,
და შებერილი, თმროჲთა და ვეცხლითა შემკობილ არიან, კუერითა და სამშჭულებითა დაამტკიცნეს იგინი, რაჲთა არა შეიძრნენ.
ვეცხლი გამოტორანტოსებული არს, და არა ვიდოდის.
ვეცხლი დასხმული თარშით მოღებული, ოქროჲ მოფათი, ჴელთა ოქროჲს-მჭედელთა, ქმნული ჴელოვანთაჲ ყოველი; იაკინთი და ძოწეული შეჰმოსიან მათ.
აღებით აღიხუნიან იგინი, რამეთუ ვერ ვლენედ. ნუ გეშინინ მათა, რამეთუ ბოროტი ვერ გიყონ, და კეთილი არსვე არა მათ თანა.
ვინ მე არს მსგავს შენდა, უფალო; დიდ ხარ შენ, და დიდ არს სახელი შენი ძალისა შენისაგან.
ვის მე არა ეშინოდის, მეუფეო წარმართთაო, რამეთუ შენდა შუენის თაყუანის-ცემაჲ, რამეთუ ყოველთა შორის ბრძენთა წარმართთასა, და შორის მეუფეთა მათთა ვინ იყოს მსგავს შენდა, უფალო.
და ერთბამად უგულის-ჴმო იქმნნენ და უგუნურ იქმნნენ, რამეთუ მოძღურებაჲ ამაოთაჲ არს მათ შორის, ძელი არს.
ვეცხლი ჭედილი თარშით მოღებული, და ოქროჲ სოფერით, ქმნული ხუროჲსაჲ, და ჴელთა ოქროჲს-მჭედელთაჲ; იაკინთი და ძოწეული. სამოსელი მათი, საქმჱ მეცნიერებისაჲ ყოველივე.
ხოლო უფალი ჭეშმარიტ არს ღმერთი, ღმერთი ცხოველ და მეუფჱ საუკუნე. გულის-წყრომისა მისისაგან შეიძრა<ს> ქუეყანაჲ, და ვერ დაუთმონ ნათესავთა მკსინვარებასა მისსა.
ესრე ჰრქუათ მათ; ღმერთთა რომელთა ცაჲ და ქუეყანაჲ არა შექ<მ>ნეს, წარწყმდედ იგინი ქუეყანისაგან, და ქუეშე ცასა ამას.
უფალმან რომელმან შექმნა ქუეყანაჲ ძალითა თჳსითა, მან აღმართა სოფელი სიბრძნითა თჳსითა, და გულის-ჴმითა თჳსითა გარდაართხა ცაჲ.
ჴმა სცის მან, სიმრავლესა წყალთასა ზეცად, და აღმოიყვანნა ღრუბელნი დასასრულით ქუეყანისაჲთ, ელვანი წჳმად შექმნნა, და გამოიყვანნა ქარნი საუნჯეთაგან მისთა.
განცოფნა ყოველი კაცი მეცნიერებისაგან, და ჰრცხუენა ყოველსა Page of ms. J: A110v ოქროჲს/-მჭედელსა ქანდაკებულთა ზედა მისთა, რამეთუ ნაცილად შებერა; არა არს სულ მათ თანა.
ცუდ არიან ნაქმნევნი იგი საკიცხელნი, ჟამსა აღხილვისა მათისასა წარწყმდენ.
არა არს ესე-ვითარი ნაწილი იაკობისი, არამედ რომელმან დაჰბადა ყოველი, იგი თავადი ნაწილ არს მისა, და ისრაჱლი კუერთხ მკჳდრობისა მისისა, უფალ ძალთა არს სახელი მისი.
შეკრიბა გარემოჲს ძალი შენი, დამკჳდრებულო რჩეულთა შორის,
რამეთუ ესრეთ იტყჳს უფალი; მე დავაბრკოლნე დამკჳდრებულნი ამის ქუეყანისანი ჭირითა, და ვაჭირო მათ რაჲთა ემხილოს, იპოვა;
ვაჲ შემუსრვასა ზედა თქუენსა, სალმობიერ არს წყლულებაჲ ეგე შენი. და მე ვთქუ; ნანდჳლვე წყლულებაჲ იგი ჩემი არს, და მეწია მე.
კარავი ჩემი დაგლახაკნა და წარწყმდა, და ყოველნი ეზონი ჩემნი განიჴნეს, შვილნი ჩემნი და საცხოვარი ჩემი განჴდეს ჩემგან, არღარა არს ადგილ მერმე კარვისა მის ჩემისა და ადგილი ეზოთა ჩემთაჲ.
რამეთუ მწყემსნი უგუნურებდეს, და უფალი არა მოიძიეს, ამისგან არა გულის-ჴმა-ყო ყოველმან სამწყსომან მათმან, არამედ განიბნინეს.
ჴმაჲ სმენისაჲ აჰა ესერა მოიწევის, და ძრვაჲ დიდი ქუეყანით ჩრდილოჲთ დასხმად ქალაქთა იუდაჲსთა განსარყუნელად და საბუდებელად სირთა.
უწყი, უფალო, რამეთუ არა კაცისაგან არს გზაჲ მისი, არცა კაცი ვიდოდის და განჰმართოს გზაჲ მისი, და წარემართნენ სლვანი მისნი./ Page of ms. J: A111r
გუსწავლენ ჩუენ, უფალო, <გარნა> განკითხვით, და ნუ გულის-წყრომით, რაჲთა არა შეგუამცირნე ჩუენ.
გარდაასხ რისხვაჲ შენი წარმართთა ზედა, რომელთა არა გიციან შვნ, და მეუფეთა ზედა რომელთა სახელსა შენსა არა ჰხადეს, რამეთუ შეჭამეს იაკობი და აკასრულეს, და საძოვარი მისი მოაოჴრეს.
