წელსა მას რომელსა შევიდა ტანათან აზოტედ: ოდეს იგი მოივლინა სარნასარისგან მეფისა ასურასტანელთაჲსა: და ჰბრძო მას, და დაიპყრა აზოტჱ.
მაშინ ეტყოდა უფალი ესაიას ძესა ამოსისსა წინაწარმეტყუელსა და ჰრქუა. წარვედ, და განიძარცუე ძაძაჲ ეგე წელთა შენთა, და სანდალნი შენნი წარიჴადენ ფერჴთაგან შენთა. და ყო ეგრე ესაია, და ვიდოდა შიშუელი და უჴამური.
და თქუა უფალმან: ვითარცა ეგე ვალს მონაჲ ჩემი ესაია შიშუელი და უჴამური, სამ წელ იყოს სასწაულები და ნიშები ეგჳპტელთა და ეთიოპელთა ზედა.
რამეთუ ესრეთ მოიყვანნეს მეფემან ასურასტანისამან ტყუენი ეგჳპტელთანი და ეთიოპელთანი ჭაბუკნი და მოხუცებულნი შიშუელნი და უჴამურნი, და გამოაჩინოს სარცხჳნელი ეგჳპტისაჲ.
და მოუძლურდენ უძლურებით ეთიოპელთა მიმართ, რომელთა იგი ესვიდეს მათ ეგჳპტელნი, რომელნი იგი იყვნეს მათა დიდება.
და თქუან დამკჳდრებულთა ამის ჭალაკისათა მას დღესა შინა, აჰა ესერა Page of ms. J: A52v ჩუენ მოსავ ვიყვენით მივლტოლად მათდა შეწევ/ნისათჳს, და მათ ვერ უძლეს განრინებად მეფისაგან ასურასტანელთაჲსა, და ჩუენ ვითარ მე განვერნეთ.
