და იყო მეოთხესა წელსა დარიოს მეფისასა, იყო სიტყუაჲ უფლისაჲ ზაქარიაჲსა მიმართ მეოთხესა თჳსა მის მეცხრისასა, რომელ არს ქასელევი.
და მიავლინა ბეთელდ არასარ და არბოსარგირ მეფემან, და კაცთა მათ მისთა, ლხინებისა-ყოფად მათთჳს უფლისა წინაშე.
და ჰრქუეს მღდელთა მათ სახლსა შინა ღმრთისა ყოვლისა-მპყრობელისასა და წინაწარმეტყუელთა, და თქუეს, უკუეთუ შემოსრულ არს აქა თუესა მას მეხუთესა შესაწირავი სიწმიდისაჲ, ვითარცა იგი ჰყოფდეს მაშინ დ<ღ>ითგან მრავალ წელ.
და იყო სიტყუაჲ უფლისა ძალთაჲსაჲ ჩემდა მომართ და თქუა,
არქუ ყოველსა მას ერსა ქუეყანისასა და მღდელთა; უკუეთუ იმარხვიდეთ, გინა თუ იტყებდეთ მეხუთესა მას, ანუ მეშჳდესა, აჰა ესერა სამეოცი და ათი წელი ნა უკუჱ მარხვაჲ იმარხეთ ჩემთჳს.
და უკუეთუ შჭამეთ გინა სუთ, თქუენვე სამე შჭამეთ და თქუენვე სუთ.
ანუ არა ესე სიტყუანი არიან, რომელთა იტყოდა უფალი ჴელითა წინაწარმეტყუელთა მისთაჲთა, რომელნი იყვნეს პირველ, ოდეს იგი იჱრუსალემი მკჳდრ და იყო და შჱნ, და ქალაქნი მისნი გარემო და მთისანი და ველისანი დამკჳდრებულ და იყვნეს.
და იყო სიტყუაჲ უფლისაჲ ზაქარიაჲსა მიმართ და ჰრქუა,
ამას იტყჳს უფალი ყოვლისა-მპყრობელი და თქუა; საშჯელი სამართალი საჯეთ, და წყალობასა და მოწყალებასა ჰყოფდით კაცად-კაცადი ძმისა მიმართ თჳსისა,
და ქურივსა და ობოლსა და მწირსა და გლახაკსა ნუ ჰმძლავრობთ, და ბოროტსა კაცად-კაცადი ძმისა თჳსისათჳს ნუ მოიჴსენებნ გულითა თჳსითა. Page of ms. J: A25v
ხოლო იგინი ურჩ იქმნნეს/ კრძალვად, და შეაქციეს ზურგი მათი შეურაცხებით, და ყურნი მათნი დაიმძ<ი>მნეს არა სმენად.
და გულნი მათნი დააწესნეს ურჩნი არა სმენად შჯულისა ჩემისა და სიტყჳსა ჩემისა, რომლისათჳს მოავლინა უფალმან ყოვლისა-მპყრობელმან სულითა თჳსითა და ჴელითა წინაწარმეტყუელთაჲთა, რომელნი იყვნეს უწინარესნი, და იყო რისხვაჲ დიდი უფლისა ყოვლისა-მპყრობელისაჲ.
და იყოს ვითარცა იგი თქუა, და არა ისმინეს მისი, ეგრეთვე იგინიცა ღაღადებდენ ჩემდამო, და არა ვისმინო მათი, იტყჳს უფალი ყოვლისა-მპყრობელი.
და განვაგნინე იგინი ყოველთა შორის წარმართ<თ>ა, რომელნი არა იცოდნიან, და ქუეყანაჲ ესე განირყუნეს შემდგომად მათსა ზედა-<მი>მავალთაგან მისთა, და რომელნი იქცევიან მას ზედა, <და> დააწესეს ქუეყანაჲ რჩეული განსარყუნელად. ;
