და მიჩუენა მე უფალმან იესუ მღდელი იგი დიდი მდგომარჱ წინაშე ანგელოზისა მის უფლისაჲსა, და ეშმაკი დგა მარჯუენით მისა მჴდომად მისა.
და ჰრქუა უფალმან ეშმაკსა მას, შეგრისხენინ შენ უფალმან ეშმაკო, და შეგრისხენინ შენ უფალმან, რომელმან იგი გამოირჩია იჱრუსალემი; ანუ არა აჰა ესერა ესე ვითარცა მუგუზი გამოტაცებული ცეცხლისაგან.
და იესუს ემოსა სამოსელი მწიკულევანი, და დგა წინაშე პირსა ანგელოზისა მის.
და მიუგო და ჰრქუა მდგომარეთა მათ მის წინაშე, განსძარცუეთ სამოსელი ეგე მწიკულევანი მაგისგან, და ჰრქუა მას; აჰა ეგერა მოგისჴან შენგან უშჯულოებანი შენნი, და თქუა, შეჰმოსეთ მაგას პოდერჱ.
და დაჰბურეთ ვარშამაგი წმიდაჲ თავსა მისსა, და შეჰმოსეს მას სამოსელი.
და უწამებდა ანგელოზი იგი უფლისაჲ იესუს, და ჰრქუა.
ამას იტყჳს უფალი ყოვლისა-მპყრობელი; უკუეთუ გზათა ჩემთა ხჳდოდი, და ბრძანებათა Page of ms. J: A23r ჩემთა იმარხვიდე შენ, განიკით/ხვიდე სახლსა ჩემსა; და უკუეთუ სცვიდე ეზოსა ჩემსა, მოგცე შენ სლვაჲ შორის მდგომარეთა ამათ.
ისმინე აწ იესუ მღდელმან მაგან დიდმან, შენ და მოყუასთა შენთა, რომელნი სხენან წინაშე პირსა შენსა, რამეთუ კაცნი ნიშის-მსტუარნი არიან, რამეთუ მე აჰა ესერა მოვიყვანო მონაჲ ჩემი, აღმოსავალ სახელი მისი.
რამეთუ ლოდი იგი რომელი მოვეც წინაშე პირსა იესუჲსსა, ერთსა მას ლოდსა შჳდნი თუალნი ასხენ, აჰა ესერა მე მოვთხარო მღჳმჱ, იტყჳს უფალი ყოვლისა-მპყრობელი, და ჴელი შევახო ყოველსა სიცრუვესა მის ქუეყანისასა ერთსა დღესა შინა.
იტყჳს უფალი ყოვლისა-მპყრობელი, მოუწოდენ კაცად-კაცადმან მოყუასსა თჳსსა, და ქუეშჱ ვენაჴსა თჳსსა, და ქუეშჱ ლეღოვანსა თჳსსა.
