TITUS
Armenian NT (Zohrab Bible)
Part No. 70
Previous part

Chapter: 2  
(Բ՜)


Section: 6  
Passage: 2-6 
Verse: 1   Link to gnt   Եւ յաւուրն երրորդի, հարսանիք էին ի Կանա Գալիլեացւոց. եւ անդ էր մայրն Յիսուսի։

Verse: 2   Link to gnt   Կոչեցաւ եւ Յիսուս եւ աշակերտքն նորա ի հարսանիսն։

Verse: 3   Link to gnt   Եւ ի պակասել գինւոյն, ասէ մայրն ցՅիսուս. գինի ոչ ունին։

Verse: 4   Link to gnt   Եւ ասէ ցնա Յիսուս. զի կայ իմ եւ քո՝ կին դու, չեւ է հասեալ ժամանակ իմ։

Verse: 5   Link to gnt   Ասէ մայրն նորա ցսպասաւորսն. որ զինչ ասիցէ ձեզ՝ արասջիք։

Verse: 6   Link to gnt   Անդ էին թակոյկք կճեայք վեց՝ ըստ սրբութեանն հրէից. տանէին մի մի ի նոցանէ մարս երկուս կամ երիս։

Verse: 7   Link to gnt   Ասէ ցնոսա Յիսուս. լցէք զթակոյկսդ ջրով, եւ լցին զնոսա մինչեւ ի վեր։

Verse: 8   Link to gnt   Եւ ասէ ցնոսա. արդ՝ առէք եւ բերէք տաճարապետիդ։ եւ նոքա՝ բերին։

Verse: 9   Link to gnt   Եւ իբրեւ ճաշակեաց տաճարապետն զջուրն գինի եղեալ, եւ ոչ գիտէր ուստի իցէ. բայց սպասաւորքն՝ գիտէին որք արկին զջուրն։ Խօսի ընդ փեսային տաճարապետն,

Verse: 10   Link to gnt   Եւ ասէ. ամենայն մարդ՝ զանոյշ գինի յառաջագոյն պաշտէ. եւ յորժամ արբենան, յայնժամ զյոռին. դու՝ պահեցեր զանոյշ գինիդ մինչեւ ցայժմ։

Verse: 11   Link to gnt   Զայս արար սկիզբն նշանաց Յիսուսի ի Կանա Գալիլեացւոց, եւ յայտնեաց զփառս իւր. եւ հաւատացին ի նա աշակերտքն նորա։

Passage: 2-7 
Verse: 12   Link to gnt   Յետ այսորիկ էջ Յիսուս ի Կափառնաում, ինքն եւ մայր իւր եւ եղբարք իւր. եւ անդ լինէր՝ ոչ բազում ինչ աւուրս։

Verse: 13   Link to gnt   Եւ էր՝ մերձ զատիկն Հրէից, եւ ել Յիսուս յԵրուսաղէմ։

Section: 7  
Verse: 14   Link to gnt   Եւ եգիտ ի տաճարին՝ զի վաճառէին զարջառս եւ զոչխարս եւ զաղաւնիս, եւ զլումայափողսն որ նստէին։

Verse: 15   Link to gnt   Եւ արար խարազան չուանեայ, եւ եհան զամենեսին ի տաճարէն, զոչխարսն եւ զարջառս, եւ զպղինձս հատավաճառացն ցրուեաց, եւ զսեղանսն կործանեաց։

Verse: 16   Link to gnt   Եւ որ զաղաւնիսն վաճառէին՝ ասէ ցնոսա. առէք զայդ աստի, եւ մի առնէք զտուն հօր իմոյ՝ տուն վաճառի։

Verse: 17   Link to gnt   Ապա յիշեցին աշակերտքն նորա՝ թէ գրեալ է. նախանձ տան քո կերիցէ զիս։

Verse: 18   Link to gnt   Պատասխանի ետուն Հրէայքն՝ եւ ասեն ցնա. զինչ նշան ցուցանես դու մեզ՝ զի զայդ առնես։

Verse: 19   Link to gnt   Պատասխանի ետ Յիսուս՝ եւ ասէ ցնոսա. քակեցէք զտաճարդ զայդ, եւ զերիս աւուրս կանգնեցից զդա։

Verse: 20   Link to gnt   Ասեն ցնա Հրէայքն. զքառասուն եւ զվեց ամ շինեցաւ տաճարս այս, եւ դու՝ զերիս աւուրս կանգնես զդա։

Verse: 21   Link to gnt   Բայց նա՝ ասէր վասն տաճարի մարմնոյ իւրոյ։

Verse: 22   Link to gnt   Իսկ յորժամ յարեաւն ի մեռելոց, յիշեցին աշակերտքն նորա, թէ այս է զոր ասացն. եւ հաւատացին գրոյն՝ եւ բանին զոր ասաց Յիսուս։

Passage: 3-1 
Verse: 23   Link to gnt   Եւ իբրեւ էր յԵրուսաղէմ ի զատկին ի տօնի, բազումք հաւատացին յանուն նորա. զի տեսանէին զնշանսն՝ զոր առնէր։

Verse: 24   Link to gnt   Բայց ինքն Յիսուս ոչ հաւատայր զանձն նոցա. քանզի ինքն գիտէր զամենայն.

Verse: 25   Link to gnt   Եւ զի ոչ էր պիտոյ՝ եթէ ոք վկայեսցէ վասն մարդոյ. զի ինքն իսկ՝ գիտէր զինչ կրէր ի մարդն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.