TITUS
Armenian NT (Zohrab Bible)
Part No. 24
Previous part

Chapter: 24  
(Ի՜Դ)


Passage: 7-7 
Verse: 1   Link to gnt   Եւ ելեալ արտաքոյ Յիսուս ի տաճարէն՝ գնայր. եւ մատեան աշակերտքն ցուցանել նմա զշինուածս տաճարին։

Verse: 2   Link to gnt   Եւ նա՝ պատասխանի ետ՝ եւ ասէ ցնոսա. տեսանիցէք զայդ ամենայն, ամէն ամէն ասեմ ձեզ. ոչ մնասցէ այդր քար՝ ի քարի վերայ որ ոչ քակտեսցի։

Section: 57  
Verse: 3   Link to gnt   Եւ մինչդեռ նստէր ի լերինն ձիթենեաց, մատեան առ նա աշակերտքն առանձինն՝ եւ ասեն. ասա մեզ՝ երբ լինիցի այդ, եւ կամ զինչ նշան իցէ քոյոյ գալստեանն, եւ վախճանի աշխարհիս։

Verse: 4   Link to gnt   Պատասխանի ետ Յիսուս՝ եւ ասէ ցնոսա. զգոյշ լերուք՝ գուցէ ոք զձեզ խաբիցէ.

Verse: 5   Link to gnt   Զի բազումք գայցեն յանուն իմ, եւ ասիցեն՝ թէ ես եմ Քրիստոսն, եւ զբազումս մոլորեցուցանիցեն։

Verse: 6   Link to gnt   Լսելոց էք պատերազմունս՝ եւ զհամբաւս պատերազմաց. զգոյշ լերուք՝ մի խռովեսջիք, զի պարտ է լինել այնմ ամենայնի, այլ չեւ է կատարած։

Verse: 7   Link to gnt   Յարիցէ ազգ յազգի վերայ, եւ թագաւորութիւն ի թագաւորութեան. եւ եղիցին սովք եւ սրածութիւնք, եւ սասանութիւնք ի տեղիս տեղիս։

Verse: 8   Link to gnt   սակայն եւ այն ամենայն՝ սկիզբն է երկանց։

Verse: 9   Link to gnt   Յայնժամ մատնեսցեն զձեզ ի նեղութիւն, եւ սպանանիցեն զձեզ. եւ եղիջիք ատեցեալք յամենայն ազգաց վասն անուան իմոյ։

Verse: 10   Link to gnt   Եւ յայնժամ գայթագղեսցեն բազումք, եւ զմիմեանս մատնեսցեն՝ եւ ատեսցեն զմիմեանս։

Verse: 11   Link to gnt   Եւ բազում սուտ մարգարէք յարիցեն, եւ զբազումս մոլորեցուսցեն։

Verse: 12   Link to gnt   Եւ վասն բազմանալոյ անօրէնութեան, ցամաքեսցի սէր բազմաց։։

Verse: 13   Link to gnt   Բայց որ համբերեացն ի սպառ, նա կեցցէ։

Verse: 14   Link to gnt   Եւ քարոզեսցի աւետարանս արքայութեան ընդ ամենայն տիեզերս՝ ի վկայութիւն ամենայն հեթանոսաց. եւ ապա եկեսցէ կատարած։

Verse: 15   Link to gnt   Արդ՝ յորժամ տեսանիցէք զպղծութիւն աւերածոյն. որ ասացեալն է ի ձեռն դանեէլի մարգարէի. զի կայցէ ի տեղւոջն սրբութեան, որ ընթեռնուն՝ ի միտ առցէ։

Verse: 16   Link to gnt   Յայնժամ որ ի հրէաստանի իցեն՝ փախիցեն ի լերինս.

Verse: 17   Link to gnt   Եւ որ ի տանիս կայցէ, մի իջցէ առնուլ ինչ ի տանէ իւրմէ.

Verse: 18   Link to gnt   Եւ որ յանդի իցէ, մի դարձցի յետս առնուլ զձորձս իւր։

Verse: 19   Link to gnt   Բայց վայ իցէ յղեաց եւ ստընտուաց յաւուրսն յայնոսիկ։

Verse: 20   Link to gnt   Յաղօթս կացէք՝ զի մի լինիցի փախուստն ձեր ձմեռանի, եւ մի ի շաբաթու։

Verse: 21   Link to gnt   Զի եղիցի յայնժամ նեղութիւն մեծ, որպիսի ոչ եղեւ ի սկզբանէ արարածոց աշխարհի մինչեւ ցայժմ, եւ ոչ այլ լիցի։

Verse: 22   Link to gnt   Եւ եթէ ոչ կարճէին աւուրքն այնորիկ, ոչ ապրէր ամենայն մարմին. բայց վասն ընտրելոցն՝ կարճեսցին աւուրքն այնոքիկ։

Verse: 23   Link to gnt   Յայնժամ՝ թէ ոք ասիցէ ձեզ՝ ահաւասիկ աստ է Քրիստոսն կամ անդ, մի հաւատասցէք։

Verse: 24   Link to gnt   Զի յարիցեն սուտ Քրիստոսք եւ սուտ մարգարէք. եւ տայցեն նշանս մեծամեծս եւ արուեստս, մինչ մոլորեցուցանել՝ թէ հնար ինչ իցէ՝ եւ զընտրեալսն։

Verse: 25   Link to gnt   Ահա յառաջագոյն ասացի ձեզ։

Verse: 26   Link to gnt   Ապա թէ ասիցեն ձեզ. ահաւանիկ յանապատի է, մի ելանիցէք. եւ թէ ահա՝ յըշտեմարանս է. մի հաւատայցէք։

Verse: 27   Link to gnt   Զի որպէս փայլակն՝ որ ելանէ յարեւելից՝ եւ երեւի մինչեւ յարեւմուտս, այնպէս եղիցի գալուստն որդւոյ մարդոյ։

Verse: 28   Link to gnt   Զի ուր գէշն իցէ. անդր ժողովեսցին արծուիք,

Verse: 29   Link to gnt   Վաղվաղակի յետ նեղութեան աւուրցն այնորիկ՝ արեգակն խաւարեսցի եւ լուսին՝ ոչ տացէ զլոյս իւր. եւ աստեղք՝ անկցին յերկնից եւ զօրութիւնք երկնից՝ շարժեսցին։

Verse: 30   Link to gnt   Եւ ապա երեւեսցի նշան որդւոյ մարդոյ յերկինս. եւ յայնժամ կոծեսցին ամենայն ազգք երկրի, եւ տեսցեն զորդի մարդոյ եկեալ ի վերայ ամպոց երկնից զօրութեամբ եւ փառօք բազմօք։

Verse: 31   Link to gnt   Եւ առաքեսցէ զհրեշտակս իւր փողով մեծաւ, եւ ժողովեսցեն զընտրեալս նորա ի չորից հողմոց՝ ի ծագաց երկնից մինչեւ ի ծագս նոցա։

Verse: 32   Link to gnt   Ի թզենւոյ անտի ուսարուք զառակն. զի յորժամ նորա ոստքն կակղասցին եւ տերեւն ցըցուիցի, գիտէք թէ մերձ է ամառն։

Verse: 33   Link to gnt   Նոյնպէս եւ դուք՝ յորժամ տեսանիցէք զայս ամենայն, գիտասջիք թէ մերձ է ի դուրս։

Verse: 34   Link to gnt   Ամէն ասեմ ձեզ՝ եթէ ոչ անցցէ ազգս այս, մինչեւ այս ամենայն եղիցի,

Verse: 35   Link to gnt   Երկինք եւ երկիր անցցեն, եւ բանք իմ մի անցցեն։

Section: 58  
Verse: 36   Link to gnt   Բայց վասն աւուրն այնորիկ եւ ժամու, ոչ ոք գիտէ, ոչ հրեշտակք երկնից, եւ ոչ սրդի՝ բայց միայն հայր։

Verse: 37   Link to gnt   Այլ որպէս աւուրքն նոյի, նոյնպէս եղիցի գալուստն որդւոյ մարդոյ։

Verse: 38   Link to gnt   Զի որպէս էին յաւուրսն որ յառաջ քան զջրհեղեղն, ուտէին եւ ըմպէին, կանայս առնէին եւ արանց լինէին, մինչեւ յօրն՝ յորում եմուտ Նոյ ի տապանն.

Verse: 39   Link to gnt   Եւ ոչ գիտացին՝ մինչեւ եկն ջրհեղեղն եւ եբարձ զամենեսին, այնպէս եղիցի եւ գալուստն որդւոյ մարդոյ։

Verse: 40   Link to gnt   Յայնժամ թէ իցեն երկու յագարակի, մին առնուսցու, եւ մեւսն թողուցու։

Verse: 41   Link to gnt   Եւ եթէ երկու աղայցեն ի մի երկանս, մին առնուցու եւ մեւսն թուուցու։

Verse: 42   Link to gnt   Արթուն կացէք՝ զի ոչ գիտէք յորում ժամու Տէրն ձեր գայ։

Verse: 43   Link to gnt   Զայն գիտասջիք, եթէ գիտէր տանուտէր՝ յորում պահու գող գայ, սկէր՝ եւ ոչ տայր ական հատանել զտանն իւրոյ։

Verse: 44   Link to gnt   Վասն այսորիկ եւ դուք՝ եղերուք պատրաստք, զի յորում ժամու ոչ ակնունիցիք՝ գայ որդի մարդոյ։

Verse: 45   Link to gnt   Իսկ ով իցէ հաւատարիմ ծառայ եւ իմաստուն, զոր կացոյց տէր իւր ի վերայ ծառայից իւրոց՝ տալ նոցա կերակուր ի ժամու։

Verse: 46   Link to gnt   Երանի իցէ ծառային այնմիկ՝ զոր եկեալ տէրն գտանիցէ արարեալ այնպէս։

Verse: 47   Link to gnt   Ամէն ասեմ ձեզ. զի ի վերայ ամենայն ընչից իւրոց կացուսցէ զնա։

Verse: 48   Link to gnt   Ապա թէ ասիցէ ծառայն չար՝ ի սրտի իւրում, տէր իմ յամէ զգալ.

Verse: 49   Link to gnt   եւ սկսանիցի հարկանել զծառայակիցս իւր. ուտիցէ եւ ըմպիցէ ընդ արբեցողս.

Verse: 50   Link to gnt   Գայցէ տէր ծառային այնորիկ՝ յաւուր յորում ոչ ակն ունիցի. եւ ի ժամու յորում ոչ գիտիցէ.

Verse: 51   Link to gnt   Եւ կտրեսցէ զնա ընդ մէջ, եւ զբաժին նորա ընդ կեղծաւորս դիցէ, անդ եղիցի լալ եւ կրճել ատամանց։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.