TITUS
Svan Prose Texts I (Upper Bal)
Part No. 16
Previous part

Text: 16 
Page of edition: 17 
Line of edition: 12 
16. ჯგუ̂იბ


Line of edition: 13       მესტია̄ლა̈რს ხაზნახ თებრუ̂ა̈ლისგა ღჷნ, ხედუ̂ა̈̄ჲს ხაჟხა ჯგუ̂იბ.
Line of edition: 14    ჯგუ̂იბ ლა̈დღიშდ მესტია ჩუ მეყუ̂ლე ლი ისგდ: აშხუ̂ა̈ნ ლიხ ლაღმა̈რ,
Line of edition: 15    მა̈რგია̄ნა̈რ ი ლა̈მბა̄შნა ლაღმარეშ ი მა̈რგია̄ნრეშ, მე̄რმახა̈ნ-მესტია̈̄
Line of edition: 16    მე̄რმე ლექუ̂ა̈̄ სოფლა̈რ.

Line of edition: 17       ჯგუ̂იბდ აშხუ̂ ნაგზა სგუ̂ებინ ლაღმა̈რ ი მა̈რგია̄ნა̈რ იბნეხ ლაღმი
Line of edition: 18    სუ̂იფისგა მუსი მურყუ̂მა̈ ლიგემს. მურყუ̂ამს მა̈̄ნკუ̂ი იხუ̂ნი ეშხუ მა̄რე,
Line of edition: 19    ხედუ̂ა̈̄ჲს ხეხუ̂ ღანაუ̂ ხა̄რ, ეჯღა ერე "ალას ესერ ხოხა ჭყინტი ლითნე",.
Line of edition: 20    ლიხუ̂ნის ლა̈̄თშუ̂ იჩოხ უფგოშ. მურყუ̂ამ ლაგა̈მჟი მუხუ̂ნის ლახ
Line of edition: 21    ჩუ̂ა̈ცხრეხ, მა̈გ ხატყციხ. ლაგა̈მჟი ტუ̄ლიხ: "მუხუ̂ნი, მუხუ̂ნი"ს ი ხატყციხ
Line of edition: 22    ყუ̂აბა̈რს

Line of edition: 23       მუყუ̂ამ ლი ლჷსკრიბა მუსიშ, ნე̄სგაისგა ხონხენიხ ზექა̈რს ლაბგად.
Line of edition: 24    მურყუ̂მა̈ ნაკლა̈თხი ლი ჲარუ̂ მა̄რე̄მი ლაგენ, ნა̈ნგრან -- ჲეშდ ჴა̈ლ.
Line of edition: 25    მურყუ̂მა̈̄ ლიგემს ერ ქა̄ზგჷრეხ, ეჩქას აშხუ̂ ფოყხა̈ნ ისგთე̄სგა სგა
Line of edition: 26    ხა̈ქუ̂ცეხ მურყუ̂ამს ჭერი ნანგრე̄მი ნაზიმს. ეჩე̄სგა ჭერს ჟ'აკჩეხ ეჩჟი̄ნ,
Line of edition: 27    ერე ჭერ ხეხო̄ლდე̄დს ნე̄სგაჟი. ეჩანღო მუსს სგა ხაგემხ, ჭერს ჩუ̂ა̈ნგჭუ̂ეხ
Line of edition: 28    ბჷგიდ. ჭერი ნაკლა̈თხი ლი ეშდოხუ̂იშდ ჴა̈ლ. ჭერს კა̈ცხჟი ხალჯენიხ
Line of edition: 29    ჯუ̂ა̈რს. ჯგუ̂იბდ აშხუ̂ ლადაღშუ̂ სგუ̂ებინ ალას ამჟი ქა̄ზგჷრეხ.

Line of edition: 30       ჯგუ̂იბ ლადაღ მესტია მურგუ̂ა̈ლ, ხოჩა მახე ღუ̂ა̈ჟ ი ხოჩა ზურა̄ლ,
Line of edition: 31    მა̈გ ინზუ̂ე̄რი. აშხუ̂ ფოყხა̈ნ ლიხ ლაღმა̈რ ი მა̈რგია̄ნა̈რ, მე̄რმა ფოყხა̈ნ
Line of edition: 32    ლჷგხ მე̄რმე სოფლა̈რ -- ლექუ̂ა̄უ̂იშა̈რ (ლექუ̂ა̄უ̂იშა̈რს ხატუ̄ლიხ:
Line of edition: 33    ლანჩუ̂ლა̈რს, სეტა̈რს ი ლეხთაგა̈რს). ლაღმა̈რ ლექუ̂ა̄უ̂იში მახე ღუ̂აჟა̈რს
Line of edition: 34    სგა იღუ̂რეუ̂იხ საყდა̈რთე̄სგა (მაცხუ̂ა̈რთე̄სგა). იმგჷნეხ, ერე ხოშა ლაღა̈ლ
Line of edition: 35    მა̈გ სგა̈̄ნჩუ̄ნ ა̈რიხ, ეჩქას ლაღმა̈რ ჩუ̂აკლიხ საყდრი ყო̄რა̈ლს ი
Page of edition: 18  Line of edition: 1    ხობნეხ ჯუგუ̂მოშ ლიყერს ლექუ̂ა̈უ̂იშა̈რს, ლექუ̂ა̈უ̂იშა̈რ დეშ ხობდა̈უ̂იხ
Line of edition: 2    ლიყერს. ამჟი ჩუ ხო̄გხ ჯგუ̂იბ, ლაღმა̈რ ერ ხატყციხ ლექუ̂ა̄უ̂იშა̈რს,
Line of edition: 3    ეჩქა ამჟი ტუ̄ლიხ-ა: "ჯგუ̂იბ, ჯგუ̂იბ, ჯგუ̂იბ!" ხუ̂ა̈ჲ ნაჯგუ̂ა̈̄მბუნღო ი
Line of edition: 4    ხოლა̄მდ ნა̈ჴიდუნღო ლექუ̂ა̈უ̂იშა̈რს ქა ფიშუ̂დეხ, ეჩანღო ლაღმა̈რ ქა
Line of edition: 5    ღჷრიხ მურყუ̂ამთექა ი ჩუ იგნიხ მურყუ̂ამცახა̈ნ. ამ დრა̈უ̂ჟი ლაღმა̈რ
Line of edition: 6    მურყუ̂ამს ხაცხიპხ გირკიდ ი ტუ̄ლიხ ალჲა̈რი̄ "კუ̂ირია"ს. გირკიდ
Line of edition: 7    ლიცხეპს საყდრიშ ი მურყუ̂მა̈შ აშხუ̂ დრო̄უ̂ს აზგჷრეხ. ეჩუნღო ლაღმა̈რ
Line of edition: 8    ლჷმა̄რე იგნიხ მურყუ̂ამცახა̈ნ, ლექუ̂ა̄უ̂იშა̈რ სგა ხოძგრენიხ ლაღმა̈რს.
Line of edition: 9    იბნი ბჷგიდ ლიბუ̄ნძგუ̂ა̈̄ლ. ალას ჟი ხემშერიხ, ეჩანღო ლექუ̂ა̄უ̂იშა̈რს
Line of edition: 10    ხაკუხ მურყუ̂ამთეჟი ლი̄ზი, ლაღმარე უფგოშ ხეკუ̂ფხენიხ მურყუ̂ამს,
Line of edition: 11    ალას ლაღმა̈რ ხეწდენიხ ი ჩუ̂აკუ̂ა̈ნეხ. უ̂ეშგიმპილს ლახე ჟი დოშ ხო̄ზიხ
Line of edition: 12    მურყუ̂ამთეჟი, ეჩქას სერ ნა̈ბოშ ფიშუ̂დეხ აშხუ̂ მა̈რა, ალ მა̄რე
Line of edition: 13    ხეკუ̂ეს ა̈თჭემს ჭერს კა̈ცხთეჟი. ლახ დოშ ხეჭმენი, ეჩქას მე̄რმა ფიშუ̂დეხ,
Line of edition: 14    კა̈ცხთეჟი ჲერუ̂ა̈̄ჲ ჟ'ა̈თჭემნი, ეჯა ჟი ხა̈ყუ̂ჩე ჯუ̂ა̈რს ი ლექუ̂ა̄უ̂
Line of edition: 15    აკუ̂ა̄ნე. ეჩუნღო ხოჩჷდენიხ ჯუ̂ა̈რი ლიღე̄შგა̈̄ლ: "ხედუ̂ა̄ჲ ფოყ მოშ ოთღინე,
Line of edition: 16    ეჩი̄ ფოყხა̈ნ ესერ ხოჩა ზა̈ჲ ჴედნი" ჭერი მეჭემ ჩუ ტეხნი. ეჩუნღო
Line of edition: 17    იბნეხ ლექუ̂ა̄უ̂იშა̈რ მურყუ̂მა̈ ლირღუ̂ეს, მარე ალას ლაღმა̈რ დე̄მ ხა̈მბეხ
Line of edition: 18    ი ხატყციხ ბჷგიდ კიცხა̈რს ი ყუ̂აბა̈რს, ხუ̂ა̈ინ ჩუ რიღუ̂ეხ ი ხუ̂ა̈ინ -- დეშ.
Line of edition: 19    ლექუ̂ა̄უ̂იშა̈რ ნა̈ყირუ̂ს დე̄მ იგხოლეხ ი დე̄მ ხა̈ტხეხ, ეჯღა ერე წეს მა̄დ ლი.
Line of edition: 20    ნა̈ბზუ̂ა̈ პილთე იბნი ამჩუ ლიხი̄რულ ი ლისუ̂ბი-ლიღრა̈̄ლ, ალას
Line of edition: 21    ქა̄ზგჷრეხ, ყჩქანღო ლაღმა̈რ ა̈წჰიხ ლექუ̂ა̈უ̂იშრე მახა ღუ̂აჟა̈რს ი ხოშა̈̄ლს,
Line of edition: 22    ჩუ̂აშდმა̈̄ლიხ ი ფიშუ̂დეხ ეჯჟი.

Line of edition: 23          (მესტია)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.