TITUS
Slovo o polku Igoreve (critical ed.)
Part No. 3
Previous part

Chapter: 3 
Chapter 3 Link to igorsh


Paragraph: 14    О, Бояне, соловию старого врѣмене <веремене>! абы ты сиѣ пълкы въщекоталь, скачя, славию <соловию>, мысльну дрѣву <дереву>, лѣтая умъмь подъ облакы <оболокы>, съвивая славы оба полы сего врѣмене <веремене>, рищя въ тропу Трояню чрѣсъ <чересъ> поля на горы.

Paragraph: 15    Пѣти было пѣснь Игореви того вънуку:

Paragraph: 16    "Не буря соколы занесе чрѣсъ <чересъ> поля широкая; галицѣ стады бѣжять къ Дону Великому."

Paragraph: 17    Чили въспѣти было, вѣщии Бояне, Велесовъ вънуче:

Paragraph: 18    Комони ръжють за Сулою - звьнить слава въ Кыевѣ; трубы трубять въ Новѣ-градѣ <-городѣ> - стоять стязи въ Путивли; Игорь жьдеть мила брата Вьсеволода.

Paragraph: 19    И рече ему буи турь Вьсеволодъ:

Paragraph: 20    "Одинъ брать, одинъ свѣтъ свѣтьлыи ты, Игорю: оба есвѣ Святославичя!

Paragraph: 21    "Седьлаи, брате, своѣ бързыѣ комонѣ!

Paragraph: 22    "А мои ти готови, оседьлани у Курьска на переди.

Paragraph: 23    "А мои ти Куряне - съвѣдоми къмети <*къметие>: подъ трубами повити, подъ шеломы възлелѣяни, коньць копия въскърмлени.

Paragraph: 24    "Пути <*путие> имъ вѣдоми, яругы имъ знаемы, луци у нихъ напряжени, тули отворени, саблѣ изъострены.

Paragraph: 25    "Сами скачють акы сѣрии вълци въ поли, ищюче себѣ <собѣ> чьсти, а кънязю славы."



Next part


This text is part of the TITUS edition of Slovo o polku Igoreve (critical ed.).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.