TITUS
Book: PT 
Corpus of Pahlavi Texts

On the basis of the edition by
Jamaspji Dastur Minocherji Jamasp-Asana,
Pahlavi Texts,
[reedited with] Transcription [and] Translation
[by] Said Orian,
Tehran 1992
entered by J. Gippert,
Frankfurt, 1997;
corrections and improvements by Carlo Cereti,
Vienna, 1997,
and Thomas Jügel,
Frankfurt, 2007-2008;
TITUS version by Jost Gippert,
Frankfurt a/M, 28.2.1998 / 22.6.1998 / 26.9.1999 / 1.6.2000 / 23.11.2002 / 18.8.2008






Page: 200 
Text: Ay.Zar.  
[<ayādgār ī zarērān>]


[pad nām ī dādār ohrmazd]




Sentence: _     pad nām ī dādār ohrmazd ud murwāg jahišn ī nēk, tan drustīh ud dagr-zīwišnīh har wehān ud frārōn kunišnān, nām čišt ōy kē rāy nibēsīhēd.

Sentence: 1     ēn ayādgār ī zarērān xwānēnd, pad ān gāh nibēšt ka wištāsp-šāh abāg pusarān ud brādarān, wāspuhragān ud ham harzān ī xwēš ēn dēn ī abēzag ī māzdēsnān az ohrmazd padīrift.

Sentence: 2     ud pas arjāsp <ī> xiyōnān xwadāy azd mad kū wištāsp-šāh abāg pusarān, brādarān ud wāspuhragān ud ham harzān ī xwēš ēn dēn ī abēzag māzdēsnān az ohrmazd padīrift.

Sentence: 3     ēg-išān garān dušxwārīh būd.

Sentence: 4     u-šān wīdrafš ī jādūg ud nām-xwāst ī hazārān abāg dō bēwar spāh ī wizīdag pad bayaspānīh ō ērān-šahr frēstīd.

Sentence: 5     ud pas jāmāsp ī pēšēnīgān sālār zūd andarōn andar šud, u-š ō wištāsp-šāh guft kū az arjāsp ī xiyōnān xwadāy dō Page: 201  frēstag āmad kē andar hamāg šahr ī xiyōnān az awēšān hu-čihr-tar nēst.

Sentence: 6     ēk wīdrafš jādūg ud dudīgar nām-xwāst ī hazārān, abāg dō bēwar spāh ī wizīdag abāg dārēnd ud frawardag pad dast dārēnd ud gōwēnd kū-mān andar ō pēš ī wištāsp-šāh hilēd.

Sentence: 7     wištāsp-šāh guft kū-šān andar ō pēš hilēd.

Sentence: 8     ud andar šud hēnd ud ō wištāsp-šāh namāz burd hēnd ud frawardag bē dād hēnd.

Sentence: 9     ābrāhēm ī dibīrān mahist abar pāy ēstād ud frawardag pad buland xwand {!}.

Sentence: 10     ud abar frawardag ēdōn nibēšt ēstād kū-m ašnūd kū ašmā bayān ēn dēn abēzag ī māzdēsnān az ohrmazd padīrift ud agar nē ān rāy (abāz) dārēd, ka amā garān zyān ud dušxwārīh az-iš šayēd būdan.

Sentence: 11     bē agar ašmā bayān sahēd ēn dēn ī abēzag hilēd, abāg amā ham-kēš bawēd ēg-itān pad xwadāyīh parastēm, ēg-itān dahēm sāl pad sāl was zarr was sēm ud was asp nēk ud was gāh šahryārīh.

Sentence: 12     ud agar ēn dēn bē nē hilēd ud abāg amā ham-kēš nē bawēd ēg-itān abar rasēm, xwēd xwarēm ud hušk sōzēm ud čahār-pāy ud dō-pāy az šahr wardag gīrēm Page: 202  ud u-tān pad bandag ī garān ud dušxwārīh kār framāyēm.

Sentence: 13     pas wištāsp-šāh ka-šān saxwan ašnūd garān dušxwārīh būd.

Sentence: 14     ud pas ān tahmag spāhbed ī nēw zarēr čiyōn-š dīd kū wištāsp-šāh nihīg būd zūd andarōn andar sūd.

Sentence: 15     ta-š ō wištāsp-šāh guft kū agar ašmā bayān sahēd man ēn frawardag passox framāyēm kardan.

Sentence: 16     wištāsp-šāh framān dād kū frawardag passox kun.

Sentence: 17     ud ān tahm spāhbed ī nēw zarēr frawardag passox ōwōn framūd kardan kū az wištāsp-šāh ī ērān dahibed ō arjāsp ī xiyōnān-šāh drōd.

Sentence: 18     pad fradomīh nē amā ēn dēn abēzag hilēm ud abāg ašmā ham-kēš nē bawēm ud amā ēn dēn abēzag az ohrmazd padīrift ud bē nē hilēm ud bē ašmā dudīgar māh anōš xwarēm.

Sentence: 19     anōh pad hutōs ī razūr ud murw ī zarduštān kē nē kōf ī borz ud nē war zofr, bē pad ān dašt ī hāmōn aspān nēw Page: 203  payān wizārišn.

Sentence: 20     ašmā az ānōh āyēd tā amā az ēdar āyēm ud ašmā amā wēnēd, amā ašmā wēnēm.

Sentence: 21     u-tān nimāyēm kū čiyōn zad bawād dēw az dast <ī> yazdān.

Sentence: 22     ābrāhēm ī dibīrān mahist frawardag bē āwišt ud wīdrafš jādūg nām-xwāst ī hazārān frawardag bē padīrift ud ō wištāsp-šāh namāz burd, bē raft hēnd.

Sentence: 23     ud pas wištāsp-šāh ō zarēr ī brād framān dād kū pad garān bašn, kōf ī borz ātaxš framāy kardan.

Sentence: 24     šahr azd kun ud bayaspān azd kun kū bē moγ-mard kē āb ud ātaxš ī wahrām yazēnd ud pahrēzēnd enyā az dah sāl tā haštād sālag ēč mard pad xānag ī xwēš bē ma pāyēd.

Sentence: 25     ēdōn kunēd kū dudīgar māh ō dar ī wištāsp-šāh āyēd ud agar nē ka āyēd <ud> ān dār abāg xwēš tan bē nē āwarēd ānōh pad dār abar framāyēm kardan.

Sentence: 26     pas har mardōm az bayaspān azd mad ō dar ī wištāsp-šāh Page: 204  āmad hēnd pad ham-spāh ud tumbag zad ud nāy pazdēnd ud gāwdumb wāng kunēnd.

Sentence: 27     u-š kārawān ēwarz kunēnd ud pīlbān pad pīl rawēnd ud stōrbān pad stōr rawēnd ud wardēn-dār pad wardēn rawēnd.

Sentence: 28     was ēstēd šif(a)rg (?) ī rōdastahm was kantigr ī purr tigr ud was zrēh ī rōyēn ud was zrēh ī čahār-kard.

Sentence: 29     ud kārawān ī ērān-šahr ēdōn bē ēstēnd, ka wāng bē ō asmān šawēd ud pattān bē ō dušox šawēd.

Sentence: 30     pad rāh kū šawēnd widarg ēdōn bē brīnēnd, abāg āb bē šōbēnd ī tā ē māh āb xwardan nē šāyēd.

Sentence: 31     tā panjāh rōz rōšn nē bawēd murw-iz nišēm nē windād bē ka ō aspān bašn, nēzag-iz tēx ayāb ō kōf ī sar borz nišīnēnd, az gard ud dūd šab ud rōz nē paydāg.

Sentence: 32     pas wištāsp-šāh ō zarēr ī brād framān dād kū wiyān kun tā ērān-iz wiyān kunēnd tā amā-iz bē dānēm kū šab ast ayāb rōz.

Sentence: 33     pas zarēr az wardēn bērōn bē āmad ud wiyān kard ud ērān wiyān kard hēnd ud gard <ud> dūd bē nišast, star ud māh pad asmān paydāg būd.

Sentence: 34     pas zanēnd sē-sad mēx ī āhanēn ī padiš bandēnd sē-sad Page: 205  arwes kē har arwēs-ē sē sad darāγ ī zarrēn padiš āgust ēstēd.

Sentence: 35     pas wištāsp ō kay-gāh nišīnēd ud jāmāsp ī bīdaxš ō pēš xwānēd, gōwēd kū man dānēm kū tō jāmāsp dānāg ud wēnāg <ud> šnāsag hē.

Sentence: 36     ēn-iz dānē kū ka dah rōz wārān āyēd čand srešk ō zamīg ud čand srešk abar srešk āyēd.

Sentence: 37     ud ēn-iz dānē, kū urwarān wiškofēd, kadām ān gul ī rōz wiškofēd ud kadām ān ī šab, kadām ān ī fradāg.

Sentence: 38     ēn-iz dānē kū mētarag (?) kadām ān āb dārēd ud kadām ān nē dārēd.

Sentence: 39     ēn-iz dāne kū fradāg rōz čē bawēd andar ān azdahāg razm ī wištāspān, az pusarān ud brādarān ī man kay-wištāsp-šāh kē zīwēd ud kē mīrēd.

Sentence: 40     gōwēd jāmāsp bīdaxš kū kāč ka man az mādar nē zād hēm ayāb ka zād hēm pad xwēš baxt pad rahīgīh bē murd hēm ayāb murw-ē būd hēm ō drayāb ōbast hēm ayāb ašmā bayān ēn frašn az man nē pursīd hē, bē ka-tān pursīd hē ēg-im nē kāmēm bē ka rāst gōwēm.

Page: 206 
Sentence: 41     agar ašmā bayān sahēd dašn ī xwēš grōwān barēd pad xwarrah ī ohrmazd, bē dēn ī māzdēsnān ud gyān <ī> zarēr ī brād sōgand xwarēd kū šamšēr ī pōlāwadēn ud šēd ī tēz ērwār tā ō druwāsp sē bār bē māl kū-t nē zanēm ud nē ōzanēm ud nē (tō-iz) pad dēbahr dārēm tā gōwēd kū čē bawēd andar ān razm ī wištāspān.

Sentence: 42     pas gōwēd wištāsp-šāh kū pad xwarrah ī ohrmazd ud dēn ī māzdēsnān ud gyān <ī> zarēr brād sōgand xwarēm kū-t nē zanēm ud nē ōzanēm ud nē tō-iz pad dēbahr darēm.

Sentence: 43     pas gōwēd jāmāsp bīdaxš kū agar ašmā bayān sahēd ēn wuzurg spāh ērān-šahr az mašk ī pādixšā ē tigr-yāb frāztar framāyēd nišāstan.

Sentence: 44     pas wištāsp-šāh ān wuzurg spāh ērān-šahr az mašk ī abarzēn ī wištāspān ē tigr-yāb frāztar framāyēd nišast<(an)>.

Sentence: 45     pas gōwēd jāmāsp ī bīdaxš kū ōy weh kē az mādar nē zād ayāb ka zād murd ayāb az rahīgīh ō paymān nē Page: 207  mad.

Sentence: 46     fradāg rōz ka pahikōbēnd nēw pad nēw ud warāz pad warāz, was mād abāg puhr (abē-puhr) was (puhr) abē-pid ud was pid abē-puhr ud was brād abē-brād ud was zan šōy-ōmand abē-šōy bawēnd.

Sentence: 47     was āyēnd bārag ērānagān kē wišād, arwand rawēnd andar ān xiyōnān xwadāy xwāhēnd ud nē windēnd.

Sentence: 48     ōy weh kē nē wēnēd ān wīdrafš jādūg ka āyēd ud razm tāzēd ud wināh kunēd ud ōzanēd tahm spāh-bed zarēr ī tō brād, u-š bārag bē barēnd ān syā āhanēn sumb ī zarēr bārag ud ōy nām-xwāst ī hazārān kē āyēd ud razm tāzēd ud wināh kunēd, ōzanēd ān pād-husro ī ardāy māzdēsnān ī tō brād, u-š bārag-iz bē barēnd ān zarrēn grī-kaft, ōy nām-xwāst ī hazārān kē āyēd ud razm tāzēd ud wīnāh kunēd ud ōzanēd ān frašāward ī tō pus ī tal zād pad nēm-wēčag kay-bāg, ud tō-iz az abārīg frazandān dōst-tar.

Sentence: 49     u-t az pus tā brād wīst-ud-sē murd bawēnd.

Sentence: 50     pas wištāsp-šāh ka-š ān saxwan āšnūd az farroxān-gāh ō zamīg ōbast.

Sentence: 51     u-š pad hōy dast kārd ud pad dašn dast šamšēr gīrēd ud Page: 208  tag ō jāmāsp kunēd ud gōwēd ku ma drust awar sahm-spār ī jādūg, čē tō mād jādūg u-t pid drōzan būd.

Sentence: 52     u-t ān guft, nē bawēd, bē ka-m pad xwarrah ī ohrmazd ud dēn ī māzdēsnān ud gyān ī zarēr ī brād sōgand <nē> xward hēm ēg-im pad ēn dō tēx ī šamšēr kārd sar brīd bē zamīg abgand hēm.

Sentence: 53     pas jāmāsp gōwēd kū agar ašmā bayān sahēd az ēn xāk abar āxēzēd ud abāz ō kay-gāh nišīnēd, čē šāyēd būdan ka šāyēd būdan, ka ēn man guft bawād.

Sentence: 54     wištāsp-šāh nē abar āxēzēd ud nē abāz nigerēd.

Sentence: 55     pas ān tahm spāh-bed nēw zarēr kē šawēd gōwēd kū agar ašmā bayān az ēn xāk abar āxēzēd ud abāz ō kay-gāh nišīnēd, čē man fradāg šawēm abāg ān ī xwēš zōr xiyōn pānzdah bēwar ōzanēm.

Sentence: 56     wištāsp-šāh nē āxēzēd nē abāz nigerēd.

Sentence: 57     pas ān pād-husraw ī ardāy māzdesnān kē šawēd ud gōwēd kū agar ašmā bayān sahēd az ēn xāk abar āxēzēd ud abāz ō kay-gāh nišīnēd, čē man fradāg rōz šawēm {!} ud ōzanēm abāg ān ī xwēš zōr xiyōn čahārdah.

Sentence: 58     wištāsp-šāh nē abar āxēzēd ud nē abāz nigerēd.

Page: 209 
Sentence: 59     pas ān frašāward ī wištāsp-šāh pus kē šawēd gōwēd kū agar ašmā bayān sahēd az ēn xāk abar āxēzēd ud abāz ō kay-gāh nišīnēd, čē fradāg rōz šawēm ud ōzanēm abāg ān ī xwēš zōr xiyōn sēzdah bēwar.

Sentence: 60     wištāsp-šāh nē āxēzēd ud nē abāz nigerēd.

Sentence: 61     pas ān yal ī nēw spandyād kē šawēd ud gōwēd kū agar ašmā bayān sahēd az ēn xāk <abar> āxēzēd, abāz ō kay-gāh nišīnēd, čē man fradāg rōz šawēm bē xwarrah ī ohrmazd ud dēn ī māzdēsnān ud gyān ašmā bayān sōgand xwarēm kū zīndag xiyōn ēč bē nē hilēm az ān razm.

Sentence: 62     pas wištāsp-šāh abar āxēzēd ud abāz ō kay-gāh nišīnēd ud jāmāsp ī bīdaxš ō pēš xwāhēd ud gōwēd kū, ma bād ēdōn čiyōn tō jāmāsp gōwē čē man diz-ē rōyēn bē framāyēm kardan ud ān diz dar-band ān ī āhanēn bē framāyēm kardan, awēšān pusarān ud brādarān ud wāspuhragān andar ān diz framāyēm kardan ud nišastan, šāyēd kū ō dast dušmenān nē rasēnd.

Sentence: 63     gōwēd jāmāsp bīdaxš kū agar diz-ē rōyēn bē framāyē kardan ōy-šan pusarān ud brādarān, wāspuhragān ī tō rām-šahr kay-wištāsp-šāh andar ān diz bē framāyē Page: 210  nišastan, pas ān and dušmen az šahr abāz dāšt<(an)> kē tuwan.

Sentence: 64     čē ān tahm spāh-bed ī nēw zarēr ī tō brād, kē šawēd <ud> ōzanēd xiyōn pānzdah bēwar, ud ān pād-husro ī ardāy māzdēsnān, kē šawēd ud ōzanēd xiyōn čahārdah bēwar ud ān frašāward ī tō pus kē šawēd ud ōzanēd xiyōn sēzdah bēwar.

Sentence: 65     wištāsp-šāh gōwēd nūn čand āyēnd xiyōn az bunag ud ka ēw-bār āyēnd čand mīrēnd ud čand abāz šawēnd.

Sentence: 66     gōwēd jāmāsp bīdaxš kū sad-ud-sīh-ud-ēk bēwar xiyōn az bunag bē āyēnd, ka ēw-bār āyēnd ēč zīndag abāz bē nē šawēnd bē ān ī ēk arjāsp ī xiyōnan xwadāy.

Sentence: 67     ōy-iz yal spandyāl girēd, aziš dast-ē ud pāy-ē ud gōš-ē brīnēd, aziš čašm-ē pad ātaxš dazēd, u-š pad brīd<(ag)> dumb xar-ē abāz ō šahr ī xwēš frēstēd ud gōwēd kū šaw ud gōw kū čē dīd az dast ī man yal spandyād.

Sentence: 68     ud pas gōwēd kay-wištāsp-šāh kū agar hamāg pus ud brād ud wāspuhragān ī man kay-wištāsp-šāh ud ān-iz ī hutōs ī-m xwah ud zan, kē az pus tā duxt sīh aziš zād ēstēd ud hamāg murd bawēnd ēg-im ēn abēzag dēn ī māzdēsn<ān> čiyōn-am az ohrmazd padīrift bē nē hilēm.

Sentence: 69     pas wištāsp-šāh ō kōf sar nišīnēd zōr abāg būd dawāzdah dawāzdah bēwar, arjāsp ī xiyōnān xwadāy ō kōf sar Page: 211  nišīnēd u-š zōr būd dawāzdah bēwar bēwar.

Sentence: 70     ud ān tahm spāh-bed ī nēw zarēr kārezār ōwōn nēw kunēd čiyōn ka ādur yazd andar ō nayestān ōftēd u-š wād-iz ayār bawēd, ka šamšēr frāz zanēd dah ud ka abāz wēzēd dah-ē xiyōn ōzanēd, ka gušnag, tišnag bawēd xōn <ī> xiyōn wēnēd šād bawēd.

Sentence: 71     ud pas arjāsp ī xiyōnān xwadāg az kōf sar nigāh kunēd ud gōwēd kū az ašmā xiyōnān kē ast kē šawēd abāg zarēr kōxšēd u-š kušēd ān ī tahm spāh-bed ī nēw zarēr, tā zarr-stūn ī man duxt, pad zanīh awiš dahēm kē andar hamāg šahr <ī> xiyōnān zan-ē az ōy hu-čihr tar nēst.

Sentence: 72     u-š hamāg šahr ī xiyōnān bīdaxš kunēm čē agar tā šab zīndag zarēr, ēg nē dagr-zamān bawēd ka az amā xiyōnān ēč zīndag abāz bē nē pāyēd.

Sentence: 73     pas ān wīdrafš ī jādūg abar ō pāy ēstēd gōwēd kū man rāy asp zēn sāzēd tā man šawēm.

Sentence: 74     ud asp zēn sāzēnd u-š wīdrafš ī jādūg abar nišīnēd ud stānēd ān fraš ī afsūdag, ī dēwān andar dušox pad xēšm ud zahr distag, pad āb ī bazag kard ēstād ud frāz ō dast stānēd ud andar razm dwārēd wēnēd kū zarēr kārezar Page: 212  čiyōn nēw kunēd frāz ō pēš nē ayārēd šudan.

Sentence: 75     u-š az nihān, az pas frāz dwārēd, šawēd ud zarēr rāy azēr ī kamar band ud azabar ī kustīg pad pušt bē zanēd ud pad dil bē widārēd ud bē ō zamīg abganēd ud pas bē nišīnēd ān parrišn ī kamānān ud wāng ī nēw mardān.

Sentence: 76     pas wištāsp-šāh az kōf sar nigāh kunēd ud gōwēd ku az pad ēd dārēm kū-mān ōzad zarēr ī ērān spāh-bed čē nūn nē āyēd parrišn ī kamānān ud wāng <ī> nēw mardān.

Sentence: 77     bē az ašmā ērān kē ast kē šawēd ud zarērān kēn xwāhēd tā ka-š ān humāg ī man duxt pad zanīh awiš dahēm kē andar hamag šahr ī ērān zan az ōy hu-čihrtar nēst.

Sentence: 78     u-š mān ud kadag ī zarēr, spāh-bedīh ī ērān awiš dahēm.

Sentence: 79     ēč ēr ud āzād passox nē dād bē ān pus zarērān, kōdak <ī> haft sālag hōmānāg frāz ō pāy ēstād ud gōwēd kū man rāy asp zēn sāzēd tā man šawēm ud razm <ī> ērān wēnēm, wāspuhr ī wištāspān wēnēm ud ān tahm spāh-bēd ī nēw zarēr ī man pidar, agar zīndag ayāb murdag čiyōn ast pēš ašmā bayān gōwēm.

Page: 213 
Sentence: 80     pas wištāsp-šāh gōwēd kū tō ma šaw čē tō aburnāy hē ud razmān pahrēz nē dānē, u-t angust pad tigr nē ōst ēstēd.

Sentence: 81     ma xiyōn<ān> rasēnd ud tō ōzanēnd čē-šān zarēr-iz ōzad, pas xiyōn<ān> dō nām barēnd kū-mān ōzad zarēr ī ērān spāh-bed, u-mān zad bastwar ī-š pus.

Sentence: 82     pas bastwar pad nihān ō ōy āxwarr-sālār gōwēd kū wištāsp<-šā> framān dād kū ān asp ka zarēr kōdak būd (abar nišast) bē ō bastwar dahēd.

Sentence: 83     ōy ī āxwarr-sālār asp zēn framāyēd kardan ud bastwar abar nišīnēd ud asp frāz hilēd ud dušmēn ōzanēd tā ō ān gyāg rasēd kū murdag <ī> nēw pidar wēnēd.

Sentence: 84     ud nē dagr-zamān pāyēd, gōwēd kū: alā dārūg, gyān ōžand-it kē amwašt, alā warāz padrān ī tō kē amwašt, alā sēn-murwag bārag-it {!} kē amwašt.

Sentence: 85     ka-t hamē ēdōn kāmist kū-t abāg xiyōnān kārezār kunē, nūn ōzad abgand hē andar amā razm čiyōn a-gāh a-ganj mardōm.

Sentence: 86     u-t ēn xwahl wars ud rēš wādān wišuft ēstēd, u-t abēzag tan, aspān xwast pad pāy, u-t xāk ō grīw nišast, bē nūn čiyōn kunēm čē agar az asp bē nišīnēm ud tō Page: 214  pidar sar andar kanār gīrēm u-t xāk az grīw bē gīrēm ud pas sabukīhā abāz ō asp nišastan nē tuwān.

Sentence: 87     ma xiyōn<ān> rasēnd ud man ōzanēnd čē-šān tō-iz kušt, pas xiyōn<ān> dō nām barēnd kū-mān ōzad zarēr ērān spāh-bed, u-mān ōzad bastwar ī-š pus.

Sentence: 88     pas bastwar asp frāz hilēd ud dušmen zanēd tā ō pēš <ī> wištāsp-šāh rasēd, gōwēd kū man šud hēm u-m razm <ī> ērān drust dīd, ud wāspuhr ī wištāspān.

Sentence: 89     u-m murdag dīd ān tahm spāh-bed ī nēw zarēr ī man pidar, bē agar ašmā bayān sahēd man hilēd tā šawēm ud pidarān kēn xwāhēm.

Sentence: 90     pas gōwēd jāmāsp bīdaxš kū hilēd ēd rahīg čē-š abar baxt ēstēd dušmen ōzanēd.

Sentence: 91     ud pas wištāsp-šāh asp zēn framāyēd kardan.

Sentence: 92     u-š bastwar abar nišīnēd; <wištāsp-šā> az kantigr ī xwēš tigr-ē dahēd u-š āfrīn padiš kunēd gōwēd kū: nūn-it yal az man šawē pērōz awar hāh pad har razm ud pād-razm-ē tō pērōz hāh, pād-rōz nām āwarē, jāwēdān rōzān dušmen murd āwarē.

Page: 215 
Sentence: 93     ud nūn bārag ud drafš im spāh ērān kār-om tō framāyē, nām-āwurd ī bawē yad-ō rōz jāwēd.

Sentence: 94     pas bastwar asp frāz hilēd ud dušmen ōzanēd ud kārezār ōwōn nēw kunēd čiyōn zarēr <ī> ērān spāh-bed kard.

Sentence: 95     pas arjāsp <ī> xiyōnān xwadāy az kōf sar nigāh kunēd ud gōwēd kū ān kē ast, ān kayān nēw rahīg kē gurd-wār asp dārēd ud gurd-wār zēn dārēd, kārezār ōwōn nēw kunēd čiyōn zarēr <ī> ērān spāh-bed kard.

Sentence: 96     bē az pad ēd dārēm kū ān tōhmag wištāspān zarērān kēn xwāhēd.

Sentence: 97     bē ašmā xiyōnān kē ast kē šawēd ud abāg ān rahīg kōxšēd ēg-iš ān bēh-stūn ī man duxt, pad zanīh bē dahēm kē andar hamāg šahr ī xiyōnān zan az ōy hu-čihrtar nēst.

Sentence: 98     u-š andar hamāg šahr ī xiyōnān bīdaxš kunēm čē agar tā šab zīndag rahīg, ēg nē dagr-zamān bawēd ka az amā xiyōnān ēč zīndag abāz nē mānēd.

Sentence: 99     pas widrafš jādūg abar ō pāy ēstād u-š guft kū man rāy Page: 216  asp zēn sāzēd tā man šawēm.

Sentence: 100     ud asp āhanēn sumb ī zarēr bārag zēn sāzēnd ud wīdrafš jādūg abar nišīnēd ud stānēd ān fraš ī afsūdag <ī> dēwān andar dušox pad xēšm ud zahr distag, pad āb <ī> bazag kard ēstēd, frāz ō dast stānēd ud andar razm dwārēd, wēnēd kū bastwar kārezār čiyōn nēw kunēd frāz ō pēš nē ayārēd šudan pad nihān az pas frāz šawēd.

Sentence: 101     bastwar nigāh kunēd ud gōwēd kū druwand ī jādūg frāz ō pēš awar čē man dārēm bārag azēr rān bē tāxtan nē dānēm ud man dārēm tigr andar kantigr bē wistan nē dānēm frāz ō pēš awar u-t ēn xwaš gyān abar gīrēm čiyōn-it {!} ān tahm spāh-bed zarēr man pidar kard.

Sentence: 102     ud wīdrafš jādūg wistāx šawēd, frāz ō pēš šawēd ud ān syā āhanēn sumb ī zarēr bārag ka wāng ī bastwar ašnawēd čahār-pāy abar zamīg ēstād nōh-sad-ud-nawad-ud-nōh wāng bē kunēd.

Sentence: 103     ud wīdrafš fraš wēzēd ud bastwar pad dast frāz padīrēd.

Sentence: 104     pas ruwān ī zarēr wāng kunēd kū ēd fraš az dast bē abgan ud az kantigr ī xwēš tigr-ē stān ēd druwand passox kun.

Sentence: 105     ud bastwar fraš az dast bē abganēd ud az kantigr ī Page: 217  xwēš tigr-ē stānēd ud wīdrafš pad dil zanēd pad pušt bē widārēd ud bē ō zamīg abganēd ud drōd ō ruwān dahēd.

Sentence: 106     u-š bē wizīd ān mōg ī spēd ī pad mōrwārīd ud ham zarr zarēr brahmag ud xwad abar bārag ī zarēr nišīnēd ud bārag-iz xwēš pad dast frāz padīrēd ud asp frāz hilēd ud dušmēn ōzanēd tā ō ān gyāg rasēd kū garāmīg-kard <ī> jāmāsp pus drafš ī pērōzān pad dandān dārēd ud pad dō dast kārezār kunēd.

Sentence: 107     garāmīg-kard ud ān wuzurg spāh ka bastwar wēnēd hāmōyēn zarēr rāy brāmēnd ud gōwēnd kū ēdar čim āmad hē ka-t angust pad tigr nē ōst ēstēd ud razmān pahrēz nē dānē.

Sentence: 108     ma xiyōn<ān> rasēnd ud tō ōzanēnd čē-š ān zarēr-iz ōzad pas (xiyōnān) dō nām barēnd kū-mān ōzad zarēr <ērān> spāh-bed u-mān ōzad bastwar ī-š pus.

Sentence: 109     pas bastwar gōwēd kū pad pērōzīh dārē tō garāmīg-kard jāmāsp pus ēd drafš pērōzān čē agar zīndag rasēm ō pēš ī wištāsp-šāh gōwēm kū-t kārezār Page: 218  čiyōn nēw kard.

Sentence: 110     pas bastwar asp frāz hilēd dušmen ōzanēd tā ō ān gyāg rasēd kū yal nēw spandyād (kārezār) kunēd.

Sentence: 111     (spandyād) ka bastwar wēnēd ān wuzurg spāh ī ērān pad bastwar bē hilēd xwad ō kōf sar šawēd ud arjāsp abāg dawāzdah bēwar spāh az kōf sar zanēd ud bē ō dašt abganēd ud spandyād zanišn ō garamīg-kard spōzēd, garāmīg-kard zanēd ud ō bastwar spōzēd.

Sentence: 112     ēg nē dagr-zamān bawēd ka az awēšān xiyōnān ēč zīndag abāz bē nē mānēd bē ān ī ēk arjāsp ī xiyōnān xwadāy.

Sentence: 113     ud ōy-iz yal spandyād gīrēd, aziš dast-ē ud pāy<-ē> ud gōš-ē brīnēd ud aziš čašm-ē pad ātaxš sōzēd, u-š pad brīdag dumb xar-ē abāz <ō> šahr ī xwēš frēstēd.

Sentence: 114     gōwēd kū šaw ud gōw kū-t čē dīd az dast man yal ī spandyād kū xiyōnān čē dānēnd kū čē būd pad rōz frawardīn andar azdahāg razm wištāspān. Page: 219  wištāsp lurāspān ud zarēr bastwar ud spandyād pad ham ēwēn frašāward ī wištāspān ud garāmīg-kard puhr jāmāsp, pād-husraw <ī> pād-yasn kē xwad-burd nām hēnd.

Sentence: 2     harwīn wāspuhragān, gawān, ēraxtārān gāh-ē xwābar bawād, pad wahišt bāmīg pad a-sar rōšnīh <ī> nišēm warzāwandān.

Sentence: 3     harwīn abzōn bawād kū ruwān anōšag bawād kū dēn panāh nibišt hēd. šād, pērōz bawād, šādān-zād puhr šādān darād.

Sentence: 4     farrox ī bawād tā hazārān sālān, yad-ō ī rōz frašgird, ābādān mēhan <ud> mān, harwīn ud xīr abzōn bawād.

Sentence: 5     kū-tān xwad bē rāmēd agar ka xwānēd farrox nibēg pad ō šādīh rustēm mihrābān nām ayādēnēd kē-š pačēn nibištag būd; man dēn bandag mihrābān





Page: 220 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.