TITUS
Black Yajur-Veda: Taittiriya-Brahmana
Part No. 2
Previous part

Chapter: 2 
Paragraph: 1 
Verse: 1    {BS 1.2.1.1}
Sentence: 1    uddʰanyámānam asyā́ amedʰyàm {BS amedʰyám} /
Sentence: 2    ápa pāpmā́naṃ yájamānasya hantu /
Sentence: 3    śivā́ naḥ santu pradíśaś cátasraḥ /
Sentence: 4    śáṃ no mātā́ pr̥tʰivī́ tókasātā /
Sentence: 5    śáṃ no devī́r abʰíṣṭaye /
Sentence: 6    ā́po bʰavantu pītáye /
Sentence: 7    śáṃ yór abʰí sravantu naḥ /
Sentence: 8    vaiśvānarásya rūpám /
Sentence: 9    pr̥tʰivyā́ṃ parisrásā /
Sentence: 10    syonám ā́viśantu {BS āviśantu} naḥ //

Verse: 2    {BS 1.2.1.2}
Sentence: 1    yád idáṃ divó yád adáḥ pr̥tʰivyā́ḥ /
Sentence: 2    saṃjajñāné ródasī saṃbabʰūvátuḥ /
Sentence: 3    ū́ṣān kr̥ṣṇám avatu kr̥ṣṇám ū́ṣāḥ /
Sentence: 4    iha_úbʰayor yajñíyam ā́gamiṣṭhāḥ /
Sentence: 5    ūtī́ḥ kurvāṇó yát pr̥tʰivīm ácaraḥ /
Sentence: 6    guhākā́ram ākʰurūpáṃ pratī́tya /
Sentence: 7    tát te nyàktam ihá saṃbʰárantaḥ /
Sentence: 8    śātáṃ jīvema śarádaḥ sávīrāḥ /
Sentence: 9    ū́rjaṃ pr̥tʰivyā́ rásam ābʰárantaḥ /
Sentence: 10    śatáṃ jīvema śarádaḥ purūcī́ḥ //

Verse: 3    {BS 1.2.1.3}
Sentence: 1    vamrī́bʰir ánuvittaṃ gúhāsu /
Sentence: 2    śrótraṃ ta urvy ábadʰirā bʰavāmaḥ /
Sentence: 3    prajā́patisr̥ṣṭānāṃ prajā́nām /
Sentence: 4    kṣudʰā_úpahatyai suvitáṃ no astu /
Sentence: 5    úpaprábʰinnam íṣam ū́rjaṃ prajā́bʰyaḥ /
Sentence: 6    sū́daṃ gr̥hébʰyo rásam ā́bʰarāmi /
Sentence: 7    yásya rūpáṃ bíbʰrad imā́m ávindat /
Sentence: 8    gúhā práviṣṭā́m̐ sarirásya mádʰye /
Sentence: 9    tásyedáṃ víhatam ābʰárantaḥ /
Sentence: 10    áccʰaṃbaṭkāram {BS ácʰambaṭkāram} asyā́ṃ vidʰema //

Verse: 4    {BS 1.2.1.4}
Sentence: 1    yát paryápaśyat sarirásya mádʰye /
Sentence: 2    urvī́m ápaśyaj jágataḥ pratiṣṭhā́m /
Sentence: 3    tát púṣkarasya_āyátanād dʰí jātám /
Sentence: 4    parṇáṃ pr̥tʰivyā́ḥ prátʰanam̐ harāmi /
Sentence: 5    yā́bʰir adŕ̥m̐haj jágataḥ pratiṣṭhām /
Sentence: 6    urvī́m imā́ṃ viśvajanásya bʰartrī́m /
Sentence: 7    tā́ naḥ śivā́ḥ śárkarāḥ santu sárvāḥ /
Sentence: 8    agné rétaś candrám̐ híraṇyam /
Sentence: 9    adbʰyáḥ sáṃbʰūtam amŕ̥taṃ prajā́su /
Sentence: 10    tát saṃbʰárann uttarató nidʰā́ya //

Verse: 5    {BS 1.2.1.5}
Sentence: 1    atiprayáccʰan {BS ati prayáccʰaṃ} dúritiṃ tareyam /
Sentence: 2    áśvo rūpáṃ kr̥tvā́ yád aśvattʰé 'tiṣṭhaḥ /
Sentence: 3    saṃvatsaráṃ devébʰyo nilā́ya /
Sentence: 4    tát te nyàktam ihá saṃbʰárantaḥ /
Sentence: 5    śatáṃ jīvema śarádaḥ sávīrāḥ /
Sentence: 6    ūrjáḥ pr̥tʰivyā́ ádʰyúttʰito 'si /
Sentence: 7    vánaspate śatávalśo víroha /
Sentence: 8    tváyā vayám íṣam ū́rjaṃ mádantaḥ /
Sentence: 9    rāyás póṣeṇa sám iṣā́ madema /
Sentence: 10    gāyatriyā́ hriyámāṇasya yát te //

Verse: 6    {BS 1.2.1.6}
Sentence: 1    parṇám ápatat tr̥tī́yasyai divó 'dʰi /
Sentence: 2    sò 'yáṃ parṇáḥ somaparṇā́d dʰi jātáḥ /
Sentence: 3    táto harāmi somapītʰásya_ávaruddʰyai /
Sentence: 4    devā́nāṃ brahmavādáṃ vádatāṃ yát /
Sentence: 5    upā́śr̥ṇoḥ suśrávā vái śrutò 'si {BS śrutòsi} /
Sentence: 6    táto mā́m ā́viśatu brahmavarcasám /
Sentence: 7    tát saṃbʰáram̐s tád ávarundʰīya sākṣā́t /
Sentence: 8    yáyā te sr̥ṣṭásya_agnéḥ /
Sentence: 9    hetím áśamayat prajā́patiḥ /tā́m imā́m ápradāhāya //

Verse: 7    {BS 1.2.1.7}
Sentence: 1    śamī́m̐ śā́ntyai harāmy ahám /
Sentence: 2    yát te sr̥ṣṭásya yatáḥ /
Sentence: 3    víkaṅkataṃ bʰā́ ārcʰaj jātavedaḥ /
Sentence: 4    táyā bʰāsā́ sáṃmitaḥ /
Sentence: 5    urúṃ no lokám ánu prábʰāhi /
Sentence: 6    yát te tāntásya hŕ̥dayam ā́ccʰindañ jātavedaḥ /
Sentence: 7    marúto 'dbʰís tamayitvā́ /
Sentence: 8    etát te tád aśanèḥ {BS aśanés} sáṃ bʰarāmi /
Sentence: 9    sā́tmā agne sáhr̥dayo bʰavehá /
Sentence: 10    cítriyād aśvattʰā́t sáṃbʰr̥tā br̥hatyàḥ //

Verse: 8    {BS 1.2.1.8}
Sentence: 1    śárīram abʰí sám̐skr̥tāḥ stʰa /
Sentence: 2    prajā́patinā yajñamukʰéna sáṃmitāḥ /
Sentence: 3    tisrás trivŕ̥dbʰir mitʰunā́ḥ prájātyai /
Sentence: 4    aśvattʰā́d dʰavyavāhā́d dʰí jātā́m /
Sentence: 5    agnés tanū́ṃ yajñíyām̐ sáṃbʰarāmi /
Sentence: 6    śāntáyonim̐ śamīgarbʰám /
Sentence: 7    agnáye prájanayitáve /
Sentence: 8    yó aśvattʰáḥ śamīgarbʰáḥ /
Sentence: 9    āruróha tvé sácā /
Sentence: 10    táṃ te harāmi bráhmaṇā //

Verse: 9    {BS 1.2.1.9}
Sentence: 1    yajñíyaiḥ ketúbʰiḥ sahá /
Sentence: 2    yáṃ tvā samábʰarañ jātavedaḥ /
Sentence: 3    yatʰāśarīráṃ bʰūtéṣu nyàktam /
Sentence: 4    sá sáṃbʰr̥taḥ sīda śiváḥ prajā́bʰyaḥ /
Sentence: 5    urúṃ no lokám ánuneṣi {BS anuneṣi} vidvā́n /
Sentence: 6    pravedʰáse {BS právedʰáse} kavaye {BS kaváye} médʰyāya /
Sentence: 7    váco vandā́ru vr̥ṣabʰā́ya vŕ̥ṣṇe /
Sentence: 8    yáto bʰayám ábʰayaṃ tán no astu /
Sentence: 9    áva devā́n yaje héḍyā́n /
Sentence: 10    samídʰāgníṃ duvasyata //

Verse: 10    {BS 1.2.1.10}
Sentence: 1    gʰr̥táir bodʰayata_átitʰim /
Sentence: 2    ā́smin havyā́ juhotana /
Sentence: 3    úpa tvāgne havíṣmatīḥ /
Sentence: 4    gʰr̥tā́cīr yantu haryata /
Sentence: 5    juṣásva samídʰo máma /
Sentence: 6    táṃ tvā samídbʰir aṅgiraḥ /
Sentence: 7    gʰr̥téna vardʰayāmasi /
Sentence: 8    br̥háccʰocā yaviṣṭhya /
Sentence: 9    samidʰyámānaḥ pratʰamó nú dʰármaḥ /
Sentence: 10    sámaktúbʰir ajyate viśvávāraḥ //

Verse: 11    {BS 1.2.1.11}
Sentence: 1    śocíṣkeśo gʰr̥tánirṇik pāvakáḥ /
Sentence: 2    suyajñó agnír yajátʰāya devā́n /
Sentence: 3    gʰr̥táyonir agníḥ /
Sentence: 4    gʰr̥táiḥ sámiddʰo gʰr̥tám asya_ánnam /
Sentence: 5    gʰr̥taprúṣas tvā saríto vahanti /
Sentence: 6    gʰr̥táṃ píban suyájā yakṣi devā́n /
Sentence: 7    āyurdā́ agne havíṣo juṣāṇáḥ /
Sentence: 8    gʰr̥tápratīko gʰr̥táyonir edʰi /
Sentence: 9    gʰr̥táṃ pītvā́ mádʰu cā́ru gávyam /
Sentence: 10    pitā́_iva putrám abʰírakṣatād imám //

Verse: 12    {BS 1.2.1.12}
Sentence: 1    tvā́m agne samidʰānáṃ yaviṣṭha /
Sentence: 2    devā́ dūtáṃ cakrire havyavā́ham /
Sentence: 3    urujráyasaṃ gʰr̥táyonim ā́hutam /
Sentence: 4    tveṣáṃ cákṣur dadʰire codayánvati /
Sentence: 5    tvā́m agne pradíva ā́hutaṃ gʰr̥téna /
Sentence: 6    sumnāyávaḥ suṣamídʰā sámīdʰire /
Sentence: 7    sá vāvr̥dʰāná óṣadʰībʰir ukṣitáḥ /
Sentence: 8    urú jráyām̐si pā́rtʰivā vitiṣṭhase /
Sentence: 9    gʰr̥tápratīkaṃ ca {BS va} r̥tásya dʰūrṣádam /
Sentence: 10    agníṃ mitráṃ ná samidʰāná r̥ñjate //

Verse: 13    {BS 1.2.1.13}
Sentence: 1    índʰāno akró vidátʰeṣu dī́dyat /
Sentence: 2    śukrávarṇām úd u no yam̐sate dʰíyam /
Sentence: 3    prajā́ agne sáṃvāsaya /
Sentence: 4    ā́śāś ca paśúbʰiḥ sahá /
Sentence: 5    rāṣṭrā́ṇy asmā ā́dʰehi /
Sentence: 6    yā́ny ā́san savitúḥ savé /
Sentence: 7    mahī́ viśpátnī sádane r̥tásya /
Sentence: 8    arvā́cī étaṃ dʰaruṇe rayīṇā́m /
Sentence: 9    antárvatnī jányaṃ jātávedasam /
Sentence: 10    adʰvarā́ṇāṃ janayatʰaḥ purogā́m //

Verse: 14    {BS 1.2.1.14}
Sentence: 1    ā́rohataṃ daśátam̐ śákvarīr máma /
Sentence: 2    r̥téna_agna ā́yuṣā várcasā sahá /
Sentence: 3    jyóg jī́vanta úttarām uttarām̐ sámām /
Sentence: 4    dárśam aháṃ pūrṇámāsaṃ yajñáṃ yátʰā yájai /
Sentence: 5    ŕ̥tviyavatī stʰo agníretasau /
Sentence: 6    gárbʰaṃ dadʰātʰāṃ té vām aháṃ dade {BS dadé} /
Sentence: 7    tát satyáṃ yád vīráṃ bibʰr̥tʰaḥ /
Sentence: 8    vīráṃ janayiṣyátʰaḥ /
Sentence: 9    té mát prātáḥ prájaniṣyetʰe /
Sentence: 10    té mā prájāte prájanayiṣyatʰaḥ //

Verse: 15    {BS 1.2.1.15}
Sentence: 1    prajáyā paśúbʰir brahmavarcaséna suvargé loké /
Sentence: 2    ánr̥tāt satyám úpaimi /
Sentence: 3    mānuṣā́d dáivyam úpaimi /
Sentence: 4    dáivīṃ vā́caṃ yaccʰāmi /
Sentence: 5    śálkair agním indʰānáḥ /
Sentence: 6    ubʰáu lokáu sanemahám /
Sentence: 7    ubʰáyor lokáyor r̥ddʰvā́ /
Sentence: 8    áti mr̥tyúṃ tarāmy ahám /
Sentence: 9    jā́tavedo bʰúvanasya rétaḥ /
Sentence: 10    ihá siñca tápaso yáj janiṣyáte //

Verse: 16    {BS 1.2.1.16}
Sentence: 1    agním aśvattʰā́d ádʰi havyavā́ham /
Sentence: 2    śamīgarbʰā́j janáyan yó mayobʰū́ḥ /
Sentence: 3    ayáṃ te yónir r̥tvíyaḥ /
Sentence: 4    yáto jātó árocatʰāḥ /
Sentence: 5    táṃ jānánn agna ā́roha /
Sentence: 6    átʰā no vardʰayā rayím /
Sentence: 7    ápeta vī́ta ví ca sarpata_átaḥ /
Sentence: 8    yé 'tra stʰá purāṇā́ yé ca nū́tanāḥ /
Sentence: 9    ádād idáṃ yamò 'vasā́naṃ pr̥tʰivyā́ḥ /
Sentence: 10    ákrann imáṃ pitáro lokám asmai //

Verse: 17    {BS 1.2.1.17}
Sentence: 1    agnér bʰásma_asy agnéḥ púrīṣam asi /
Sentence: 2    saṃjñā́nam asi kāmadʰáraṇam /
Sentence: 3    máyi te kāmadʰáraṇaṃ bʰūyāt /
Sentence: 4    sáṃ vaḥ sr̥jāmi hŕ̥dayāni /
Sentence: 5    sám̐sr̥ṣṭaṃ máno astu vaḥ /
Sentence: 6    sám̐sr̥ṣṭaḥ prāṇó astu vaḥ /
Sentence: 7    sáṃ yā́ vaḥ priyā́s tanúvaḥ /
Sentence: 8    sáṃ priyā́ hŕ̥dayāni vaḥ /
Sentence: 9    ātmā́ vo astu sáṃ priyaḥ /
Sentence: 10    sáṃ priyās tanúvo máma //

Verse: 18    {BS 1.2.1.18}
Sentence: 1    kálpetāṃ dyā́vāpr̥tʰivī /
Sentence: 2    kálpantām ā́pa óṣadʰīḥ /
Sentence: 3    kálpantām agnáyaḥ pŕ̥tʰak /
Sentence: 4    máma jyáiṣṭhyāya sávratāḥ /
Sentence: 5    yè 'gnáyaḥ sámanasaḥ /
Sentence: 6    antarā́ dyā́vāpr̥tʰivī /
Sentence: 7    vā́santikāv r̥tū́ abʰí kálpamānāḥ /
Sentence: 8    índram iva devā́ abʰí sáṃviśantu /
Sentence: 9    divás tvā vīryèṇa /
Sentence: 10    pr̥tʰivyái mahimnā́ //

Verse: 19    {BS 1.2.1.19}
Sentence: 1    antárikṣasya póṣeṇa /
Sentence: 2    sarvápaśum ā́dadʰe /
Sentence: 3    ájījanann amŕ̥taṃ mártyāsaḥ /
Sentence: 4    asremā́ṇaṃ taráṇiṃ vīḍújambʰam /
Sentence: 5    dáśa svásāro agrúvaḥ samīcī́ḥ /
Sentence: 6    púmām̐saṃ jātám abʰí sám̐rabʰantām /
Sentence: 7    prajā́pates tvā prāṇéna_ábʰi prā́ṇimi /
Sentence: 8    pūṣṇáḥ póṣeṇa máhyam /
Sentence: 9    dīrgʰāyutvā́ya śatáśāradāya /
Sentence: 10    śatám̐ śarádbʰya ā́yuṣe várcase //

Verse: 20    {BS 1.2.1.20}
Sentence: 1    jīvā́tvái púṇyāya /
Sentence: 2    aháṃ tvád asmi mád asi tvám etát /
Sentence: 3    máma_asi yónis táva yónir asmi /
Sentence: 4    mámaivá sán váha havyā́ny agne /
Sentence: 5    putráḥ pitré lokakŕ̥j jātavedaḥ /
Sentence: 6    prāṇé tvā_amŕ̥tam ā́dadʰāmi /
Sentence: 7    annādám annā́dyāya /
Sentence: 8    goptā́raṃ gúptyai /
Sentence: 9    sugārhapatyó vidáhann árātīḥ /
Sentence: 10    uṣásaḥ śréyasīśśreyasīr dádʰat //

Verse: 21    {BS 1.2.1.21}
Sentence: 1    ágne sapátnām̐ apa bā́dʰamānaḥ /
Sentence: 2    rāyás póṣam íṣam ū́rjam asmā́su dʰehi /
Sentence: 3    imā́ u mā́m úpa tiṣṭhantu rā́yaḥ /
Sentence: 4    ābʰíḥ prajā́bʰir ihá sáṃ vaseya /
Sentence: 5    ihó {AS iho} íḍā tiṣṭhatu viśvarūpī́ {AS viśvarūpī} /
Sentence: 6    mádʰye vásor dīdihi jātavedaḥ /
Sentence: 7    ójase bálāya tvā_údyaccʰe /
Sentence: 8    vŕ̥ṣaṇe śúṣmāya_ā́yuṣe várcase /
Sentence: 9    sapatnatū́r asi vr̥tratū́ḥ /
Sentence: 10    yás te devéṣu mahimā́ suvargáḥ //

Verse: 22    {BS 1.2.1.22}
Sentence: 1    yás ta ātmā́ paśúṣu práviṣṭaḥ /
Sentence: 2    púṣṭir yā́ te manuṣyèṣu papratʰé /
Sentence: 3    táyā {AS táyā /} no agne juṣámāṇa éhi /
Sentence: 4    diváḥ pr̥tʰivyā́ḥ páry antarikṣā́t /
Sentence: 5    vā́tāt paśúbʰyo ádʰy óṣadʰībʰyaḥ /
Sentence: 6    yátra_yatra jātavedaḥ saṃbabʰū́tʰa /
Sentence: 7    táto no agne juṣámāṇa éhi /
Sentence: 8    prā́cīm ánu pradíśaṃ préhi vidvā́n /
Sentence: 9    agnér agne puró ágnír bʰávehá /
Sentence: 10    víśvā ā́śā dī́dyāno ví bʰāhi //

Verse: 23    {BS 1.2.1.23}
Sentence: 1    ū́rjaṃ no dʰehi dvipáde cátuṣpade /
Sentence: 2    ánv agnír uṣásām ágram akʰyat /
Sentence: 3    ánv áhāni pratʰamó jātávedāḥ /
Sentence: 4    ánu sū́ryasya purutrā́ ca raśmī́n /
Sentence: 5    ánu dyā́vāpr̥tʰivī́ ā́tatāna /
Sentence: 6    víkramasva mahā́m̐ asi /
Sentence: 7    vediṣán mā́nuṣebʰyaḥ /
Sentence: 8    triṣú lokéṣu jāgr̥hi /
Sentence: 9    yád idáṃ divó yád adáḥ pr̥tʰivyā́ḥ /
Sentence: 10    saṃvidāné ródasī saṃbabʰūvátuḥ //

Verse: 24    {BS 1.2.1.24}
Sentence: 1    táyoḥ pr̥ṣṭhé sīdatu jātávedāḥ /
Sentence: 2    śaṃbʰū́ḥ prajā́bʰyas tanúve syonáḥ /
Sentence: 3    prāṇáṃ tvāmŕ̥ta ā́dadʰāmi /
Sentence: 4    annādám annā́dyāya /
Sentence: 5    goptā́raṃ gúptyai /
Sentence: 6    yát te śukra śukráṃ várcaḥ śukrā́ tanū́ḥ /
Sentence: 7    śukráṃ jyótir ájasram /
Sentence: 8    téna me dīdihi téna tvā́dadʰe /
Sentence: 9    agnínāgne bráhmaṇā /
Sentence: 10    ānaśé vyā̀naśe {BS vyānaśe} sárvam ā́yur vyā̀naśe //

Verse: 25    {BS 1.2.1.25}
Sentence: 1    nárya prajā́ṃ me gopāya /
Sentence: 2    amr̥tatvā́ya jīváse /
Sentence: 3    jātā́ṃ janiṣyámāṇāṃ ca /
Sentence: 4    amŕ̥te satyé prátiṣṭhitām /
Sentence: 5    átʰarva pitúṃ me gopāya /
Sentence: 6    rásam ánnam ihā́yuṣe /
Sentence: 7    ádabdʰāyó 'śītatano /
Sentence: 8    áviṣaṃ naḥ pitúṃ kr̥ṇu /
Sentence: 9    śám̐sya paśū́n me gopāya /
Sentence: 10    dvipā́do yé cátuṣpadaḥ //

Verse: 26    {BS 1.2.1.26}
Sentence: 1    aṣṭā́śapʰāś ca yá ihā́gne /
Sentence: 2    yé cáikaśapʰā āśugā́ḥ /
Sentence: 3    sápratʰa sabʰā́ṃ me gopāya /
Sentence: 4    yé ca sábʰyāḥ sabʰāsádaḥ /
Sentence: 5    tā́n indriyā́vataḥ kuru /
Sentence: 6    sárvamā́yur úpāsatām /
Sentence: 7    áhe budʰniya mántraṃ me gopāya /
Sentence: 8    yám ŕ̥ṣayastraividā́ vidúḥ /
Sentence: 9    ŕ̥caḥ sā́māni yájūm̐ṣi /
Sentence: 10    sā́ hí śrī́r amŕ̥tā satā́m //

Verse: 27    {BS 1.2.1.27}
Sentence: 1    cátuḥśikʰaṇḍā yuvatíḥ supéśāḥ /
Sentence: 2    gʰr̥tápratīkā bʰúvanasya mádʰye /
Sentence: 3    marmr̥jyámānā mahaté sáubʰagāya /
Sentence: 4    máhyaṃ dʰukṣva yájamānāya kā́mān /
Sentence: 5    iháivá sán tátra sató vo agnayaḥ /
Sentence: 6    prāṇéna vācā́ mánasā bibʰarmi /
Sentence: 7    tiró mā sántam ā́yur mā́ práhāsīt /
Sentence: 8    jyótiṣā vo vaiśvānaréṇópatiṣṭhe /
Sentence: 9    pañcadʰā́gnī́n vyakrāmat /
Sentence: 10    virā́ṭ sr̥ṣṭā́ prajā́pateḥ /
Sentence: 11    ūrdʰvā́roha drohiṇī́ /
Sentence: 12    yónir agnéḥ prátiṣṭhitiḥ //

Paragraph: 2 
Verse: 1    {BS 1.2.2.28}
Sentence: 1    návaitā́ny áhāni bʰavanti /
Sentence: 2    náva vái suvargā́ lokā́ḥ /
Sentence: 3    yád etā́ny áhāny upayánti /
Sentence: 4    navásv evá tát suvargéṣu lokéṣu satríṇaḥ pratitíṣṭhanto yanti /
Sentence: 5    agniṣṭomā́ḥ páraḥsāmānaḥ kā́ryā íty āhuḥ /
Sentence: 6    agniṣṭomásaṃmitaḥ suvargó loká íti /
Sentence: 7    dvā́daśāgniṣṭomásya stotrā́ṇi /
Sentence: 8    dvā́daśa mā́sāḥ saṃvatsaraḥ /
Sentence: 9    tát tán ná sū́rkṣyam /
Sentence: 10    uktʰyā̀ evá saptadaśā́ḥ páraḥsāmānaḥ kāryā̀ḥ //

Verse: 2    {BS 1.2.2.29}
Sentence: 1    paśávo vā́ uktʰā́ni /
Sentence: 2    paśūnā́m ávarudʰyai /
Sentence: 3    viśvajidabʰijítāv agniṣṭomáu /
Sentence: 4    uktʰyā̀ḥ saptadaśā́ḥ páraḥsāmānaḥ /
Sentence: 5    té sám̐stutā virā́jam abʰí sáṃpadyante /
Sentence: 6    dvé cárcāv áti ricyete /
Sentence: 7    ékayā gáur átiriktaḥ /
Sentence: 8    ékayāyur ūnáḥ /
Sentence: 9    suvargó vái lokó jyótiḥ /
Sentence: 10    ū́rg virā́ṭ //

Verse: 3    {BS 1.2.2.30}
Sentence: 1    suvargám evá téna lokám abʰí jayanti /
Sentence: 2    yát páram̐ rā́tʰantaram /
Sentence: 3    tát pratʰamé 'han kāryàm /
Sentence: 4    br̥hád dvitī́ye /
Sentence: 5    vairūpáṃ tr̥tī́ye /
Sentence: 6    vairājáṃ caturtʰé /
Sentence: 7    śākvaráṃ pañcamé /
Sentence: 8    raivatám̐ ṣaṣṭhé /
Sentence: 9    tád u pr̥ṣṭhébʰyo náyanti /
Sentence: 10    saṃtánaya eté gráhā gr̥hyante //

Verse: 4    {BS 1.2.2.31}
Sentence: 1    atigrāhyā̀ḥ páraḥsāmasu /
Sentence: 2    imā́n eváitáir lokā́n sáṃ tanvanti /
Sentence: 3    mitʰunā́ eté gráhā gr̥hyante /
Sentence: 4    atigrāhyā̀ḥ páraḥsāmasu /
Sentence: 5    mitʰunám evá táir yájamānā ávarundʰate /
Sentence: 6    br̥hát pr̥ṣṭháṃ bʰavati /
Sentence: 7    br̥hád vái suvargó lokáḥ /
Sentence: 8    br̥hatáivá suvargáṃ lokáṃ yanti /
Sentence: 9    trayastrim̐śí nā́ma sā́ma /
Sentence: 10    mádʰyandine pávamāne bʰavati //

Verse: 5    {BS 1.2.2.32}
Sentence: 1    tráyastrim̐śad vái devátāḥ /
Sentence: 2    devátā evā́varundʰate /
Sentence: 3    yé vā́ itáḥ párāñcam̐ saṃvatsarám upayánti /
Sentence: 4    ná hainaṃ té svastí sámaśnuvate /
Sentence: 5    átʰa ye 'muto 'rvā́ñcam upa yánti /
Sentence: 6    té hainam̐ svastí sámaśnuvate /
Sentence: 7    etád vā́ amúto 'rvā́ñcam úpa yanti /
Sentence: 8    yád evám /
Sentence: 9    yó ha kʰálu vā́vá prajā́patiḥ /
Sentence: 10    sá u vevéndraḥ /
Sentence: 11    tád u devébʰyo náyanti //

Paragraph: 3 
Verse: 1    {BS 1.2.3.33}
Sentence: 1    sáṃtatir vā́ eté gráhāḥ /
Sentence: 2    yát páraḥsāmānaḥ /
Sentence: 3    viṣūvā́n divākīrtyàm {AS divākīrtyám} /
Sentence: 4    yátʰā śā́lāyai pákṣasī /
Sentence: 5    evám̐ saṃvatsarásya pákṣasī /
Sentence: 6    yád eté ná gr̥héran /
Sentence: 7    víṣūcī saṃvatsarásya pákṣasī vyávasram̐seyātām /
Sentence: 8    ā́rtim ā́rcʰeyuḥ {BS ārcʰeyuḥ} /
Sentence: 9    yád eté gr̥hyánte /
Sentence: 10    yátʰā śālāyai pákṣasī madʰyamáṃ vam̐śám abʰí samāyáccʰati //

Verse: 2    {BS 1.2.3.34}
Sentence: 1    evám̐ saṃvatsarásya pákṣasī divākīrtyàm abʰí sáṃtanvanti /
Sentence: 2    nā́rtim ā́rcʰanti /
Sentence: 3    ekavim̐śám áhar bʰavati /
Sentence: 4    śukrā́grā gráhā gr̥hyante /
Sentence: 5    pratyúttabdʰyai {BS prátyúttabdʰyai} sayatvā́ya /
Sentence: 6    sauryà etád áhaḥ paśúr ā́labʰyate /
Sentence: 7    sauryò 'tigrāhyò gr̥hyate /
Sentence: 8    áhar evá rūpéṇa sámardʰayanti /
Sentence: 9    átʰo áhna eváiṣá balír hriyate /
Sentence: 10    saptáitád áhar atigrāhyā̀ gr̥hyante //

Verse: 3    {BS 1.2.3.35}
Sentence: 1    saptá vái śīrṣaṇyā̀ḥ prāṇā́ḥ /
Sentence: 2    asā́v ādityáḥ śíraḥ prajā́nām /
Sentence: 3    śīrṣánn evá prajā́nāṃ prāṇā́n dadʰāti /
Sentence: 4    tásmāt saptá śīrṣán prāṇā́ḥ /
Sentence: 5    índro vr̥trám̐ hatvā́ /
Sentence: 6    ásurān parābʰā́vya /
Sentence: 7    sá imā́m̐l {BS imā́n} lokā́n abʰyàjayat /
Sentence: 8    tásyāsáu lokó 'nabʰijita āsīt /
Sentence: 9    táṃ viśvákarmā bʰūtvā́bʰyajayat /
Sentence: 10    yád vaiśvakarmaṇó gr̥hyáte //

Verse: 4    {BS 1.2.3.36}
Sentence: 1    suvargásya lokásyābʰíjityai /
Sentence: 2    prá vā́ etè 'smā́l lokā́c cyavante /
Sentence: 3    yé vaiśvakarmaṇáṃ gr̥hṇáte /
Sentence: 4    ādityáḥ śvó gr̥hyate /
Sentence: 5    iyáṃ vā́ áditiḥ /
Sentence: 6    asyā́m evá práti tiṣṭhanti /
Sentence: 7    anyònyo gr̥hyete /
Sentence: 8    víśvāny evā́nyéna kármāṇi kurvāṇā́ yanti /
Sentence: 9    asyā́m anyéna práti tiṣṭhanti /
Sentence: 10    tā́v ā́parārdʰā́t saṃvatsarásyānyònyo gr̥hyete /
Sentence: 11    tā́v ubʰáu sahá mahāvraté gr̥hyete /
Sentence: 12    yajñásyaivā́ntaṃ gatvā́ /
Sentence: 13    ubʰáyor lokáyoḥ prátitiṣṭhanti /
Sentence: 14    arkyàm uktʰáṃ bʰavati /
Sentence: 15    annā́dyasyā́varuddʰyai {BS annā́dyasyā́varudʰyai} //

Paragraph: 4 
Verse: 1    {BS 1.2.4.37}
Sentence: 1    ekavim̐śá eṣá bʰavati /
Sentence: 2    eténa vái devā́ ekavim̐śéna /
Sentence: 3    ādityám itá uttamám̐ suvargáṃ lokám ā́rohayann /
Sentence: 4    sá vā́ eṣá itá ekavim̐śáḥ /
Sentence: 5    tásya dáśāvástād áhāni /
Sentence: 6    dáśa parástāt /
Sentence: 7    sá vā́ eṣá virā́jy ubʰayátaḥ prátiṣṭhitaḥ /
Sentence: 8    virā́ji hí vā́ eṣá ubʰayátaḥ prátiṣṭhitaḥ /
Sentence: 9    tásmād antarémáu lokáu yán /
Sentence: 10    sárveṣu suvargéṣu lokéṣv abʰitápann eti //

Verse: 2    {BS 1.2.4.38}
Sentence: 1    devā́ vā́ ādityásya suvargásya lokásya /
Sentence: 2    párāco 'tipādā́d abibʰayuḥ /
Sentence: 3    táṃ cʰándobʰir adr̥m̐han dʰŕ̥tyai /
Sentence: 4    devā́ vā́ ādityásya suvargásya lokásya /
Sentence: 5    ávāco 'vapādā́d abibʰayuḥ /
Sentence: 6    táṃ pañcábʰī raśmíbʰir údavayann /
Sentence: 7    tásmād ekavim̐śé 'han páñca divākīrtyā̀ni kriyante /
Sentence: 8    raśmáyo vái divākīrtyā̀ni /
Sentence: 9    yé gāyatré /
Sentence: 10    té gāyatrī́ṣū́ttarayoḥ pávamānayoḥ //

Verse: 3    {BS 1.2.4.39}
Sentence: 1    mahā́divākīrtyam̐ hótuḥ pr̥ṣṭhám /
Sentence: 2    vikarṇáṃ brahmasāmá {BS brahmasāmám} /
Sentence: 3    bʰā́so 'gniṣṭomáḥ /
Sentence: 4    átʰaitā́ni párāṇi /
Sentence: 5    párair vái devā́ ādityám̐ suvargáṃ lokám apārayann /
Sentence: 6    yád ápārayann /
Sentence: 7    tát párāṇāṃ paratvám /
Sentence: 8    pāráyanty enaṃ párāṇi /
Sentence: 9    yá eváṃ véda /
Sentence: 10    átʰaitā́ni spárāṇi /
Sentence: 11    spárairvái devā́ ādityám̐ suvargáṃ lokám aspārayann /
Sentence: 12    yád áspārayann /
Sentence: 13    tát spárāṇām̐ {AS párāṇām̐ as option} sparatvám /
Sentence: 14    spāráyanty enam̐ spárāṇi /
Sentence: 15    yá eváṃ véda //

Paragraph: 5 
Verse: 1    {BS 1.2.5.40}
Sentence: 1    ápratiṣṭhāṃ vā́ eté gaccʰanti /
Sentence: 2    yéṣām̐ saṃvatsaré 'nāpté 'tʰa /
Sentence: 3    ekādaśíny āpyáte /
Sentence: 4    vaiṣṇaváṃ vāmanám ā́labʰante /
Sentence: 5    yajñó vái víṣṇuḥ /
Sentence: 6    yajñám evā́labʰante prátiṣṭhityai /
Sentence: 7    aindrāgnám ā́labʰante /
Sentence: 8    indrāgnī́ vái devā́nām áyātayāmānau /
Sentence: 9    yé evá deváte áyātayāmnī {BS áyātayāmni} /
Sentence: 10    té evā́labʰante //

Verse: 2    {BS 1.2.5.41}
Sentence: 1    vaiśvadevám ā́labʰante /
Sentence: 2    devátā evā́varundʰate /
Sentence: 3    dyāvāpr̥tʰivyā̀ṃ dʰenúm ā́labʰante /
Sentence: 4    dyā́vāpr̥tʰivyór evá práti tiṣṭhanti /
Sentence: 5    vāyavyàṃ vatsám ā́labʰante /
Sentence: 6    vāyúr eváibʰyo yátʰāyatanā́d devátā ávarundʰe /
Sentence: 7    ādityā́m áviṃ vaśā́m ā́labʰante /
Sentence: 8    iyáṃ vā́ áditiḥ /
Sentence: 9    asyā́m evá prátitiṣṭhanti /
Sentence: 10    maitrāvaruṇī́m ā́labʰante //

Verse: 3    {BS 1.2.5.42}
Sentence: 1    mitréṇaivá yajñásya svìṣṭam̐ śamayanti /
Sentence: 2    váruṇena dúriṣṭam /
Sentence: 3    prājāpatyáṃ tūparáṃ mahāvratá ā́labʰante /
Sentence: 4    prājāpatyó {BS prājāpatyè} 'tigrāhyò gr̥hyate /
Sentence: 5    áhar evá rūpéṇa sámardʰayanti /
Sentence: 6    átʰo áhna eváiṣá balír hriyate /
Sentence: 7    āgneyám ā́labʰante práti prájñātyai /
Sentence: 8    ajapetvā́n vā́ eté pū́rvair mā́sair ávarundʰate /
Sentence: 9    yád eté gavyā́ḥ paśáva ālabʰyánte /
Sentence: 10    ubʰáyeṣāṃ paśūnā́m ávarudʰyai //
{BS 1.2.5.43}
Sentence: 11    yád átiriktām ekādaśínīm ālábʰeran /
Sentence: 12    ápriyaṃ bʰrā́tr̥vyam abʰyátiricyeta /
Sentence: 13    yád dváudvau paśū́ samásyeyuḥ /
Sentence: 14    kánīya ā́yuḥ kurvīran /
Sentence: 15    yád eté brā́hmaṇavantaḥ paśáva ālabʰyánte /
Sentence: 16    nā́priyaṃ bʰrā́tr̥vyam abʰyàtirícyate /
Sentence: 17    ná kánīya ā́yuḥ kurvate //

Paragraph: 6 
Verse: 1    {BS 1.2.6.44}
Sentence: 1    prajā́patiḥ prajā́ḥ sr̥ṣṭvā́ vr̥ttó {BS vr̥ttò} 'śayat /
Sentence: 2    táṃ devā́ bʰūtā́nām̐ rásaṃ téjaḥ saṃbʰŕ̥tya /
Sentence: 3    ténainam abʰiṣajyan /
Sentence: 4    mahā́n avavartī́ti /
Sentence: 5    tán mahāvratásya mahāvratatvám /
Sentence: 6    mahád vratám íti /
Sentence: 7    tán mahāvratásya mahāvratatvám /
Sentence: 8    maható vratám íti /
Sentence: 9    tán mahāvratásya mahāvratatvám /
Sentence: 10    pañcavim̐śáḥ stómo bʰavati //

Verse: 2    {BS 1.2.6.45}
Sentence: 1    cáturvim̐śatyardʰamāsaḥ saṃvatsaráḥ /
Sentence: 2    yád vā́ etásmin saṃvatsaré {AS saṃvatsare} 'dʰi prā́jāyata /
Sentence: 3    tád ánnaṃ pañcavim̐śám abʰavat /
Sentence: 4    madʰyatáḥ kriyate /
Sentence: 5    madʰyató hy ánnam aśitám̐ dʰinóti /
Sentence: 6    átʰo madʰyatá evá prajā́nām ū́rg dʰīyate /
Sentence: 7    átʰa yád vā́ idám antatáḥ kriyáte /
Sentence: 8    tásmād udanté prajā́ḥ sámedʰante /
Sentence: 9    antatáḥ kriyate prajánanāyaivá /
Sentence: 10    trivŕ̥c cʰíro bʰavati //

Verse: 3    {BS 1.2.6.46}
Sentence: 1    tredʰā vihitám̐ hí śíraḥ /
Sentence: 2    lóma cʰavī́r ástʰi /
Sentence: 3    párācā stuvanti /
Sentence: 4    tásmāt tát sadŕ̥g evá /
Sentence: 5    ná médyató 'nu medyati /
Sentence: 6    ná kŕ̥śyató 'nu kr̥śyati /
Sentence: 7    pañcadaśò 'nyáḥ pakṣó bʰavati /
Sentence: 8    saptadaśò 'nyáḥ /
Sentence: 9    tásmād váyām̐sy anyatarám ardʰám abʰí paryā́vartante /
Sentence: 10    anyataráto hí tád gárīyaḥ kriyáte //

Verse: 4    {BS 1.2.6.47}
Sentence: 1    pañcavim̐śá ātmā́ bʰavati /
Sentence: 2    tásmān madʰyatáḥ paśávo váriṣṭhāḥ /
Sentence: 3    ekavim̐śáṃ púccʰam /
Sentence: 4    dvipádāsu stuvanti prátiṣṭhityai /
Sentence: 5    sárveṇa sahá stuvanti /
Sentence: 6    sárveṇa hy ā̀tmanātmanvī́ /
Sentence: 7    sahótpátanti /
Sentence: 8    ékaikām úccʰim̐ṣanti /
Sentence: 9    ātmánn hy áṅgāni baddʰā́ni /
Sentence: 10    ná vā́ eténa sárvaḥ púruṣaḥ //

Verse: 5    {BS 1.2.6.48}
Sentence: 1    yád itá_ito {AS itá ito} lómāni dató nakʰā́n /
Sentence: 2    parimā́daḥ kriyante /
Sentence: 3    tā́ny evá téna prátyupyante /
Sentence: 4    áudumbaras tálpo bʰavati /
Sentence: 5    ū́rg vā́ ánnam udumbáraḥ /
Sentence: 6    ūrjá evā́nnā́dyasyā́varuddʰyai {BS evā́nnā́dyasyā́varudʰyai} /
Sentence: 7    yásya talpasádyam ánabʰijitam̐ syāt /
Sentence: 8    sá devā́nām̐ sā́myakṣe /
Sentence: 9    talpasádyam abʰíjayānī́ti tálpam ārúhyódgāyet /
Sentence: 10    talpasádyam evā́bʰíjayati //

Verse: 6    {BS 1.2.6.49}
Sentence: 1    yásya talpasádyam {BS tálpasádyam} abʰíjitam̐ syā́t /
Sentence: 2    sá devā́nām̐ sā́myakṣe /
Sentence: 3    talpasádyaṃ mā́ párājeṣī́ti tálpam ārúhyódgāyet /
Sentence: 4    ná talpasádyaṃ párājayate /
Sentence: 5    pleṅkʰé śam̐sati /
Sentence: 6    máho vái pleṅkʰáḥ /
Sentence: 7    máhasa evā́nnā́dyasyā́varuddʰyai /
Sentence: 8    devāsurā́ḥ sáṃyattā āsan /
Sentence: 9    tá ādityé vyā́yaccʰanta /
Sentence: 10    táṃ devā́ḥ sámajayan //

Verse: 7    {BS 1.2.6.50}
Sentence: 1    brāhmaṇáś ca śūdráś ca carmakarté vyā́yaccʰete /
Sentence: 2    dáivyo vái várṇo brāhmaṇáḥ /
Sentence: 3    asuryàḥ śūdráḥ /
Sentence: 4    imè 'rātsur imé subʰūtám akrann íty anyataró brūyāt /
Sentence: 5    imá udvāsīkāríṇa imé durbʰūtám akrann íty anyataráḥ /
Sentence: 6    yád eváiṣām̐ sukr̥táṃ yā́ rā́ddʰiḥ /
Sentence: 7    tád anyatarò 'bʰiśrī́ṇāti {BS 'bʰíśrīṇāti} /
Sentence: 8    yád eváiṣāṃ duṣkr̥táṃ yā́ rāddʰiḥ /
Sentence: 9    tád anyataró 'pahanti /
Sentence: 10    brāhmaṇáḥ sáṃjayati /
Sentence: 11    amúm evā́dityáṃ bʰrā́tr̥vyasya sáṃvindante //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.