TITUS
Author: Hom. 
Homer
Book: Od. 
Odyssee


On the basis of the edition by
Arthur Ludwich,
Homeri Odyssea,
vol. 1-2,
Lipsiae 1889-1891
electronically prepared by
Marina Benedetti,
Siena 2000;
TITUS version by J. Gippert,
Frankfurt a/M, 20.1.2001 / 29.10.2007



Chapter: 1    
ΟΔΥΣΣΕΙΑΣ Α


Verse: 1       ῎Ανδρά μοι ἔννεπε, Μοῦσα, πολύτροπον, ὃς μάλα πολλὰ
Verse: 2    πλάγχϑη, ἐπεὶ Τροίης ἱερὸν πτολίεϑρον ἔπερσε·
Verse: 3    πολλῶν δ' ἀνϑρώπων ἴδεν ἄστεα καὶ νόον ἔγνω,
Verse: 4    πολλὰ δ' ὅ γ' ἐν πόντῳ πάϑεν ἄλγεα ὃν κατὰ ϑυμόν,
Verse: 5    ἀρνύμενος ἥν τε ψυχὴν καὶ νόστον ἑταίρων.
Verse: 6    ἀλλ' οὐδ' ὧς ἑτάρους ἐρρύσατο ἱέμενός περ·
Verse: 7    αὐτῶν γὰρ σϕετέρῃσιν ἀτασϑαλίῃσιν ὄλοντο,
Verse: 8    νήπιοι, οἳ κατὰ βοῦς ῾Υπερίονος ᾽Ηελίοιο
Verse: 9    ἤσϑιον· αὐτὰρ ὁ τοῖσιν ἀϕείλετο νόστιμον ἦμαρ.
Verse: 10    τῶν ἁμόϑεν γε, ϑεά, ϑύγατερ Διός, εἰπὲ καὶ ἡμῖν.

Verse: 11       ἔνϑ' ἄλλοι μὲν πάντες, ὅσοι ϕύγον αἰπὺν ὄλεϑρον,
Verse: 12    οἴκοι ἔσαν, πόλεμόν τε πεϕευγότες ἠδὲ ϑάλασσαν·
Verse: 13    τὸν δ' οἶον, νόστου κεχρημένον ἠδὲ γυναικός,
Verse: 14    Νύμϕη πότνι' ἔρυκε Καλυψώ, δῖα ϑεάων,
Verse: 15    ἐν σπέσσι γλαϕυροῖσι, λιλαιομένη πόσιν εἶναι.
Verse: 16    ἀλλ' ὅτε δὴ ἔτος ἦλϑε περιπλομένων ἐνιαυτῶν,
Verse: 17    τῷ οἱ ἐπεκλώσαντο ϑεοὶ οἶκον δὲ νέεσϑαι
Verse: 18    εἰς ᾽Ιϑάκην, οὐδ' ἔνϑα πεϕυγμένος ἦεν ἀέϑλων,
Verse: 19    καὶ μετὰ οἷσι ϕίλοισι. ϑεοὶ δ' ἐλέαιρον ἅπαντες
Verse: 20    νόσϕι Ποσειδάωνος· ὁ δ' ἀσπερχὲς μενέαινεν
Verse: 21    ἀντιϑέῳ ᾽Οδυσῆι πάρος ἣν γαῖαν ἱκέσϑαι.
Verse: 22    ἀλλ' ὁ μὲν Αἰϑίοπας μετεκίαϑε τηλόϑ' ἐόντας -
Verse: 23    Αἰϑίοπας, τοὶ διχϑὰ δεδαίαται, ἔσχατοι ἀνδρῶν,
Verse: 24    οἱ μὲν δυσομένου ῾Υπερίονος, οἱ δ' ἀνιόντος, -
Verse: 25    ἀντιόων ταύρων τε καὶ ἀρνειῶν ἑκατόμβης.
Verse: 26    ἔνϑ' ὅ γε τέρπετο δαιτὶ παρήμενος: οἱ δὲ δὴ ἄλλοι
Verse: 27    Ζηνὸς ἐνὶ μεγάροισιν ᾽Ολυμπίου ἁϑρόοι ἦσαν.
Verse: 28    τοῖσι δὲ μύϑων ἦρχε πατὴρ ἀνδρῶν τε ϑεῶν τε·
Verse: 29    μνήσατο γὰρ κατὰ ϑυμὸν ἀμύμονος Αἰγίσϑοιο,
Verse: 30    τόν ῥ' ᾽Αγαμεμνονίδης τηλεκλυτὸς ἔκταν' ᾽Ορέστης:
Verse: 31    τοῦ ὅ γ' ἐπιμνησϑεὶς ἔπε' ἀϑανάτοισι μετηύδα·

Verse: 32       "ὢ πόποι, οἷον δή νυ ϑεοὺς βροτοὶ αἰτιόωνται·
Verse: 33    ἐξ ἡμέων γάρ ϕασι κάκ' ἔμμεναι· οἱ δὲ καὶ αὐτοὶ
Verse: 34    σϕῇσιν ἀτασϑαλίῃσιν ὑπέρμορον ἄλγε' ἔχουσιν·
Verse: 35    ὡς καὶ νῦν Αἴγισϑος ὑπέρμορον ᾽Ατρείδαο
Verse: 36    γῆμ' ἄλοχον μνηστήν, τὸν δ' ἔκτανε νοστήσαντα,
Verse: 37    εἰδὼς αἰπὺν ὄλεϑρον, ἐπεὶ πρό οἱ εἴπομεν ἡμεῖς,
Verse: 38    ῾Ερμείαν πέμψαντες, ἐύσκοπον ᾽Αργειϕόντην,
Verse: 39    μήτ' αὐτὸν κτείνειν μήτε μνάασϑαι ἄκοιτιν·
Verse: 40    ἐκ γὰρ ᾽Ορέσταο τίσις ἔσσεται ᾽Ατρείδαο,
Verse: 41    ὁππότ' ἂν ἡβήσῃ τε καὶ ἧς ἱμείρεται αἴης.
Verse: 42    ὣς ἔϕαϑ' ῾Ερμείας, ἀλλ' οὐ ϕρένας Αἰγίσϑοιο
Verse: 43    πεῖϑ' ἀγαϑὰ ϕρονέων· νῦν δ' ἁϑρόα πάντ' ἀπέτισε."

Verse: 44       τὸν δ' ἠμείβετ' ἔπειτα ϑεὰ γλαυκῶπις ᾽Αϑήνη·

Verse: 45       "ὦ πάτερ ἡμέτερε Κρονίδη, ὕπατε κρειόντων,
Verse: 46    καὶ λίην κεῖνός γε ἐοικότι κεῖται ὀλέϑρῳ·
Verse: 47    ὡς ἀπόλοιτο καὶ ἄλλος ὅτις τοιαῦτά γε ῥέζοι.
Verse: 48    ἀλλά μοι ἀμϕ' ᾽Οδυσῆιὴ δαί:ϕρονι δαίεται ἦτορ,
Verse: 49    δυσμόρῳ, ὃς δὴ δηϑὰ ϕίλων ἄπο πήματα πάσχει
Verse: 50    νήσῳ ἐν ἀμϕιρύτῃ, ὅϑι τ' ὀμϕαλός ἐστι ϑαλάσσης,
Verse: 51    νῆσος δενδρήεσσα, ϑεὰ δ' ἐν δώματα ναίει,
Verse: 52    ῎Ατλαντος ϑυγάτηρ ὀλοόϕρονος, ὅς τε ϑαλάσσης
Verse: 53    πάσης βένϑεα οἶδεν, ἔχει δέ τε κίονας αὐτὸς
Verse: 54    μακράς, αἳ γαῖάν τε καὶ οὐρανὸν ἀμϕὶς ἔχουσι.
Verse: 55    τοῦ ϑυγάτηρ δύστηνον ὀδυρόμενον κατερύκει,
Verse: 56    αἰεὶ δὲ μαλακοῖσι καὶ αἱμυλίοισι λόγοισι
Verse: 57    ϑέλγει, ὅπως ᾽Ιϑάκης ἐπιλήσεται· αὐτὰρ ᾽Οδυσσεύς,
Verse: 58    ἱέμενος καὶ καπνὸν ἀποϑρῴσκοντα νοῆσαι
Verse: 59    ἧς γαίης, ϑανέειν ἱμείρεται. οὐ δέ νυ σοί περ
Verse: 60    ἐντρέπεται ϕίλον ἦτορ, ᾽Ολύμπιε. οὔ νύ τ' ᾽Οδυσσεὺς
Verse: 61    ᾽Αργείων παρὰ νηυσὶ χαρίζετο ἱερὰ ῥέζων
Verse: 62    Τροίῃ ἐν εὐρείῃ; τί νύ οἱ τόσον ὠδύσαο, Ζεῦ;"

Verse: 63       τὴν δ' ἀπαμειβόμενος προσέϕη νεϕεληγερέτα Ζεύς:

Verse: 64       "τέκνον ἐμόν, ποῖόν σε ἔπος ϕύγεν ἕρκος ὀδόντων.
Verse: 65    πῶς ἂν ἔπειτ' ᾽Οδυσῆος ἐγὼ ϑείοιο λαϑοίμην;
Verse: 66    ὃς περὶ μὲν νόον ἐστὶ βροτῶν, περὶ δ' ἱρὰ ϑεοῖσιν
Verse: 67    ἀϑανάτοισιν ἔδωκε, τοὶ οὐρανὸν εὐρὺν ἔχουσιν.
Verse: 68    ἀλλὰ Ποσειδάων γαιήοχος ἀσκελὲς αἰεὶ
Verse: 69    Κύκλωπος κεχόλωται, ὃν ὀϕϑαλμοῦ ἀλάωσεν,
Verse: 70    ἀντίϑεον Πολύϕημον, ὅου κράτος ἔσκε μέγιστον
Verse: 71    πᾶσιν Κυκλώπεσσι· Θόωσα δέ μιν τέκε Νύμϕη,
Verse: 72    Φόρκυνος ϑυγάτηρ, ἁλὸς ἀτρυγέτοιο μέδοντος,
Verse: 73    ἐν σπέσσι γλαϕυροῖσι Ποσειδάωνι μιγεῖσα.
Verse: 74    ἐκ τοῦ δὴ ᾽Οδυσῆα Ποσειδάων ἐνοσίχϑων
Verse: 75    οὔ τι κατακτείνει, πλάζει δ' ἀπὸ πατρίδος αἴης.
Verse: 76    ἀλλ' ἄγεϑ' ἡμεῖς οἷδε περιϕραζώμεϑα πάντες
Verse: 77    νόστον, ὅπως ἔλϑῃσι. Ποσειδάων δὲ μεϑήσει
Verse: 78    ὃν χόλον· οὐ μὲν γάρ τι δυνήσεται ἀντία πάντων
Verse: 79    ἀϑανάτων ἀέκητι ϑεῶν ἐριδαινέμεν οἶος."

Verse: 80       τὸν δ' ἠμείβετ' ἔπειτα ϑεὰ γλαυκῶπις ᾽Αϑήνη·

Verse: 81       "ὦ πάτερ ἡμέτερε Κρονίδη, ὕπατε κρειόντων,
Verse: 82    εἰ μὲν δὴ νῦν τοῦτο ϕίλον μακάρεσσι ϑεοῖσι,
Verse: 83    νοστῆσαι ᾽Οδυσῆα πολύϕρονα ὅν δε δόμον δέ,
Verse: 84    ῾Ερμείαν μὲν ἔπειτα, διάκτορον ᾽Αργειϕόντην,
Verse: 85    νῆσον ἐς ᾽Ωγυγίην ὀτρύνομεν, ὄϕρα τάχιστα
Verse: 86    Νύμϕῃ ἐυπλοκάμῳ εἴπῃ νημερτέα βουλήν,
Verse: 87    νόστον ᾽Οδυσσῆος ταλασίϕρονος, ὥς κε νέηται.
Verse: 88    αὐτὰρ ἐγὼν ᾽Ιϑάκην δ' ἐσελεύσομαι, ὄϕρά οἱ υἱὸν
Verse: 89    μᾶλλον ἐποτρύνω, καί οἱ μένος ἐν ϕρεσὶ ϑείω,
Verse: 90    εἰς ἀγορὴν καλέσαντα καρηκομόωντας ᾽Αχαιοὺς
Verse: 91    πᾶσι μνηστήρεσσιν ἀπειπέμεν, οἵ τέ οἱ αἰεὶ
Verse: 92    μῆλ' ἁδινὰ σϕάζουσι καὶ εἰλίποδας ἕλικας βοῦς.
Verse: 93    πέμψω δ' ἐς Σπάρτην τε καὶ ἐς Πύλον ἠμαϑόεντα
Verse: 94    νόστον πευσόμενον πατρὸς ϕίλου, ἤν που ἀκούσῃ,
Verse: 95    ἠδ' ἵνα μιν κλέος ἐσϑλὸν ἐν ἀνϑρώποισιν ἔχῃσιν."

Verse: 96       ὣς εἰποῦσ' ὑπὸ ποσσὶν ἐδήσατο καλὰ πέδιλα,
Verse: 97    ἀμβρόσια, χρύσεια, τά μιν ϕέρον ἠμὲν ἐϕ' ὑγρὴν
Verse: 98    ἠδ' ἐπ' ἀπείρονα γαῖαν ἅμα πνοιῇς ἀνέμοιο.
Verse: 99    εἵλετο δ' ἄλκιμον ἔγχος, ἀκαχμένον ὀξέι χαλκῷ,
Verse: 100    βριϑὺ, μέγα, στιβαρόν, τῷ δάμνῃσι στίχας ἀνδρῶν
Verse: 101    ἡρώων, τοῖσίν τε κοτέσσεται ὀβριμοπάτρη.
Verse: 102    βῆ δὲ κατ' Οὐλύμποιο καρήνων ἀίξασα,
Verse: 103    στῆ δ' ᾽Ιϑάκης ἐνὶ δήμῳ ἐπὶ προϑύροις ᾽Οδυσῆος,
Verse: 104    οὐδοῦ ἐπ' αὐλείου, παλάμῃ δ' ἔχε χάλκεον ἔγχος,
Verse: 105    εἰδομένη ξείνῳ, Ταϕίων ἡγήτορι, Μέντῃ.
Verse: 106    εὗρε δ' ἄρα μνηστῆρας ἀγήνορας. οἱ μὲν ἔπειτα
Verse: 107    πεσσοῖσι προπάροιϑε ϑυράων ϑυμὸν ἔτερπον,
Verse: 108    ἥμενοι ἐν ῥινοῖσι βοῶν, ουἠς ἔκτανον αὐτοί.
Verse: 109    κήρυκες δ' αὐτοῖσι καὶ ὀτρηροὶ ϑεράποντες
Verse: 110    οἱ μὲν ἄρ' οἶνον ἔμισγον ἐνὶ κρητῆρσι καὶ ὕδωρ,
Verse: 111    οἱ δ' αὖτε σπόγγοισι πολυτρήτοισι τραπέζας
Verse: 112    νίζον καὶ πρότιϑεν, τοὶ δὲ κρέα πολλὰ δατεῦντο.

Verse: 113       τὴν δὲ πολὺ πρῶτος ἴδε Τηλέμαχος ϑεοειδής:
Verse: 114    ἧστο γὰρ ἐν μνηστῆρσι ϕίλον τετιημένος ἦτορ,
Verse: 115    ὀσσόμενος πατέρ' ἐσϑλὸν ἐνὶ ϕρεσίν, εἴ ποϑεν ἐλϑὼν
Verse: 116    μνηστήρων τῶν μὲν σκέδασιν κατὰ δώματα ϑείη,
Verse: 117    τιμὴν δ' αὐτὸς ἔχοι καὶ κτήμασιν οἷσιν ἀνάσσοι·
Verse: 118    τὰ ϕρονέων, μνηστῆρσι μεϑήμενος, εἴσιδ' ᾽Αϑήνην.
Verse: 119    βῆ δ' ἰϑὺς προϑύροιο, νεμεσσήϑη δ' ἐνὶ ϑυμῷ
Verse: 120    ξεῖνον δηϑὰ ϑύρῃσιν ἐϕεστάμεν· ἐγγύϑι δὲ στὰς
Verse: 121    χεῖρ' ἕλε δεξιτερὴν καὶ ἐδέξατο χάλκεον ἔγχος,
Verse: 122    καί μιν ϕωνήσας ἔπεα πτερόεντα προσηύδα·

Verse: 123       "χαῖρε, ξεῖνε· παρ' ἄμμι ϕιλήσεαι· αὐτὰρ ἔπειτα
Verse: 124    δείπνου πασσάμενος μυϑήσεαι ὅττεό σε χρή."

Verse: 125       ὣς εἰπὼν ἡγεῖϑ', ἡ δ' ἕσπετο Παλλὰς ᾽Αϑήνη.
Verse: 126    οἱ δ' ὅτε δή ῥ' ἔντοσϑεν ἔσαν δόμου ὑψηλοῖο,
Verse: 127    ἔγχος μέν ῥ' ἔστησε ϕέρων πρὸς κίονα μακρὴν
Verse: 128    δουροδόκης ἔντοσϑεν ἐυξόου, ἔνϑά περ ἄλλα
Verse: 129    ἔγχε' ᾽Οδυσσῆος ταλασίϕρονος ἵστατο πολλά,
Verse: 130    αὐτὴν δ' ἐς ϑρόνον εἷσεν ἄγων, ὑπὸ λῖτα πετάσσας
Verse: 131    καλὸν, δαιδάλεον· ὑπὸ δὲ ϑρῆνυς ποσὶν ἦεν.
Verse: 132    πὰρ δ' αὐτὸς κλισμὸν ϑέτο ποικίλον, ἔκτοϑεν ἄλλων
Verse: 133    μνηστήρων, μὴ ξεῖνος ἀνιηϑεὶς ὀρυμαγδῷ
Verse: 134    δείπνῳ ἀδήσειεν, ὑπερϕιάλοισι μετελϑών,
Verse: 135    ἠδ' ἵνα μιν περὶ πατρὸς ἀποιχομένοιο ἔροιτο.
Verse: 136    χέρνιβα δ' ἀμϕίπολος προχόῳ ἐπέχευε ϕέρουσα
Verse: 137    καλῇ, χρυσείῃ, ὑπὲρ ἀργυρέοιο λέβητος,
Verse: 138    νίψασϑαι· παρὰ δὲ ξεστὴν ἐτάνυσσε τράπεζαν.
Verse: 139    σῖτον δ' αἰδοίη ταμίη παρέϑηκε ϕέρουσα,
Verse: 140    εἴδατα πόλλ' ἐπιϑεῖσα, χαριζομένη παρεόντων·
Verse: 141    δαιτρὸς δὲ κρειῶν πίνακας παρέϑηκεν ἀείρας
Verse: 142    παντοίων, παρὰ δέ σϕι τίϑει χρύσεια κύπελλα·
Verse: 143    κῆρυξ δ' αὐτοῖσιν ϑάμ' ἐπῴχετο οἰνοχοεύων.

Verse: 144       ἐς δ' ἦλϑον μνηστῆρες ἀγήνορες. οἱ μὲν ἔπειτα
Verse: 145    ἑξείης ἕζοντο κατὰ κλισμούς τε ϑρόνους τε,
Verse: 146    τοῖσι δὲ κήρυκες μὲν ὕδωρ ἐπὶ χεῖρας ἔχευαν,
Verse: 147    σῖτον δὲ δμῳαὶ παρενήνεον ἐν κανέοισι,
Verse: 148    κοῦροι δὲ κρητῆρας ἐπεστέψαντο ποτοῖο.
Verse: 149    οἱ δ' ἐπ' ὀνείαϑ' ἑτοῖμα προκείμενα χεῖρας ἴαλλον.
Verse: 150    αὐτὰρ ἐπεὶ πόσιος καὶ ἐδητύος ἐξ ἔρον ἕντο
Verse: 151    μνηστῆρες, τοῖσιν μὲν ἐνὶ ϕρεσὶν ἄλλα μεμήλει,
Verse: 152    μολπή τ' ὀρχηστύς τε· τὰ γάρ τ' ἀναϑήματα δαιτός.
Verse: 153    κῆρυξ δ' ἐν χερσὶν κίϑαριν περικαλλέα ϑῆκε
Verse: 154    Φημίῳ, ὅς ῥ' ἤειδε παρὰ μνηστῆρσιν ἀνάγκῃ.
Verse: 155    ἤτοι ὁ ϕορμίζων ἀνεβάλλετο καλὸν ἀείδειν,
Verse: 156    αὐτὰρ Τηλέμαχος προσέϕη γλαυκῶπιν ᾽Αϑήνην,
Verse: 157    ἄγχι σχὼν κεϕαλήν, ἵνα μὴ πευϑοίαϑ' οἱ ἄλλοι·

Verse: 158       "ξεῖνε ϕίλ', ἦ καί μοι νεμεσήσεαι ὅττί κεν εἴπω;
Verse: 159    τούτοισιν μὲν ταῦτα μέλει, κίϑαρις καὶ ἀοιδή,
Verse: 160    ῥεῖ', ἐπεὶ ἀλλότριον βίοτον νήποινον ἔδουσιν,
Verse: 161    ἀνέρος, οὗ δή που λεύκ' ὀστέα πύϑεται ὄμβρῳ
Verse: 162    κείμεν' ἐπ' ἠπείρου, ἢ εἰν ἁλὶ κῦμα κυλίνδει.
Verse: 163    εἰ κεῖνόν γ' ᾽Ιϑάκην δὲ ἰδοίατο νοστήσαντα,
Verse: 164    πάντές κ' ἀρησαίατ' ἐλαϕρότεροι πόδας εἶναι
Verse: 165    ἢ ἀϕνειότεροι χρυσοῖό τε ἐσϑῆτός τε.
Verse: 166    νῦν δ' ὁ μὲν ὣς ἀπόλωλε κακὸν μόρον, οὐ δέ τις ἥμιν
Verse: 167    ϑαλπωρή, εἴ πέρ τις ἐπιχϑονίων ἀνϑρώπων
Verse: 168    ϕῇσιν ἐλεύσεσϑαι· τοῦ δ' ὤλετο νόστιμον ἦμαρ.
Verse: 169    ἀλλ' ἄγε μοι τόδε εἰπὲ καὶ ἀτρεκέως κατάλεξον·
Verse: 170    τίς, πόϑεν εἰς ἀνδρῶν; πόϑι τοι πόλις ἠδὲ τοκῆες...
Verse: 171    ὁπποίης τ' ἐπὶ νηὸς ἀϕίκεο· πῶς δέ σε ναῦται
Verse: 172    ἤγαγον εἰς ᾽Ιϑάκην; τίνες ἔμμεναι εὐχετόωντο;
Verse: 173    οὐ μὲν γάρ τί σε πεζὸν ὀίομαι ἐνϑάδ' ἱκέσϑαι.
Verse: 174    καί μοι τοῦτ' ἀγόρευσον ἐτήτυμον, ὄϕρ' ἔυ εἰδῶ,
Verse: 175    ἠὲ νέον μεϑέπεις ἦ καὶ πατρώιός ἐσσι
Verse: 176    ξεῖνος, ἐπεὶ πολλοὶ ἴσαν ἀνέρες ἡμέτερον δῶ
Verse: 177    ἄλλοι, ἐπεὶ καὶ κεῖνος ἐπίστροϕος ἦν ἀνϑρώπων."

Verse: 178       τὸν δ' αὖτε προσέειπε ϑεὰ γλαυκῶπις ᾽Αϑήνη·

Verse: 179       "τοὶ γὰρ ἐγώ τοι ταῦτα μάλ' ἀτρεκέως ἀγορεύσω.
Verse: 180    Μέντης ᾽Αγχιάλοιο δαί:ϕρονος εὔχομαι εἶναι
Verse: 181    υἱός, ἀτὰρ Ταϕίοισι ϕιληρέτμοισιν ἀνάσσω.
Verse: 182    νῦν δ' ὧδε ξὺν νηὶ κατήλυϑον ἠδ' ἑτάροισι,
Verse: 183    πλέων ἐπὶ οἴνοπα πόντον ἐπ' ἀλλοϑρόους ἀνϑρώπους,
Verse: 184    ἐς Τεμέσην μετὰ χαλκόν, ἄγω δ' αἴϑωνα σίδηρον.
Verse: 185    νηῦς δέ μοι ἧδ' ἕστηκεν ἐπ' ἀγροῦ νόσϕι πόληος,
Verse: 186    ἐν λιμένι ῾Ρείϑρῳ, ὑπὸ Νηίῳ ὑλήεντι.
Verse: 187    ξεῖνοι δ' ἀλλήλων πατρώιοι εὐχόμεϑ' εἶναι
Verse: 188    ἐξ ἀρχῆς, εἴ πέρ τε γέροντ' εἴρηαι ἐπελϑὼν
Verse: 189    Λαέρτην ἥρωα, τὸν οὐκέτι ϕασὶ πόλιν δὲ
Verse: 190    ἔρχεσϑ', ἀλλ' ἀπάνευϑεν ἐπ' ἀγροῦ πήματα πάσχειν
Verse: 191    γρηὶ σὺν ἀμϕιπόλῳ, ἥ οἱ βρῶσίν τε πόσιν τε
Verse: 192    παρτιϑεῖ, εὖτ' ἄν μιν κάματος κατὰ γυῖα λάβῃσιν
Verse: 193    ἑρπύζοντ' ἀνὰ γουνὸν ἀλωῆς οἰνοπέδοιο.
Verse: 194    νῦν δ' ἦλϑον· δὴ γάρ μιν ἔϕαντ' ἐπιδήμιον εἶναι,
Verse: 195    σὸν πατέρ'· ἀλλά νυ τόν γε ϑεοὶ βλάπτουσι κελεύϑου.
Verse: 196    οὐ γάρ πω τέϑνηκεν ἐπὶ χϑονὶ δῖος ᾽Οδυσσεύς,
Verse: 197    ἀλλ' ἔτι που ζωὸς κατερύκεται εὐρέι πόντῳ
Verse: 198    νήσῳ ἐν ἀμϕιρύτῃ, χαλεποὶ δέ μιν ἄνδρες ἔχουσιν,
Verse: 199    ἄγριοι, οἵ που κεῖνον ἐρυκανόωσ' ἀέκοντα.
Verse: 200    αὐτὰρ νῦν τοι ἐγὼ μαντεύσομαι, ὡς ἐνὶ ϑυμῷ
Verse: 201    ἀϑάνατοι βάλλουσι καὶ ὡς τελέεσϑαι ὀίω,
Verse: 202    οὔτέ τι μάντις ἐὼν οὔτ' οἰωνῶν σάϕα εἰδώς.
Verse: 203    οὔ τοι ἔτι δηρόν γε ϕίλης ἀπὸ πατρίδος αἴης
Verse: 204    ἔσσεται, οὐδ' εἴ πέρ τε σιδήρεα δέσματ' ἔχῃσι·
Verse: 205    ϕράσσεται ὥς κε νέηται, ἐπεὶ πολυμήχανός ἐστιν.
Verse: 206    ἀλλ' ἄγε μοι τόδε εἰπὲ καὶ ἀτρεκέως κατάλεξον,
Verse: 207    εἰ δὴ ἐξ αὐτοῖο τόσος παῖς εἰς ᾽Οδυσῆος.
Verse: 208    αἰνῶς μὲν κεϕαλήν τε καὶ ὄμματα καλὰ ἔοικας
Verse: 209    κείνῳ, ἐπεὶ ϑαμὰ τοῖον ἐμισγόμεϑ' ἀλλήλοισι,
Verse: 210    πρίν γε τὸν ἐς Τροίην ἀναβήμεναι, ἔνϑά περ ἄλλοι
Verse: 211    ᾽Αργείων οἱ ἄριστοι ἔβαν κοίλῃς ἐνὶ νηυσίν·
Verse: 212    ἐκ τοῦ δ' οὔτ' ᾽Οδυσῆα ἐγὼν ἴδον οὔτ' ἐμὲ κεῖνος."

Verse: 213       τὴν δ' αὖ Τηλέμαχος πεπνυμένος ἀντίον ηὔδα·

Verse: 214       "τοὶ γὰρ ἐγώ τοι, ξεῖνε, μάλ' ἀτρεκέως ἀγορεύσω.
Verse: 215    μήτηρ μέν τέ μέ ϕησι τοῦ ἔμμεναι, αὐτὰρ ἔγωγε
Verse: 216    οὐκ οἶδ'· οὐ γάρ πώ τις ἑὸν γόνον αὐτὸς ἀνέγνω.
Verse: 217    ὡς δὴ ἔγωγ' ὄϕελον μάκαρός νύ τευ ἔμμεναι υἱὸς
Verse: 218    ἀνέρος, ὃν κτεάτεσσιν ἑοῖς ἐπὶ γῆρας ἔτετμε.
Verse: 219    νῦν δ', ὃς ἀποτμότατος γένετο ϑνητῶν ἀνϑρώπων,
Verse: 220    τοῦ μ' ἔκ ϕασι γενέσϑαι, ἐπεὶ σύ με τοῦτ' ἐρεείνεις."

Verse: 221       τὸν δ' αὖτε προσέειπε ϑεὰ γλαυκῶπις ᾽Αϑήνη·

Verse: 222       "οὐ μέν τοι γενεήν γε ϑεοὶ νώνυμνον ὀπίσσω
Verse: 223    ϑῆκαν, ἐπεὶ σέγε τοῖον ἐγείνατο Πηνελόπεια.
Verse: 224    ἀλλ' ἄγε μοι τόδε εἰπὲ καὶ ἀτρεκέως κατάλεξον·
Verse: 225    τίς δαίς, τίς δαὶ ὅμιλος ὅδ' ἔπλετο; τίπτε δέ σε χρεώ;
Verse: 226    εἰλαπίνη ἦε γάμος... ἐπεὶ οὐκ ἔρανος τάδε γ' ἐστίν.
Verse: 227    ὥς τέ μοι ὑβρίζοντες ὑπερϕιάλως δοκέουσι
Verse: 228    δαίνυσϑαι κατὰ δῶμα. νεμεσσήσαιτό κεν ἀνὴρ
Verse: 229    αἴσχεα πόλλ' ὁρόων, ὅς τις πινυτός γε μετέλϑοι."

Verse: 230       τὴν δ' αὖ Τηλέμαχος πεπνυμένος ἀντίον ηὔδα·

Verse: 231       "ξεῖν', ἐπεὶ ἂρ δὴ ταῦτά μ' ἀνείρεαι ἠδὲ μεταλλᾷς,
Verse: 232    μέλλεν μέν ποτε οἶκος ὅδ' ἀϕνειὸς καὶ ἀμύμων
Verse: 233    ἔμμεναι, ὄϕρ' ἔτι κεῖνος ἀνὴρ ἐπιδήμιος ἦεν·
Verse: 234    νῦν δ' ἑτέρως ἐβόλοντο ϑεοὶ κακὰ μητιόωντες,
Verse: 235    οἳ κεῖνον μὲν ἄιστον ἐποίησαν περὶ πάντων
Verse: 236    ἀνϑρώπων, ἐπεὶ οὔ κε ϑανόντί περ ὧδ' ἀκαχοίμην,
Verse: 237    εἰ μετὰ οἷς ἑτάροισι δάμη Τρώων ἐνὶ δήμῳ
Verse: 238    ἠὲ ϕίλων ἐν χερσίν, ἐπεὶ πόλεμον τολύπευσε.
Verse: 239    τῶ κέν οἱ τύμβον μὲν ἐποίησαν Παναχαιοί,
Verse: 240    ἠδέ κε καὶ ᾧ παιδὶ μέγα κλέος ἤρατ' ὀπίσσω.
Verse: 241    νῦν δέ μιν ἀκλειῶς ῞Αρπυιαι ἀνηρείψαντο·
Verse: 242    οἴχετ' ἄιστος, ἄπυστος, ἐμοὶ δ' ὀδύνας τε γόους τε
Verse: 243    κάλλιπεν. οὐδέ τι κεῖνον ὀδυρόμενος στεναχίζω
Verse: 244    οἶον, ἐπεί νύ μοι ἄλλα ϑεοὶ κακὰ κήδε' ἔτευξαν·
Verse: 245    ὅσσοι γὰρ νήσοισιν ἐπικρατέουσιν ἄριστοι,
Verse: 246    Δουλιχίῳ τε Σάμῃ τε καὶ ὑλήεντι Ζακύνϑῳ,
Verse: 247    ἠδ' ὅσσοι κραναὴν ᾽Ιϑάκην κάτα κοιρανέουσι,
Verse: 248    τόσσοι μητέρ' ἐμὴν μνῶνται, τρύχουσι δὲ οἶκον.
Verse: 249    ἡ δ' οὔτ' ἀρνεῖται στυγερὸν γάμον οὔτε τελευτὴν
Verse: 250    ποιῆσαι δύναται· τοὶ δὲ ϕϑινύϑουσιν ἔδοντες
Verse: 251    οἶκον ἐμόν· τάχα δή με διαραίσουσι καὶ αὐτόν."

Verse: 252       τὸν δ' ἐπαλαστήσασα προσηύδα Παλλὰς ᾽Αϑήνη·

Verse: 253       "ὢ πόποι, ἦ δὴ πολλὸν ἀποιχομένου ᾽Οδυσῆος
Verse: 254    δεύῃ, ὅ κε μνηστῆρσιν ἀναιδέσι χεῖρας ἐϕείη.
Verse: 255    εἰ γὰρ νῦν ἐλϑὼν δόμου ἐν πρώτῃσι ϑύρῃσι
Verse: 256    σταίη, ἔχων πήληκα καὶ ἀσπίδα καὶ δύο δοῦρε,
Verse: 257    τοῖος ἐὼν οἷόν μιν ἐγὼ τὰ πρῶτ' ἐνόησα
Verse: 258    οἴκῳ ἐν ἡμετέρῳ πίνοντά τε τερπόμενόν τε,
Verse: 259    ἐξ ᾽Εϕύρης ἀνιόντα παρ' ῎Ιλου Μερμερίδαο ή
Verse: 260    ᾤχετο γὰρ καὶ κεῖσε ϑοῆς ἐπὶ νηὸς ᾽Οδυσσεὺς
Verse: 261    ϕάρμακον ἀνδροϕόνον διζήμενος, ὄϕρά οἱ εἴη
Verse: 262    ἰοὺς χρίεσϑαι χαλκήρεας: ἀλλ' ὁ μὲν οὔ οἱ
Verse: 263    δῶκεν, ἐπεί ῥα ϑεοὺς νεμεσίζετο αἰὲν ἐόντας,
Verse: 264    ἀλλὰ πατήρ οἱ δῶκεν ἐμός: ϕιλέεσκε γὰρ αἰνῶς ή·
Verse: 265    τοῖος ἐὼν μνηστῆρσιν ὁμιλήσειεν ᾽Οδυσσεύς:
Verse: 266    πάντες κ' ὠκύμοροί τε γενοίατο πικρόγαμοί τε.
Verse: 267    ἀλλ' ἤτοι μὲν ταῦτα ϑεῶν ἐν γούνασι κεῖται,
Verse: 268    ἤ κεν νοστήσας ἀποτίσεται, ἦε καὶ οὐκί,
Verse: 269    οἷσιν ἐνὶ μεγάροισι· σὲ δὲ ϕράζεσϑαι ἄνωγα,
Verse: 270    ὅππως κε μνηστῆρας ἀπώσεαι ἐκ μεγάροιο.
Verse: 271    εἰ δ' ἄγε νῦν ξυνίει καὶ ἐμῶν ἐμπάζεο μύϑων·
Verse: 272    αὔριον εἰς ἀγορὴν καλέσας ἥρωας ᾽Αχαιοὺς
Verse: 273    μῦϑον πέϕραδε πᾶσι, ϑεοὶ δ' ἐπὶ μάρτυροι ἔστων.
Verse: 274    μνηστῆρας μὲν ἐπὶ σϕέτερα σκίδνασϑαι ἄνωχϑι,
Verse: 275    μητέρα δ', εἴ οἱ ϑυμὸς ἐϕορμᾶται γαμέεσϑαι,
Verse: 276    ἂψ ἴτω ἐς μέγαρον πατρὸς μέγα δυναμένοιο·
Verse: 277    οἱ δὲ γάμον τεύξουσι καὶ ἀρτυνέουσιν ἔεδνα
Verse: 278    πολλὰ μάλ', ὅσσα ἔοικε ϕίλης ἐπὶ παιδὸς ἕπεσϑαι.
Verse: 279    σοὶ δ' αὐτῷ πυκινῶς ὑποϑήσομαι, αἴ κε πίϑηαι·
Verse: 280    νῆ' ἄρσας ἐρέτῃσιν ἐείκοσιν, ἥ τις ἀρίστη,
Verse: 281    ἔρχεο πευσόμενος πατρὸς δὴν οἰχομένοιο,
Verse: 282    ἤν τίς τοι εἴπῃσι βροτῶν, ἢ ὄσσαν ἀκούσῃς
Verse: 283    ἐκ Διός, ἥ τε μάλιστα ϕέρει κλέος ἀνϑρώποισι.
Verse: 284    πρῶτα μὲν ἐς Πύλον ἐλϑὲ καὶ εἴρεο Νέστορα δῖον,
Verse: 285    κεῖϑεν δὲ Σπάρτην δὲ παρὰ ξανϑὸν Μενέλαον·
Verse: 286    ὃς γὰρ δεύτατος ἦλϑεν ᾽Αχαιῶν χαλκοχιτώνων.
Verse: 287    εἰ μέν κεν πατρὸς βίοτον καὶ νόστον ἀκούσῃς,
Verse: 288    ἦ τ' ἂν τρυχόμενός περ ἔτι τλαίης ἐνιαυτόν·
Verse: 289    εἰ δέ κε τεϑνηῶτος ἀκούσῃς μηδ' ἔτ' ἐόντος,
Verse: 290    νοστήσας δὴ ἔπειτα ϕίλην ἐς πατρίδα γαῖαν
Verse: 291    σῆμά τέ οἱ χεῦαι καὶ ἐπὶ κτέρεα κτερεί:ξαι
Verse: 292    πολλὰ μάλ', ὅσσα ἔοικε, καὶ ἀνέρι μητέρα δοῦναι.
Verse: 293    αὐτὰρ ἐπὴν δὴ ταῦτα τελευτήσῃς τε καὶ ἕρξῃς,
Verse: 294    ϕράζεσϑαι δὴ ἔπειτα κατὰ ϕρένα καὶ κατὰ ϑυμόν,
Verse: 295    ὅππως κε μνηστῆρας ἐνὶ μεγάροισι τεοῖσι
Verse: 296    κτείνῃς ἠὲ δόλῳ ἢ ἀμϕαδόν. οὐδέ τί σε χρὴ
Verse: 297    νηπιάας ὀχέειν, ἐπεὶ οὐκέτι τηλίκος ἐσσί.
Verse: 298    ἦ οὐκ ἀίεις οἷον κλέος ἔλλαβε δῖος ᾽Ορέστης
Verse: 299    πάντας ἐπ' ἀνϑρώπους, ἐπεὶ ἔκτανε πατροϕονῆα,
Verse: 300    Αἴγισϑον δολόμητιν, ὅ οἱ πατέρα κλυτὸν ἔκτα;
Verse: 301    καὶ σύ, ϕίλος, - μάλα γάρ σ' ὁρόω καλόν τε μέγαν τε-
Verse: 302    ἄλκιμος ἔσσ', ἵνα τίς σε καὶ ὀψιγόνων ἔυ εἴπῃ.
Verse: 303    αὐτὰρ ἐγὼν ἐπὶ νῆα ϑοὴν κατελεύσομαι ἤδη
Verse: 304    ἠδ' ἑτάρους, οἵ που με μάλ' ἀσχαλόωσι μένοντες:
Verse: 305    σοὶ δ' αὐτῷ μελέτω, καὶ ἐμῶν ἐμπάζεο μύϑων."

Verse: 306       τὴν δ' αὖ Τηλέμαχος πεπνυμένος ἀντίον ηὔδα·

Verse: 307       "ξεῖν', ἤτοι μὲν ταῦτα ϕίλα ϕρονέων ἀγορεύεις,
Verse: 308    ὥς τε πατὴρ ᾧ παιδί, καὶ οὔ ποτε λήσομαι αὐτῶν.
Verse: 309    ἀλλ' ἄγε νῦν ἐπίμεινον ἐπειγόμενός περ ὁδοῖο,
Verse: 310    ὄϕρα λοεσσάμενός τε τεταρπόμενός τε ϕίλον κῆρ,
Verse: 311    δῶρον ἔχων ἐπὶ νῆα κίῃς, χαίρων ἐνὶ ϑυμῷ,
Verse: 312    τιμῆεν, μάλα καλόν, ὅ τοι κειμήλιον ἔσται
Verse: 313    ἐξ ἐμεῦ, οἷα ϕίλοι ξεῖνοι ξείνοισι διδοῦσι."

Verse: 314       τὸν δ' ἠμείβετ' ἔπειτα ϑεὰ γλαυκῶπις ᾽Αϑήνη·

Verse: 315       "μή μ' ἔτι νῦν κατέρυκε λιλαιόμενόν περ ὁδοῖο.
Verse: 316    δῶρον δ' ὅττί κέ μοι δοῦναι ϕίλον ἦτορ ἀνώγῃ,
Verse: 317    αὖτις ἀνερχομένῳ δόμεναι οἶκον δὲ ϕέρεσϑαι,
Verse: 318    καὶ μάλα καλὸν ἑλών· σοὶ δ' ἄξιον ἔσται ἀμοιβῆς."

Verse: 319       ἡ μὲν ἄρ' ὣς εἰποῦσ' ἀπέβη γλαυκῶπις ᾽Αϑήνη,
Verse: 320    ὄρνις δ' ὣς ἀνόπαια διέπτατο· τῷ δ' ἐνὶ ϑυμῷ
Verse: 321    ϑῆκε μένος καὶ ϑάρσος, ὑπέμνησέν τέ ἑ πατρὸς
Verse: 322    μᾶλλον ἔτ' ἢ τὸ πάροιϑεν. ὁ δὲ ϕρεσὶν ᾗσι νοήσας
Verse: 323    ϑάμβησεν κατὰ ϑυμόν· ὀίσατο γὰρ ϑεὸν εἶναι.
Verse: 324    αὐτίκα δὲ μνηστῆρας ἐπῴχετο ἰσόϑεος ϕώς.

Verse: 325       τοῖσι δ' ἀοιδὸς ἄειδε περικλυτός, οἱ δὲ σιωπῇ
Verse: 326    εἵατ' ἀκούοντες. ὁ δ' ᾽Αχαιῶν νόστον ἄειδε
Verse: 327    λυγρόν, ὃν ἐκ Τροίης ἐπετείλατο Παλλὰς ᾽Αϑήνη.
Verse: 328    τοῦ δ' ὑπερωιόϑεν ϕρεσὶ σύνϑετο ϑέσπιν ἀοιδὴν
Verse: 329    κούρη ᾽Ικαρίοιο, περίϕρων Πηνελόπεια·
Verse: 330    κλίμακα δ' ὑψηλὴν κατεβήσετο οἷο δόμοιο,
Verse: 331    οὐκ οἴη, ἅμα τῇ γε καὶ ἀμϕίπολοι δύ' ἕποντο.
Verse: 332    ἡ δ' ὅτε δὴ μνηστῆρας ἀϕίκετο δῖα γυναικῶν,
Verse: 333    στῆ ῥα παρὰ σταϑμὸν τέγεος πύκα ποιητοῖο,
Verse: 334    ἄντα παρειάων σχομένη λιπαρὰ κρήδεμνα·
Verse: 335    ἀμϕίπολος δ' ἄρα οἱ κεδνὴ ἑκάτερϑε παρέστη.
Verse: 336    δακρύσασα δ' ἔπειτα προσηύδα ϑεῖον ἀοιδόν·

Verse: 337       "Φήμιε, πολλὰ γὰρ ἄλλα βροτῶν ϑελκτήρια οἶδας,
Verse: 338    ἔργ' ἀνδρῶν τε ϑεῶν τε, τά τε κλείουσιν ἀοιδοί·
Verse: 339    τῶν ἕν γέ σϕιν ἄειδε παρήμενος, οἱ δὲ σιωπῇ
Verse: 340    οἶνον πινόντων· ταύτης δ' ἀποπαύε' ἀοιδῆς
Verse: 341    λυγρῆς, ἥ τέ μοι αἰὲν ἐνὶ στήϑεσσι ϕίλον κῆρ
Verse: 342    τείρει, ἐπεί με μάλιστα καϑίκετο πένϑος ἄλαστον·
Verse: 343    τοίην γὰρ κεϕαλὴν ποϑέω μεμνημένη αἰεὶ
Verse: 344    ἀνδρός, τοῦ κλέος εὐρὺ καϑ' ῾Ελλάδα καὶ μέσον ῎Αργος."

Verse: 345       τὴν δ' αὖ Τηλέμαχος πεπνυμένος ἀντίον ηὔδα·

Verse: 346       "μῆτερ ἐμή, τί τ' ἄρα ϕϑονέεις ἐρίηρον ἀοιδὸν
Verse: 347    τέρπειν ὅππῃ οἱ νόος ὄρνυται; οὔ νύ τ' ἀοιδοὶ
Verse: 348    αἴτιοι, ἀλλά ποϑι Ζεὺς αἴτιος, ὅς τε δίδωσιν
Verse: 349    ἀνδράσιν ἀλϕηστῇσιν, ὅπως ἐϑέλῃσιν, ἑκάστῳ.
Verse: 350    τούτῳ δ' οὐ νέμεσις Δαναῶν κακὸν οἶτον ἀείδειν·
Verse: 351    τὴν γὰρ ἀοιδὴν μᾶλλον ἐπικλείουσ' ἄνϑρωποι,
Verse: 352    ἥ τις ἀκουόντεσσι νεωτάτη ἀμϕιπέληται.
Verse: 353    σοὶ δ' ἐπιτολμάτω κραδίη καὶ ϑυμὸς ἀκούειν·
Verse: 354    οὐ γὰρ ᾽Οδυσσεὺς οἶος ἀπώλεσε νόστιμον ἦμαρ
Verse: 355    ἐν Τροίῃ, πολλοὶ δὲ καὶ ἄλλοι ϕῶτες ὄλοντο.
Verse: 356    ἀλλ' εἰς οἶκον ἰοῦσα τὰ σ' αὐτῆς ἔργα κόμιζε,
Verse: 357    ἱστόν τ' ἠλακάτην τε, καὶ ἀμϕιπόλοισι κέλευε
Verse: 358    ἔργον ἐποίχεσϑαι. μῦϑος δ' ἄνδρεσσι μελήσει
Verse: 359    πᾶσι, μάλιστα δ' ἐμοί· τοῦ γὰρ κράτος ἔστ' ἐνὶ οἴκῳ."

Verse: 360       ἡ μὲν ϑαμβήσασα πάλιν οἶκον δὲ βεβήκει·
Verse: 361    παιδὸς γὰρ μῦϑον πεπνυμένον ἔνϑετο ϑυμῷ.
Verse: 362    ἐς δ' ὑπερῷ' ἀναβᾶσα σὺν ἀμϕιπόλοισι γυναιξὶ
Verse: 363    κλαῖεν ἔπειτ' ᾽Οδυσῆα, ϕίλον πόσιν, ὄϕρά οἱ ὕπνον
Verse: 364    ἡδὺν ἐπὶ βλεϕάροισι βάλε γλαυκῶπις ᾽Αϑήνη.

Verse: 365       μνηστῆρες δ' ὁμάδησαν ἀνὰ μέγαρα σκιόεντα·
Verse: 366    πάντες δ' ἠρήσαντο παραὶ λεχέεσσι κλιϑῆναι.
Verse: 367    τοῖσι δὲ Τηλέμαχος πεπνυμένος ἤρχετο μύϑων·

Verse: 368       "μητρὸς ἐμῆς μνηστῆρες ὑπέρβιον ὕβριν ἔχοντες,
Verse: 369    νῦν μὲν δαινύμενοι τερπώμεϑα, μὴ δὲ βοητὺς
Verse: 370    ἔστω, ἐπεὶ τό γε καλὸν ἀκουέμεν ἐστὶν ἀοιδοῦ
Verse: 371    τοιοῦδ', οἷος ὅδ' ἐστί, ϑεοῖς ἐναλίγκιος αὐδήν.
Verse: 372    ἠῶϑεν δ' ἀγορὴν δὲ καϑεζώμεσϑα κιόντες
Verse: 373    πάντες, ἵν' ὕμιν μῦϑον ἀπηλεγέως ἀποείπω,
Verse: 374    ἐξιέναι μεγάρων· ἄλλας δ' ἀλεγύνετε δαῖτας
Verse: 375    ὑμὰ κτήματ' ἔδοντες, ἀμειβόμενοι κατὰ οἴκους.
Verse: 376    εἰ δ' ὕμιν δοκέει τόδε λωίτερον καὶ ἄμεινον
Verse: 377    ἔμμεναι, ἀνδρὸς ἑνὸς βίοτον νήποινον ὀλέσϑαι,
Verse: 378    κείρετ'· ἐγὼ δὲ ϑεοὺς ἐπιβώσομαι αἰὲν ἐόντας,
Verse: 379    αἴ κέ ποϑι Ζεὺς δῷσι παλίντιτα ἔργα γενέσϑαι.
Verse: 380    νήποινοί κεν ἔπειτα δόμων ἔντοσϑεν ὄλοισϑε."

Verse: 381       ὣς ἔϕαϑ', οἱ δ' ἄρα πάντες ὀδὰξ ἐν χείλεσι ϕύντες
Verse: 382    Τηλέμαχον ϑαύμαζον, ὃ ϑαρσαλέως ἀγόρευε.
Verse: 383    τὸν δ' αὖτ' ᾽Αντίνοος προσέϕη, Εὐπείϑεος υἱός:

Verse: 384       "Τηλέμαχ', ἦ μάλα δή σε διδάσκουσιν ϑεοὶ αὐτοὶ
Verse: 385    ὑψαγόρην τ' ἔμεναι καὶ ϑαρσαλέως ἀγορεύειν.
Verse: 386    μὴ σέγ' ἐν ἀμϕιάλῳ ᾽Ιϑάκῃ βασιλῆα Κρονίων
Verse: 387    ποιήσειεν, ὅ τοι γενεῇ πατρώιόν ἐστι."

Verse: 388       τὸν δ' αὖ Τηλέμαχος πεπνυμένος ἀντίον ηὔδα·

Verse: 389       "᾽Αντίνο', εἴ πέρ μοι καὶ ἀγάσσεαι ὅττί κεν εἴπω,
Verse: 390    καί κεν τοῦτ' ἐϑέλοιμι Διός γε διδόντος ἀρέσϑαι.
Verse: 391    ἦ ϕῂς τοῦτο κάκιστον ἐν ἀνϑρώποισι τετύχϑαι;
Verse: 392    οὐ μὲν γάρ τι κακὸν βασιλευέμεν· αἶψά τέ οἱ δῶ
Verse: 393    ἀϕνειὸν πέλεται καὶ τιμηέστερος αὐτός.
Verse: 394    ἀλλ' ἤτοι βασιλῆες ᾽Αχαιῶν εἰσι καὶ ἄλλοι
Verse: 395    πολλοὶ ἐν ἀμϕιάλῳ ᾽Ιϑάκῃ, νέοι ἠδὲ παλαιοί,
Verse: 396    τῶν κέν τις τόδ' ἔχῃσιν, ἐπεὶ ϑάνε δῖος ᾽Οδυσσεύς:
Verse: 397    αὐτὰρ ἐγὼν οἴκοιο ἄναξ ἔσομ' ἡμετέροιο
Verse: 398    καὶ δμώων, οὕς μοι ληίσσατο δῖος ᾽Οδυσσεύς."

Verse: 399       τὸν δ' αὖτ' Εὐρύμαχος, Πολύβου παῖς, ἀντίον ηὔδα·

Verse: 400       "Τηλέμαχ', ἤτοι ταῦτα ϑεῶν ἐν γούνασι κεῖται,
Verse: 401    ὅς τις ἐν ἀμϕιάλῳ ᾽Ιϑάκῃ βασιλεύσει ᾽Αχαιῶν·
Verse: 402    κτήματα δ' αὐτὸς ἔχοις καὶ δώμασι σοῖσιν ἀνάσσοις.
Verse: 403    μὴ γὰρ ὅ γ' ἔλϑοι ἀνήρ ὅς τίς σ' ἀέκοντα βίηϕι
Verse: 404    κτήματ' ἀπορραίσει, ᾽Ιϑάκης ἔτι ναιετοώσης.
Verse: 405    ἀλλ' ἐϑέλω σε, ϕέριστε, περὶ ξείνοιο ἐρέσϑαι,
Verse: 406    ὁππόϑεν οὗτος ἀνήρ, ποίης δ' ἐξ εὔχεται εἶναι
Verse: 407    γαίης... ποῦ δέ νύ οἱ γενεὴ καὶ πατρὶς ἄρουρα;
Verse: 408    ἠέ τιν' ἀγγελίην πατρὸς ϕέρει ἐρχομένοιο,
Verse: 409    ἦ ἑὸν αὐτοῦ χρεῖος ἐελδόμενος τόδ' ἱκάνει;
Verse: 410    οἷον ἀναί:ξας ἄϕαρ οἴχεται, οὐδ' ὑπέμεινε
Verse: 411    γνώμεναι· οὐ μὲν γάρ τι κακῷ εἰς ὦπα ἐῴκει."

Verse: 412       τὸν δ' αὖ Τηλέμαχος πεπνυμένος ἀντίον ηὔδα·

Verse: 413       "Εὐρύμαχ', ἤτοι νόστος ἀπώλετο πατρὸς ἐμοῖο·
Verse: 414    οὔτ' οὖν ἀγγελίῃς ἔτι πείϑομαι, εἴ ποϑεν ἔλϑοι,
Verse: 415    οὔτε ϑεοπροπίης ἐμπάζομαι, ἥν τινα μήτηρ
Verse: 416    ἐς μέγαρον καλέσασα ϑεοπρόπον ἐξερέηται.
Verse: 417    ξεῖνος δ' οὗτος ἐμὸς πατρώιος ἐκ Τάϕου ἐστί,
Verse: 418    Μέντης δ' ᾽Αγχιάλοιο δαί:ϕρονος εὔχεται εἶναι
Verse: 419    υἱός, ἀτὰρ Ταϕίοισι ϕιληρέτμοισιν ἀνάσσει."

Verse: 420       ὣς ϕάτο Τηλέμαχος, ϕρεσὶ δ' ἀϑανάτην ϑεὸν ἔγνω.

Verse: 421       οἱ δ' εἰς ὀρχηστύν τε καὶ ἱμερόεσσαν ἀοιδὴν
Verse: 422    τρεψάμενοι τέρποντο, μένον δ' ἐπὶ ἕσπερον ἐλϑεῖν.
Verse: 423    τοῖσι δὲ τερπομένοισι μέλας ἐπὶ ἕσπερος ἦλϑε·
Verse: 424    δὴ τότε κακκείοντες ἔβαν οἶκον δὲ ἕκαστος.
Verse: 425    Τηλέμαχος δ', ὅϑι οἱ ϑάλαμος περικαλλέος αὐλῆς
Verse: 426    ὑψηλὸς δέδμητο, περισκέπτῳ ἐνὶ χώρῳ,
Verse: 427    ἔνϑ' ἔβη εἰς εὐνὴν πολλὰ ϕρεσὶ μερμηρίζων.
Verse: 428    τῷ δ' ἄρ' ἅμ' αἰϑομένας δαί:δας ϕέρε κέδν' εἰδυῖα
Verse: 429    Εὐρύκλει', ῎Ωπος ϑυγάτηρ Πεισηνορίδαο,
Verse: 430    τήν ποτε Λαέρτης πρίατο κτεάτεσσιν ἑοῖσι
Verse: 431    πρωϑήβην ἔτ' ἐοῦσαν, ἐεικοσάβοια δ' ἔδωκεν·
Verse: 432    ἶσα δέ μιν κεδνῇ ἀλόχῳ τίεν ἐν μεγάροισιν,
Verse: 433    εὐνῇ δ' οὔ ποτ' ἔμικτο, χόλον δ' ἀλέεινε γυναικός:
Verse: 434    ἥ οἱ ἅμ' αἰϑομένας δαί:δας ϕέρε, καί ἑ μάλιστα
Verse: 435    δμῳάων ϕιλέεσκε, καὶ ἔτρεϕε τυτϑὸν ἐόντα.
Verse: 436    ὤιξεν δὲ ϑύρας ϑαλάμου πύκα ποιητοῖο,
Verse: 437    ἕζετο δ' ἐν λέκτρῳ, μαλακὸν δ' ἔκδυνε χιτῶνα·
Verse: 438    καὶ τὸν μὲν γραίης πυκιμηδέος ἔμβαλε χερσίν.
Verse: 439    ἡ μὲν τὸν πτύξασα καὶ ἀσκήσασα χιτῶνα,
Verse: 440    πασσάλῳ ἀγκρεμάσασα παρὰ τρητοῖσι λέχεσσι,
Verse: 441    βῆ ῥ' ἴμεν ἐκ ϑαλάμοιο, ϑύρην δ' ἐπέρυσσε κορώῃ
Verse: 442    ἀργυρέῃ, ἐπὶ δὲ κληῖδ' ἐτάνυσσεν ἱμάντι.
Verse: 443    ἔνϑ' ὅ γε παννύχιος, κεκαλυμμένος οἰὸς ἀώτῳ,
Verse: 444    βούλευε ϕρεσὶν ᾗσιν ὁδόν τὴν πέϕραδ' ᾽Αϑήνη.



Next part


This text is part of the TITUS edition of Homer, Odyssee.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.