TITUS
Hartmann von Aue, Erec
Part No. 4
Previous part

Verse group: (4) 
Verse: 300    und gienc dâ er den alten sach.
Verse: 301    mit zwîvel er zuo im sprach:

Verse: 302    ʽherre, mir wære herberge nôt.'
Verse: 303    diu bete machete in schamerôt.

Verse: 304    als in der alte hete vernomen,
Verse: 305    er sprach: ʽnû sît mir willekomen

Verse: 306    ze dem und ich nû haben mac.'
Verse: 307    des genâdete im Êrec fil de roi lac.

Verse: 308    nû hete er ingesindes
Verse: 309    niuwan eines kindes

Verse: 310    (diu was ein diu schœniste maget
Verse: 311    von der uns ie wart gesaget)

Verse: 312    und der hûsvrouwen.
Verse: 313    dar an man mohte schouwen

Verse: 314    daz er rîches muotes wielt,
Verse: 315    daz er den gast sô arm enthielt.

Verse: 316    dem kinde rief er dar.
Verse: 317    er sprach: ʽgenc und bewar

Verse: 318    dises herren phert, tohter mîn,
Verse: 319    der unser gast geruochet sîn,

Verse: 320    und begenc ez sâ ze vlîze
Verse: 321    daz ich dirs iht verwîze.'

Verse: 322    si sprach: ʽherre, daz tuon ich.'
Verse: 323    der megede lîp was lobelich.

Verse: 324    der roc was grüener varwe,
Verse: 325    gezerret begarwe,

Verse: 326    abehære über al.
Verse: 327    dar under was ir hemde sal

Verse: 328    und ouch zebrochen eteswâ:
Verse: 329    sô schein diu lîch dâ

Verse: 330    durch wîz alsam ein swan.
Verse: 331    man saget daz nie kint gewan

Verse: 332    einen lîp sô gar dem wunsche gelîch:
Verse: 333    und wære si gewsen rîch,

Verse: 334    sô engebræste niht ir lîbe
Verse: 335    ze lobelîchem wîbe.

Verse: 336    ir lîp schein durch ir salwe wât
Verse: 337    alsam diu lilje, dâ si stât

Verse: 338    under swarzen dornen wîz.
Verse: 339    ich wæne got sînen vlîz

Verse: 340    an si hâte geleit
Verse: 341    von schœne und von sælekeit.

Verse: 342    Êrecken muote ir ungemach.
Verse: 343    zuo ir vater er sprach:

Verse: 344    ʽwir sulns die juncvrouwen erlân.
Verse: 345    ich wæne siz selten habe getân:

Verse: 346    ez zimt mir selbem vil baz.'
Verse: 347    dô sprach der alte daz:

Verse: 348    ʽman sol dem wirte lân
Verse: 349    sînen willen, daz ist guot getân.

Verse: 350    uns gebristet der knehte:
Verse: 351    von diu tuot siz mit rehte.'

Verse: 352    diu juncvrouwe des niht enliez
Verse: 353    si entæte als si ir vater hiez.

Verse: 354    daz phert begienc ze vlîze
Verse: 355    ir hende vil wîze:

Verse: 356    und wære daz got hie ûf erde rite,
Verse: 357    ich wæne in genuocte dâ mite,

Verse: 358    ob er solhen marschalc hæte.
Verse: 359    swie si schine in swacher wæte,

Verse: 360    sô weiz ich daz wîp noch man
Verse: 361    süezern schiltkneht nie gewan

Verse: 362    dan Êrec fil de roi lac,
Verse: 363    dô si sînes pherdes phlac.

Verse: 364    im zam von solhem knehte
Verse: 365    sîn vuoter wol mit rehte.

Verse: 366    hie wart der gast berâten
Verse: 367    als si des state hâten.

Verse: 368    guote teppeche gespreit
Verse: 369    unde dar ûf geleit

Verse: 370    alsô rîchiu bettewât
Verse: 371    sô si diu werlt beste hât,

Verse: 372    mit samîte bezogen,
Verse: 373    dem daz golt was unerlogen,

Verse: 374    daz daz bette ein man nie möhte erwegen
Verse: 375    und selbe vierde müeste legen,

Verse: 376    und dar über gebreit
Verse: 377    nâch grôzer herren werdekeit

Verse: 378    kulter von zendâle,
Verse: 379    rîche und gemâle--

Verse: 380    diu wâren bî dem viure
Verse: 381    des âbendes vil tiure.

Verse: 382    si geleisten wol ein reine strô:
Verse: 383    dar über genuocte si dô

Verse: 384    eines bettes âne vlîz,
Verse: 385    daz bedahte ein lîlachen wîz.

Verse: 386    ouch was dâ ritters spîse:
Verse: 387    swes ein man vil wîse

Verse: 388    möhte in sînem muote
Verse: 389    erdenken ze guote,

Verse: 390    des heten si die überkraft
Verse: 391    und volleclîche wirtschaft,

Verse: 392    doch mans ûf den tisch niht truoc.
Verse: 393    in gap der reine wille genuoc

Verse: 394    den man dâ ze hûse vant:
Verse: 395    wan er ist aller güete ein phant.

Verse: 396    nû muget ir hœren mære
Verse: 397    wer dirre alte wære,

Verse: 398    daz er den gast sô wol emphie
Verse: 399    und ers durch armuot niht enlie.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.