TITUS
Berthold von Regensburg, Predigten
Part No. 3
Previous part

Chapter: 17 
3. Predigt

Die sibenzehende.
Von dem fride
Pacem meam do vobis


Sentence: 585    Man liset hiute in dem heiligen êwangeliô, daz der almehtige got sprichet: 'ich wil iuwer ieglîchem ein künicrîche geben'.
Sentence: 586    Daz ist gar ein grôziu gâbe und ist ein troestlîchiu gâbe.
Sentence: 587    Ich weiz daz gar wol, ob ich iezuo spraeche: ich wil iuwer ieglîchem eine gâbe geben, diu ist wol hundert marke wert, oder ich wil iuwer leglîchem hundert marke bereites silbers geben, jâ wie frô iuwer herze in iuwerm lîbe waere.
Sentence: 588    Seht, sô soltet ir sus hundertstunt frôwer sîn, wan ein künicrîche ist hundertstunt tiuwerr denne der iu hundert mark gehieze.
Sentence: 589    Wan unser herre ist tûsentstunt wârhafter denne dehein künic, der halt ie sô rîch unde sô gewaltic wart.
Sentence: 590    Unde dâ von sult ir alle grôze freude an iuwerrn herzen gewinnen unde sult dem almehtigen gote gar grôze gnâde unde dank sagen umbe diu übergrôze gnâde und umbe die rîche gâbe.
Sentence: 591    Wan er sprichet niht: 'ich wil iuwer leglîchem eine grâveschaft geben oder ein herzogetuom'.
Sentence: 592    Daz waere ein ander rede; und ir ist doch gar vil, die ez für eine rîche gâbe haeten.
Sentence: 593    Unde der halt etelîchem eine huobe gaebe, er waere halt herzeclîchen frô.
Sentence: 594    Gaebe man im aber eine stat oder ein dorf, er waere aber frôwer.
Sentence: 595    Gaebe man im aber eine marke oder ein herzogetuom, er waere aber frôwer.
Sentence: 596    Unde dâ von sult ir nû der triuwen unde der êren herzeclîchen frô sîn, wan der almehtige got wil iuwer ieglîchem ein grôzez künicrîche geben.
Sentence: 597    Unde daz daz wâr sî, daz sach der guote sant Johannes In apokalipsî.
Sentence: 598    Der sach eine stat, diu was als wît und als michel daz ez âne mâze was in dem himelrîche.
Sentence: 599    Und im seite ein engel wie wît unde lanc unde hôch sie waere unde wie breit diu mûre waere.
Sentence: 600    Unde diu selbe mûre, dâ mite diu stat umbemûret was, daz wâren allez edel steine, achâtes unde karbunkel unde saphire und ander edele steine, unde niht wan lûter golt, Und alsô seite der engel dem guoten sante Johannes, wie manic tûsent mîle daz waere, der diu mûre lanc unde hôch unde breit was.
Sentence: 601    Und alle die in der selben stat sint, die sint alle künige unde küniginne unde sint alle bekleit mit kleiden sam diu sunne unde sie habent alle liehte krône unde kuniclîche krône ûf ir houbet unde diu stat ist sô gar wol gezieret mit götlîcher gezierde, daz ich daz wol weiz, und waere ein semelîchiu stat in der heidenschaft jenhalp meres, iuwer ist maniger des muotes, er füere von hinnen über mer, daz er niwan die selben stat gesaehe; ich wil des geswîgen, daz man im ein künicrîche drinne ze rehtem eigen gaebe unde daz daz im niemer mêr genomen würde von êwin unz êwen.
Sentence: 602    Unde dâ von sult ir von rehtem herzen frô sîn und sult gote danken der grôzen gâbe unde der grôzen gnâde, die er uns hiute geheizen hât.
Sentence: 603    'Owê, bruoder Berhtolt, ich waere vil frô, der mir iezuo zehen marke silbers gaebe!
Sentence: 604    daz wiste ich waz daz waere: ich enger des niht, daz ich ein künic waere oder würde.'
Sentence: 605    Sich, dû verstêst sîn anders niht, der übergrôzen gnâde diu in himelrîche ist.
Sentence: 606    Wan reht als gewis dû des bist daz morgen ein tac kumet, als ouch hiute einer ist - wan dâ sprichet her Salomôn: ' orietur sol: diu sunne diu gêt hînt hin unde kumet morne aber her wider' - unde dâ von spriche ich alsô: als man gewis ist daz morgen ein ander tac kumet, als gewis ist daz hiute dehein mensche vor mînen ougen sitzet als versmaehet und als arm, ez sî siech oder zervallen von ûzsetzikeit, unde wil ez dar umbe werben, im engebe der almehtige got ein künicrîche.
Sentence: 607    Der got der nie deheine lügen getete, der hât ez iu geheizen unde wil ez iu wâr lâzen.
Sentence: 608    Unde dar umbe sult ir alle gerne zuo dem himelrîche komen und dar umbe werben daz ir alle dar kumet unde künige werdet unde für baz sît iemer mêre.
Sentence: 609    Unde daz iuwer etelîcher sô niuwegernde ist, er füere über mer niwan dar umbe, daz er gesaehe eine stat sô überrîch unde dâ sô manic künic unde küniginne mite waeren, wirt unde wirtinne, unde dâ sô maniger rîcheit kraft mite waere, nû kumet ir alle sanfter dar danne ir ülber mer vart unde danne her wider hein, unde daz ir sie danne als gerne sehet als vor.
Sentence: 610    Nû seht, waz danne daz wert waere, daz ir iemer und iemer herren unde künige soltet sîn!
Sentence: 611    'Wie, bruoder Berhtolt, wie wît daz himelrîche danne müeste sîn, sô ein ieglich mensche ein künicrîche haete!'
Sentence: 612    Nû merke rehte, wie vil der himel mügen sîn.
Sentence: 613    Alse vil und alliu diu werlt wîter unde groezer ist danne einigiu nâdelspitze, als ist der himel wîter unde groezer dâ die sternen ane stênt danne allzu disiu werlt.
Sentence: 614    Unde dar über ist ein himet, der heizet celum cristallinum, unde der ist danne als vil wîter unde groezer als daz firmament ist wider dem ertrîche.
Sentence: 615    Unde dar über ist aber der himel witer unde groezer, der dâ heizet celum empireum, danne celum cristallinum.
Sentence: 616    Und alsô vil ist ie ein himel groezer danne der ander.
Sentence: 617    Als vil als alliu disiu werlt ist gein einer nâdelspitze, als vil ist der êrste himel, dâ die sternen ane stênt, wider aller der werlte oder allem ertrîche, und als vil ist danne der ander groezer.
Sentence: 618    Nû seht, welch ein wîte daz sî!
Sentence: 619    Wande er aller engel herre ist und aller der werlte, dâ hât er oucn grôze hêrschaft unde vil künige.
Sentence: 620    Unde dâ von vienc er den himel wir unde hôch unde grôz, daz ez unzellich aller der werlte ze sagenne waere.
Sentence: 621    Unde dâ von sprichet der guote sant Johannes: 'daz ez mügelich waere daz man ez allez geschrîben möhte daz ich ze himele sach, sô möhte doch alliu diu werlt diu buoch niht behalten.'
Sentence: 622    Daz ist alsô gesprochen: diu buoch möhten von dem ertrîche unz an daz firmament niht geligen, dâ ez allez an geschriben waere daz ich ze himele hân gesehen.
Sentence: 623    Nû seht!
Sentence: 624    ob ir niht die liebe unde die minne unsers herren dâ mite woltet êren, sô möhtet ir doch durch daz grôze wunder gerne ze himelrîche komen unde dar umbe werben, daz ir daz übergrôze wunder saehet.
Sentence: 625    Wan der almehtige got alse wît und alse breit ez hât gemachet, sô gedâhte er im der wîsheit, wie er der liute aller meiste in sîn witez himelrîche möhte bringen.
Sentence: 626    Unde dâ von gehiez er in als grôz, daz sie deste gerner zuo im füeren.
Sentence: 627    Dô liez er doch niht, er fünde dô ein ander wîsheit, dâ mite er der liute eht vil in sîn rîche brachte, daz er vil werlte gewünne.
Sentence: 628    Unde swie grôz burcreht er in gehiez, dâ kerten sie sich niht ane unde fuoren von dem almehtigen gote unde von sînem wîten schoenen himelrîche unde fuoren zuo dem verfluochten tiuvel in die verfluochten helle.
Sentence: 629    Unde dar umb erdâhte im der almehtige got einer wîsheit, wie er vil werlte zuo dem himelrîche braehte mit guoten dingen, unde gedâhte im, wâ mite den liuten aller sanfteste waere und aller beste unde daz alliu diu werlt aller gernste taete, die jungen unde die alten, die frouwen unde die man, unde dâ aller der werlte gir aller meiste nâch stüende, und ob sie wünschen solten, daz sie niht anders wolten.
Sentence: 630    Unde daz selbe hât iu der almehtige got geboten, daz ir dem almehtigen gote dâ mite dienen soltet unde zuo dem himelrîche komen.
Sentence: 631    Wan er weiz wol, ob er iu ein hertez dinc haete geboten, daz ir daz niemer haetet getân.
Sentence: 632    Unde dar umbe hât er iu ein senftez dinc, ein süezez geboten, daz iuwer deste mêr dar kome.
Sentence: 633    Wan daz himelrîche ist wît, und haete eht gerne vil liute in sînem rîche, in sînen keiserlîchen êren.
Sentence: 634    Unde dar umbe hât er iu gar ein lustlich dinc geboten: ob ir wünschen kundet, daz ir niht anders woltet wünschen.
Sentence: 635    Und ez ist halt sô lustlich, daz der vogel in dem lufte niht anders begert noch der visch in dem wâge noch daz tier ûf dem velde noch der wurm in der erden.
Sentence: 636    Und allez menschlich künne begert anders niht wan eht des einen, daz iu der almehtige got geboten hât.
Sentence: 637    Unde den worten daz ir ez deste gerner behaltet daz gebot, sô wil ich iu sagen, welher leie gebot ez ist, dâ aller der werlte girde nâch stuont.
Sentence: 638    Daz heizet der fride.
Sentence: 639    Der fride ist ein dinc, des alliu diu werlt begert und anders niht danne des frides.
Sentence: 640    Und allez daz der mensche begert unde tuot, daz tuot er anders niht danne durch den fride.
Sentence: 641    Ez sitzet etewenne einez in mir, daz heizet der hunger; sô izze ich eht dar, dar umbe, daz ich mir einen fride gemache vor dem, daz der hunger dâ heizet.
Sentence: 642    Sô sitzet danne einez in mir, daz heizet der durst; sô trinke ich eht dar, durch daz ich mir einen fride geschaffe vor dem, daz dâ heizet der durst.
Sentence: 643    Sô gên ich in eine stuben oder zuo einem fiure oder ich lege des gewandes deste mê an mich, daz ich mir einen fride geschaffe vor dem, daz dâ heizet der frost.
Sentence: 644    Sô sitzet einez etewenne in mir, daz heizet der slâf; sô lege ich nider, daz ich mir einen fride geschaffe vor dem, daz dâ heizet der slâf.
Sentence: 645    Sô twinget mich etewenne einez, daz heizet diu müede; sô erbeite ich kûme, unz daz ich mich gelege, daz ich mir einen fride gemache vor der müede.
Sentence: 646    Sô twinget mich etewenne einez, daz heizet hitze; sô kume ich gar gerne an eine küele, daz ich mir einen fride geschaffe vor der hitze.
Sentence: 647    Und alsô ist sîn gar vil, des die liute gernt durch den fride.
Sentence: 648    Sô twinget manige liute armuot.
Sentence: 649    Die wirkent dar tac unde niht, dar umbe, daz sie in gerne einen fride schüefen vor der armüete.
Sentence: 650    Und alsô begert alliu diu werlt eht niht wan frides, noch der vogel in dem lufte noch der visch in dem wâge noch daz tier in dem walde noch der wurm in der erden, und alliu diu geschaft die got ie geschuof diu begert des frides.
Sentence: 651    Wan daz der almehtige got ûf ertrîche kam, daz tet er anders niht danne durch den fride: daz er einen fride gemachte under uns und under dem vater von himelrîche unde daz er uns einen fride gemachte.
Sentence: 652    Dô sungen die engel ob der kripfen: ' gloria in excelsis deo er in terra pax hominibus bonae voluntatis: dîn êre in der hoehe und allen den die dâ guotes willen sîn guot fride ûf erden'.
Sentence: 653    Unde dô unser herre hie ûf erden gienc mit sînen jüngern, dô sprach er ze allen zîten zuo sînen jüngern und ouch zuo andern liuten: ' pax vobis '.
Sentence: 654    Daz sprichet: 'der fride sî mit iu'.
Sentence: 655    Unde dô er in erschein an dem ôstertage, dâ sprach er aber zuo sînen jüngern: 'der fride sî mit iu'.
Sentence: 656    Unde dô er ze himele fuor, dô sprach er aber: 'der fride sî mit iu'.
Sentence: 657    Wan eht alliu diu werlt niht anders begert danne frides, sô gebôt der almehtige got uns, daz wir den fride behielten, sît er sô senfte unde sô guot ist, daz unser deste mêr zuo dem himelrîche komen.
Sentence: 658    Dâ gebot er uns drîer hande fride, die wir solten behalten.
Sentence: 659    Und allen den die die drîer leie fride behielten, den wil der almehtige got tegelîchen êwigez künicrîche geben.
Sentence: 660    Und alle die der drîer leie fride niht enhaltent, die werdent verstôzen des êwigen künicrîches, daz der almehtige got hiute uns allen geheizen hât.
Sentence: 661    Unde dô die tiuvel sâhen, daz uns got gar genaedeclîche hete getân an dem rîche daz sie dâ verworht heten, dô giengen sie ze sende; wan sie vorhten, daz der heiligen kristenheit ze vil zuo dem himelrîche waeren komen.
Sentence: 662    Unde sie gingen ze sende unde wurden ze râte, wie sie daz erwenten, daz der werlte sô vil iht zuo dem himelrîche kaeme.
Sentence: 663    Unde sie funden einen list, eine valscheit, daz sie valsche münze sluogen ûf den edeln fride und ûf den rehten fride und ûf den gnaedigen fride, als der rehte valsche kupferîne pfenninge sleht, die valsch unde kupfrîn sint, ûf guote pfenninge.
Sentence: 664    Unde haeten die unsaeligen tiuvele unde die verfluochten den valsch unde den list den sie erdâhten niht funden, sô waere manic tûsent sêle zem himelrîche komen, dem schoenen himelrîche, daz in got geheizen hete.
Sentence: 665    Unde dar umbe habent sie gar grôzen unde gar trügenhaften valsch dar under gemischet.
Sentence: 666    Unde die drîer hande fride die sint alsô.
Sentence: 667    Der êrste fride den uns got gegeben hât daz wir in halten, den sullen wir halten alse liep uns daz himerîche sî.
Sentence: 668    Daz ist fride mit gote.
Sentence: 669    Unde mit dem almehtigen gote suln wir einen vesten fride halten unde staeten, wan er uns einen fride gemachet hât vor dem gewalte des tiuvels unde vor dem zorne des vater.
Sentence: 670    Unde dar umbe suin wir fride mit gote hân.
Sentence: 671    Der fride ist alsô daz wir den almehtigen got mit deheiner slahte toetlîchen sünden niemer mêr erzürnen suln.
Sentence: 672    Wan got reine ist vor allen sünden, sô wil er bî deheiner sünde dehein tuon hân.
Sentence: 673    Wan er verstiez manic tûsent engel von dem himelrîche, daz sie den fride zebrâchen den sie mit gote êwiclîchen solten haben, unde dar umbe muosten sie daz himelrîche rûmen, und ez kan niemer mêr fride noch suone werden zwischen got unde den engelen, die den fride zebrâchen mit der ungehôrsame der sünden.
Sentence: 674    Daz selbe geschach Adâme in dem paradîse.
Sentence: 675    Als er die sünde getet, sâ zehant was fride ûz unde muoste daz paradîse rûmen, als der engel daz himelrîche.
Sentence: 676    Unde dar umbe kam unser herre Jêsus Kristus von himelrîche ûf ertrîche her abe, daz er Adâmes künne einen fride gemachete.
Sentence: 677    Wan Adam zuo der sünde verrâten wart, dô was daz ouch wol mügelich, daz er baz ze hulden kaeme danne der ungehorsame engel.
Sentence: 678    Der überhuop sich von sîn selbes willen unde brach den fride mit der hôhvart.
Sentence: 679    Und alle die mit grôzer höhvart umbe gênt, die sint sâ zehant fridebrecher; oder swelher leie sünde ez ist, daz houbetsünde sîn, sô ist fride ûz.
Sentence: 680    Owê, armer sünder!
Sentence: 681    sâ zehant sô dû die sünde begêst, sô ist fride ûz.
Sentence: 682    Unde dar umbe sô hânt die tiuvel valsch geslagen ûf den edeln fride, den ein leglich mensche haben solte mit gote.
Sentence: 683    - Daz ist der êrste fride, den der almehtige got geboten hât dem mensehen.
Sentence: 684    Der ander fride den dir got geboten hât, daz ist fride mit dir selber.
Sentence: 685    Der dritte fride daz ist fride mit dînem naehsten.
Sentence: 686    Wan der mensche fride haben sol mit dem almehtigen gote, als ich iezuo sprach, als er fride haben sol mit gote, alsô sol er fride haben mit im selber; sô sol er ouch fride haben mit sînem naehsten als mit im selber.
Sentence: 687    Unde dâ mite sô habent die tiuvel valschen fride geslagen under den guoten und under den rehten fride unde habent nû gemachet, daz der werlte daz mêrre teil valschen fride hât.
Sentence: 688    Die dâ fride haben solten mit gote, die habent nû fride mit dem tiuvel.
Sentence: 689    Die danne mit in selber fride solten haben, die habent fride mit dem fleische.
Sentence: 690    Unde swer mit im selber fride hât, der hât fride mit dem lîbe unde mit der sêle, alsô daz der lîp niht begern sol danne daz der sêle guot ist.
Sentence: 691    Die danne fride haben suln mit ir naehsten, die habent nû fride mit der werlte süezekeit.
Sentence: 692    Nû von den selben wil ich des êrsten sagen.
Sentence: 693    Unde dar umb, ir unsaeligen tiuvel, unde haetet ir den list niht funden, sô waere manic tûsent sêle behalten, die alle samt verlorn iemer mêre êwiclîchen müezent sîn.
Sentence: 694    Pfî, ir verfluochten tiuvel!
Sentence: 695    waz ir mit disen listen sêle verlorn habet unde verkoufet mit iuwerr ungetriuwen valschen münze, die ir ûf disen guoten fride geslagen habet!
Sentence: 696    Fride mit dînem naehsten hât der almehtige got dir geboten.
Sentence: 697    Daz ist alse vil gesprochen, daz dû dînem nachsten solt günnen daz dû dir selber ganst und im solt verbünnen daz dû dir selber verbanst.
Sentence: 698    'Wie, bruoder Berhtolt, sô würde nieman behalten.
Sentence: 699    Jâ hât maniger zwêne recke oder drîe an, unde daz der ander niht einigen hât, wie sol des danne rât werden?
Sentence: 700    Wan der ziuhet doch sînen roc niht abe unde gît in disem der dâ keinen hât.'
Sentence: 701    Sich, alsô hât ez got niht gemeinet; wan sô würde nieman behalten.
Sentence: 702    Ich hân ouch zwêne röcke; der gibe ich dir dewedern.
Sentence: 703    Ich wolte aber vil gerne, daz dû einen semelîchen haetest oder zwêne alsam.
Sentence: 704    Ich haete ouch daz himelrîche gerne; sô günde ich dirz alse wol alse mir selber, daz dû gotes hulde haetest unde daz dû die niemer mêre verliesen möhtest.
Sentence: 705    Des günde ich dir gar wol, unde dar an stêt ouch diu minne, die dû dînem naehsten tragen solt als dir selber.
Sentence: 706    Und ûf die wâre minne hât der tiuvel valsch geslagen.
Sentence: 707    Unde wan der mensche sînen naehsten minnen sol als sich selben - daz ist diu wâre minne -, sô hât der tiuvel valsche minne geslagen ûf die wâren minne.
Sentence: 708    Unde dû minnest dînen naehsten als dich selber, daz ist alsô gesprochen; wan dû selbe unkiusche bist an dem lîbe, sô minnest dû alle die deste gerner die dâ unkiusche sint, unde dû hâst sie dar umbe liep; wan dû trüwest ir geniezen an der unkiusche.
Sentence: 709    Unde dâ mite sô hât der tiuvel valsch geslagen ûf die wâren minne.
Sentence: 710    Wan allez daz dû minnen solt an dînem naehsten mit der wâren minne, daz hât der tiuvel allez verkêret in die valschen minne.
Sentence: 711    Wan bist dû ein unkiuscher mensche, dû minnest einen andern, der ouch unkiusche ist, unde dû minnest in ouch durch anders niht wan eht durch unkiusche.
Sentence: 712    Bist dû ein rouber, dû minnest einen, der ouch ein rouber ist.
Sentence: 713    Bist dû ein diep, dû minnest einen andern, der ouch ein diep ist.
Sentence: 714    Bist dû ein tanzer oder ein turneiesman oder ein luoderer oder ein spiler oder ein frâz, dû bist einem vil holder, der dir des selben hilfet wan der dir dar zuo niht gehelfen kan.
Sentence: 715    Unde dû minnest den frâz durch sîne frâzheit unde den spiler durch sîn spil, unde ieglîcher minnet sînen gelîchen.
Sentence: 716    Sô minnet der díe sünde; sô minnet der ein ander sünde, ketzerîe unde zouberîe unde swelher leie ez ist, daz minnet iuwer ieglîcher an dem andern, an sînem naehsten.
Sentence: 717    Daz wir dâ sprechen: 'an unserm naehsten', daz ist alsô gesprochen: wir sîn alle einander gebrüeder in gote, unde dâ von suln wir sprechen: 'unser nachsten', daz ist, daz wir gebrüeder sîn.
Sentence: 718    Unde dar ûf hât ouch der tiuvel valsch geslagen, daz wir sprechen: 'unser naehster'.
Sentence: 719    Dû minnest dînen naehsten, daz ist, der dir an bôsheit der naehste ist: den hât der tiuvel dir ze einem naehsten geben unde ze minnen für die wâren minne.
Sentence: 720    Des mac er dir vil wol gelônen, im zerrinne danne alles des fiures, daz er iendert hât.
Sentence: 721    Ze dem andern mâle hât iu der almehtige got geboten, daz ir fride haltet mit iu selben.
Sentence: 722    Daz ist alsô gesprochen, daz der lîp sol mit der sêle vereinet sîn, daz der lîp niht begern sol swaz der sêle schade sî.
Sentence: 723    Sô hâst dû fride mit dir selber.
Sentence: 724    Swenne aber der lîp toetlîcher sünde begert, sô kan niemer dehein mensche fride mit im selber gehaben.
Sentence: 725    Wan diu sêle ist von der edeln gotheit gemachet, sô ist ir diu sünde wider; sô krieget der lîp nâch den sünden.
Sentence: 726    Wan ir wizzet wol, swenne der lîp die sünde getuot, sô erkumest dû in dînem herzen - swelher leie diu sünde ist -, sô erschrickest dû dar abe vil oder wênic unde gedenkest dir alsô: 'owê, waz hân ich getân!'
Sentence: 727    Sich, daz ist diu sêle: wan sie daz wol weiz, daz sie die martel dar umbe lîden muoz.
Sentence: 728    Sô sprichet manic mensche: 'weh!
Sentence: 729    waz schulde hât diu sêle an den sünden, die der lîp getuot'.
Sentence: 730    Jâ, gotweiz!
Sentence: 731    diu sêle hât dicke und ofte schulde an den sünden, wan von rehte ist diu sêle des lîbes meister unde sie ist wirt und hûsfrouwe in dem lîbe als ein frumer wirt in sînem hûse.
Sentence: 732    Daz sprichet der guote sant Jacob: 'diu sêle sol sich gar vaste widersetzen in dem lîbe'.
Sentence: 733    Als der lîp einer sünde begert, sô sol diu sêle gar vesteclîchen widerstrîten unde sol dem lîbe meisterschaft anhaben, daz er die sünde iht tuo.
Sentence: 734    Wan daz mac sie wol getuon, ob sie eht wil.
Sentence: 735    Unde dâ von, swaz der lîp gesündet, dâ ist diu sêle ouch schuldic an; wan sie henget allez dem lîbe nâch durch die liebe, die sie zuo dem lîbe hât, unde dâ von muoz sie ouch die martel lîden.
Sentence: 736    Wan ez ist manic sêle als frum, daz sie sô gar des lîbes meister ist, daz der lîp niemer deheine sünde getuon mac.
Sentence: 737    Tegelîcher sünde der mac sich nieman behüeten, wan der ist mêre danne stoubes in der sunnen, unde dar umbe kan sich nieman dâ vor behüeten und ez envert ouch nieman dar umbe ze helle.
Sentence: 738    Und taete ein mensche alle tegelîche sünde, ez enfüere drumbe ze helle niht.
Sentence: 739    Unde tuo niht danne éine houbetsünde: ez muoz zer helle varn unde muoz iemer dâ sîn.
Sentence: 740    Buoze nim ich alle zît ûz.
Sentence: 741    Und danne swie dâ tegelîche sünde niht zer helle ziehen, sô ist manigiu sêle doch sô frumer meister in dem lîbe, daz sich der lîp niht alleine behüetet vor toetlîchen sünden, wan sie hüetent sich halt vor tegelîchen sünden gar vil.
Sentence: 742    Niht gar mac man sich vor tegelîchen sünden behüeten; iedoch hüetet sich etelîcher mensche verre baz danne daz ander.
Sentence: 743    Unde dar umbe, ir hêrschaft alle samt, sô hüetet iuch durch den almehtigen got.
Sentence: 744    Swenne ir der sünden muot gewinnet, sô empfindet ir der sünden wol daz ir ein vorhte dergegen habet.
Sentence: 745    Daz ist diu edele sêle: diu strîtet vaste wider, wan sie die râche unsers herren wol bekennet unde weiz.
Sentence: 746    Unde dar umbe sult ir der edeln sêle volgen unde widerstrîtet den sünden: sô ist eht ein ganzer fride zwischen lîbe unde sêle.
Sentence: 747    Nû habent die tiuvel grôzen valsch ûf den fride geslagen.
Sentence: 748    Wan diu sêle niht danne himelischer dinge begern solte unde sie von himelischen dingen ist, sô habent sie danne valsch ûf die begerunge funden, daz der lîp oberhant hât gewunnen unde daz er niht wan irdenischer dinge begert unde hât der sêle den sic meistic an gewunnen.
Sentence: 749    Wan der lîp ist von irdenischen dingen gemachet unde dâ von begert er ouch irdenischer dinge und die ouch der sêle gar wider sint .
Sentence: 750    Unde dâ von mac niht fride sîn, swâ dû dînem lîbe toetlîcher sünden verhengen wilt.
Sentence: 751    Und alsô hât iu der almehtige got fride geboten, daz ir fride mit iu selben habet.
Sentence: 752    Daz ist der fride, dâ mite der unedel lîp der edelen sêle volgen sol, unde sol ir gehôrsam und undertaenic sîn.
Sentence: 753    Daz ist der gotes fride.
Sentence: 754    Sô ist daz des tiuvels fride.
Sentence: 755    sô der unedel lîp der sêle mit der sünde an gesiget.
Sentence: 756    Die dritten, die dâ fride mit gote haben suln, alsô daz sie den almehtigen got mit keinen dingen erzürnen suln die toetlîche sünde sint, die habent nû fride mit dem tiuvel.
Sentence: 757    Daz sint drîer hande liute, die fride habent mit dem tiuvel.
Sentence: 758    Unde dâ von habent sie fride mit dem tiuvel, daz sie dem an ir lebene aller gelîchest sint .
Sentence: 759    Daz eine sint ketzer, die fride mit dem tiuvel habent.
Sentence: 760    Wan der ketzer hât zwei dinc an im, diu dem tiuvel gelîchent unde diu der tiuvel beidiu hât.
Sentence: 761    Daz ein daz der tiuvel tuot daz ist, daz er alle die er mac von gote kêret, daz er daz tuot.
Sentence: 762    Wan er daz himelrîche verworht unde verlorn hât, sô saehe er âne mâze gerne, daz ez alle die verworhten, die von Adâmes künne geborn sint, und er schüpfet unde raetet mit allem flîze, swie er kan unde mac, daz ir vil sî die den fride unsers herren zebrechen unde daz êwige künicrîche verwirken, daz sie dâ verworht hânt die leiden tiuvel.
Sentence: 763    Daz ander, daz ouch der tiuvel an im hât, daz ist, daz er sich niemer bekêren wil.
Sentence: 764    Er wolte halt niht, daz er bî gote in dem himelrîche waere, den worten daz er gotes friunt wolte sîn.
Sentence: 765    Und an den selben dingen sint die ketzer dem tiuvel ouch gelîch.
Sentence: 766    Der ketzer ist gevallen von der gemeinde der heiligen kristenheit, und alsô machete er alle die ze ketzern gerne, die in der heiligen kristenheite sint.
Sentence: 767    Unde dar umbe sol man sich vor im hüeten, sô er vil heimlîchen gêt zuo iu unde sprichet, er welle iuch guot dinc lêren heimlîche in einem winkel unde des er iuch offenlîche gelêren entar.
Sentence: 768    Daz ist reht ein ketzer.
Sentence: 769    Wan wolte er dich guot dinc lêren, sô lêrte er dich an dem liehte vor den liuten.
Sentence: 770    Und als ir des selben innen werdet, sô sult ir sie rüegen, unde hüetet iuch vor in, als liep iu himelrîche sî, daz ir iemer ein einigez wort von in gelernet.
Sentence: 771    Und etelîche die dunkent sich sô gar sicher, daz sie in gedenkent: 'Ich wil ez wol im vervâhen, unz ich besihe, waz ez sî daz er mich dâ lêren wil.'
Sentence: 772    Seht, daz sult ir niht tuon.
Sentence: 773    Wan als ir sie versuochen wellet unde biz ir niwan versuochet waz er künne, mit dem selben sô hât er dich ze einem ketzer gemachet unde daz dû iemer deste boeser unde deste kränker an dînem gelouben bist oder daz dû sâ zehant vellest von der gemeinde der heiligen kristenheit unde von dem frônen himeirîche, daz dû daz antlütze unsers herren niemer mêre gesihst.
Sentence: 774    Dâ beschirme uns der almehtige got vor!
Sentence: 775    - Daz ander, dar an sich der ketzer dem tiuvel gelîchet, daz ist, daz sich der ketzer niemer mêre bekêren wil als wênic als der tiuvel.
Sentence: 776    Wan er ist als gar verhertet unde versteinet als der tiuvel in der ketzerîe.
Sentence: 777    Unde rehte als der kristalle von wazzer ze steine worden ist, als ist der ketzer von einem kristenmenschen worden.
Sentence: 778    Und als wênic als man den kristallen iemer ze wazzer gemachen mac, als wênic mac man den ketzer iemer mêr ze einem kristenmenschen gemachen, er sî denne kürzlîche in die ketzerîe komen.
Sentence: 779    - Die andern liute, die sich ouch aller beste dem tiuvel gelîchent unde die sô staeten fride mit dem tiuvel habent, daz er niemer zerbrochen wirt, daz sint alle die dâ sündent wider den heiligen geist.
Sentence: 780    Daz sint fünf leie oder sehs leie sünde die wider den heiligen geist sint, unde dâ engetürren wir niht von gereden, wan daz ist eht uns verboten.
Sentence: 781    Unde die sint ouch als versteinet unde verhertet als der tiuvel.
Sentence: 782    - Sô sint die dritten aller liute wirste, die dem tiuvel aller gelîchest sint an ir sünden.
Sentence: 783    Die haltent staeten fride mit dem tiuvel.
Sentence: 784    Der ist sô staete, daz halt under allen sündern nieman sô staeten fride hât mit dem tiuvel.
Sentence: 785    Die sint dem tiuvel aller gelîchest under allen liuten unde sint aller sünder schedelîcheste die selben sünder, die diu werlt ie gewan oder iemer gewinnet.
Sentence: 786    Daz sint die gîtigen liute.
Sentence: 787    Alle die unreht guot wider got gewinnent unde wider sînen hulden, sô mit wuocher, sô mit fürkoufe, mit dingesgeben, sô mit roube oder mit diupstâl oder mit trügenheit an koufe oder an antwerke oder mit swelhen dingen dû ez gewinnest daz unrehte guot: die sint alle dem tiuvel gelîche unde habent staeten fride mit dem tiuvel eht iemer mêre.
Sentence: 788    Wan der tiuvel hât driu dinc an im, diu sint aller dinge wirstiu, diu diu werlt ie gewan.
Sentence: 789    Daz êrste ist, daz der tiuvel staetes sündet tac unde niht für sich dar, daz er niemer geruowet keine wîle noch deheine stunde.
Sentence: 790    Daz ander, daz er gitic nâch den sünden ist: sô er ie mêr gesündet, sô er ie gerner sündet, und in benüeget eht niemer.
Sentence: 791    Daz dritte ist, daz der tiuvel sich niemer bekêren wil.
Sentence: 792    Und an disen drin sünden sint die gîtigen liute dem tiuvel aller gelîchest unde habent staeten fride mit im an den selben dingen.
Sentence: 793    Die gîtigen liute sündent tac unde niht alle zît, diu zît sî heilic oder niht, ez sî jeniu zît oder disiu zît, sô sündet eht er für sich dar.
Sentence: 794    Ir andern sünder, ir lât doch gote etewenne einen fride mit iuwern sünden.
Sentence: 795    Ir mörder, ir mordet iezuo nieman; ir êbrecher, ir brechet iezuo niht iuwer ê; ir zouberer und ir zoubraerinne, ir zoubert iezuo mit nihte; ir fraeze, ir luoderer und ir spiler und ir tenzer, ir trîbet iuwer unfuore mit nieman iezuo und iuch durstet halt vil sêre; ir tuot ez gerne oder ungerne sô müezet ir sîn ungetrunken.
Sentence: 796    Ir tanzer, ir tanzet iezuo mit nieman.
Sentence: 797    Ir andern sünder, ir gebet dem almehtigen gote etewenne fride.
Sentence: 798    Dise gîtigen liute die gebent dem almehtigen gote niemer deheinen fride.
Sentence: 799    Daz ist dâ von, daz sie fride mit dem tiuvel habent.
Sentence: 800    Nû sich, gîtiger, wuocherer unde fürköufer, sît hiute daz dû her kaeme, sît hâst dû mit wuocher unde mit fürkoufe wol vier pfenninge gewunnen.
Sentence: 801    Unde sît ich dise rede an huob, sît bist dû lîhte eines helbelinges rîcher danne ê.
Sentence: 802    Und an dém teile hâst dû fride mit dem tiuvel.
Sentence: 803    Der laet ouch got niemer geruowen.
Sentence: 804    Unde dâ von sprichet der almehtige got selbe von den gîtigen liuten als gar übel, daz ich niht naeme dehein guot, ich naeme niht hundert pfunt, daz ich alsô vor disen engeln spraeche, die alhie gegenwertic sint unde vor allen den liuten.
Sentence: 805    Ez würde den engeln unde liuten allen ir ôren betrüebet, ob ich nû vor in spraeche als got selber hât gesprochen.
Sentence: 806    Er sprichet: 'dû rehte boese hût!' al für sich hin, unde sprichet gar übele: 'dû rehte boese hût, dû laest mich niemer geruowen.
Sentence: 807    Die von Samariâ unde die von Gomorrâ unde die von Sodomâ die lânt mich geruowen etewenne: dû laest mich niemer geruowen, wan dîn pfluoc ist eht alle zît ûf der verte und ûf der arbeit des gewinnes'.
Sentence: 808    Nû wis frô, gîtiger!
Sentence: 809    dû versûmest einen helbelinc niht an dirre predige.
Sentence: 810    Ir andern liute, ir versûmet iuch lezuo gar sêre an iuwer arbeit.
Sentence: 811    Der gîtige versûmet sich aber nihtes niht an dirre predige.
Sentence: 812    Wan iuwer gewinne gênt eht alle zît für sich, sô krump sô sleht, ez witer übel oder wol, ez sî bisezze oder niht, ez hagel oder niht, sô gêt dîn pfluoc doch alle zît gelîch.
Sentence: 813    Pfî, daz dich diu erde niht verslant, daz dû mit dem heiligen toufe getoufet bist!
Sentence: 814    wan dû ein jüde bist an dînen werken und an dînem leben.
Sentence: 815    Unde dâ mite ist dîn fride mit dem tiuvel iemer staete.
Sentence: 816    - Zem andern mâle bist dû dem tiuvel ouch gelîch an dînen sünden.
Sentence: 817    Daz ist, daz den tiuvel an sînen sünden niemer genüeget.
Sentence: 818    Sô er ie mêr sündet, sô er ie gerner sündet.
Sentence: 819    Alsô tuot ouch der gîtige.
Sentence: 820    Den selben fride heltet er gar vesteclîche mit dem tiuvel.
Sentence: 821    Wan sô er ie mêre mit fürkoufe unde mit wuocher unde mit satzunge gewinnet, sô er ie gerner mê unde ie gerner vil haete.
Sentence: 822    Pfî, gîtiger, wie gar gelîch dû dem tiuvel bist!
Sentence: 823    und ir verfluochten tiuvel, wie gar wislîche ir den valsch geslagen habet unde disen ungetriuwen fride!
Sentence: 824    Wan dise gîtigen liute, der herze vor gîtikeit niemer vollen sat werden kan, sie heizent anders nibt die gingen liute danne dâ von: sô sie des unrehten guotes ie mêre gewinnent, sô sie ie gerner mê wollten haben.
Sentence: 825    Unde daz ist ir fride mit dem tiuvel.
Sentence: 826    - Ze dem dritten mâle hât der gîtige fride mit dem tiuvele, alsô daz er niemer wâre riuwe gewinnet, als wênic als der tiuvel und als der ketzer und alse die dâ sündent wider den heiligen geist.
Sentence: 827    Wan daz ist allez éin geselleschaft.
Sentence: 828    Der tiuvel unde die gîtigen unde die ketzer unde die wider den heiligen geist dâ sündent, daz ist allez éin kumpanîe und éin gesunde, sie haeten anders niht fride mit dem tiuvel.
Sentence: 829    Und iedoch suln wir versuochen unde suln dise gîtigen liute biten unde manen, daz sie sich ûz dem fride nemen, ûz dem fride des tiuvels, unde sich ergeben in den fride und in die geselleschaft des almehtigen gotes und aller gotes heiligen und aller engele und aller himelischen menie; unde hiute daz unrehte guot lâzet, daz ir erhoehet werdet in der himelischen Jerusalem bî dem almehtigen gote.
Sentence: 830    Jâ soltet ir ze edel iuwer ieglîcher sîn dar zuo, daz ir mit dem verfluochten tiuvel iemer geselleschaft habet an dem grunde der helle.
Sentence: 831    Man gap einest wîsen liuten für, daz sie solten râten, waz mannes herze aller schierste überwunden habe.
Sentence: 832    Dô sprach daz eine, daz taete ein künic: der überwünde aller schierste mannes herze; wan swaz der künic einem armen manne gebüte, des waere er mit allem flîze gerne gereht unde bereit und er getörstes niemer widerreden und er waere halt frô swenne im der künic ihtes gebüte.
Sentence: 833    Dô sprach der ander: 'des ist niht!
Sentence: 834    der wîn überwindet mannes herze aller schierste.
Sentence: 835    Der wîn der machet einen, daz er von bürge und ouch von lande ret unde von grôzem guote unde von tûsent marken, der er einigen pfenninc niht enhât.'
Sentence: 836    Sô sprach der dritte.
Sentence: 837    'des ist niht!
Sentence: 838    die frouwen habent mannes herzen aller schierste überkomen'.
Sentence: 839    Der nam obernthant, wan er hete reht, daz bewaerete er mit Adâme wol.
Sentence: 840    Den hete got als starken geschaffen, und haete man alle tage berge ûf in geleit, man möhte in niht erdrücket hân, wan er hete eht in untoetlich geschaffen.
Sentence: 841    Der alliu swert und alliu wâfen haete ûf in geslagen unde gestâzen, er enwaere niht tôt.
Sentence: 842    Der in versenket haete in alliu wazzer, er waere niht ertrunken, wan er was reht untoetlich: dâ von mohte er niht erstorben sîn, swie man im getân haete.
Sentence: 843    Unde swie starken unde swie untoetlîchen er in hete geschaffen, sô hât in doch ein frouwe schiere überwunden: an aller sîner kraft und an aller sîner wirde und an aller sîner edelkeit überwant in ein frouwe, daz er alle sîne krefte verlôs.
Sentence: 844    Unde dâ von sô hete er behabet.
Sentence: 845    Wan Sampsôn der hete tûsent manne sterke, unde gewan im ein wîp alle sîne sterke an und alle sîne kraft.
Sentence: 846    Unde Salomôn wart betrogen an aller sîner wîsheit unde manic ander man, die betrogen sint von frouwen.
Sentence: 847    Unde dâ von habent die frouwen den mannen den sic an behabet.
Sentence: 848    Unde dar umbe wil ich dise gîtigen liute des biten: sît disiu driu dinc aller meiste mannes herze überwindent, sô lât iuch hiute disiu driu dinc überwinden unde sît des êrsten erbeten unde ermant bî dem wîne, den iu der almehtige got schenken wil êwiclîchen, wan der bezeichent die wâren minne unsers herren.
Sentence: 849    Die wil er dir dar umbe êwiclîchen schenken, daz dû komest ûz der geselleschaft des tiuvels unde daz dû daz unrehte guot hiute laezest, daz dû doch muost lâzen, den worten daz dir der guote sant Pêter schenket êwiclîchen mit den heiligen zwelfboten, daz dich die ewiclîchen minnen in der genözeschaft aller heiligen.
Sentence: 850    Nû lât heute daz unrehte guot durch den guoten sant Stephân und alle gotes martelaere, daz iuch die iemer êwiclîchen müezen minnen.
Sentence: 851    Ich bite iuch hiute, daz ir ein wênic unrehtes guotes widergebet durch den guoten sant Niclausen unde durch alle nôthelfer - owê!
Sentence: 852    nû ist er doch gar milte der guote sant Nicolaus und er hât manic tûsenden ûz noeten geholfen mit sîner heillkeit, die er umbe got verdienst hât - unde durch die heiligen niun koere der heiligen engele und allez himelische her, daz die iu feiner mêr in den êwigen freuden êwiclîchen müezen schenken den edeln süezen wîn der wâren minne unde daz ir dâ von trunken müezet werden der wâren minne, der dâ niemer zerrinnet unde diu dâ niemer kein ende genimet, und alsô trunken mit der freude werden, die herze nie betrahten kunde, die âre nie gehôrte unde munt nie gesprach, als der guote sant Paulus dâ sprichet.
Sentence: 853    Unde lât hiute daz unrehte guot durch alle gemeinschaft alles himelischen hers unde lât iu hiute disen edeln süezen wîn iuwer herze an gewinnen, daz iuch allez himellsehe her iemer froelîchen müeze minnen.
Sentence: 854    Zem andern mâle bite ich iuch durch die liebe, die ir dem himelischen künige leisten sult; wan daz ist der drîer dinge einez, diu mannes herze überwindent.
Sentence: 855    Wan jener künic den himelischen künic bediutet, den künic aller künige und aller dirre werlte unde den keiser aller künige und aller engel herren: den lât iuch hiute überwinden, daz ir daz untehte guot lât, wan er iu geheizen hât, daz er iuwer ieglîchem ein künicrîche geben welle und iuch ouch ze künigen wil machen, als er selbe ein künic ist.
Sentence: 856    Und er hât iuch doch gelobet, daz er iuch iemer mêre êwiclîche behalten wil, in dirre werlte und in jener, ob ir sîn im getrûwet.
Sentence: 857    Unde dâ von sult irs im getrûwen, ob ir ein künicrîche durch sînen willen liezet, daz er iuch des wol ergetzen mac.
Sentence: 858    Nû seht, wie lützel sie der glîche iendert tuont!
Sentence: 859    wie gar sie verzwîvelt hânt an aller gotes barmherzikeit!
Sentence: 860    Nû wirt doch maniges hôhen mannes herze überwunden von küniclîchem gewalte.
Sentence: 861    Nû weist dû doch wol, daz ér dir lîp unde sêle geben hât unde guot unde gehoeren unde gesehen und alle iuwer sinne.
Sentence: 862    Unde dâ von ist ez ein wunder, daz ir daz iemer getürret geleben, daz ir deheiner slahte guot wider got haben wellet.
Sentence: 863    Unde dâ von bist dû eintweder ein verzwîveler als der tiuvel oder ein verherter als der tiuvel.
Sentence: 864    Owê des!
Sentence: 865    daz dîn herze als versteinet ist, daz ez weder wîn mit der wâren minne noch aliu diu geselleschaft aller gotes heiligen noch der künic aller künige niemer überwinden mac!
Sentence: 866    Sô lâ dich doch überwinden diu reine süeze frouwe, diu mit der sunnen bekleit ist, als sie der guote sant Johannes dâ sach in apokalipsî, unde zwelf sternen ûf ir houbete ze einer krône, und ir füeze hânt den mânen under in ze einem fuozschemel.
Sentence: 867    Seht, die selben edeln künigin die sult ir hie mit êren unde sult hiute daz unrehte guot von iu lâzen durch die edeln frouwen sant Marîam, gotes muoter, von der her Dâvît dâ sprach, daz sie stêt bî sînem künige ze sîner zeswen in guldîner waete.
Sentence: 868    Unde der wîse Salomôn hât sie ouch gelobet: ' sicut lilium inter spinas etc.'.
Sentence: 869    Unde dâ von sult ir die hôhen frouwen êren, diu frouwe ist über alle frouwen und über alle juncfrouwen; unde sant Marîam Magdalenen unde sant Margarêten unde sant Katharînen unde die andern alle samt.
Sentence: 870    Sô lange daz jener gewan, daz frouwen mannes herze aller schierste über-wünden und aller meiste, sô lât iuch hiute dise edeln frouwen überwinden, diu uns allen ze heile unde ze saelden ist ertaget unde diu uns dâ wol gehelfen mac von allen unsern sünden und uns ouch helfen wil.
Sentence: 871    Nû lât hiute unrehtez guot durch aller der êre willen, die mîn frouwe sant Marîâ hât bî ir heiligem trûtkinde, unde daz ir die iemer mit ir niezet êwiclîchen.
Sentence: 872    Ir andern sünder, die dâ fride mit dem fleische habent unde die fride mit der werlte süeze habent, die gewinnen alle samt wâre riuwe unde buoze nâch gotes gnâden unde nâch iuwern staten.
Sentence: 873    Wan swaz ich mit disen gîtigen liuten gerede, daz ist verlorn: wan ez ist ein sô staeter fride, den sie mit dem tiuvel habent gesichert, daz er nû niemer mêr zerbrochen wirt.
Sentence: 874    Ir andern sünder gewinnet wâren riuwen unde gewinnet fride mit dem almehtigen gote unde mit iu selben unde fride mit iuweren nachsten, als iu der almehtige got geboten hât, unde daz ir daz künicrîche besitzet, daz er iu geheizen hât, als man hiute liset in dem heiligen amte.
Sentence: 875    Daz uns daz allen wider-var, iu mit mir und mir mit iu, daz verlîhe uns der almehtige got.
Sentence: 876    Âmen.



Next part


This text is part of the TITUS edition of Berthold von Regensburg, Predigten.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.