TITUS
Ulrich von Eschenbach, Alexander
Part No. 6
Previous part

Chapter: 9a  
Über Balthasar


Verse: 913       Darîus gewaltes sich vermaʒ.
Verse: 914    ein rîcher künic bî im saʒ,

Verse: 915    der fürste der hieʒ Balthasar.
Verse: 916    mir ist gesagt für wâr,

Verse: 917    rîch und wît wær sîn lant,
Verse: 918    Caldeâ ist eʒ noch genant.

Verse: 919    er bette die abgote an.
Verse: 920    der hêrre wolde des niht lân,

Verse: 921    er wolde die trugner êren,
Verse: 922    ein dienst gegen in kêren.

Verse: 923    sie heten sô vil in betrogen
Verse: 924    und mit irm zouber an sich gezogen,

Verse: 925    daʒ er an sie geloubte
Verse: 926    und sich wîʒheit roubte.

Verse: 927    einer site er phlac,
Verse: 928    sô er sich ophers in bewac,

Verse: 929    daʒ er nam die goltvaʒ
Verse: 930    (dar umbe dult er gotes haʒ),

Verse: 931    die sîne vordern heten genomen:
Verse: 932    die wâren ûʒ dem tempel komen

Verse: 933    von Jhêrusalêm, hân ich gehôrt,
Verse: 934    dô die Nabuchodonosor zerstôrt,

Verse: 935    der sînen zorn an ir rach,
Verse: 936    als ir wol vernemt her nâch.

Verse: 937       Balthasar in vröuden saʒ
Verse: 938    under sînen hern. nû sach er daʒ

Verse: 939    ob im hôch an der want
Verse: 940    dise driu wort schreip ein hant:

Verse: 941    mane techel und phares.
Verse: 942    er kunde sich niht verstên des

Verse: 943    mit allen sînen liuten,
Verse: 944    waʒ dise wort bediuten.

Verse: 945    dô die künegîn daʒ gesach,
Verse: 946    ze dem fürsten sie sprach

Verse: 947    'ich weiʒ einen wîsen man:
Verse: 948    ist daʒ uns ieman kan

Verse: 949    dirre wort bescheiden, daʒ tuot er.
Verse: 950    gebietent daʒ man in bringe her.

Verse: 951    er ist vil liuten wol bekant,
Verse: 952    Dâniêl ist er genant'.

Verse: 953    dô man den heiligen brâhte dar
Verse: 954    und er nam der worte war,

Verse: 955    dem künge er bescheinte
Verse: 956    waʒ ieglich wort meinte.

Verse: 957    'daʒ ich sîn blîbe âne haʒ'
Verse: 958    sprach er 'mane bediutet daʒ

Verse: 959    dîne sünde manicvalt
Verse: 960    sint vor gote gezalt.

Verse: 961    got dir mer enbiutet.
Verse: 962    techel waʒ daʒ bediutet?

Verse: 963    alle dîn werc sint gewegen,
Verse: 964    der du hie hâst gephlegen.

Verse: 965    phares bediutet alsô vil,
Verse: 966    daʒ ich dir niht verswigen wil'.

Verse: 967    er sagte dem heiden
Verse: 968    sîn tât wær gescheiden,

Verse: 969    daʒ bœse und daʒ guote.
Verse: 970    mit trûrigem muote

Verse: 971    bleip der hêrre aldâ,
Verse: 972    Dâniêl fuor anderswâ.

Verse: 973    nû begunde sich daʒ niht sparn,
Verse: 974    dise zwên künge kâmen mit scharn,

Verse: 975    Darîus von Asîâ
Verse: 976    und Cyrus von Syrîâ.

Verse: 977    sie vanden den künic Balthasar
Verse: 978    sitzen in der fröiden schar:

Verse: 979    ze tôde sluogen sie den man
Verse: 980    unde fuorten mit in dan

Verse: 981    alleʒ daʒ in behagte,
Verse: 982    als mir der meister sagte.

Verse: 983    alsô des künges hôchvart
Verse: 984    mit tôde zerfüeret wart.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.