TITUS
Lamprecht, Alexander (Strassburger Bearbeitung)
Part No. 4
Previous part

Chapter: 13  
Alexanders Erziehung


Verse: 181       Nû hôret, wî er sih fure nam:
Verse: 182    swâ ein frumich rîter zô ime quam,

Verse: 183    den bôt er lîb unde gût
Verse: 184    unde ne karte neheinen sînen mût

Verse: 185    an neheinen tumben man;
Verse: 186    vil harte wol im daz gezam.

Verse: 187    ime was sîn gebâre,
Verse: 188    als er ein furste wâre

Verse: 189    ubir alliz ertrîche.
Verse: 190    ih sage û wêrlîche:

Verse: 191    die meistere, di er dô gwan,
Verse: 192    di wâren cunstige man.

Verse: 193    si begunden in wîsheit lêren
Verse: 194    und zugen in ze grôzen êren.

Verse: 195    si larten ime strîten
Verse: 196    und vermezzenlîchen rîten

Verse: 197    in sturm unde in volcwîch,
Verse: 198    sô daz is nie ne wart sîn gelîch.

Verse: 199    der liste di er von in gwan,
Verse: 200    der wart er ên vil vornême man.

Verse: 201       Der êriste meister sîn
Verse: 202    der lartin kriechisch und latîn

Verse: 203    und scrîben ane pergemint.
Verse: 204    noh dan was er ein lutzil kint.

Verse: 205    und lartin vil manige bûch
Verse: 206    und andire wîsheit genûch.

Verse: 207       Sîn meister, den er dar nâh gwan,
Verse: 208    der lartin wol mûsicam

Verse: 209    und lartin di seiten zîhen,
Verse: 210    daz alle tône dar inne gîhen,

Verse: 211    rotten unde der lîren clanc,
Verse: 212    und von ime selben heben den sanc.

Verse: 213       Der dritte frumete ime wole:
Verse: 214    er lartin allir dinge zale

Verse: 215    unde lartin al di wîsheit,
Verse: 216    wî verre diu sunne von dem mânen geit;

Verse: 217    unde lartin ouh di list,
Verse: 218    wî verre von den wazzeren zô den himelen ist.

Verse: 219       Der meister, den er dô gwan,
Verse: 220    was Aristotiles der wîse man.

Verse: 221    der lartin alle di cundicheit,
Verse: 222    wî der himel umbe geit,

Verse: 223    und stach ime di list in sînen gedanc
Verse: 224    zerkennene daz gestirne und sînen ganc?

Verse: 225    dâ sih di wîsen veren mite bewarint,
Verse: 226    dâ si in dem tiefen mere varint.

Verse: 227       Einen meister gwan er abir sint
Verse: 228    Alexander daz edele kint,

Verse: 229    der lartin mit gewêfene varen,
Verse: 230    wî er sih mit einem schilde solde bewarn,

Verse: 231    und wî er sîn sper solde tragen
Verse: 232    zô deme, dem er wolde schaden,

Verse: 233    und wî er den erkiesen mohte
Verse: 234    und gestechen, alsiz ime tohte

Verse: 235    und alse der stich wêre getân,
Verse: 236    wî er zô dem swerte solde vân

Verse: 237    und dâ mite kundiclîche slege slân,
Verse: 238    und wî er sînen vîant solde vân,

Verse: 239    und wî er sih selben solde bewaren
Verse: 240    vor allen, di ime woldin schaden;

Verse: 241    und wî er sînen vîanden lâgen solde,
Verse: 242    di er danne untwirken wolde,

Verse: 243    und wî er zô den rîteren solde gebâren
Verse: 244    zô diu daz si ime willich wâren.

Verse: 245       Der sehste bestunt in mit grôzen witzen
Verse: 246    und lartin ze dinge sitzen

Verse: 247    und lartin, wî er daz irdêhte,
Verse: 248    wî er von dem unrehten beschiede daz rehte,

Verse: 250    und wî er lantreht bescheiden kunde
Verse: 251    allen den er is gunde.

Verse: 252       Umbe daz und vil manich ander
Verse: 253    alsus wart daz kint Alexander

Verse: 254    listic, gwaldich unde balt.
Verse: 255    nû allir êrist was er zwelif jâr alt.

Verse: 256    alsô stêtich was ime sîn mût,
Verse: 257    durh alliz werltlîch gût

Verse: 258    ne wolder nie geliegen
Verse: 259    und niemanne betriegen,

Verse: 260    noh durh lieb noh durh leit
Verse: 261    geswachen di wârheit.

Verse: 262    einem sînen meistere daz wol schein:
Verse: 263    den stîz er ze tale ubir einen stein,

Verse: 264    daz ime sîn hals in zwei brach,
Verse: 265    wander ime eine lugene zû sprah.

Verse: 266    nû sprechent manige lugenêre,
Verse: 267    daz der sîn vater wêre.

Verse: 268    vil ubile ih des gelouben mach,
Verse: 269    wander ime den hals in zwei brach.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.