TITUS
Lamprecht, Alexander (Strassburger Bearbeitung)
Part No. 3
Previous part

Chapter: 12  
Alexanders Geburt


Verse: 125       Woldet ir alle nû gedagen,
Verse: 126    sô woldih û sagen

Verse: 127    von Alexandris geburte,
Verse: 128    wî diu gewurte:

Verse: 129    sîn mûter frowe Olympias
Verse: 130    zestunt dô si sîn genas,

Verse: 131    dô wart ein michil nôtfal:
Verse: 132    di erde irbibete ubir al.

Verse: 133    der donre wart vil grôz.
Verse: 134    ein starkiz weder nider gôz.

Verse: 135    der himel verwandelôte sih
Verse: 136    und di sunne vertunkelôte sih

Verse: 137    und hete vil nâh irn schîn verlorn,
Verse: 138    dô Alexander wart geborn.

Verse: 139       Nû ne vereischetih ê nie noh sint
Verse: 140    alsus geborn nie nehein kint.

Verse: 141    geloubit mir des ih û sagen:
Verse: 142    er gedeih baz in drîn tagen

Verse: 143    dan alle andere kint,
Verse: 144    sô si drîer mânede alt sint.

Verse: 145    und alsime iht des gescach,
Verse: 146    daz ime ubile ze hugen was,

Verse: 147    sô sach er alse der wolf deit,
Verse: 148    alser ubir sînem âze steit.

Verse: 149    daz ih von ime sagen, daz ist wâr:
Verse: 150    strûb unde rôt was ime sîn hâr,

Verse: 151    nâh eineme vische getân,
Verse: 152    den man in den mere sehet gân,

Verse: 153    und was ime ze mâzen dicke
Verse: 154    und crisp als eines wilden lewen locke.

Verse: 155       Umbe sîn gesihte
Verse: 156    wil ih ûh ouh berihten

Verse: 157    unde rehte bescheiden:
Verse: 158    ein ouge was ime weiden,

Verse: 159    getân nâh einen trachen.
Verse: 160    daz quam von den sachen:

Verse: 161    dô in sîn mûter bestunt ze tragene;
Verse: 162    dô quâmen ir freislîche bilide ingagene,

Verse: 163    daz was ein michil wunder.
Verse: 164    swarz was ime daz ander,

Verse: 165    nâh einem grîfen getân.
Verse: 166    daz sult ir wizzen âne wân.

Verse: 167       Sîn hals was ime wol geschaffin,
Verse: 168    sîn brust starc und wol offin,

Verse: 169    sîne arme wâren ime von grôzer maht.
Verse: 170    allis sînes mûtes was er wol bedâht.

Verse: 171    sîn bûch ne was ime nit ze lanc noh ze breit:
Verse: 172    vil wol daz deme jungelinge steit.

Verse: 173    beide ubir vûze und ubir bein
Verse: 174    rîterlîch er ze tale schein.

Verse: 175    unde ubir allen sînen lîb
Verse: 176    was er rehte hêrlîch.

Verse: 177    daz sagih û zewâre:
Verse: 178    in sînen êristen jâre

Verse: 179    wôhs ime maht und der lîb sîn
Verse: 180    mêr dan einem anderen in drîn.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.