TITUS
Text collection: Edda 
Edda


On the basis of the edition
Edda,
Die Lieder des Codex Regius
nebst verwandten Denkmälern,
hrsg. v. Gustav Neckel,
I. Text,
5., umgearbeitete Auflage von Hans Kuhn,
Heidelberg: Carl Winter 1983

prepared for the TITUS collection
by David Stifter and Sigurdur H. Palsson,
Vienna 1994;
corrections by Fabrizio Ducci,
2001;
TITUS version by Jost Gippert,
Frankfurt a/M, 28.2.1998 / 21.6.1998 / 3.10.1999 / 1.6.2000 / 13.4.2002 / 1.3.2003



Song: Vsp. 
Strophe: 1 
(VǪLOSPÁ)


Strophe: 1 
Verse: 1    Hlióðs bið ec allar helgar kindir,
Verse: 2    meiri oc minni, mǫgo Heimdalar;
Verse: 3    vildo, at ec, Valfǫðr, vel fyrtelia
Verse: 4    forn spiǫll fira, þau er fremst um man.

Strophe: 2 
Verse: 1    Ec man iǫtna, ár um borna,
Verse: 2    þá er forðom mic fœdda hǫfðo;
Verse: 3    nío man ec heima, nío íviði,
Verse: 4    miǫtvið mœran fyr mold neðan.

Strophe: 3 
Verse: 1    Ár var alda, þat er Ymir bygði,
Verse: 2    Vara sandr né sær né svalar unnir;
Verse: 3    iorð fannz æva né upphiminn,
Verse: 4    gap var ginnunga, enn gras hvergi.

Strophe: 4 
Verse: 1    Áðr Burs synir biǫðom um ypþo,
Verse: 2    þeir er miðgarð, mœran, scópo;
Verse: 3    sól scein sunnan á salar steina,
Verse: 4    þá var grund gróin grœnom lauki.

Strophe: 5 
Verse: 1    Sól varp sunnan, sinni mána,
Verse: 2    bendi inni hœgri um himinioður;
Verse: 3    sól þat né vissi, hvar hon sali átti,
Verse: 4    Stiornor þat né visso, hvar þær staði átto,
Verse: 5    máni þat né vissi, hvat hann megins átti.

Strophe: 6 
Verse: 1    Þá gengo regin ǫll á rǫcstóla,
Verse: 2    Ginnheilog goð, oc um þat gættuz:
Verse: 3    nótt oc niðiom nǫfn um gáfo,
Verse: 4    morgin héto oc miðian dag,
Verse: 5    undorn oc aptan, árom at telia.

Strophe: 7 
Verse: 1    Hittuz æsir á Iðavelli,
Verse: 2    þeir er hǫrg oc hof há timbroðo;
Verse: 3    afla lǫgðo, auð smiðoðo,
Verse: 4    tangir scópo oc tól gorðo.

Strophe: 8 
Verse: 1    Teflðo í túni, teitir vóro,
Verse: 2    var þeim vættergis vant ór gulli,
Verse: 3    unz þriár qvómo þursa meyiar,
Verse: 4    ámátcar mioc, ór iǫtunheimom.

Strophe: 9 
Verse: 1    Þá gengo regin ǫll á rǫcstóla,
Verse: 2    Ginnheilog goð, oc um þat gættuz,
Verse: 3    hverr scyldi dverga dróttin scepia,
Verse: 4    ór Brimis blóði oc ór Bláins leggiom.

Strophe: 10 
Verse: 1    Þar var Mótsognir mæztr um orðinn
Verse: 2    dverga allra, enn Durinn annarr;
Verse: 3    þeir manlícon mǫrg um gorðo,
Verse: 4    dvergar, ór iorðo, sem Durinn sagði.

Strophe: 11 
Verse: 1    Nýi oc Niði, Norðri oc Suðri,
Verse: 2    Austri oc Vestri, Alþiófr, Dvalinn,
Verse: 3    Bívǫrr, Bávǫrr, Bǫmburr, Nóri,
Verse: 4    Án oc Ánarr, Ái, Mioðvitnir.

Strophe: 12 
Verse: 1    Veigr oc Gandálfr, Vindálfr, Þráinn,
Verse: 2    Þeccr oc Þorinn, Þrór, Vitr oc Litr,
Verse: 3    Nár oc Nýráðr - nú hefi ec dverga
Verse: 4    - Reginn oc Ráðsviðr - rétt um talða.

Strophe: 13 
Verse: 1    Fíli, Kíli, Fundinn, Náli,
Verse: 2    Hepti, Víli, Hánarr, Svíurr,
Verse: 3    Frár, Hornbori, Frægr oc Lóni,
Verse: 4    Aurvangr, Iari, Eikinscialdi.

Strophe: 14 
Verse: 1    Mál er, dverga í Dvalins liði
Verse: 2    lióna kindom til Lofars telia,
Verse: 3    þeir er sótto frá salar steini
Verse: 4    Aurvanga siǫt til Iorovalla.

Strophe: 15 
Verse: 1    Þar var Draupnir oc Dólgþrasir,
Verse: 2    Hár, Haugspori, Hlévangr, Glói,
Verse: 3    Scirvir, Virvir, Scáfiðr, Ái,

Strophe: 16 
Verse: 1    Álfr oc Yngvi, Eikinscialdi,
Verse: 2    Fialarr oc Frosti, Finnr oc Ginnarr;
Verse: 3    þat mun uppi, meðan ǫld lifir,
Verse: 4    langniðia tal Lofars hafat.

Strophe: 17 
Verse: 1    Unz þrír qvómo ór því liði,
Verse: 2    ǫflgir oc ástgir, æsir, at húsi;
Verse: 3    fundo á landi, lítt megandi,
Verse: 4    Asc oc Emblo, ørlǫglausa.

Strophe: 18 
Verse: 1    ǫnd þau né átto, óð þau né hǫfðo,
Verse: 2    lá né læti né lito góða;
Verse: 3    ǫnd gaf Óðinn, óð gaf Hœnir,
Verse: 4    lá gaf Lóðurr oc lito góða.

Strophe: 19 
Verse: 1    Asc veit ec standa, heitir Yggdrasill,
Verse: 2    hár baðmr, ausinn hvítaauri;
Verse: 3    þaðan koma dǫggvar, þærs í dala falla,
Verse: 4    stendr æ yfir, grœnn, Urðar brunni.

Strophe: 20 
Verse: 1    Þaðan koma meyiar, margs vitandi,
Verse: 2    þriár, ór þeim sæ, er und þolli stendr;
Verse: 3    Urð héto eina, aðra Verðandi
Verse: 4    - scáro á scíði -, Sculd ina þriðio;
Verse: 5    þær lǫg lǫgðo, þær líf kuro
Verse: 6    alda bornom, ørlǫg seggia.

Strophe: 21 
Verse: 1    Þat man hon fólcvíg fyrst í heimi,
Verse: 2    er Gullveigo geirom studdo
Verse: 3    oc í hǫll Hárs hána brendo;
Verse: 4    þrysvar brendo, þrysvar borna,
Verse: 5    opt, ósialdan, þó hon enn lifir.

Strophe: 22 
Verse: 1    Heiði hana héto, hvars til húsa kom,
Verse: 2    vǫlo velspá, vitti hon ganda;
Verse: 3    seið hon, hvars hon kunni, seið hon hug leikinn,
Verse: 4    æ var hon angan illrar brúðar.

Strophe: 23 
Verse: 1    Þá gengo regin ǫll á rǫcstóla,
Verse: 2    ginnheilog goð, oc um þat gættuz,
Verse: 3    hvárt scyldo æsir afráð gialda
Verse: 4    eða scyldo goðin ǫll gildi eiga.

Strophe: 24 
Verse: 1    Fleygði Óðinn oc í fólc um scaut,
Verse: 2    þat var enn fólcvíg fyrst í heimi;
Verse: 3    brotinn var borðveggr borgar ása,
Verse: 4    knátto vanir vígspá vǫllo sporna.

Strophe: 25 
Verse: 1    Þá gengo regin ǫll á rǫcstóla,
Verse: 2    ginnheilog goð, oc um þat gættuz,
Verse: 3    hverir hefði lopt alt lævi blandit
Verse: 4    eða ætt iǫtuns Óðs mey gefna.

Strophe: 26 
Verse: 1    Þórr einn þar vá, þrunginn móði,
Verse: 2    hann sialdan sitr, er hann slíct um fregn;
Verse: 3    á genguz eiðar, orð oc sœri,
Verse: 4    mál ǫll meginlig, er á meðal fóro.

Strophe: 27 
Verse: 1    Veit hon Heimdalar hlióð um fólgit
Verse: 2    Undir heiðvǫnom helgom baðmi;
Verse: 3    á sér hon ausaz aurgom forsi
Verse: 4    af veði Valfǫðrs - vitoð ér enn, eða hvat?

Strophe: 28 
Verse: 1    Ein sat hon úti, þá er inn aldni kom
Verse: 2    Yggiungr ása, oc í augo leit:
Verse: 3    "Hvers fregnit mic, hví freistið mín?
Verse: 4    alt veit ec, Óðinn, hvar þú auga falt:
Verse: 5    í inom mæra Mímis brunni."
Verse: 6    Dreccr mioð Mímir morgin hverian
Verse: 7    af veði Valfǫðrs - vitoð ér enn, eða hvat?

Strophe: 29 
Verse: 1    Valði henni Herfǫðr hringa oc men,
Verse: 2    fecc spiǫll spaclig oc spáganda;
Verse: 3    sá hon vítt oc um vítt of verold hveria.

Strophe: 30 
Verse: 1    Sá hon valkyrior, vítt um komnar,
Verse: 2    gorvar at ríða til Goðþióðar;
Verse: 3    Sculd helt scildi, enn Scǫgul ǫnnor,
Verse: 4    Gunnr, Hildr, Gǫndul oc Geirscǫgul;
Verse: 5    nú ero talðar nǫnnor Herians,
Verse: 6    gorvar at ríða grund, valkyrior.

Strophe: 31 
Verse: 1    Ec sá Baldri, blóðgom tívor,
Verse: 2    Óðins barni, ørlǫg fólgin;
Verse: 3    stóð um vaxinn, vǫllom hæri,
Verse: 4    miór oc mioc fagr, mistilteinn.

Strophe: 32 
Verse: 1    Varð af þeim meiði, er mær sýndiz,
Verse: 2    harmflaug hættlig, Hǫðr nam scióta;
Verse: 3    Baldrs bróðir var of borinn snemma,
Verse: 4    sá nam Óðins sonr einnættr vega.

Strophe: 33 
Verse: 1    Þó hann æva hendr né hǫfuð kembði,
Verse: 2    áðr á bál um bar Baldrs andscota;
Verse: 3    enn Frigg um grét í Fensǫlom
Verse: 4    vá Valhallar - vitoð ér enn, eða hvat?

Strophe: 34 
Verse: 1    Þá kná Vála vígbǫnd snúa,
Verse: 2    heldr vóro harðgor hǫpt, ór þǫrmom.

Strophe: 35 
Verse: 1    Hapt sá hon liggia undir hvera lundi,
Verse: 2    lægiarn líki Loca áþeccian;
Verse: 3    þar sitr Sigyn þeygi um sínom
Verse: 4    ver velglýiuð - vitoð ér enn, eða hvat?

Strophe: 36 
Verse: 1    Á fellr austan um eitrdala,
Verse: 2    sǫxom oc sverðom, Slíðr heitir sú.

Strophe: 37 
Verse: 1    Stóð fyr norðan, á Niðavǫllom,
Verse: 2    salr ór gulli Sindra ættar;
Verse: 3    enn annarr stóð á Ókólni,
Verse: 4    biórsalr iǫtuns, enn sá Brimir heitir.

Strophe: 38 
Verse: 1    Sal sá hon standa sólo fiarri,
Verse: 2    Nástrǫndo á, norðr horfa dyrr;
Verse: 3    fello eitrdropar inn um lióra,
Verse: 4    sá er undinn salr orma hryggiom.

Strophe: 39 
Verse: 1    Sá hon þar vaða þunga strauma
Verse: 2    menn meinsvara oc morðvarga,
Verse: 3    oc þannz annars glepr eyrarúno;
Verse: 4    þar saug Níðhǫggr nái framgengna,
Verse: 5    sleit vargr vera - vitoð er enn, eða hvat?

Strophe: 40 
Verse: 1    Austr sat in aldna í Iárnviði
Verse: 2    oc fœddi þar Fenris kindir;
Verse: 3    verðr af þeim ǫllom einna noccorr
Verse: 4    tungls tiúgari í trollz hami.

Strophe: 41 
Verse: 1    Fylliz fiorvi feigra manna,
Verse: 2    rýðr ragna siǫt rauðom dreyra;
Verse: 3    svort verða sólscin of sumor eptir,
Verse: 4    veðr ǫll válynd - vitoð ér enn, eða hvat?

Strophe: 42 
Verse: 1    Sat þar á haugi oc sló hǫrpo
Verse: 2    gýgiar hirðir, glaðr Eggþér;
Verse: 3    gól um hánom í gaglviði
Verse: 4    Fagrrauðr hani, sá er Fialarr heitir.

Strophe: 43 
Verse: 1    Gól um ásom Gullinkambi,
Verse: 2    sá vecr hǫlða at Heriafǫðrs;
Verse: 3    enn annarr gelr fyr iorð neðan,
Verse: 4    sótrauðr hani, at sǫlom Heliar.

Strophe: 44 
Verse: 1    Geyr Garmr mioc fyr Gnipahelli,
Verse: 2    festr mun slitna, enn freki renna;
Verse: 3    fiolð veit hon froða, fram sé ec lengra
Verse: 4    um ragna rǫc, rǫmm, sigtýva.

Strophe: 45 
Verse: 1    Brœðr muno beriaz oc at bǫnom verðaz,
Verse: 2    muno systrungar sifiom spilla;
Verse: 3    hart er í heimi, hórdómr mikill,
Verse: 4    sceggǫld, scálmǫld, scildir ro klofnir,
Verse: 5    vindǫld, vargǫld, áðr verold steypiz;
Verse: 6    mun engi maðr ǫðrom þyrma.

Strophe: 46 
Verse: 1    Leica Míms synir, enn miǫtuðr kyndiz
Verse: 2    at ino gamla Giallarhorni;
Verse: 3    hátt blæss Heimdallr, horn er á lopti,
Verse: 4    mælir Óðinn við Míms hǫfuð.

Strophe: 47 
Verse: 1    Scelfr Yggdrasils ascr standandi,
Verse: 2    ymr iþ aldna tré, enn iǫtunn losnar;
Verse: 3    hræðaz allir á helvegom,
Verse: 4    áðr Surtar þann sefi of gleypir.

Strophe: 49 
Verse: 1    Geyr nú Garmr mioc fyr Gnipahelli,
Verse: 2    festr mun slitna, enn freki renna;
Verse: 3    fiolð veit hon froða, fram sé ec lengra
Verse: 4    um ragna rǫc, rǫmm, sigtýva.

Strophe: 50 
Verse: 1    Hrymr ecr austan, hefiz lind fyrir,
Verse: 2    snýz iormungandr í iǫtunmóði;
Verse: 3    ormr knýr unnir, enn ari hlaccar,
Verse: 4    slítr nái neffǫlr, Naglfar losnar.

Strophe: 51 
Verse: 1    Kióll ferr austan, koma muno Muspellz
Verse: 2    um lǫg lýðir, enn Loki stýrir;
Verse: 3    fara fífls megir með freca allir,
Verse: 4    þeim er bróðir Býleiptz í for.

Strophe: 48 
Verse: 1    Hvat er með ásom, hvat er með álfom?
Verse: 2    gnýr allr iǫtunheimr, æsir ro á þingi;
Verse: 3    stynia dvergar fyr steindurom,
Verse: 4    veggbergs vísir - vitoð ér enn, eða hvat?

Strophe: 52 
Verse: 1    Surtr ferr sunnan með sviga lævi,
Verse: 2    scínn af sverði sól valtíva;
Verse: 3    griótbiǫrg gnata, enn gífr rata,
Verse: 4    troða halir helveg, enn himinn klofnar.

Strophe: 53 
Verse: 1    Þá kømr Hlínar harmr annarr fram,
Verse: 2    er Óðinn ferr við úlf vega,
Verse: 3    enn bani Belia, biartr, at Surti;
Verse: 4    þá mun Friggiar falla angan.

Strophe: 55 
Verse: 1    Þá kømr inn micli mǫgr Sigfǫður,
Verse: 2    Víðarr, vega at valdýri;
Verse: 3    lætr hann megi Hveðrungs mund um standa
Verse: 4    hior til hiarta, þá er hefnt fǫður.

Strophe: 55H 
Verse: 1    Gínn lopt yfir lindi iarðar,
Verse: 2    gapa ýgs kiaptar orms í hæðom;
Verse: 3    mun Óðins sonr ormi mœta,
Verse: 4    vargs at dauða Víðars niðia.

Strophe: 56 
Verse: 1    Þá kømr inn mœri mǫgr Hlóðyniar,
Verse: 2    gengr Óðins sonr við úlf vega;
Verse: 3    drepr hann af móði miðgarðz véor,
Verse: 4    muno halir allir heimstǫð ryðia;
Verse: 5    gengr fet nío Fiorgyniar burr
Verse: 6    neppr frá naðri, níðs óqvíðnom.

Strophe: 57 
Verse: 1    Sól tér sortna, sígr fold í mar,
Verse: 2    hverfa af himni heiðar stiornor;
Verse: 3    geisar eimi við aldrnara,
Verse: 4    leicr hár hiti við himin siálfan.

Strophe: 58 
Verse: 1    Geyr nú Garmr mioc fyr Gnipahelli,
Verse: 2    festr mun slitna, enn freki renna;
Verse: 3    fiolð veit hon froða, fram sé ec lengra
Verse: 4    um ragna rǫc, rǫmm, sigtýva.

Strophe: 59 
Verse: 1    Sér hon upp koma ǫðro sinni
Verse: 2    iorð ór ægi, iðiagrœna;
Verse: 3    falla forsar, flýgr ǫrn yfir,
Verse: 4    sá er á fialli fisca veiðir.

Strophe: 60 
Verse: 1    Finnaz æsir á Iðavelli
Verse: 2    oc um moldþinur, mátcan, dœma,
Verse: 3    oc minnaz þar á megindóma
Verse: 4    oc á Fimbultýs fornar rúnar.

Strophe: 61 
Verse: 1    Þar muno eptir undrsamligar
Verse: 2    gullnar tǫflor í grasi finnaz,
Verse: 3    þærs í árdaga áttar hǫfðo.

Strophe: 62 
Verse: 1    Muno ósánir acrar vaxa,
Verse: 2    bǫls mun allz batna, Baldr mun koma;
Verse: 3    búa þeir Hǫðr oc Baldr Hroptz sigtóptir,
Verse: 4    vel, valtívar - vitoð ér enn, eða hvat?

Strophe: 63 
Verse: 1    Þá kná Hœnir hlautvið kiósa,
Verse: 2    oc byrir byggia brœðra tveggia
Verse: 3    vindheim víðan - vitoð ér enn, eða hvat?

Strophe: 64 
Verse: 1    Sal sér hon standa, sólo fegra,
Verse: 2    gulli þacþan, á Gimlé;
Verse: 3    þar scolo dyggvar dróttir byggia
Verse: 4    oc um aldrdaga ynðis nióta.

Strophe: 65 
Verse: 1    Þá kømr inn ríki at regindómi,
Verse: 2    ǫflugr, ofan, sá er ǫllo ræðr.

Strophe: 66 
Verse: 1    Þar kømr inn dimmi dreki fliúgandi,
Verse: 2    naðr fránn, neðan frá Niðafiollom;
Verse: 3    berr sér í fioðrom - flýgr vǫll yfir -,
Verse: 4    Níðhǫggr, nái - nú mun hon søcqvaz.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.