TITUS
Actus Apostolorum iberice (Versio sinaitica)
Part No. 3
Previous part

Chapter: 3 
Verse: 1  Link to gnt Link to armnt   პეტრე და იოვანე აღვიდოდეს ტაძარსა მას ჟამსა ოდენ ლოცვისასა ცხრა ჟამს.
Verse: 2  Link to gnt Link to armnt   
და კაცი ვინმე იყო*, მკელობელი მუცლითგან დედისაჲთ იყო, რომელი* აღიკიდიან, დასჳან* დღითი-დღედ კართა თანა ტაძრისათა, რომელსა ერქუა შუენიერ, თხოვად ქველის-საქმარისა* შემავალთაგან ტაძრად,
Verse: 3  Link to gnt Link to armnt   
რომელმან იხილნა* პეტრე და იოვანე, შე-რაჲ-ვიდოდეს ტაძრად, ითხოვდა ქველის-საქმარსა მათგან.
Verse: 4  Link to gnt Link to armnt   
მიხედა მას პეტრე* იოვანჱთურთ და* ჰრქუა: "მოიხილე ჩუენდა".
Verse: 5  Link to gnt Link to armnt   
ხოლო იგი ხედვიდა მათ და ელოდა მოღებად რასმე* მათგან.
Verse: 6  Link to gnt Link to armnt   
ჰრქუა მას პეტრე: "ოქროჲ და ვეცხლი* არა მაქუს ჩუენ*; ხოლო რომელი მაქუს, გცეთ* შენ სახელითა იესუ ქრისტჱს ნაზარეველისაჲთა: აღდეგ და ვიდოდე!"
Verse: 7  Link to gnt Link to armnt   
და უპყრა ჴელი მარჯუენჱ* მისი, აღადგინა იგი. მეყსეულად განუმტკიცნეს* ფერჴნი* მისნი და კოჭნი;
Verse: 8  Link to gnt Link to armnt   
და აღდგა* და ვიდოდა და შევიდა მათ თანა ტაძარსა მას, ვიდოდა და ხლდებოდა და აქებდა ღმერთსა.
Verse: 9  Link to gnt Link to armnt   
და იხილა იგი ყოველმან ერმან, ვიდოდა იგი და აქებდა ღმერთსა.
Verse: 10  Link to gnt Link to armnt   
იცოდეს იგი, რამეთუ ესე არს, რომელი იგი ზინ* ქველის-საქმარისათჳს* ბჭეთა ზედა შუენიერთა ტაძრისათა. და აივსნეს იგინი შიშითა და საკჳრველებითა, რომელი-იგი იქმნა მის ზედა.
Verse: 11  Link to gnt Link to armnt   
და ვითარ ეპყრა მას პეტრე და იოჰანე*, შეკრბებოდა ყოველი ერი მათა სტოვასა მას, რომელსა ჰრქჳან სოლომონისი, საკჳრველისა მისთჳს.
Verse: 12  Link to gnt Link to armnt   
ვითარცა იხილა პეტრე, ჰრქუა ერსა მას: "კაცნო ისრაიტელნო, რაჲსა გიკჳრს ამას ზედა? ანუ ჩუენ რაჲსა მხედავთ, ვითარცა თჳსითა ძალითა გინა ღმრთის მსახურებითა გჳყოფიეს სლვაჲ ეგე მაგისი?
Verse: 13  Link to gnt Link to armnt   
ღმერთმან აბრაჰამისმან და ღმერთმან ისაკისმან და ღმერთმან იაკობისმან და ღმერთმან მამათა ჩუენთამან ადიდა ძჱ თჳსი იესუ*, რომელი თქუენ მიეცით და უვარ-ჰყავთ წინაშე პილატჱსა, რომელმან საჯა განტევებაჲ მისი.
Verse: 14  Link to gnt Link to armnt   
ხოლო თქუენ წმიდაჲ იგი და მართალი უვარ-ჰყავთ, და გამოითხოვეთ კაცი იგი კაცის-მკლველი.
Verse: 15  Link to gnt Link to armnt   
ხოლო წინამძღუარი იგი ცხორებისაჲ მოჰკალთ, რომელი ღმერთმან აღადგინა მკუდრეთით, რომლისა ჩუენ ვართ მოწამე.
Verse: 16  Link to gnt Link to armnt   
და სარწმუნოებითა სახელისა მისისაჲთა, რომელსა ამას ხედავთ და იცით, განამტკიცა სახელმან მისმან, და სარწმუნოებამან მის მიერმან მოსცა მას სიცოცხლჱ ესე წინაშე თქუენ ყოველთა.
Verse: 17  Link to gnt Link to armnt   
და აწ უწყით, ძმანო, რამეთუ უმეცრებით ჰქმენით, ვითარცა-იგი მთავართა თქუენთა.
Verse: 18  Link to gnt Link to armnt   
ხოლო რომელი-იგი ღმერთმან წინაჲსწარ აღუთქუა პირითა ყოველთა წინაჲსწარმეტყუელთა მისთა მიერ, ვნებაჲ ცხებულისა მისისაჲ, აღასრულა ესრჱთ.
Verse: 19  Link to gnt Link to armnt   
აწ უკუე შეინანეთ და მოიქეცით, რაჲთა აღიჴოცნენ ცოდვანი თქუენნი,
Verse: 20  Link to gnt Link to armnt   
რაჲთა, რაჟამს მოიწინენ ჟამნი განსუენებისანი პირისაგან უფლისა, და მოავლინოს რომელსა-იგი ჴელი შეჰყავთ თქუენ, ქრისტჱ იესუ*,
Verse: 21  Link to gnt Link to armnt   
რომელი-იგი* ზეცით ჯერ-არს შეწყნარებად ვიდრე ჟამადმდე კუალად-გებისა ყოველთა, რომელთა იტყოდა ღმერთი პირითა წმიდათა წინაჲსწარმეტყუელთა მისთაჲთა.
Verse: 22  Link to gnt Link to armnt   
მოსე თქუა, რამეთუ: "წინაჲსწარმეტყუელი აღგიდგინოს თქუენ უფალმან ღმერთმან თქუენმან ძმათაგან თქუენთა, ვითარცა-ესე მე; მისი ისმინეთ ყოვლისაებრ, რომელსა გეტყოდის თქუენ.
Verse: 23  Link to gnt Link to armnt   
და იყოს ყოველმან სულმან რომელმან არა ისმინოს მის წინაჲსწარმეტყუელისაჲ, მოისპოს სული იგი ერისაგან მისისა".
Verse: 24  Link to gnt Link to armnt   
და ყოველნივე წინაჲსწარმეტყუელნი სამოველისითგან* და შემდგომითი შემდგომად რავდენნი იტყოდეს, და წინაჲსწარ უთხრობდეს დღეთა ამათ*.
Verse: 25  Link to gnt Link to armnt   
რამეთუ თქუენ ხართ შვილნი წინაჲსწარმეტყუელთანი და აღთქუმისანი, რომელი-იგი აღუთქუა ღმერთმან მამათა თქუენთა და ჰრქუა აბრაჰამსა, ვითარმედ: "ნათესავისა შენისა მიმართ იკურთხეოდიან* ყოველნი ნათესავნი ქუეყანისანი".
Verse: 26  Link to gnt Link to armnt   
თქუენ პირველად აღგიდგინა* ძჱ თჳსი იესუ და მოავლინა მაკურთხეველად თქუენდა, რაჲთა მოიქცეთ კაცად-კაცადი უკეთურებისაგან თქუენისა".
Next part



This text is part of the TITUS edition of Actus Apostolorum iberice (Versio sinaitica).

Copyright TITUS Project, Frankfurt a/M, 28.10.2007. No parts of this document may be republished in any form without prior permission by the copyright holder.