ნუ მრავალნი ჰმოძღურით, ძმანო ჩემნო! უწყოდეთ, რამეთუ უდიდესი საშჯელი მოვიღოთ.
რამეთუ ფრიად ვსცთებით ყოველნივე. რომელი სიტყჳთ არა სცთებოდის, იგი სრული კაცი არს, შემძლებელ არს იგი აღჳრ-სხმად ყოვლისა* გუამისა.
უკუეთუ ცხენსა აღჳრნი აღუსხნით დამორჩილებად ჩუენდა, იგი და ყოველი გუამი მისი მოვაქციით,
აჰა ესერა ნავებიცა იგი დიდ-დიდები და ფიცხელთაგან ქართა მიმოდატაცებულნი მოიქცევიან მცირისაგან საჭისა, ვიდრეცა-იგი ჰნებავნ მისლვად* მმართებელსა მას მათსა.
ეგრეცა*, ენაჲ მცირჱ ასოჲ არს და დიდად მაღლოის*. აჰა ესერა მცირემან ცეცხლმან რაოდენი* ნივთი აღაგზნის!
და ენაჲ ეგრეთვე ცეცხლ არს, სამკაული სიცრუისაჲ*. ენაჲ დადგრომილ არს ასოთა შინა ჩუენთა, რომელი შეაგინებს ყოველსა* გუამსა და აღაგზნებს* ურმის თუალსა მას შესაქმისასა და თჳთ* აღგზებულ არს გეჰენიისაგან*.
რამეთუ ყოველივე ბუნებაჲ მჴეცთა და მფრინველთაჲ* და* ქუეწარმავალთაჲ* და მცურვალთაჲ დაიმწყსების* და დამწყსილ* არს ბუნებასა ქუეშე კაცთასა.
ხოლო ენაჲ კაცთაჲ ვერვის ჴელ-ეწიფების დამწყსად, დაუპყრობელი ბოროტი, სავსე გესლითა მაკუდინებელითა.
რამეთუ მით ვაკურთხევთ ღმერთსა და მამასა. და მითვე* ვსწყევთ კაცთა, რომელნი მსგავსად ღმრთისა შექმნულ არიან.
მიერვე პირით გამოვალს კურთხევაჲ და წყევაჲ. არა ჯერ-არს, ძმანო ჩემნო საყუარელნო, ესე ესრეთ ყოფად.
ნუუკუე წყაროჲსაგან მისვე თუალისა აღმოდინ ტკბილი და მწარე?
ეგების-მე, ძმანო ჩემნო, ვითარმცა ლეღუმან ზეთის ხილი გამოიღო, გინა ვენაჴმან ლეღჳ? ეგრეთვე ვერცა ერთი წყაროჲ მარილიანსა და ტკბილსა წყალსა აღმოცენებად*.
ვინ არს ბრძენ და მეცნიერ თქუენ შორის, აჩუენენ კეთილად სლვისაგან საქმენი თჳსნი სიმშჳდითა სიბრძნისაჲთა.
ხოლო უკუეთუ შური მწარე გაქუნდეს და ჴდომაჲ გულთა შინა თქუენთა, ნუ იქადით და სტყუით* ჭეშმარიტებასა ზედა.
არა არს ესე სიბრძნე ზეგარდამოსრული*, არამედ ქუეყანისაჲ, მშჳნვიერი საეშმაკოჲ.
რამეთუ სადა შური და ჴდომაჲ, მუნ შფოთი და ყოველი* ბოროტისა* საქმჱ.
ხოლო ზეგარდამო სიბრძნჱ პირველად სიწმიდე არს და* მერმე მშჳდობაჲ, სახიერებაჲ, მორჩილებაჲ, სავსე წყალობითა და ნაყოფითა კეთილთა საქმეთაჲთა*, განუკითხველ* და შეუორგულებელ.
რამეთუ ნაყოფი სიმართლისაჲ დაეთესვის მშჳდობით მათთჳს, რომელნი ჰყოფენ მშჳდობასა.
