TITUS
Armenian NT (Zohrab Bible)
Part No. 38
Previous part

Chapter: 10  
(Ժ՜)


Passage: 6-4 
Verse: 1   Link to gnt   Եւ անտի յարուցեալ՝ գայ ի սահմանս հրեաստանի, յայնկոյս յորդանանու։ եւ երթայր դարձեալ խռնեալ ժողովուրդն առ նա. եւ որպէս սովո́ր էր՝ միւսանգամ ուսուցանէր զնոսա։

Section: 28  
Verse: 2   Link to gnt   
Իսկ փարիսեցիքն մատուցեալ փորձելով հարցանէին զնա՝ եւ ասէին, եթէ արժան իցէ առն զկին իւր արձակել։

Verse: 3   Link to gnt   
Նա՝ պատասխանի ետ նոցա՝ եւ ասէ. զինչ պատուիրեաց ձեզ մովսէս։

Verse: 4   Link to gnt   
Եւ նոքա ասեն. մովսէս հրաման ետ՝ գիր մեկնելոյ գրել եւ արձակել։

Verse: 5   Link to gnt   
Պատասխանի ետ Յիսուս՝ եւ ասէ ցնոսա. վասն խստասրտութեան ձերոյ գրեաց զպատուիրանն զայն.

Verse: 6   Link to gnt   
այլ ի սկզբանէ արարածոց, արու եւ էգ արար զնոսա Աստուած, եւ ասէ.

Verse: 7   Link to gnt   
Վասն այսորիկ թողցէ այր զհայր իւր եւ զմայր, եւ երթիցէ զհետ կնոջ իւրոյ։

Verse: 8   Link to gnt   
Եւ եղիցին երկուքն ի մարմին մի. եւ այնուհետեւ ոչ են երկու՝ այլ մարմին մի։

Verse: 9   Link to gnt   
արդ՝ զոր Աստուած զուգեաց, մարդ մի մեկնեսցէ։

Verse: 10   Link to gnt   
Եւ ի տան դարձեալ՝ աշակերտքն զնոյն հարցին ցնա։

Verse: 11   Link to gnt   
Եւ ասէ ցնոսա եթէ այր՝ արձակեսցէ զկին իւր, եւ արասցէ այլ. շնայ։

Verse: 12   Link to gnt   
Եւ կին՝ եթէ ելցէ յառնէ իւրմէ՝ եւ եղիցի առն այլում, շնայ։

Passage: 6-5 
Verse: 13   Link to gnt   
Եւ մատուցանէին առ նա մանկտի՝ զի ձեռն դիցէ նոցա. իսկ աշակերտքն՝ սաստէին այնոցիկ որ մատուցանէինն։

Verse: 14   Link to gnt   
Իբրեւ ետես Յիսուս, բարկացեալ սաստեաց նոցա եւ ասէ. թոյլ տուք մանկտւոյդ գալ առ իս, եւ մի արգելուք զդոսա. զի այդպիսեացդ է արքայութիւն Աստուծոյ։

Verse: 15   Link to gnt   
Ամէն ասեմ ձեզ. որ ոչ ընկալցի զարքայութիւն Աստուծոյ իբրեւ զմանուկ։ ոչ մտցէ ի նա։

Verse: 16   Link to gnt   
Եւ առեալ զնոսա ի գիրկս ձեռն եդ ի վերայ՝ եւ օրհնեաց զնոսա։

Section: 29  
Verse: 17   Link to gnt   
Եւ ընդ ելանելն նորա անտի ի ճանապարհ, ահաւասիկ ոմն մեծատուն՝ ընթացեալ ի ծունր իջանէր, հարցանէր ցնա՝ եւ ասէր. վարդապետ բարի՝ զինչ արարից զի զկեանսն յաւիտենականս ժառանգեցից։

Verse: 18   Link to gnt   
Եւ Յիսուս ասէ ցնա. զի ասես զիս բարի. չիք ոք բարի՝ բայց մի Աստուած հայր։

Verse: 19   Link to gnt   
Զպատուիրանս գիտես. մի շնար. մի սպանաներ. մի գողանար. մի սուտ վկայեր. պատուեա զհայր քո եւ զմայր։

Verse: 20   Link to gnt   
Նա պատասխանի ետ՝ եւ ասէ ցնա. վարդապետ՝ զայդ ամենայն արարի ի մանկութենէ իմմէ, արդ զինչ եւս պակաս իցեմ։

Verse: 21   Link to gnt   
Եւ Յիսուս հայեցեալ ի նա՝ սիրեաց զնա եւ ասէ ցնա. մի ինչ պակաս է ի քէն, եթէ կամիս կատարեալ լինել. երթ զոր ինչ ունիս վաճառեա՝ եւ տուր աղքատաց, եւ ունիցիս գանձս յերկինս, եւ առ զխաչն՝ եւ եկ զկնի իմ։

Verse: 22   Link to gnt   
Եւ նա խոժոռեալ ընդ բանն՝ գնաց տրտում։ զի ունէր ինչս բազումս։

Verse: 23   Link to gnt   
Եւ հայեցեալ յայսկոյս՝ յայնկոյս Յիսուս, ասէ ցաշակերտսն. զիարդ դժուարին է որ զինչսդ ունին, մտանել յարքայութիւն Աստուծոյ։

Verse: 24   Link to gnt   
Եւ աշակերտքն զարմացեալ էին ի վերայ բանիցն նորա։ իսկ Յիսուս դարձեալ պատասխանի ետ նոցա՝ եւ ասէ. որդեակք՝ որչափ դժուարին է յուսացելոց յինչս՝ մտանել յարքայութիւն Աստուծոյ։

Verse: 25   Link to gnt   
Դիւրին է մալխոյ ընդ ծակ ասղա́ն անցանել, քան մեծատան յարքայութիւն Աստուծոյ մտանել։

Verse: 26   Link to gnt   
Եւ նոքա առաւել եւս զարմանային՝ եւ ասէին ընդ միմեանս. իսկ ով կարասցէ ապրել։

Verse: 27   Link to gnt   
Հայեցեալ ընդ նոսա Յիսուս՝ ասէ. առ ի մարդկանէ այդ անհնարին է այլ ոչ առ ի յԱստուծոյ։

Passage: 6-6 
Verse: 28   Link to gnt   
Սկսաւ ասել ցնա պետրոս. ահաւասիկ մեք՝ թողաք զամենայն, եւ եկաք զկնի քո։

Verse: 29   Link to gnt   
Պատասխանի ետ Յիսուս եւ ասէ. ամէն ասեմ ձեզ՝ ոչ ոք է որ եթող զտուն, կամ զեղբարս, կամ զքորս, կամ զհայր, կամ զմայր, կամ զորդիս, կամ զագարակս՝ վասն իմ կամ վասն աւետարանին.

Verse: 30   Link to gnt   
եթէ ոչ առնուցու հարիւրապատիկ այժմ յայսմ ժամանակի տունս, եւ եղբարս, եւ քորս, եւ մայր, եւ որդիս, եւ ագարակս հալածանօք հանդերձ, եւ յաշխարհին որ գալոց է՝ զկեանսն յաւիտենականս։

Verse: 31   Link to gnt   
Զի բազումք եղիցին առաջինք՝ յետինք, եւ յետինք՝ առաջինք։

Verse: 32   Link to gnt   
Եւ էին ի ճանապարհի մինչ դեռ ելանէին յերուսաղէմ. եւ երթայր Յիսուս առաջի քան զնոսա. եւ զարմացեալ էին որ զհետն երթային. եւ երկնչէին։
Passage: 6-7 
   
Եւ առեալ միւսանգամ զերկոտասանսն առանձինն, սկսաւ ասել նոցա զինչ անցք անցանելոց իցեն ընդ նա։

Verse: 33   Link to gnt   
Թէ ահաւասիկ ելանեմք յերուսաղէմ. եւ որդի մարդոյ մատնեսցի քահանայապետիցն եւ դպրաց. եւ դատեսցին զնա ի մահ, եւ մատնեսցեն զնա հեթանոսաց.

Verse: 34   Link to gnt   
Եւ կատակեսցեն զնովաւ, եւ հարկանիցեն զնա, եւ թքանիցեն ի նա, եւ սպանցեն. եւ յերիր աւուր յարիցէ։

Section: 30  
Verse: 35   Link to gnt   
Եւ երթային առ նովաւ յակովբոս եւ յովհաննէս՝ որդիքն զեբեդեայ. եւ ասեն ցնա. վարդապետ՝ կամիմք զի զոր խնդրեսցուք ի քէն՝ արասցես մեզ։

Verse: 36   Link to gnt   
Եւ նա՝ ասէ ցնոսա. զինչ կամիք յինէն՝ զի արարից ձեզ։

Verse: 37   Link to gnt   
Եւ նոքա ասեն ցնա. տուր մեզ՝ զի նստցուք մի՝ յաջմէ քումմէ եւ մի յահեկէ ի փառսն քում։

Verse: 38   Link to gnt   
Պատասխանի ետ Յիսուս՝ եւ ասէ ցնոսա. ոչ գիտէք զինչ խնդրէք. կարէք ըմպել զբաժակն՝ զոր ես ըմպելոց եմ. կամ զմկրտութիւնն՝ զոր ես մկտրելոց եմ մկտրել։

Verse: 39   Link to gnt   
Եւ նոքա՝ ասեն ցնա. կարեմք։ եւ Յիսուս ասէ ցնոսա. զբաժակն զոր ես ըմպելոց եմ՝ ըմպիցէք, եւ զմկրտութիւնն՝ զոր ես մկրտելոց եմ՝ մկրտիցիք.

Verse: 40   Link to gnt   
այլ նստուցանել ընդ աջմէ իմմէ եւ ընդ ահեկէ՝ ոչ է իմ տալ, այլ որոց տուեալ իցէ։

Verse: 41   Link to gnt   
Եւ լուեալ զայն տասանցն, սկսան բարկանալ յակովբայ եւ յովհաննու։

Verse: 42   Link to gnt   
Եւ Յիսուս կոչեաց զնոսա առ ինքն. եւ ասէ ցնոսա. գիտէք. զի որ յանուան իշխանքն են հեթանոսաց, տիրեն նոցա. եւ մեծամեծք նոցա իշխեն նոցա։

Verse: 43   Link to gnt   
Ոչ նոյնպէս իցէ եւ ի ձերում միջի. այլ որ կամիցէ ի ձէնջ մեծ լինել. եղիցի ձեր պաշտօնեայ.

Verse: 44   Link to gnt   
Եւ որ կամիցի ի ձէնջ առաջին լինել՝ եղիցի ձեր ամենեցուն ծառայ։

Verse: 45   Link to gnt   
Քանզի եւ որդի մարդոյ՝ ոչ եկն առնուլ պաշտօն. այլ պաշտել, եւ տալ զանձն իւր փրկանս փոխանակ բազմաց։

Passage: 31 
Passage: 7-1 
Verse: 46   Link to gnt   
Եւ գան յերիքով. եւ ընդ ելանելն նորա յերիքովէ աշակերտքն՝ եւ բազում ժողովուրդք, որդի տիմէի բարտիմէոս կոյր նստէր մուրացիկ յանցս ճանապարհի։

Verse: 47   Link to gnt   
Իբրեւ լուաւ՝ թէ Յիսուս նազովրեցի է, սկսաւ աղաղակել՝ եւ ասել. որդի դաւթի Յիսուս՝ ողորմեաց ինձ։

Verse: 48   Link to gnt   
Եւ սաստէին նմա բազումք զի լռեսցէ, եւ նա առաւել եւս աղաղակէր. որդի դաւթի ողորմեաց ինձ։

Verse: 49   Link to gnt   
Զտեղի առ Յիսուս, եւ հրամայեաց կոչել զնա. կոչեն զկոյրն՝ եւ ասեն ցնա. քաջալերեաց՝ արի՝ կոչէ զքեզ։

Verse: 50   Link to gnt   
Եւ նորա ընկեցեալ զձորձս իւր. յարեաւ եկն առ Յիսուս։

Verse: 51   Link to gnt   
Պատասխանի ետ նմա Յիսուս՝ եւ ասէ. զինչ կամիս՝ թէ արարից քեզ։ ասէ ցնա կոյրն. ռաբբունի, զի բացայց։

Verse: 52   Link to gnt   
Եւ Յիսուս ասէ ցնա. երթ՝ հաւատք քո կեցուցին զքեզ, եւ վաղվաղակի բացաւ, եւ երթայր զհետ նորա ի ճանապարհին։



Next part



This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 1.6.2018. No parts of this document may be republished in any form without prior permission by the copyright holder.