TITUS
Armenian NT (Zohrab Bible)
Part No. 4
Previous part

Chapter: 4  
(Դ՜)


Verse: 1   Link to gnt   Յայնժամ վարեցաւ Յիսուս յանապատ ի հոգւոյն՝ փորձել ի սատանայէ։

Verse: 2   Link to gnt   Եւ պահեալ զքառասուն տիւ եւ զքառասուն գիշեր՝ ապա քաղցեաւ։

Verse: 3   Link to gnt   Եւ մատուցեալ փորցիչն՝ ասէ ցնա. եթէ որդի ես Աստուծոյ՝ ասա զի քարինքս այսոքիկ հաց լինիցին։

Verse: 4   Link to gnt   Նա պատասխանի ետ եւ ասէ. գրեալ է՝ թէ ոչ հացիւ միայն կեցցէ մարդ, այլ ամենայն բանիւ որ ելանէ ի բերանոյ Աստուծոյ։

Verse: 5   Link to gnt   Յայնժամ առեալ ածէ զնա սատանայ ի քաղաքն սուրբ, եւ կացուցանէ զնա ի վերայ աշտարակի տաճարին,

Verse: 6   Link to gnt   եւ ասէ ցնա. եթէ որդի ես Աստուծոյ արկ զքեզ աստի ի վայր. զի գրեալ է՝ թէ հրեշտակաց իւրոց պատուիրեալ է վասն քո՝ եւ ի ձեռաց բարձցեն զքեզ զի մի երբէք հարցես զքարի զոտն քո։

Verse: 7   Link to gnt   Ասէ ցնա դարձեալ Յիսուս. գրեալ է՝ թէ ոչ փորձեսցես զտէր Աստուած քո։

Verse: 8   Link to gnt   Դարձեալ առնու ածէ զնա սատանայ ի լեառն մի բարձր յոյժ, եւ ցուցանէ նմա զամենայն թագաւորութիւնս աշխարհի, եւ զփառս նոցա,

Verse: 9   Link to gnt   Եւ ասէ ցնա. զայս ամենայն քեզ տաց եթէ անկեալ երկիրպագանիցես ինձ։

Verse: 10   Link to gnt   Յայնժամ ասէ ցնա Յիսուս. երթ յետս իմ սատանայ, զի գրեալ է տեառն Աստուծոյ քում երկիր պագցես, եւ զնա միայն պաշտեսցես։

Verse: 11   Link to gnt   Ապա եթող զնա սատանայ. եւ ահա հրեշտակք մատեան եւ պաշտէին զնա.

Passage: 2-2 
Verse: 12   Link to gnt   Եւ իբրեւ լուաւ Յիսուս՝ եթէ յովհաննէս մատնեցաւ, մեկնեցաւ գնաց ի գալիլեա.

Verse: 13   Link to gnt   Եւ թողեալ զնազարեթ, եկ բնակեցաւ ի կափառնայում ի ծովեզերին, ի սահմանս զաբուղովնի եւ նեփթաղիմայ։

Verse: 14   Link to gnt   Զի լցցի բանն՝ որ ասացաւ ի ձեռն եսայեայ մարգարէի,

Verse: 15   Link to gnt   երկիր զաբուղովնի եւ երկիր նեփթաղիմայ ճանապարհ ծովու՝ յայնկոյս յորդանանու, գալիլեա հեթանոսաց։

Verse: 16   Link to gnt   ժողովուրդ որ նստէր ի խաւարի ետես լոյս մեծ. եւ որոց նստէին յաշխարհին եւ ստուերս մահու՝ լոյս ծագեաց նոցա։

Verse: 17   Link to gnt   Յայնմ հետէ սկսաւ քարոզել Յիսուս՝ եւ ասել. ապաշխարեցէք՝ զի մերձեալ է արքայութիւն երկնից։

Verse: 18   Link to gnt   Մինչ դեռ զգնայր Յիսուս ընդ եզր ծովուն գալիլեացւոց, ետես երկուս եղբայրս զսիմովն զկոչեցեալն պետրոս, եւ զանդրէաս եղբայր նորա արկեալ ուռկան ի ծով. քանզի ձկնուրսք էին։

Verse: 19   Link to gnt   Եւ ասէ ցնոսա, եկայք զկնի իմ, եւ արարից զձեզ որսորդս մարդկան։

Verse: 20   Link to gnt   Եւ նոցա թողեալ վաղվաղակի զգործիսն՝ գնացին զհետ նորա։

Verse: 21   Link to gnt   Եւ մատուցեալ անտի յառաջ՝ ետես այլ երկուս եղբայրս, զյակովբոս զեբեդեայ եւ զյովհաննէս զեղբայր նորա ի նաւ ի զեբեդեաւ հանդերձ հարբն իւրեանց. մինչդեռ կազմէին զուռկանս իւրեանց. եւ կոչեաց զնոսա։

Verse: 22   Link to gnt   Նոցա թողեալ վաղվաղակի զնաւն եւ զհայր իւրեանց, գնացին զհետ նորա։

Section: 4  
Verse: 23   Link to gnt   Եւ շրջէր Յիսուս ընդ ամենայն կողմն գալիլեացւոց. ուսուցանէր ի ժողովուրդս նոցա՝ եւ քարոզէր զաւետարանն արքայութեան, եւ բժշկէր զամենայն հիւանդութիւնս՝ եւ զամենայն ախտս ի ժողովրդեանս։

Verse: 24   Link to gnt   Եւ ել լուր նորա ընդ ամենայն երկիրն ասորւոց, եւ մատուցին առ նա զամենայն հիւանդս՝ որ նեղեալ էին ի պէսպէս ցաւս եւ ի տանջանս, եւ զդիւահարս եւ զլուսնոտս եւ զանդամալոյծս. եւ բժշկեաց զնոսա։

Verse: 25   Link to gnt   Եւ երթային զհետ նորա ժողովուրդք բազումք ի գալիլեէ, եւ ի դեկապօլեայ, եւ յերուսաղէմէ եւ ի հրեաստանէ, եւ յանկոյսս յորդանանու, եւ բժշկեաց զնոսա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.