TITUS
Armenian AT (Zohrab Bible)
Part No. 4
Previous part

Chapter: 4 
ԳԼ(ՈՒԽ) Դ՜.


Verse: 1  Link to sept   Եմո́ւտ ադամ առ եւայ կին իւր, եւ յղացաւ եւ ծնաւ զկային. եւ ասէ. ստացա́յ մարդ ա(ստուծո)վ։

Verse: 2  Link to sept   
Եւ յաւել ծնանել զեղբայր ն(ո)ր(ա) զհաբէլ։ եւ եղեւ հաբէլ հովիւ խաշանց, եւ կային գործէր զերկիր։

Verse: 3  Link to sept   
Եւ եղեւ յետ աւուրց՝ եբեր կային ՛ի պտղոյ երկրի պատարա́գ ա(ստուծո)յ.

Verse: 4  Link to sept   
ա́ծ եւ հաբէլ յանդրանկաց խաշանց իւրոց եւ ՛ի պարարտաց ն(ո)ց(ա)։ եւ հայեցաւ ա(ստուա)ծ յաբէլ եւ ՛ի պատարագս ն(ո)ր(ա)։

Verse: 5  Link to sept   
եւ ՛ի կային եւ ՛ի զոհս ն(ո)ր(ա) ո́չ նայեցաւ։ եւ տրտմեցաւ կային յոյժ, եւ խոնարհեցան անկան երեսք իւր։

Verse: 6  Link to sept   
Եւ ասէ տ(է)ր ա(ստուա)ծ ցկային. ընդէ՞ր տրտմեցար, կամ ընդէ՞ր խոնարհեցան անկան երեսք քո։

Verse: 7  Link to sept   
ո́չ ապաքէն եթէ ուղի́ղ մատուցանես, եւ ուղիղ ո́չ բաժանես՝ մեղա́ր. լո́ւռ լեր, առ քե́զ լիցի դա́րձ ն(ո)ր(ա), եւ դո́ւ տիրեսցես նմա։

Verse: 8  Link to sept   
Եւ ասէ կային ցհաբէլ եղբայր իւր, ե́կ երթիցուք ՛ի դաշտ։ եւ եղեւ իբրեւ չոգան ՛ի դաշտ անդր, յարեաւ կային ՛ի վերայ աբիլի եղբօր իւրոյ եւ սպա́ն զնա։

Verse: 9  Link to sept   
Եւ ասէ տ(է)ր ա(ստուա)ծ ցկային. ո՞ւր է հաբէլ եղբայր քո. եւ նա ասէ՝ չգիտե́մ. միթէ պահապա՞ն իցեմ եղբօրն իմոյ։

Verse: 10  Link to sept   
Եւ ասէ ա(ստուա)ծ. զի՞նչ գործեցեր զայդ. գոչումն արեան եղբօր քո բողոքէ́ առիս յերկրէ։

Verse: 11  Link to sept   
եւ արդ՝ անիծեա́լ լիջիր դու ՛ի վ(ե)ր(այ) երկրի, որ եբաց զբերան իւր ընդունել զարիւն եղբօր քոյ ՛ի ձեռաց քոց։

Verse: 12  Link to sept   
զի գործիցես զերկիր՝ եւ ոչ յաւելցէ տալ քեզ զզօրութի(ւն) իւր. երերեա́լ եւ տատանեալ եղիցես ՛ի վ(ե)ր(այ) երկրի։

Verse: 13  Link to sept   
Եւ ասէ կային ցտ(է)ր ա(ստուա)ծ. մե́ծ է պարիժ իմ քան զթողուլդ զիս։

Verse: 14  Link to sept   
եթէ հանէս զիս այսօր յերեսաց երկրէ, եւ յերեսաց քոց թաքեայց. եւ լինիցիմ երերեալ եւ տատանեալ յերկրի. եւ եղիցի ա(մենայ)ն որ գտանիցէ զիս՝ սպանցէ́ զիս։

Verse: 15  Link to sept   
Եւ ասէ ցնա տ(է)ր ա(ստուա)ծ. ո́չ այդպէս։ ա(մենայ)ն որ սպանանէ զկային, եւթն վրէժս լուծցէ։ եւ եդ տ(է)ր ա(ստուա)ծ նշա́ն ՛ի կային՝ չսպանանել զնա ա(մենայ)նի որ գտանիցէ զնա։

Verse: 16  Link to sept   
Եւ ե́լ կային յերեսաց ա(ստուծո)յ. եւ բնակեցաւ յերկրին նայիդ յանդիման եդեմայ։

Verse: 17  Link to sept   
Եմո́ւտ կային առ կին իւր, եւ յղացաւ եւ ծնաւ զենոք։ եւ շինէր քաղաք, եւ դնէ́ր անուն քաղաքին յանուն որդւոյ իւրոյ ենոքայ։

Verse: 18  Link to sept   
Եւ եղեւ որդի ենոքայ գայերիդադ։ եւ գայերիդադ ծնաւ զմայիէլ։ եւ մայիէլ ծնաւ զմաթուսաղա։ եւ մաթուսաղա ծնաւ զղամէք։

Verse: 19  Link to sept   
Եւ ա́ռ իւր ղամէք երկուս կանայս. անուն միումն ադդա, եւ անուն երկրորդին սէլլա։

Verse: 20  Link to sept   
Եւ ծնաւ ադդա զյովբէլ. նա́ է հայր այնոցիկ որ բնակեալեն ՛ի վրանս խաշնարածաց։

Verse: 21  Link to sept   
եւ անուն եղբօր ն(ո)ր(ա) յովբաղ։ նա́ է հայր՝ որ եցոյց զերգս եւ զքնարս։

Verse: 22  Link to sept   
Եւ սէլլա ծնաւ զթոբէլ, եւ էր ճարտարապետ դարբին՝ պղնձոյ եւ երկաթոյ. եւ քոյր թովբելայ նոյեմա։

Verse: 23  Link to sept   
Եւ ասէ ղամէք ցկանայս իւր ցադդա եւ ցսէլլա. լուարո́ւք ձայնի իմում կանայք ղամեքայ, եւ ո́ւնկնդիք բանից իմոց. զի այր սպանի ՛ի վէ́րս ինձ, եւ երիտասարդ՝ ՛ի հարուածս ինձ։

Verse: 24  Link to sept   
զի թէ եւթն անգամ վրէժք խնդրիցին ՛ի կայենէ. ապա եւ ՛ի ղամեքայ եւթանասնեկին եւթն։

Verse: 25  Link to sept   
Եմո́ւտ ադամ առ եւայ կին իւր, եւ յղացաւ եւ ծնաւ որդի. եւ անուանեաց զանուն ն(ո)ր(ա) սէթ *. ասէ։ զի յարոյց ինձ ա(ստուա)ծ զաւակ ա́յլ փոխանակ հաբիլի զոր սպանն կային։

Verse: 26  Link to sept   
Եւ սեթայ եղեւ որդի, եւ անուանեաց զանուն ն(ո)ր(ա) էնո́վս. նա յուսացաւ կոչել զանուն տ(եառ)ն ա(ստուծո)յ։



Next part



This text is part of the TITUS edition of Armenian AT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.