TITUS Texts: Biblia judaica georgice, versio 1

GNC
Text collection: VT
Biblia Judaica Georgica

Bereshit

Text version by Xaxam Abram Gagulašvili (Beer-Ševa)

as edited in
Reuven Enoch,
Tavsili - The Traditional Oral Translation
of the Bible in Judeo-Georgian.
A Critical Edition of Genesis.
Pt. 1: The Text,
Jerusalem 2008
(Publication of the Hebrew University Jewish Oral Tradition Research Center, 28)
electronically prepared Reuven Enoch,
Jerusalem 2008;
GNC version by J. Gippert,
Frankfurt a/M, 25.4.2014

Book: Gen.
ბერეშით

(ჩაწერილი ხახამ აბრამ გაგულაშვილისაგან (ბეერ-შევა)

Chapter: 1
ფარაშათ ბერეშით

Verse: 1    შინა პირველად გააჩინა ღმერთმა იგი მცები და იგი ქვეყანა.

Verse: 2    და იგი ქვეყანა იყო ცუდი და ცარიელი. და სიბნელე ზედა პირსა უფსკუნისასა. და ქარი ღმერთისა დაქროლავდა ზედა პირსა იმის წყლისასა.

Verse: 3    და ბზანა ღმერთმა: იქნეს შუქი, და შეიქნა სინათლე.

Verse: 4    დაინახა ღმერთმან, იგი სინათლე რომ კარგი, და გაჰყო ღმერთმან შუა იმა სინათლესა და შუა იმა სიბნელესა.

Verse: 5    და დაარქვა ღმერთმან თანა შუქსა დღე და თანა სიბნელესა დაარქვა ღამე. და იყო საღამო და იყო დილა დღე პირველი.

Verse: 6    და ბძანა ღმერთმა: იქნეს სამყარო შინა შუა იმა წყლებსა, და იქნეს გაყოფილობა შუა წყლებსა თანა წყლებსა.

Verse: 7    და შექმნა ღმერთმან იგი სამყარო და გაჰყო შუა იმა წყლებსა, რომ იმის ქვეშე თანა სამყაროსა, და შუა იმა წყლებსა, რომ იმის ზევით თანა სამყაროსა; და შეიქმნა ენგრე.

Verse: 8    და დაარქვა ღმერთმან თანა სამყაროსა მცები. და იყო საღამო და იყო დილა დღე მეორე.

Verse: 9    და ბძანა ღმერთმან: შეიკრიბონ იმა წყლებმან იმის ქვეშეთ იმა მცებსა იმათ ადგილსა ერთსა და გამოჩდეს იგი ხმელეთი. და შეიქნა ენგრეთ.

Verse: 10    და დაარქვა ღმერთმან ხმელეთსა დედამიწა და თავყრილობასა წყლებისას დაარქვა ზღვები. დაინახა ღმერთმან, რამეთუ კარგი.

Verse: 11    და ბზანა ღმერთმან: ამოამწვანილოს იმა დედამიწამ მწვანილი^{2^*} მათესლებელი თესლისა, ხე _ ნაყოფისა, მქნელი ნაყოფიერი თანაგვარით მისითა, რომ თესლი მისი შინა მისსა ზედა იმათ დედამიწაზედა; და იყო ეგრეთ.

Verse: 12    და გამოიტანა იმა დედამიწამ ბალახი მათესლებელი თესლისა თანაგვარით მისითა, და ხე მქნელი ნაყოფიერი, რომ თესლი მისი შინა მისა თანაგვარით მისითა. და დაინახა ღმერთმან, რამეთუ კარგი.

Verse: 13    და იყო საღამო და იყო დილა დღე მესამე.

Verse: 14    და ბძანა ღმერთმან: იქნეს მანათლობლები შინა სამყაროსა იმის მცისასა თანა-გასაყოფლად შუა იმა დღესა და შუა იმა ღამესა, და იქნენ თანა-ნიშნებად და თანა-დღეებად^{3^*} და წლებად.

Verse: 15    და იყვნენ მანათლობლები შინა სამყაროსა იმის მცისასა გასანათლებლად ზედა იმას დედამიწაზედა; და იყო ეგრეთ.

Verse: 16    და შექმნა ღმერთმან იგი ორი მანათლობლები იგი დიდები: იგი მანათლობელი იგი დიდი თანა-საუფროსოდ იმა დღესა და იგი მანათლობელი იგი პატარა საუფროსოდ იმა ღამესა, და იგი მასკვლავები.

Verse: 17    და მისცა ისინი ღმერთმან შინა სამყაროსა იმის მცებისას თანა-გასანათლებლად ზედა იმა ქვეყანაზედა^{4^*}.

Verse: 18    და საუფროსოდ შინა დღესა და შინა ღამესა და თანა-გასაყოფლად შუა იმა სინათლესა და შუა იმა სიბნელესა. და დაინახა ღმერთმან, რამეთუ კარგი.

Verse: 19    და იყო საღამო და იყო დილა დღე მეოთხე.

Verse: 20    და ბძანა ღმერთმან: ამოიძრიოს იმა წყალმან ამოსანძრევი სულისა ცოცხლიერისა და ფრინველმა იფრინოს ზედა იმა დედამიწაზედა ზედა პირსა სამყაროსა იმის მცისასა.

Verse: 21    და გააჩინა ღმერთმან ვეშაპები იგი დიდები და იყო ერი სული იგი ცოცხლიერი, იგი მაძრომალე, რომ დაძვრებიან იმა წყალშიდა, თანა-გვარით მათითა, და იგი ყოველი ფრინველი ფრთოსანი თანა-გვარით მისითა. დაინახა ღმერთმან^{5^*}, ნამეტურ კარგი.

Verse: 22    და აკურთხა ისინი ღმერთმან ამნაირად: გაფუვდით და გამრავლდით და აავსეთ იგი წყლები შინა ზღვებშიდა და იგი ფრინველი გამრავლდეს ქვეყანაზედა.

Verse: 23    და იყო საღამო და იყო დილა დღე მეხუთე.

Verse: 24    და ბძანა ღმერთმან: გამოიტანოს იმა დედამიწამ სული ცოცხლიერისა თანა-გვარით მისითა, პირუტყვი და მაძრომალე და მხეცი იმის ქვეყანისა თანა-გვარით მისითა, და იყო ენგრე.

Verse: 25    და ქნა ღმერთმან^{6^*} იგი მხეცი იმის ქვეყანისა^{7^*} თანა-გვარით მისითა და იგი პირუტყვი თანა-გვარით მისითა და იგი ყოველი მაძრომალე იმის დედამიწისა თანა-გვარით მისითა. და ნახა ღმერთმან, რამეთუ კარგი.

Verse: 26    და ბძანა ღმერთმან: შევქმნათ ადამიანი სახით ჩვენითა და ვითარცა მსგავსი ერობით ჩვენითა, და იუფროსოს შინა თევზებსა იმის ზღვისასა და შინა ფრინველსა იმის მცისასა და შინა პირუტყვსა და შინა ყოველ ქვეყანასა და შინა ყოველ მაძრომალესა მძრომიელსა ზედა იმას ქვეყანაზედა.

Verse: 27    და გააჩინა ღმერთმა იგი ადამიანი სახით მისითა; შინა სახითა ღმერთითა გაჩდა ისი, ვაჟი და ქალი გააჩინა ისინი.

Verse: 28    აკურთხა ისინი ღმერთმა და უბძანა მათ ღმერთმა: გაფუვდით და გამრავლდით და აავსეთ იგი ქვეყანა და დაიჭირეთ ის; და იუფროსეთ შინა თევზებსა იმის ზღვისასა და შინა მფრინველსა იმის მცისასა და შინა ყოველ მხეცებსა, იმა მაძრომალესა ზედა იმა დედამიწაზედა.

Verse: 29    და ბძანა ღმერთმან: ესერა მოგეცით მე თქვენ იგი ყოველი ბალახი მათესლებელი თესლისა, რომ ზედა პირსა ყოველ იმა ქვეყანასა, და იგი ყოველი იგი ხე, რომ შინა მისსა ნაყოფი ხე, მათესლებელი თესლისა, თქვენთვის იქნეს თანა-საჭმელად.

Verse: 30    და ყოველი მხეცი იმის ქვეყნისა და ყოველი ფრინველი იმის მცებისა და ყოველი მაძრომალე ზედა იმა დედამიწაზედა, რომ შინა მისსა სული ცოცხლიერისა, და იგი ყოველი მწვანილი ბალახისა^{8^*} თანა-საჭმელად. და იყო ენგრე.

Verse: 31    და ნახა ღმერთმა იგი ყოველი, რომ ქნა, და ესერა კარგი მეტად. და იყო საღამო და იყო დილა დღე მეექვსე.

Next part

This text is part of the TITUS edition of Biblia judaica georgice, versio 1.

Copyright TITUS Project, Frankfurt a/M, 6.5.2015. No parts of this document may be republished in any form without prior permission by the copyright holder.