TITUS
White Yajur-Veda: Brhad-Aranyaka-Upanisad
Part No. 3
Previous part

Paragraph: 3    {= ŚBM 14.4.1.1-33}    {= ŚBK 16.3.3.1-23}
Verse: MK1 
Sentence: a    द्वया॒ ह प्राजापत्या,
   द्वया॒स् ह प्राजापत्या॒स्

Sentence: b          देवाश्चा॒सुराश्च.
         देवा॒स् च अ॒सुरास् च

Sentence: c    त॒तः कानीयसा॒ एव॒ देवा,
   त॒तस् कानीयसा॒स् एव देवा॒स्

Sentence: d          ज्यायसा अ॒सुरास्.
         ज्यायसा॒स् अ॒सुरास्

Sentence: e    त॒ एषु॒ लोके॒ष्वस्पर्धन्त.
   ते एषु लोके॒षु अस्पर्धन्त

Verse: MK2 
Sentence: a    ते॒ ह देवा॒ ऊचुर्:
   ते ह देवा॒स् ऊचुर्

Sentence: b       हन्ता॒सुरान्यज्ञ॒ उद्गीथे॒नात्य॒यामे॒ति.
      ह॒न्त अ॒सुरान् यज्ञे उद्गीथे॒न अत्य॒याम इ॒ति

Verse: M3/K2 
Sentence: a    ते॒ ह वा॒चमूचुस्:
   ते ह वा॒चम् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्यो वागु॒दगायद्.
   ते॒भ्यस् वा॒क् उ॒दगायत्

Sentence: e    यो॒ वाचि भो॒गस्तं॒ देवे॒भ्य आ॒गायद्,
   य॒स् वाचि भो॒गस् त॒म् देवे॒भ्यस् आ॒गायत्

Sentence: f          य॒त्कल्या॒णं व॒दति त॒दात्म॒ने.
         य॒द् कल्या॒णम् व॒दति त॒द् आत्म॒ने

Sentence: g    ते ऽविदुर्:
   ते अविदुर्

Sentence: h       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: i    त॒मभिद्रु॒त्य पाप्म॒नाविध्यन्त्.
   त॒म् अभिद्रु॒त्य पाप्म॒ना अविध्यन्

Sentence: j    स यः स॒ पाप्मा य॒दे॒वेदम॒प्रतिरूपं व॒दति,
   स य॒स् स पाप्मा य॒द् एव इद॒म् अ॒प्रतिरूपम् व॒दति

Sentence: k          स॒ एव स॒ पाप्मा.
         स॒स् एव स पाप्मा

Verse: M4/K3 
Sentence: a    अ॒थ ह प्राण॒मूचुस्:
   अ॒थ ह प्राण॒म् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्यः प्राण उ॒दगायद्.
   ते॒भ्यस् प्राण॒स् उ॒दगायत्

Sentence: e    यः॒ प्राणे भो॒गस्तं॒ देवे॒भ्य आ॒गायद्,
   य॒स् प्राणे भो॒गस् त॒म् देवे॒भ्यस् आ॒गायत्

Sentence: f          य॒त्कल्या॒णं जि॒घ्रति त॒दात्म॒ने.
         य॒द् कल्या॒णम् जि॒घ्रति त॒द् आत्म॒ने

Sentence: g    ते ऽविदुर्:
   ते अविदुर्

Sentence: h       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: i    त॒मभिद्रु॒त्य पाप्म॒नाविध्यन्त्.
   त॒म् अभिद्रु॒त्य पाप्म॒ना अविध्यन्

Sentence: j    स यः स॒ पाप्मा य॒दे॒वेदम॒प्रतिरूपं जि॒घ्रति,
   स य॒स् स पाप्मा य॒द् एव इद॒म् अ॒प्रतिरूपम् जि॒घ्रति

Sentence: k          स॒ एव स॒ पाप्मा.
         स॒स् एव स पाप्मा

Verse: M5/K4 
Sentence: a    अ॒थ ह च॒क्षुरूचुस्:
   अ॒थ ह च॒क्षुस् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्यश्च॒क्षुरु॒दगायद्.
   ते॒भ्यस् च॒क्षुस् उ॒दगायत्

Sentence: e    यश्च॒क्षुषि भो॒गस्तं॒ देवे॒भ्य आ॒गायद्,
   य॒स् च॒क्षुषि भो॒गस् त॒म् देवे॒भ्यस् आ॒गायत्

Sentence: f          य॒त्कल्या॒णं प॒श्यति त॒दात्म॒ने.
         य॒द् कल्या॒णम् प॒श्यति त॒द् आत्म॒ने

Sentence: g    ते ऽविदुर्:
   ते अविदुर्

Sentence: h       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: i    त॒मभिद्रु॒त्य पाप्म॒नाविध्यन्त्.
   त॒म् अभिद्रु॒त्य पाप्म॒ना अविध्यन्

Sentence: j    स यः स॒ पाप्मा य॒दे॒वेदम॒प्रतिरूपं प॒श्यति,
   स य॒स् स पाप्मा य॒द् एव इद॒म् अ॒प्रतिरूपम् प॒श्यति

Sentence: k          स॒ एव स॒ पाप्मा.
         स॒स् एव स पाप्मा

Verse: M6/K5 
Sentence: a    अ॒थ ह श्रो॒त्रमूचुस्:
   अ॒थ ह श्रो॒त्रम् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्यः श्रो॒त्रमु॒दगायद्.
   ते॒भ्यस् श्रो॒त्रम् उ॒दगायत्

Sentence: e    यः श्रो॒त्रे भो॒गस्तं॒ देवे॒भ्य आ॒गायद्,
   य॒स् श्रो॒त्रे भो॒गस् त॒म् देवे॒भ्यस् आ॒गायत्

Sentence: f          य॒त्कल्या॒णँ शृणो॒ति त॒दात्म॒ने.
         य॒द् कल्या॒णम् शृणो॒ति त॒द् आत्म॒ने

Sentence: g    ते ऽविदुर्:
   ते अविदुर्

Sentence: h       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: i    त॒मभिद्रु॒त्य पाप्म॒नाविध्यन्त्.
   त॒म् अभिद्रु॒त्य पाप्म॒ना अविध्यन्

Sentence: j    स यः स॒ पाप्मा य॒दे॒वेदम॒प्रतिरूपँ शृणो॒ति,
   स य॒स् स पाप्मा य॒द् एव इद॒म् अ॒प्रतिरूपम् शृणो॒ति

Sentence: k          स॒ एव स॒ पाप्मा.
         स एव स पाप्मा

Verse: M7/K5 
Sentence: a    अ॒थ ह म॒न ऊचुस्:
   अ॒थ ह म॒नस् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्यो म॒न उ॒दगायद्.
   ते॒भ्यस् म॒नस् उ॒दगायत्

Sentence: e    यो म॒नसि भो॒गस्तं॒ देवे॒भ्य आ॒गायद्,
   य॒स् म॒नसि भो॒गस् त॒म् देवे॒भ्यस् आ॒गायत्

Sentence: f          य॒त्कल्या॒णँ सङ्कल्प॒यति त॒दात्म॒ने.
         य॒द् कल्या॒णम् सङ्कल्प॒यति त॒द् आत्म॒ने

Sentence: g    ते ऽविदुर्:
   ते अविदुर्

Sentence: h       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: i    त॒मभिद्रु॒त्य पाप्म॒नाविध्यन्त्.
   त॒म् अभिद्रु॒त्य पाप्म॒ना अविध्यन्

Sentence: j    स यः स॒ पाप्मा य॒दे॒वेदम॒प्रतिरूपँ सङ्कल्प॒यति,
   स य॒स् स पाप्मा य॒द् एव इद॒म् अ॒प्रतिरूपम् सङ्कल्प॒यति

Sentence: k          स॒ एव स॒ पा॒प्मैव॒मु ख॒ल्वेता॒ देव॒ताः पाप्म॒भिरु॒पासृजन्न्,
         स॒स् एव स पाप्मा एव॒म् उ ख॒लु एता॒स् देव॒तास् पाप्म॒भिस् उ॒पासृजन्

Sentence: l          एव॒मेनाः पाप्म॒नाविध्यन्.
         एव॒म् एनास् पाप्म॒ना अविध्यन्

Verse: M8/K7 
Sentence: a    अ॒थ हेम॒मास॒न्यं प्राण॒मूचुस्:
   अ॒थ ह इम॒म् आस॒न्यम् प्राण॒म् ऊचुर्

Sentence: b       त्वं॒ न उ॒द्गाये॒ति.
      त्व॒म् नस् उ॒द्गाय इ॒ति

Sentence: c    तथे॒ति.
   त॒था इ॒ति

Sentence: d    ते॒भ्य एष॒ प्राण उ॒दगायत्.
   ते॒भ्यस् एष प्राण॒स् उ॒दगायत्

Sentence: e    ते ऽविदुर्:
   ते अविदुर्

Sentence: f       अने॒न वै॒ न उद्गात्रा॒त्येष्यन्ती॒ति.
      अने॒न वै नस् उद्गात्रा अ॒त्येष्यन्ति इ॒ति

Sentence: g    त॒मभिद्रु॒त्य पाप्म॒नाविव्यत्सन्त्.
   त॒म् अभिद्रु॒त्य पाप्म॒ना अविव्यत्सन्

Sentence: h    स यथा॒श्मानमृत्वा॒ लोष्टो॒ विध्वँ॒सेतैवँ॒ हैव॒ विध्वँ॒समाना वि॒ष्वञ्चो वि॒नेशुस्.
   स य॒था अ॒श्मानम् ऋत्वा लोष्ट॒स् विध्वँ॒सेत एव॒म् ह एव विध्वँ॒समानास् वि॒ष्वञ्चस् वि॒नेशुर्

Sentence: i    त॒तो देवा अ॒भवन्,
   त॒तस् देवा॒स् अ॒भवन्

Sentence: j          परा॒सुरा.
         प॒र अ॒सुरास्

Sentence: k    भ॒वत्यात्म॒ना,
   भ॒वति आत्म॒ना

Sentence: l          प॒रास्य द्विषन्भ्रा॒तृव्यो भवति,
         प॒र अस्य द्विष॒न् भ्रा॒तृव्यस् भवति

Sentence: m          य॒ एवं वे॒द.
         य एव॒म् वे॒द

Verse: M9/K8 
Sentence: a    ते॒ होचुः:
   ते ह ऊचुर्

Sentence: b       क्व नु॒ सो ऽभूद्,
      क्व नु स॒स् अभूत्

Sentence: c          यो॒ न इत्थम॒सक्ते॒त्य्.
         य॒स् नस् इत्थ॒म् अ॒सक्त इ॒ति

Sentence: d    अय॒मा॒स्ये ऽन्तरि॒ति,
   अय॒म् आ॒स्ये अन्त॒र् इ॒ति

Sentence: e          सो ऽया॒स्य;
         स॒स् अया॒स्यस्

Sentence: f       आङ्गिरसो,
      आङ्गिरस॒स्

Sentence: g          ऽङ्गानाँ हि र॒सः.
         अ॒ङ्गानाम् हि र॒सस्

Verse: M10/K9 
Sentence: a    सा वा॒ एषा॒ देव॒ता दूर्ना॒म,
   सा वै एषा देव॒ता दू॒र् ना॒म

Sentence: b          दूरँ॒ ह्यस्या मृत्यु॒र्.
         दूर॒म् हि अस्यास् मृत्यु॒स्

Sentence: c    दूरँ॒ ह वा॒ अस्मा॒न्मृत्यु॒र्भवति,
   दूर॒म् ह वै अस्मा॒द् मृत्यु॒स् भवति

Sentence: d          य॒ एवं वे॒द.
         य॒स् एव॒म् वे॒द

Verse: M11/K10 
Sentence: a    सा वा॒ एषा॒ देव॒तैता॒सां देव॒तानां पाप्मा॒नं मृत्यु॒मपह॒त्य,
   सा वै एषा देव॒ता एता॒साम् देव॒तानाम् पाप्मा॒नम् मृत्यु॒म् अपह॒त्य

Sentence: b          य॒त्रासां॒ दिशाम॒न्तस्,
         य॒त्र आसा॒म् दिशा॒म् अ॒न्तस्

Sentence: c          त॒द्गमयां॒ चकार,
         त॒द् गमया॒म् चकार

Sentence: d          त॒दासां पाप्म॒नो वि॒न्यदधात्.
         त॒द् आसाम् पाप्म॒नस् वि॒न्यदधात्

Sentence: e    त॒स्मान्न ज॒नमियान्,
   त॒स्माद् न ज॒नम् इयात्

Sentence: f          ना॒न्तमियान्,
         न अ॒न्तम् इयात्

Sentence: g          ने॒त्पाप्मा॒नं मृत्यु॒मन्ववा॒यानी॒ति.
         ने॒द् पाप्मा॒नम् मृत्यु॒म् अन्ववा॒यानि इ॒ति

Verse: M12/K11 
Sentence: a    सा वा॒ एषा॒ देव॒तैता॒सां देव॒तानां पाप्मा॒नं मृत्यु॒मपहत्या॒थैना मृत्युम॒त्यवहत्.
   सा वै एषा देव॒ता एता॒साम् देव॒तानाम् पाप्मा॒नम् मृत्यु॒म् अपह॒त्य अ॒थ एनास् मृत्यु॒म् अ॒त्यवहत्

Verse: M13/K12 
Sentence: a    सा वै वा॒चमेव॒ प्रथमाम॒त्यवहत्.
   सा वै वा॒चम् एव प्रथमा॒म् अ॒त्यवहत्

Sentence: b    सा॒ यदा॒ मृत्यु॒मत्य॒मुच्यत,
   सा यदा मृत्यु॒म् अत्य॒मुच्यत

Sentence: c          सो ऽग्नि॒रभवत्;
         स॒स् अग्नि॒स् अभवत्

Sentence: d       सो ऽय॒मग्निः प॒रेण मृत्युम॒तिक्रान्तो दीप्यते.
      स॒स् अय॒म् अग्नि॒स् प॒रेण मृत्यु॒म् अ॒तिक्रान्तस् दीप्यते

Verse: M14/K13 
Sentence: a    अ॒थ प्राणम॒त्यवहत्.
   अ॒थ प्राण॒म् अ॒त्यवहत्

Sentence: b    स॒ यदा॒ मृत्यु॒मत्य॒मुच्यत,
   स यदा मृत्यु॒म् अत्य॒मुच्यत

Sentence: c          स॒ वायु॒रभवत्;
         स वायु॒स् अभवत्

Sentence: d       सो ऽयं॒ वायुः प॒रेण मृत्युम॒तिक्रान्तः पवते.
      स॒स् अय॒म् वायु॒स् प॒रेण मृत्यु॒म् अ॒तिक्रान्तस् पवते

Verse: M15/K14 
Sentence: a    अ॒थ च॒क्षुर॒त्यवहत्.
   अ॒थ च॒क्षुस् अ॒त्यवहत्

Sentence: b    त॒द्यदा॒ मृत्यु॒मत्य॒मुच्यत,
   त॒द् यदा मृत्यु॒म् अत्य॒मुच्यत

Sentence: c          स॒ आदि॒त्यो ऽभवत्;
         स आदित्य॒स् अभवत्

Sentence: d       सो ऽसा॒वादित्यः प॒रेण मृत्युम॒तिक्रान्तस्तपति.
      स॒स् असौ आदित्य॒स् प॒रेण मृत्यु॒म् अ॒तिक्रान्तस् तपति

Verse: M16/K15 
Sentence: a    अ॒थ श्रो॒त्रम॒त्यवहत्.
   अ॒थ श्रो॒त्रम् अ॒त्यवहत्

Sentence: b    त॒द्यदा॒ मृत्यु॒मत्य॒मुच्यत,
   त॒द् यदा मृत्यु॒म् अत्य॒मुच्यत

Sentence: c          ता दि॒शो ऽभवन्;
         ता॒स् दि॒शस् अभवन्

Sentence: d       ता॒ इमा दि॒शः प॒रेण मृत्युम॒तिक्रान्ताः.
      ता॒स् इमा॒स् दि॒शस् प॒रेण मृत्यु॒म् अ॒तिक्रान्तास्

Verse: M17/K16 
Sentence: a    अ॒थ मनो॒ ऽत्यवहत्.
   अ॒थ म॒नस् अ॒त्यवहत्

Sentence: b    त॒द्यदा॒ मृत्युम॒त्यमुच्यत,
   त॒द् यदा मृत्यु॒म् अ॒त्यमुच्यत

Sentence: c          स॒ चन्द्र॒मा अभवत्;
         स चन्द्र॒मास् अभवत्

Sentence: d       सो ऽसौ॒ चन्द्रः प॒रेण मृत्युम॒तिक्रान्तो भात्य्.
      स॒स् असौ चन्द्र॒स् प॒रेण मृत्यु॒म् अ॒तिक्रान्तस् भाति

Sentence: e    एवँ॒ ह वा॒ एनमेषा॒ देव॒ता मृत्युम॒तिवहति,
   एव॒म् ह वै एनम् एषा देव॒ता मृत्यु॒म् अ॒तिवहति

Sentence: f          य॒ एवं वे॒द.
         य॒स् एव॒म् वे॒द

Verse: M18/K17 
Sentence: a    अ॒थात्म॒ने ऽन्ना॒द्यमा॒गायद्.
   अ॒थ आत्म॒ने अन्ना॒द्यम् आ॒गायत्

Sentence: b    यद्धि किञ्चा॒न्नमद्य॒ते,
   य॒द् हि कि॒ञ्च अ॒न्नम् अद्य॒ते

Sentence: c          ऽने॒नैव त॒दद्य॒त;
         अने॒न एव त॒द् अद्य॒ते

Sentence: d       इह प्र॒तितिष्ठति.
      इह प्र॒तितिष्ठति

Verse: M19/K18 
Sentence: a    ते॒ देवा॒ अब्रुवन्न्:
   ते देवा॒स् अब्रुवन्

Sentence: b       एता॒वद्वा॒ इदँ स॒र्वं यद॒न्नं,
      एता॒वत् वै इद॒म् स॒र्वम् य॒द् अ॒न्नम्

Sentence: c          त॒दात्म॒न आ॒गासीर्;
         त॒द् आत्म॒ने आ॒गासीस्

Sentence: d       अ॒नु नो ऽस्मिन्न॒न्न आ॒भजस्वे॒ति.
      अ॒नु नस् अस्मि॒न् अ॒न्ने आ॒भजस्व इ॒ति

Sentence: e    ते वै॒ माभिसं॒विशते॒ति.
   ते वै मा अभिसं॒विशत इ॒ति

Sentence: f    तथे॒ति.
   त॒था इ॒ति

Sentence: g    तँ॒ समन्तं॒ परि॒ण्यविशन्त.
   त॒म् समन्त॒म् परि॒ण्यविशन्त

Sentence: h    त॒स्माद्य॒दनेना॒न्नम॒त्ति,
   त॒स्माद् य॒द् अने॒न अ॒न्नम् अ॒त्ति

Sentence: i          ते॒नैता॒स्तृप्यन्त्य्.
         ते॒न एता॒स् तृप्यन्ति

Sentence: j    एवँ॒ ह वा॒ एनँ स्वा॒ अभिसं॒विशन्ति,
   एव॒म् ह वै एनम् स्वा॒स् अभिसं॒विशन्ति

Sentence: k          भ॒र्ता स्वा॒नाँ श्रे॒ष्ठः पुरएता॒ भवत्यन्नादो॒ ऽधिपतिर्,
         भ॒र्ता स्वा॒नाम् श्रे॒ष्ठस् पुरएता भवति अन्नाद॒स् अ॒धिपतिस्

Sentence: l          य॒ एवं वे॒द.
         य॒स् एव॒म् वे॒द

Verse: M20/K18 
Sentence: a    य॒ उ हैवंवि॒दँ स्वे॒षु प्रतिप्रतिर्बु॒भूषति,
   य॒स् उ ह एवंवि॒दम् स्वे॒षु प्रतिप्रति॒स् बु॒भूषति

Sentence: b          न॒ हैवा॒लं भा॒र्येभ्यो भवत्य्;
         न ह एव अ॒लम् भा॒र्येभ्यस् भवति

Sentence: c       अ॒थ य॒ ए॒वैतम॒नुभवति,
      अ॒थ य॒स् एव एत॒म् अ॒नुभवति

Sentence: d          यो॒ वैतम॒नु भा॒र्यान्बु॒भूर्षति,
         य॒स् वा एत॒म् अ॒नु भा॒र्यान् बु॒भूर्षति

Sentence: e          स॒ हैवा॒लं भा॒र्येभ्यो भवति.
         स ह एव अ॒लम् भा॒र्येभ्यस् भवति

Verse: M21/K19 
Sentence: a    सो ऽया॒स्य आङ्गिरसो,
   स॒स् अया॒स्यस् आङ्गिरस॒स्

Sentence: b          ऽङ्गानाँ हि र॒सः.
         अ॒ङ्गानाम् हि र॒सस्

Sentence: c    प्राणो वा अ॒ङ्गानाँ र॒सः.
   प्राण॒स् वै अ॒ङ्गानाम् र॒सस्

Sentence: d    प्राणो हि वा अ॒ङ्गानाँ र॒सस्,
   प्राण॒स् हि वै अ॒ङ्गानाम् र॒सस्

Sentence: e          त॒स्माद्य॒स्मात्क॒स्माच्चा॒ङ्गात्प्राण॒ उत्क्रा॒मति,
         त॒स्माद् य॒स्माद् क॒स्माच्च अ॒ङ्गाद् प्राण॒स् उत्क्रा॒मति

Sentence: f          त॒देव त॒च्छुष्यत्य्;
         त॒द् एव त॒द् शुष्यति

Sentence: g       एष हि वा अ॒ङ्गानाँ र॒सः.
      एष हि वै अ॒ङ्गानाम् र॒सस्

Verse: M22/K20 
Sentence: a    एष॒ उ एव बृ॒हस्प॒तिर्:
   एष॒स् उ एव बृ॒हस्प॒तिस्

Sentence: b       वाग्वै॒ बृहती,
      वा॒क् वै बृहती

Sentence: c          त॒स्या एष प॒तिस्,
         त॒स्यास् एष प॒तिस्

Sentence: d          त॒स्मादु बृ॒हस्प॒तिः.
         त॒स्माद् उ बृ॒हस्प॒तिस्

Verse: M23/K21 
Sentence: a    एष॒ उ एव ब्र॒ह्मणस्प॒तिर्;
   एष॒स् उ एव ब्र॒ह्मणस्प॒तिस्

Sentence: b       वाग्वै ब्र॒ह्म,
      वा॒क् वै ब्र॒ह्म

Sentence: c          त॒स्या एष प॒तिस्,
         त॒स्यास् एष प॒तिस्

Sentence: d          त॒स्मादु ब्र॒ह्मणस्प॒तिः.
         त॒स्माद् उ ब्र॒ह्मणस्प॒तिस्

Verse: M24/K22 
Sentence: a    एष॒ उ एव सा॒म;
   एष॒स् उ एव सा॒म

Sentence: b       वाग्वै सा॒मैष सा चा॒मश्चे॒ति,
      वा॒क् वै सा॒म एष सा च अ॒मस् च इ॒ति

Sentence: c          तत्सा॒म्नः सामत्वं.
         त॒द् सा॒म्नस् सामत्व॒म्

Sentence: d    य॒द्वेव॒ समः प्लु॒षिणा,
   य॒द् उ एव सम॒स् प्लु॒षिणा

Sentence: e          समो॒ मश॒केन,
         सम॒स् मश॒केन

Sentence: f          समो॒ नागे॒न,
         सम॒स् नागे॒न

Sentence: g          सम॒ एभि॒स्त्रिभि॒र्लोकैः,
         सम॒स् एभि॒स् त्रिभि॒स् लोकै॒स्

Sentence: h          स॒मो ऽने॒न स॒र्वेण,
         सम॒स् अने॒न स॒र्वेण

Sentence: i          त॒स्माद्वेव सा॒माश्नुते सा॒म्नः सा॒युज्यँ सलोक॒तां,
         त॒स्माद् उ एव सा॒म अश्नुते सा॒म्नस् सा॒युज्यम् सलोक॒ताम्

Sentence: j          य॒ एव॒मेतत्सा॒म वे॒द.
         य॒स् एव॒म् एत॒द् सा॒म वे॒द

Verse: M25/K23 
Sentence: a    एष॒ उ वा॒ उद्गीथः.
   एष॒स् उ वै उद्गीथ॒स्

Sentence: b    प्राणो वा उ॒त्,
   प्राण॒स् वै उ॒द्

Sentence: c          प्राणे॒न॒ हीदँ स॒र्वमु॒त्तब्धं.
         प्राणे॒न हि इद॒म् स॒र्वम् उ॒त्तब्धम्

Sentence: d    वा॒गेव गीथो॒च्च गी॒था चे॒ति,
   वा॒क् एव गी॒था उ॒द् च गी॒था च इ॒ति

Sentence: e          स॒ उद्गीथः.
         स उद्गीथ॒स्

Verse: M26/K24 
Sentence: a    तद्धा॒पि ब्रह्मदत्त॒श्चैकितानेयो रा॒जानं भक्ष॒यन्नुवाचायं त्य॒स्य रा॒जा मूर्धा॒नं वि॒पातय
   त॒द् ह अ॒पि ब्रह्मदत्त॒स् चैकितानेय॒स् रा॒जानम् भक्ष॒यन् उवाच अय॒म् त्य॒स्य रा॒जा मूर्धा॒नम् वि॒पातयतात्

Sentence: b          य॒दि॒तो ऽया॒स्य आङ्गिर॒सो ऽन्ये॒नोद॒गायदि॒ति.
         य॒द् इत॒स् अया॒स्यस् आङ्गिरस॒स् अन्ये॒न उद॒गायत् इ॒ति

Sentence: c    वाचा॒ च॒ ह्येव स॒ प्राणे॒न चोद॒गायदि॒ति.
   वाचा च हि एव स प्राणे॒न च उद॒गायत् इ॒ति

Verse: M27/K25 
Sentence: a    त॒स्य हैत॒स्य सा॒म्नो यः स्वं वे॒द,
   त॒स्य ह एत॒स्य सा॒म्नस् य॒स् स्व॒म् वे॒द

Sentence: b          भ॒वति हास्य स्वं.
         भ॒वति ह अस्य स्व॒म्

Sentence: c    त॒स्य वै स्व॒र एव स्वं.
   त॒स्य वै स्व॒रस् एव स्व॒म्

Sentence: d    त॒स्मादा॒र्त्विज्यं करिष्य॒न्वाचि स्व॒रमिच्छेत,
   त॒स्माद् आ॒र्त्विज्यम् करिष्य॒न् वाचि स्व॒रम् इच्छेत

Sentence: e          त॒या वाचा स्व॒रसम्पन्नया॒र्त्विज्यं कुर्यात्.
         त॒या वाचा स्व॒रसम्पन्नया आ॒र्त्विज्यम् कुर्यात्

Sentence: f    त॒स्माद्यज्ञे स्व॒रवन्तं दि॒दृक्षन्त एवा॒थो य॒स्य स्वं भ॒वति.
   त॒स्माद् यज्ञे स्व॒रवन्तम् दि॒दृक्षन्ते एव अ॒थ उ य॒स्य स्व॒म् भ॒वति

Sentence: g    भ॒वति हास्य स्वं,
   भ॒वति ह अस्य स्व॒म्

Sentence: h          य॒ एव॒मेतत्सा॒म्नः स्वं वे॒द.
         य॒स् एव॒म् एत॒त् सा॒म्नस् स्व॒म् वे॒द

Verse: M28/K26 
Sentence: a    त॒स्य हैत॒स्य सा॒म्नो यः॒ सुव॒र्णं वे॒द,
   त॒स्य ह एत॒स्य सा॒म्नस् य॒स् सुव॒र्णम् वे॒द

Sentence: b          भ॒वति हास्य सुव॒र्णं.
         भ॒वति ह अस्य सुव॒र्णम्

Sentence: c    त॒स्य वै स्व॒र एव॒ सुव॒र्णं.
   त॒स्य वै स्व॒रस् एव सुव॒र्णम्

Sentence: d    भ॒वति हास्य सुव॒र्णं,
   भ॒वति ह अस्य सुव॒र्णम्

Sentence: e          य॒ एव॒मेतत्सा॒म्नः सुव॒र्णं वे॒द.
         य॒स् एव॒म् एत॒द् सा॒म्नस् सुव॒र्णम् वे॒द

Verse: M29/K27 
Sentence: a    त॒स्य हैत॒स्य सा॒म्नो यः॒ प्रतिष्ठां वे॒द,
   त॒स्य ह एत॒स्य सा॒म्नस् य॒स् प्रतिष्ठा॒म् वे॒द

Sentence: b          प्र॒ति ह तिष्ठति.
         प्र॒ति ह तिष्ठति

Sentence: c    त॒स्य वै वा॒गेव॒ प्रतिष्ठा,
   त॒स्य वै वा॒क् एव प्रतिष्ठा

Sentence: d          वाचि हि ख॒ल्वेष॒ एत॒त्प्राणः प्र॒तिष्ठितो गीयते,
         वाचि हि ख॒लु एष॒स् एत॒द् प्राण॒स् प्र॒तिष्ठितस् गीय॒ते

Sentence: e          ऽन्न इ॒त्यु है॒क आहुः.
         अ॒न्ने इ॒ति उ ह ए॒के आहुर्

Verse: M30/K28 
Sentence: a    अथा॒तः प॒वमानानामे॒वाभ्यारोहः.
   अ॒थ अ॒तस् प॒वमानानाम् एव अभ्यारोह॒स्

Sentence: b    स वै ख॒लु प्रस्तोता सा॒म प्र॒स्तौति.
   स वै ख॒लु प्रस्तोता सा॒म प्र॒स्तौति

Sentence: c    स य॒त्र प्रस्तुया॒त्,
   स य॒त्र प्रस्तुया॒त्

Sentence: d          त॒देता॒नि जपेद्:
         त॒द् एता॒नि जपेत्

Sentence: e    अ॒सतो मा स॒द्गमय
   अ॒सतस् मा स॒त् गमय

Sentence: f    त॒मसो मा ज्यो॒तिर्गमय,
   त॒मसस् मा ज्यो॒तिस् गमय

Sentence: g    मृत्यो॒र्मामृ॒तं गमये॒ति.
   मृत्यो॒स् मा अमृ॒तम् गमय इ॒ति

Verse: M31/K28 
Sentence: a    स यदाहा॒सतो मा स॒द्गमये॒ति,
   स य॒द् आ॒ह अ॒सतस् मा स॒त् गमय इ॒ति

Sentence: b          मृत्युर्वा अ॒सत्,
         मृत्यु॒स् वै अ॒सत्

Sentence: c          स॒दमृ॒तं:
         स॒त् अमृ॒तम्

Sentence: d       मृत्यो॒र्मामृ॒तं गमयामृ॒तं मा कुर्वि॒त्ये॒वैत॒दाह.
      मृत्यो॒स् मा अमृ॒तम् गमय अमृ॒तम् मा कुरु इ॒ति एव एत॒द् आह

Verse: M32/K28 
Sentence: a    त॒मसो मा ज्यो॒तिर्गमये॒ति,
   त॒मसस् मा ज्यो॒तिस् गमय इ॒ति

Sentence: b          मृत्युर्वै त॒मो,
         मृत्यु॒स् वै त॒मस्

Sentence: c          ज्यो॒तिरमृ॒तं:
         ज्यो॒तिस् अमृ॒तम्

Sentence: d       मृत्यो॒र्मामृतं गमयामृ॒तं मा कुर्वि॒त्ये॒वैत॒दाह.
      मृत्यो॒स् मा अमृ॒तम् गमय अमृ॒तम् मा कुरु इ॒ति एव एत॒द् आह

Sentence: e    मृत्यो॒र्मामृ॒तं गमये॒ति,
   मृत्यो॒स् मा अमृ॒तम् गमय इ॒ति

Sentence: f          ना॒त्र तिरो॒हितमिवास्ति.
         न अ॒त्र तिरो॒हितम् इव अस्ति

Verse: M33/K28 
Sentence: a    अ॒थ यानी॒तराणि स्तोत्रा॒णि,
   अ॒थ या॒नि इ॒तराणि स्तोत्रा॒णि

Sentence: b          ते॒ष्वात्म॒ने ऽन्ना॒द्यमा॒गायेत्;
         ते॒षु आत्म॒ने अन्ना॒द्यम् आ॒गायेत्

Sentence: c       त॒स्मादु ते॒षु व॒रं वृणीत,
      त॒स्माद् उ ते॒षु व॒रम् वृणीत

Sentence: d          यं का॒मं काम॒येत,
         य॒म् का॒मम् काम॒येत

Sentence: e          तँ.
         त॒म्

Sentence: f    स॒ एष॒ एवंवि॒दुद्गा॒तात्म॒ने वा य॒जमानाय वा यं का॒मं काम॒यते,
   स॒स् एष॒स् एवंवि॒द् उद्गाता आत्म॒ने वा य॒जमानाय वा य॒म् का॒मम् काम॒यते

Sentence: g          तमा॒गायति.
         त॒म् आ॒गायति

Sentence: h    त॒द्धैत॒ल्लोकजि॒देव,
   त॒द् ह एत॒द् लोकजि॒त् एव

Sentence: i          न॒ है॒वालोक्य॒ताया आ॒शास्ति,
         न ह एव अलोक्य॒तायास् आशा अस्ति

Sentence: j          य॒ एव॒मेतत्सा॒म वे॒द.
         य॒स् एव॒म् एत॒द् सा॒म वे॒द

Next part


This text is part of the TITUS edition of White Yajur-Veda: Brhad-Aranyaka-Upanisad.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.