ტევახტა Ⴈსუსახ ლაინეჩერი ელმუღონ ბეივან განუ, სინა̈მიშბესუნუნ ბახტინ შეითანახო,
პაჺყოჺ ღი პაჺყოჺ შუ წუმ ეჶი ახრახ ბუსანებაქე.
ვაჺ იშˊანებაქი შეტა ტოჺღოჺლ სინა̈მიშბალ, ვაჺ ფინე: ა̈გა̈ნა̈ უნ ღარ ბიხოღოინუ, უფა მე ჟˊერხოხ შˊუმალ ყან თარაფი.
შეტინალ ჯუღაბნები შეტუ: ცამნე: თა̈ქსა შˊუმენ ქარხალ თენე ადამარ; ამმა ჰარსა აითენ, მანოთე ჭენესა ბიხოღო ჟˊომოხო.
ოშˊა თანესა შეითანენ შოტუხ ივეჺლ შა̈ჰა̈რა̈, ვაჺ ჩურრესტა ნამაზუნ იაფუღალ
ვაჺ ეხნე შოტუ: ა̈გა̈ნა̈ უნ ღარ ბიხოღოინუ ბოსა ვახ ოყა, შეტაბახტინთე ცამნე: იჩ ჶა̈რიშტიღო ბუირუღნე ვი ბახტინ, ქინ ლახო თაშალყუნ ვახ, ტეთა̈რ თე ვი ღარ ნუ ლამანდანე ჟˊენალ.
Ⴈსუსენ ფინე შოტუხ: ცამნე ჰამეთა̈რალ: მა სინა̈მიშბა ვი აღა ბიხოღოხ.
პურან თანესშა შეითანენ შოტუ გო̈ლო̈ ალალუ ბურღოლ ვაჺ აკესნესტა შოტუ ბუ̈თუ̈ნ დუ̈ნიანუნ ფასჭაღლუღახ ვაჺ შუ̈ქურახ შოტღოი,
ვაჺ ეხნე შოტუ: მოტუ ბუ̈თუ̈ნ თაზდო ვა, ა̈გა̈ნა̈ ბითი ზა ბულ კოწბაინ.
ტევახტა Ⴈსუსენ ეხნე შოტუ: ირა̈დბაქა ზახო, შეითან, შეტაბახტინთე ცამნე: აღა ბიხოღო ვი ბულ კოწბა ვაჺ შოტუ თა̈ქსა ყულლუღბა.
ტევახტა ბარრეხა შოტუხ შეითანენ, ვაჺ მე ჶა̈რიშტიღონალ იშˊაბაქი ყულლუღყუნბი შოტუ.
Ⴈსუსა იბაქესხოლან თე Ⴈოანახ ტუსსაღყუნბე, თანეცი Ⴂალილეია,
ვაჺ Ⴌაზორეთახ ბართი არი არრეცი და̈რიანუნ ჭოტელ ბუ Ⴉაპერნაუმა, Ⴆავულონი ყან Ⴌეჶალიმოვი სა̈ჰრა̈თღოლ,
ბართა თამყან ბაქი Ⴈსაი ფეხამბარენ ფიო, მატინთე ეხნე:
Ⴆავულონი კულ ვაჺ Ⴌეჶალიმოვი კულ და̈რია̈ნუნ ჭოტტა იაყალლე, Ⴈორდანახო ტეჩˊო ბუთფარაზღოი {!} Ⴂალილეია,
ადამარუხ არციორ ბეჺჷჺნყუნა, აყოკე ქალა ხაშ ვაჺ არციტღოენკ ო̈ლქინა ვაჺ პურიტღო ხოჯინა ხაშნედი ხაშენ.
მე ვა̈დინახო Ⴈსუსენ ბურრეჴი ქაროზთასტახ, ფინე იაყაექენან, შეტაბახტინთე იშˊანებაქე ფასჭაღლუღ გო̈გნა̈ი.
Ⴂალილეუნ და̈რიანახო იშˊა ჭებაქახუნ შეტუ ატუკი ვაჺ ვიჩეხ. Ⴑიმონახ, მატუხთე ეხყუნი Ⴎეტრ, ვაჺ Ⴀნდრეიახ შეტა ვიჩეხ მატღონთე ბოყუნსესაი თორრუხ და̈რია̈ნა, შეტაბახტინთე შონორ ბუყუნი ჩა̈ლი ბიყალუხ.
ვაჺ ფინე შოტღოხ: ექენან ბეზ ჴოშტან, ზუალ ეჶაჺხ ბაზ ადამარ ბიყალ.
შოტღონალ თორრურღოხ ბართი, ტესსაჰათ თაყუნცი შეტა ჴოშტან.
ტელან ტეჩˊო თაცი ატუკი შოტუ ყეირი ვაჺ ვიჩიმუღოხ Ⴈაკოვ Ⴆავედეევახ ვაჺ Ⴈოანახ შეტა ვიჩეხ, კიწკე გა̈მინა̈ არცი Ⴆავედეიახოლ იჩხო ბაბახოლ, მატინთე იჩღო თორრუხ იამალუღნებესაი; მოტღოხალ კალლეფი.
ვაჺ შოტღონ ტესსაჰათ კიწკე გა̈მინახ ვაჺ იჩღო ბაბახ ბართი თაყუნცი შეტა ჴოშტან.
ვაჺ ჩურრეცი Ⴈსუს ბუ̈თუ̈ნ Ⴂალილეია, მეჩითღო ბოშ ზომბესინ შოტღოხ, ვაჺ ქაროზთასტინ დაჶტარ ფასჭაღლუღუნ, ვაჺ შელბესინ ჰარ აზარახ ვაჺ ჰარსა იარიღოხ ადამარღოი.
ვაჺ თანეცი სა̈ს შეტა ბახტინ ბუ̈თუ̈ნ Ⴑირია, ვა ეყუნჩესაი შეტა ტოჺღოჺლ ბუ̈თუ̈ნ აზარუღოხ, ბიყეცი ჯუ̈რა̈ აზარღონ, თუთმინენტღოხ, ჯინურღოხ, ალახობაქიტღოხ, სუსბაქიტღოხ, ვაჺ შეტინალ შელლებესაი შოტღოხ.
შეტა ჴოშტან თაყუნსაი გო̈ლო̈ ხალხ Ⴂალილეიახო, ვიწშა̈ჰა̈რახო, Ⴈერუსალიმახო, Ⴈუდუნ კულლუხო, ვაჺ Ⴈორდანუნ ტეჩˊხო.
