TITUS
Svan Prose Texts III (Lentekh)
Part No. 2
Previous part

Text: 2 
Page of edition: 13 
Line of edition: 5 
II. ჴელედი სასოფლო საბჭო


Line of edition: 6       ჴელედი თემსაბჭოჲ ხა̈ლხ იზგე ჴელედურა̈ჲ ტვიბ ლეჟა ლარა̈ში
Line of edition: 7    
ბოგხენ ლეჟა ცხუმალდდ. ლექვსირხენ ცხუმალდხოჲსა ჲერბეშტიარა
Line of edition: 8    
კილომეტრ ლი.

Line of edition: 9       
მიჟლაწადხენ საზღვა̈რ ლი ლექვსირი თემსაბჭო, მიჟლავარხენ
Line of edition: 10    
ჟიბე შვა̈ნხო ქა ლაზ თანა̈ღ ვა̈ნი ლი, ლემჷჟხენი საზღვა̈რ ლი და̈ბერი
Line of edition: 11    
ლახვ, აწოლილ (\ აწოლირ) ლა̈ჲლა, შკედხენ -- ტვიბლა̈კესა̈რ,
Line of edition: 12    
ლება̈რდელ ლაბრაჴ. ალმინ ლა̈ჲდი ლასვა̈რ ლიხ.

Line of edition: 13       
ლექვსირი ვოკერ ხენა̈ჩდი ლაშხირს ჴელედურა. ჴელედურას
Line of edition: 14    
ეჩეხ ამეხ ა̈რიხ მეზგალ. მა̈ნკვი სოფელ ლი ლესემა, ლესემაუნღო
Line of edition: 15    
იბნი ლეჴვდა̈რეშ ჟიბე ფა̈ყ. ლესემა ლეჴვდა̈რეშ ა̈რიხ (\ იზგეხ)
Line of edition: 16    
გაზდელიანა̈რ აფაქიძეა̈რ, ლა̈ჲდი იშხუ მეზგე -- ჩანქსელიან, მერბე
Line of edition: 17    
-- ბემდელიან. ჟიბე ფა̈ყ ყველანი კუთხეა̈რდ (\ კვითხა̈რდ)
Line of edition: 18    
ჴარა̈შ, ლესხან, მიქელშერ, გვეგნიშერა̈ლ, ლექმეთ ბაჲა̈რ. ჟიბე
Line of edition: 19    
ფა̈ყს ა̈რიხ ხოშა ნაღალდ ლიპარტელიანა̈რ, ჩანქსელიანა̈რ გვიდანა̈რ.
Line of edition: 20    
ლესემას ეჩეხენ ხაჟახა ჩხალვა̈რ. ეჩეჲსა ა̈რიხ მეზგალ ჩხალვარა̈ლ.
Line of edition: 21    
ამან ლეჟა იბნი სოფელ წანა̈შ: ჩუბე წანა̈შ ჟიბე წანა̈შ
Line of edition: 22    
ჟიბე წანა̈შ ეშხუ ლი. ჩუბე წანა̈შ ა̈რი ჲერბი კვითხ: იფხალდ
Line of edition: 23    
ბენდა̈შ. წანა̈შ ეშხუ ლი. ჩუბე წანა̈შ ა̈რი ჲერბი კვითხ: იფხალდ
Line of edition: 24    
ბენდა̈შ. წანა̈შ მა̈გ ლიპარტელიანა̈რ ა̈რიხ.

Line of edition: 25       
წანა̈შუნღო ჴელედ ლი. ჴელედ ჲარბდ მეყველე ლი: ჟიბე ჴელედ
Line of edition: 26    
ჩუბე ჴელედ. ეჩანღო იბნი სოფელ ძუღვა̈რეშ. ძირ ჴელედა̈რ
Line of edition: 27    
ლიხ ბენდელიანა̈რ, გვიჭიანა̈რ, ქარდავალ. იშკენ ფა̈ყხენ ნაჴადვ
Line of edition: 28    
ლიხ. ხოფშირა მეზგალ გაზდელიანა̈რ ლიხ, ღვე -- ჩანქსელიანა̈რ,
Line of edition: 29    
ჲერბი-სემი მეზგე -- ლიპარტელიანა̈რ.

Line of edition: 30       
ჴელედს ეჩეხ მა̈ნკვი ა̈დგილს ჴუდიშ ხაჟახა. იმა̈ჲ ჩუ იზგე ჲერბი
Line of edition: 31    
მეზგე ჩანქსელიანა̈რ. ეჩა ლეჟაშხენ ტვიბლედ ლი, იზგეხ ჩანქსელიანა̈რ
Line of edition: 32    
ლიპარტელიანა̈რ. ტვიბლედ ლეჟაშხენ ა̈რი სოფელ ჴა̈ჩეშ,
Line of edition: 33    
იმა̈ჲ ჩუ იზგეხ ჩანქსელიანა̈რ ლიპარტელიანა̈რ, ლა̈ჲდი ეშხუ მეზგე
Line of edition: 34    
ხელაია ლი. ჴა̈ჩეშს ეჩეხ ხურა̈შვილ ლი. ეჩე ა̈რიხ ჩანქსელიანა̈რ, ქარდავალ
Line of edition: 35    
ლიპარტელიანა̈რ. ხურა̈შვილჷნ ლეჟა მა̈ნკვი სოფელ ჯჷდარ
Line of edition: 36    
ჲედ მანანუ̈რ ლი. იზგეხ ლიპარტელიანა̈რ ჩანქსელიანა̈რ.

Line of edition: 37       
მანანუ̈რ ეჩეხენ ლი შკედილდა̈შ, იმა̈ჲ ა̈რიხ ბენდელიანა̈რ
Line of edition: 38    
ვვიდიანა̈რ. ეჩე ლეჟაშხენ ლი ჩვა̈ბე ბავა̈რ. იზგეხ აფაქიძეა̈რ.

Page of edition: 14 
Line of edition: 1       
ბავა̈რ მეყველე ლი სამდ: ჩვა̈ბე ბავა̈რ, ნესკა̈ჲ ბავა̈რ ჟა̈ბე ბავა̈რ.
Line of edition: 2    
ნესკა̈ჲ ბავა̈რ იზგეხ გაზდელიანა̈რ ბენდელიანა̈რ, ჟა̈ბე ბავა̈რ --
Line of edition: 3    
ჩა̈ნქსელიანა̈რ ლიპარტელიანა̈რ.

Line of edition: 4       
ბავა̈რი მეჩი მარალს ა̈თხეჲ ჩუ ხაშყიდხ, ერ ბავა̈რ ჲერბი-სემი
Line of edition: 5    
მეზგე გარ ლჷმა̈ზიგ ლი. ეჯმინ ლა̈ჲდი ლაბა̈ვიდ ლჷმა̈ჴედენლიხ
Line of edition: 6    
ფა̈ყხენ. მა̈ნკვი ლახობინახ ლიკვმა̈ში, ეჩანღვე (\ ეჩანღო) თანდათან
Line of edition: 7    
ხოწალდავახ დაბა̈რჲაქ ა̈დგილ ლახობინახ ქორვა̈ლე ლიგემ.
Line of edition: 8    
ეჩანღვე თანდათანობით ა̈მეჴედხ ფა̈ყხენ მეზგალ ჩვა̈დფშირანხ.
Line of edition: 9    
ა̈თხე ბავა̈რს იზგე ჲერბიჲერბეშტიეშტიშკვიდ მეზგე.

Line of edition: 10       
ბავა̈რს ჯვინალდ ლა̈ჲდი ლჷმა̈ზიგლი სა̈ლხ. ა̈თხე ლა̈ჲდი ჩვა̈რი
Line of edition: 11    
ეჩქა̈შია მურყვამა̈ლე ნა̈მსვირუა̈ლ ლაჴვამა̈რ.

Line of edition: 12       
ჯჷდარ, შკედილდა̈შ, ლექვა̈ჲ ბავა̈რ, ლეჟა̈ჲ ბავა̈რ ცხუმალდ
Line of edition: 13    
მა̈გ ასხრიხ ბავა̈რი კოლექტივხოჲსკა.

Line of edition: 14       
ბავა̈რ ა̈თხე ჲერბი ვოშთხვზა̈ჲა̈ნ კლას ა̈რი. ეშხუ ლეჟა̈ჲ ბავა̈რ
Line of edition: 15    
მერბე ჯჷდარ. ეშხუ სამკითხველო ა̈რი აჯაღ. ბავა̈რხო ანსყან
Line of edition: 16    
მანქანა̈ჲ შუკვ ა̈თხელხი ლექვსირხენ.

Line of edition: 17       
ბავა̈რი საზრვა̈რ ლი მჷჟე (\ მიჟე) ლაჴადხენ ჴა̈ჩეშ, მიჟლავარხენ
Line of edition: 18    
-- ტეხვირი ზაგა̈რ. ლემიჟ ფოყხენი საზღვა̈რ ლი ლა̈ჲლა
Line of edition: 19    
წჷრა̈ნია̈შ, შკედხენიშ -- მჷნია̈ში.

Line of edition: 20       
ბავა̈რს ეჩეხენ ლი სოფელ ცხუმალდ. იზგეხ გაზდელიანა̈რ
Line of edition: 21    
ჩანქსელიანა̈რ, ალმინ მა̈გ სკანღრი ჴელედი საბჭოხოისა.

Line of edition: 22       
მაშენე ჯოდია სოფლა̈ლ ლიხ გუშკვე თემსაბჭოხენქა: ცხუმალდ,
Line of edition: 23    
ბავა̈რ, ჯჷდარ ლა̈ჯრებილ. ბავა̈რიშ ცხუმალდა̈ სოფელა̈რისკა
Line of edition: 24    
ხვა̈ჲნა̈ირ მორელა̈ლ (\\ სკიმა̈რ) ა̈რიხ.

Line of edition: 25       
ჯვინალდ, აშირ ზა̈ჲ დეშ ლი ეჩანღო, იმა̈ჲ ერე სოფელ ა̈ნსყან
Line of edition: 26    
ჴელედჷნ ლეჟა, ეჩქად ტევრ ლას ჴელედა̈რ ხაპატრონენახ. ფაყა̈რ
Line of edition: 27    
წანაშა̈რ ზურალა̈ლ ერ ადინახ ქალაკოდა̈ჲ ლა̈თხელიდ ღვაჟა̈რ
Line of edition: 28    
ლათხვიარდ, ხეკვეს ერე ბაჟ (ჯიმ) ლახოვოდანხ ჴელედა̈რეშვ. ფა̈ყს
Line of edition: 29    
წანა̈შს ხალონდახ ალე ადავუზეხ ბაპ თუსტ ნიკო დადიანიშხო.
Line of edition: 30    
ეჩემდ საბუთ ლახვემ ლიმოლეჲშ (\ მოლა̈ლე ლიკვშეჲშ) ლიზგეჲშ.
Line of edition: 31    
ეჩანღო ჩვადამოლეხ ჩვა̈დზიგანხ ა̈თხე სოფლა̈ლ ლიხ.

Line of edition: 32       
ჴელედი თემსაბჭოჲსკა ა̈რი ვოშთხვ კოლექტივ. ალ კოლექტივა̈რ
Line of edition: 33    
ლიხ ლესემას, ჴელედს, ჴა̈ჩეშს, ბავა̈რს. ამოხქა ფა̈ყს ლა̈ჲდი
Line of edition: 34    
ლას კოლექტივ, მარე ჩვადანა̈ჩდეხ ლესემა̈ჲშ ფა̈ყი კოლექტივა̈რ.

Line of edition: 35       
ჴელედი თემსაბჭჲსკა ასღრი სემი აშირ ჲერბიჲერბეშტხოქა
Line of edition: 36    
მეზგე.

Line of edition: 37       
ამე ანღრი: სიმინდ, მანა̈შ. ქერ, კვეცენ, ქართობილ. ლობიო.
Line of edition: 38    
ლესემა̈ჲშ, ფა̈ყიშ, ჴელედიშ ჴა̈ჩეში სოფელა̈ლისკა ანღრი ღვინალ
Line of edition: 39    
ლა̈ჲდი. ხოშა ნაღალდ ჯვინელ ჯიში ყურძენ ა̈რი; მეშეხე
Page of edition: 15  Line of edition: 1    
თვეთვენე ა̈დეცა. ალ სოფელა̈ლისკა მა̈გ ნა̈ირიშ შინავარ ცხეკი ხილ
Line of edition: 2    
ა̈რი: ჲერ ნა̈ლეყან, ჲერ აშ ნაზვაბ. ნა̈ლეყან ხილა̈ლ ლიხ; სა̈ნეფ,
Line of edition: 3    
ვისკვ, თურაშოვილ, ყინილ, ბაღა̈ ვისკვ, აყა̈რი, გურთლ, გომბრ,
Line of edition: 4    
გა̈მბრ, კაცითავა̈რ, ზურუმბი, დურწუმ, სასალ, ქილვა̈რდ, ჭანჭურა̈,
Line of edition: 5    
ვოღნაშო, ბჟოლა, გაკ, ბარყვენ, ჲებ, ბია, ატამ.

Line of edition: 6       
ამშაჷნქა ლახვა̈შ ბა̈რი ნესკა ა̈რი ხვა̈ჲ ნა̈ირ ხილ: მუგმოლდ,
Line of edition: 7    
უღვ, ცინაყა, ინაღა, ბასყი, მურგუ, ზუნტუ, გვიჯ, წიფ, შტიხ,
Line of edition: 8    
მანცხჷლდ, წანწოფ (\ წანწვეფ), ჴვა̈რი, ცანცი.

Line of edition: 9       
მიჩავშ ნაზვაბ ხილ ეჯზუმ ანღრი, ერე შვიდედ ეჯმინს, ხვიხორჲელიდ
Line of edition: 10    
არა̈ყს ხვიხნედ (\ ხვალინედ) ეჩეხენქა.

Line of edition: 11       
გუშკვე დაბა̈რს ლახვს ლა̈ჲდი ა̈რიხ ლეზვებ ბალახა̈რ: მედეგვა
Line of edition: 12    
(\ მედეგვო), ქალაკოდა̈, ბურღუ, მაღვნი, ღე, მა̈სენტუ, მეჭეხ,
Line of edition: 13    
მერხელ, მუჩვ, ზა̈რჩვ, მათა̈ჲკუთხი (\ მუთა̈ჲკუთხი), შაშკილ,
Line of edition: 14    
ფშალა̈, წჷწხა... ბალა̈ხჷნქა ლეზვეგ ლი მანჭკვარა̈ (\ მანჭკორა̈), არყა̈,
Line of edition: 15    
ჭედო.

Line of edition: 16       
ამე ხა̈ლხს ხა̈მთქვა ლარტამა̈ლ. ლარტამს ხვაბა̈რჯედ, ჟი ხვა̈წმინდა̈ვიდ
Line of edition: 17    
ლაფა̈ცხირშვ. ეჩეჟი ხვა̈შდედ დაჴლა̈ ა̈ნწს, ჩუ ხვა̈რინქედ
Line of edition: 18    
ფიწა̈ლშვ. ლარტამა̈ლისკა ხვალა̈შიდ: ლახანას, ხა̈ხვს, ნიორა̈ს არასას,
Line of edition: 19    
ვოხრახვიშს, ქართს (წჷრა̈ნის თვეთვენეს), ძაფანა̈ს, კამა̈ს,
Line of edition: 20    
ქინძს, სურნელა̈ლს, პიტნა̈ს, სტამფილოს, ბოლეკს, პატრიჯანს,
Line of edition: 21    
ბადრიჯანს, ჭაკუნტელს, ჭაგვს, კინტრს, მოლოქა̈ს შაშკვლავს, თუთინს,
Line of edition: 22    
ქანს (ქანს ხვალა̈შიდ ლალქანისკა ლა̈ჲდი).

Line of edition: 23       
ლახანა̈ჲშ, ქართა̈შ, ძაფანა̈ჲშ, ხა̈ხვიშ პატრიჯანი ნერგს ჩუ
Line of edition: 24    
ხვა̈ნერგა̈ვიდ მერბ' ა̈გის.

Line of edition: 25       
შომა̈ს გვა̈ლი ლი, ეჩქა ლიცს ხვა̈გვეშიდ ლელარტა̈მს, ჩუ ხვალცუნედ
Line of edition: 26    
ხოჩა ლელარტა̈მ ჴედენი.

Line of edition: 27       
გუშკვე სოფელა̈ლე ხა̈ლხ ხოშანაღალდ ხაჭიმხ ლიკვმა̈შის. კოლექტივა̈რისკა
Line of edition: 28    
ჩაჲს ხაყახ ფურა̈ლ, დაჴა̈რ, ხამა̈რ. ამშაჷნქა აჯაღ
Line of edition: 29    
ხაყახ ჩაჟა̈რ, წელა̈ლ (\ წელა̈რ), ჯორა̈ლ...

Line of edition: 30       
ზავლა̈დეღ ალ კუმა̈შ გუშკვე ლახვა̈რისკა გვაყა. აგვსაყა სკიმერი
Line of edition: 31    
ხოჩა ლჷბალა̈ხ ლახვა̈რხო. გუშკვე მერბე ლახვა̈რს ხაჟახახ: ვა̈ნი,
Line of edition: 32    
ლა̈ჭშხალდ, თეკრა̈შ, უწყარო, ბავალა̈შ, ღვადარა̈შ, ღგკიშ, ფიჩხან,
Line of edition: 33    
ნეზვი დაბ, ლაღუნვა̈რი სვორბა̈შ.

Line of edition: 34       
ლინთვისკა ჲერეხი კუმა̈შ (ხოშა ნაღალდ მეშკი კუმა̈შ) ა̈გის
Line of edition: 35    
გვაყა. ამ კუმა̈შიშვდ ლელინთვდ ამარეხ ჭემს ა̈გიჲ ლა̈ჭემოლისკა
Line of edition: 36    
ლახვა̈შ ლა̈ჲდი. ხვამარედ აჯაღ ჩალს, ნოშს სილოსს ლა̈ჲდი.
Line of edition: 37    
კოლექტივს გუღვე (გუღვა) ლა̈ჭემალ სოფელისკა ლახვა̈რისკა.
Line of edition: 38    
ლახვა̈ ხოჩა ლა̈ჭემალს ხაჟახახ: ბალდიშ, მაცხვა̈რიშ,
Line of edition: 39    
ლალაჴად დაბ, ლეშვნირ, ჩაზნეკილ, ბესკა̈შ, ბა̈ჯგილდა̈შ
Page of edition: 16  Line of edition: 1    
ჴა̈ჩეში ლახვ. ა̈გია̈ ლარალხენ ჭემს მუჟოღირ იმაჯეხ ბოსელხო
Line of edition: 2    
კირავისკა იშხვნიხ. ლახვა̈ ჭემა̈რს ხვაგემდ აწოლა̈ლდ ეჩე ლინთვისკა
Line of edition: 3    
აგუღვე (\ აგუღვა) ლათრია̈ლშვ. ლათრინად გუღვეხ კევირ
Line of edition: 4    
თაკვა̈რ. აწოლა̈ ლალაღა̈იდ გუღვე ლა̈ღერ. ჟი ხვალა̈ჯიდ
Line of edition: 5    
ლახვს ლათრია̈ლს, ჩუ ფიშტვედ შურ ლექო (\ ლექვა), ძირს ხუშდედ
Line of edition: 6    
კევრა̈ლს ეჯჟი ჴვიდედ ფერმახო ლა̈თრინუშ.

Line of edition: 7       
მეშკი კუმა̈ში ლეზვებდ ფერმა იშხვნი სილოსს სილოსი კოშკა̈რისკა.
Line of edition: 8    
მეშკი კუმა̈შიშვდ ხუღვახ ლა̈ჲდი ქართ. ქართს ლინთვისკა
Line of edition: 9    
'აჯა̈ბხ ქატოს ხანა̈ჩდეხ მეშკი ფურა̈ლს ჩუ ხამნეხ.

Line of edition: 10       
ჲერეხი კუმა̈შ კოლექტივა̈რს ასაყახ ჭალადიდხო.

Line of edition: 11       
ჴელედურა̈ჲ ტვიბი ლიცისკა ხვა̈ჲ ცუზს ხვირმიდ ა̈ნკეზშვ, ტვეტი
Line of edition: 12    
ბა̈დშვ ლა̈ფშტვა ბა̈დშვ.

Line of edition: 13       
გუშკვე ცხეკა̈რისკა ხვა̈ჲ ხოჩა მეგამ ითხი. ალმინ ლიხ: ნეზვრა,
Line of edition: 14    
წიფრა, გვიჯრა, ცა̈ცხვრა, ცა̈ჲრა, ფიხვრა, შა̈ჲრა, თეკარლა, მუნჯორლა.
Line of edition: 15    
ალ ცხეკა̈რხენ ხვა̈ჲ მეგამ ასუღვა ლეჩხუმს. ბავა̈რი კოლექტივ
Line of edition: 16    
აქა̈ჩე მეგამს ხავდი მერბე-მერბე წარმოებას. მაშენე მეგამა̈
Line of edition: 17    
ლამარა ტვიბ ლი ლაშთხა̈ში ტვიბ, ჯჷდარა̈ ტვიბ მემფარია̈ნ.
Line of edition: 18    
ლიმეგემიხენქა კოლექტივი წევრა̈ლ ხვა̈ჲ თეთრს იკედხ.

Line of edition: 19       
გუშკვეშმოყ ლახვა̈შ ბა̈რი ნესკა ხვა̈ჲნა̈ირ ნა̈თხვჲერა̈ლ ა̈რიხ.
Line of edition: 20    
ლახვა̈რისკა ითხიხ: ღვაშა̈რ, ჲერსკნა̈ლ... ცხეკა̈რისკა -- დაშტვა̈რ,
Line of edition: 21    
თხერალ, მავლა̈რ, ყურდგელა̈ლ, კვენა̈რ, მანჩვა̈რ, ციყვა̈რ...


Line of edition: 22 
ჟორჟო, ანზორი, ვალოდია, ჯონდო ჩანქსელიანები. ხელედი. . ქალდანი. 10.IX.1957 .



Next part



This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.