ECLING
Text collection: SPT
Svan Prose Texts
Book: I
I: Upper Bal Dialect
Svan Original Texts
as published in
Svanuri ṗrozauli ṭeksṭebi,
I: Balszemouri ḳilo.
Ṭeksṭebi šeḳribes A. Šaniʒem da V. Topuriam
(Masalebi kartvelur enata šesc̣avlisatvis, I) /
Svanskie prozaičeskie teksty,
I: Verxnebal'skoe narečie.
Teksty sobrali A. Šanidze i V. Topuria /
(Materialy dlja izučenija kartvel'skix jazykov, I) /
Textes svanes prosaïques,
I: Dialecte du Haut-Bal.
Textes recueillies par A. Chanidzé et V. Topouria
(Matériaux pour l'étude des langues kartvéliennes, I),
Tbilisi 1939
entered by J. Gippert and M. Tandashvili,
Frankfurt a/M, 1995-1999;
corrected and proofread by Iza Chantladze, Rusudan Ioseliani and Ketevan Margiani,
Tbilisi 1999-2000;
ECLING version by Jost Gippert,
Frankfurt a/M, 13.6.2000 / 21.8.2002
Text: 1
Page of edition: 1
Line of edition: 1
1. თათრიანობ ი ჯუ̂ინელ მურყუ̂მა̈ლ
Line of edition: 2 ჯუ̂ინელ დრეუ̂ს ესნა̈რ თათრა̈ლ მე̄უ̂არ ლჷმჴა̈დუ̈ნხ შუ̂ა̈ნთე ი ერუ̂ა̈̄ჲ
Line of edition: 3 წინა̄ღმდეგობს ხა̈ბნინა ი ლიცუ̂ა̈̄ლს ხა̈ჩუ̂მინა, ეჯჲა̈რს ჩი̄ ხოლა̄მ
Line of edition: 4 გარ ხა̈ჩუ̂მინახ თათრა̈ლ. ამკა̈ლიბ თათრალე ლიჴედს შუ̂ა̈ნთე ი მუშუ̂ა̈ნ
Line of edition: 5 მა̄რე̄მი ხოლე̄მი ლიყრინეს თათრიანობს ხუ̂აყლედ შუ̂ანა̈რ.
Line of edition: 6 აშხუ̂ ჩიქქა ა̈მჴედხ თათრა̈ლ ი ხუ̂ა̈ჲ მა̄რე ოთჷრმახ მუშუ̂ა̈ნ. ეშხუ
Line of edition: 7 მა̄რე, მჷლხირ, სგა ლოხცუ̂ი̄რახ მურყუ̂ამთე. მა̄დ ა̈მჴედ ქა მურყუ̂ამხა̈ნქა
Line of edition: 8 ი ხაცუ̂ა̄ლა ეჩხა̈ნქა თათრა̈ლს. თათრა̈ლ ა̈მჴედე̄ლიხ ი მურყუ̂ამდ
Line of edition: 9 ჩუქუ̂ა̄ნისგა ლაღუმ ლოხდახ, ეჯღა ერე "ჟ' ესერ ა̈ნუნჴუ̂ი მურყუ̂ამ ი
Line of edition: 10 მა̄რე ესერ ჩუ ა̈დდაგრი". [ალ] მა̄რა მურყუ̂ამს ეშხუ ხაბნა̈̄ გუ̂ა̈რე
Line of edition: 11 ხაღუ̂ე̄ნა; ჩუ ოთფი̄ტა გუ̂ა̈რად ნე̄სგაჩუ, ჩოთქუ̂იჭა ეჩლექუ̂ა ჭჷშხა̈რ ი
Line of edition: 12 ტა̈ნ ლა̈ღლიაშა̈რმჷყ, ტოტა̈რ ჟიბოუ̂ ლოხცუ̂ი̄რა მეფტან ი მეპო̈̄რი
Line of edition: 13 გუ̂ა̈რდ ქა̄ლპო̈̄რლი მურყუ̂ამხა̈ნქა ი ეზა̈რ ჯო̈̄დიად ა̈მპერე̄ლი. ამჩუ
Line of edition: 14 ჩუ̂ათჩედა თათრა̈ლს, ჟ' ა̈მჩედ ჩხე̄ლა̈შდ. ჩხე̄ლა̈შ აჯაღ ლჷმა̈რდხ თათრა̈ლ
Line of edition: 15 ი ლოხთჷრა მა̄რა, ერე ხა̈დურდ ჩუ დეშ ხა̈ჩდა̈ნუ̂ნა ი სგა ლახჩჷ̄და
Line of edition: 16 თათრა̈ლს, მუგუ̂დაჲ მინე ა̈რთქუ̂ილ ლა̈სუ̂. თათრა̈ლს აჯაღ ხონჴერხ
Line of edition: 17 შუ̂ანა̈რ, ლახრა̈ლ ი იშგნა̈̄გხა̈ნ ნა̈ჴიდუ̂ მა̄რა̈̄ლ.
Line of edition: 18 ალ მა̄რა ხო̄ქუ̂ა აშხუ̂ მჷლხირდ, ერე "სგაუ̂ ესერ ა̈ხჩჷ̄დხ ალჲა̈რს
Line of edition: 19 ხანჯრალშუ̂ ი ჟიუ̂ ესერ ანხუ̂იტხ" [მარე] ეჩას დეშ ოთბა̈დუ̂ა ი ჯა გარ
Line of edition: 20 სგა̄ხჩჷ̄და თათრა̈ლს ხანჯარშუ̂ ი უ̂ოხუ̂იშდ ჩოთდაგრა. ეჩუნღო ღალ
Line of edition: 21 ჯაჲ ჩოთდაგრახ.
Line of edition: 22 ეჯ მურყუ̂ამ-ე́, ხედუ̂ა̈̄ჲსგა სგა ლა̈ხსა̈დ მა̄რე ი თათრა̈ლდ ლაღუმ
Line of edition: 23 ოხდეხ, ლა̈დი̄ ჩუ ლჷგ ლახრი ლექუ̂ა̈̄ პილს, შუკუნ ჟიბოუ̂, სარაგ
Line of edition: 24 ჟიქა̄ნ, ი ნე̄სგაჩუ ჩუ მეყუ̂ლე ლი.
Line of edition: 25 თათრიანობ და̈̄ს ხაშყიდ (\\ და̈̄ს ხამგჷნა) ათხე, მარე ალა [ეშ] ჩუ
Line of edition: 26 ხასმა ჩი̄ მინე-მინე ხოშა̈̄ლხა̈ნქა, ერე ჯუ̂ინალდ შუ̂ა̈ნს მე̄უ̂არ მაყალ
Line of edition: 27 ხა̄რა თათრალეშ. ამი̄ მჷმტკიცა̈̄უ̂ი ხუ̂ა̈ჲ ა̈რი შუ̂ა̈ნისგა, ამბაუ̂შუ̂ი ხუ̂ა̈ჲ
Line of edition: 28 ა̈რი ი ჯუ̂ინელ ნამსა̈დშუ̂ი̄. ჯუ̂ინელ ნამსა̈დშუ̂ ა̈რი ეჯა, ერე ხუ̂ა̈ჲ
Line of edition: 29 მურყუ̂ამ ლჷგ ჩია̈̄გ, კოჯა̈რჟი ი იშგნა̈̄გ ლაბჷგ ა̈გის, მარე მურყუ̂მა̈ლ
Line of edition: 30 ჰა̈დუ̈რ ძუ̂ირდ გარ ლჷგხ: ჲერხი მერღუ̂ე ი ჲერხი ური̄ღუ̂ა ლი. ლახრი
Line of edition: 31 ფე̄დიას ლჷგხ ამკა̈ლიბ მურყუ̂მა̈ლ ჲერუ.
Line of edition: 32 ეშხუ ლჷგ ჴე̄რში კოჯჟი. ალ კოჯ ძღჷდ კჷ̄ლთხი ლი; ჩუქუ̂ა̄ნჟი
Line of edition: 33 ხა̈დურდ მა̄მ ლი ლა̄ზ. ლახ ლა̈ხსგიდნი, ქა შა̄ლ ჯალფარა კოჯ,
Line of edition: 34 ეჯჟი კჷ̄ლთხი ლი. ჟიქა̄ნჩუ ძღჷდ ჯუ̂ე̄დიანეშ ლახ ა̈ხჭემნი, ჩუ ა̈ნჴდენი
Page of edition: 2 Line of edition: 1 უმუ̂ა̄ლაჟი. მურყუ̂ამისგა ათხეი ჩუ ა̈რი ეშხუ ჯუ̂ინელ ბანდრი̄ლ.
Line of edition: 2 ბანდა̈რ ჩუ ლჷკჷრტჷნე ლი. ჲერხი ყჷლეხ, ერე "ლჷკჷრტჷნე ესერ
Line of edition: 3 ცხუ̂იარე ნა̈ყირ ლი." მურყუ̂ამს ლესგა̈რხა̈ნ სგა ხა̈ჩხინახ ცხუ̂ია̈რ. ეჯა
Line of edition: 4 ჰა̈დურდ ჰა̈დუ̈რ ლი. ლჷყა̄რჷნქა დე̄სამა ხაკლი.
Line of edition: 5 მე̄რმე მურყუ̂ამ ლჷგ ჩხე̄ლა̈შ ჟიქა̄ნ ლაბგ' ა̈̄გის, კჷ̄ლთხი ა̈დგილჟი.
Line of edition: 6 ალა ისგთეჩუ ჩუ მერღუ̂ე ლი.
Line of edition: 7 მესმე აჯაღ ჟა̄მშუ̂ი ფე̄დიას [ლჷგ], კოჯისგა. ამე, სგა̈̄ნჩუ, დე̄სა მიჩდა,
Line of edition: 8 ქა̄მენჩუ გარ მიწუ̂ა: ჩუ მერღუ̂ე ლი, კოტო̄ლ გარ ცუ̂ირ.
Line of edition: 9 (მულახი)
Line of edition: 11 აშხუ̂ჟი̄ნ თათრა̈რ ა̈მჴედე̄ლიხ შუ̂ა̈ნთე ლაჴუ̂მა̈რ ლატფუ̄რათე.
Line of edition: 12 ჭუბე̄რთე სგა̈̄მჴედხ. ეჩეჩუ̄ნ ესხუ̂იე̄ნახ შუ̂ანა̈რ ი ხუ̂ა̈ჲ ოხხუ̂ი̄ტახ: ეჯჲარე
Line of edition: 13 ზისხუ̂შ გიმ ჩუ̂ალწჷრნე̄ლი. ათხე̄ჲ ლიხ აშხუ̂ ა̈გის ბაჩა̈რ ლჷწრანე. ეჯ
Line of edition: 14 ა̈დგილს თურქუ̂რე ნა̈ხუ̂იტს ხაყლეხ. ეჩხა̈ნ ლეჟა ლეჟ ა̈̄მჴედხ ლახმჷლდდ
Line of edition: 15 ი ხუ̂ა̈ჲ ლაჴუ̂ა̈მ ოთტუფუ̄რახ.
Line of edition: 16 ლახმჷლდს ესნა̈რ მჷმჟა̈̄ლ თა̈თაუ̂ ბუტიშ' ა̈̄რი, ხეწა̈დ თათრა̈რს,
Line of edition: 17 ანჴა̈დ ლეჟა მჷლახთე ი სოფელ ჩუ̂ადბა̈ჟნე. მჷლახდ ლეჟ' ა̄ნჴა̈დხ
Line of edition: 18 თათრა̈რ ი უღუ̂ირ ზაგა̈რ ჩუ̂ა̈დსადგუ̂მა̈̄ნხ. ა̈ხცხა̈პხ ესნა̈რ ქა მჷლხა̈რ
Line of edition: 19 ი ხუ̂ა̈ჲ ანხუ̂იტხ, მინე მათხუ̂მი ხუ̂ანთქარ ჩუ̂ადგა̈რხ. ეჩი̄ ფაყუ̂ ათხე̄ჲ
Line of edition: 20 ჩუ̂ა̈რი ჭო̄ლში ბარბალისგა. ფაყუ̂ ძღჷდ ლი, წუ̂ი̄მიშ.
Line of edition: 21 ალ ლა̈შია̄ლჟი̄ნ ესნა̈რ ლა̈ხჴუ̂ა̈სგ თა̈თაუ̂ ბუტიშა ი ეშხუ ძაძრა
Line of edition: 22 ხატა̈რ ჟ'ოხკიდ თათრა̈რს. ეჩე̄სგა ლჷმა̈რდ აშირ უსგუ̂აჲეშდ ი უსგუ̂ა
Line of edition: 23 ხა̈ტ. ეჯჲა̈რ მჷჟა̄ლუ̂ა̈ მაცხუ̂ა̈̄რთე ადჲე ი ათხე̄ჲ ჩუ̂ა̈რიხ.
Line of edition: 24 მჷლხა̈რდ ესნა̈რ თათრა̈რ ქა̄დრა̈კლეხ ი ხუ̂ა̈ჲ ჟ'ანხუ̂იტხ. ეჩქას
Line of edition: 25 ლიშია̈̄ლ ცხუ̂ი-ცჷჴემადშუ̂ ლჷმა̈̄რ.
Line of edition: 26 (ლენჯერი)
Line of edition: 28 თათრობ ლა̈სუ̂, შომუ̂ა̈̄ჲ ცჴუ̂ემა̈დ (\\ ცჷჴუ̂ემა̈დ) ხუღუ̂ა̈̄ნხ ლა̈შია̄ლდ.
Line of edition: 29 ეჩქა ლალხორა̈ გელუ̂ა̄ნა̈ გეზალ ჯა̈რს არდა, ლა̈შია̄ლს ხონჴერდა
Line of edition: 30 შუ̂ანა̈რს. ჩუ̂ადგა̈რხ თათრა̈ლდ ეჯა. ეჩის თა̈უ̂ირ მუ ხორდა, მეჩი
Line of edition: 31 მა̄რე. გეზლა̈ დაგრა ჩუ̂ა̈დკუ̂იჰ. შომუ̂ა̈̄ჲ თათრა̈ლ ანღჷრდახ (კა̄ლქა
Line of edition: 32 იეტიხდახ) ეჩქა გელუ̂ა̄ნდ ხე̄ქუ̂ მიჩა ხეხუ̂ს, მეჩი მა̄რემ: "ჲაღო, ჯ' ე̄სერ
Line of edition: 33 დეშ იწუ̂ე̄ნე ჩუ ი დეშ ესერ ხომწუ̂ინე: ლა̈სგიდ ესერ მა̄მ ხა̄რ,
Page of edition: 3 Line of edition: 1 ი ჯა ესერ ჟ'ა̈ნბუ̄ცი ჴემა̈დს ი ეჯნემ ესერ ქა̄უ̂ ოთმეწუ̂ნე ხოჩა̄მდ".
Line of edition: 2 ახფიშუ̂დხ ჴემა̈დ, გუ̂ამა̈რისგა ხაჴიდ თათრი მახუ̂შის ი ჩუ̂ანკუ̂ა̈რ ჰუ̈ლხა̈ნჩუ.
Line of edition: 3 ამეჩუ ლიშია̈̄ლ ლჷმა̈̄რ, ეჩქა ხა̈ლხ, სოფელ მა̈გ, ჟი̄ბ ლჷმა̈რდ ლა̈გურკამჷყ;
Line of edition: 4 ჴემადშუ̂ ხა̈შია̄ლახ თათრა̈ლს. თათრა̈ლს ჴემდა̈რ ხოჩა
Line of edition: 5 ხაღუ̂ე̄ნახ, მარე თათრა̈ლ იმუ̂ა̈̄ჲ ცხუუ̂ა̈რს ხა̈ფშუ̂დინახ ეჩხა̈ნისგა, ეჩას
Line of edition: 6 კა̄ლა̈რ ქა ხაჭკუ̂რინახ ი ეჩქა თათრალე ჴემდარეშდ მა̄მა ხაყე̄ნახ ეჯ
Line of edition: 7 ცხუუ̂ა̈რს ი ეჯნოშ ჟ'ახწინე̄ნახ თათრა̈ლს. ი ფე̄დიათე ლახ ლჷმჴა̈დუ̈ნხ,
Line of edition: 8 ეჩქა გურნა̈ლს ხატყცინახ შდულუ̂ა̈რხა̈ნქა ი ჟ'ახწინე̄ნახ თათრა̈ლს.
Line of edition: 9 დეშ ოთჴაცახ ჩუ: ჴე̄ საყდა̈რს, ბარბალხა̈ნქა, ჩოთტუფუ̄რახ
Line of edition: 10 ჲერუ ჯუ̂ა̈რ, სერ ეჩჷნქა დე̄სამა მოშ ოთჲახ თათრა̈ლს.
Line of edition: 11 ნათთარუ̂ ჲურინ ლი შუ̂ა̈ნ, მარე ჟი დეშ ხა̈წნე̄ნახ შუ̂ანა̈რს, ჩიგარ
Line of edition: 12 ხოლა გუჟი ხა̄რახ ლი̄ზა̈̄ლ.
Line of edition: 13 (კალა)
Line of edition: 15 აშხუ̂ ჩიქქა ჯუ̂ინალდ სა̈უ̂ჲა̈რს ი შუ̂ანა̈რს მე̄უ̂არ ლიცუ̂ა̈̄ლ ხა̄რახ.
Line of edition: 16 აშხუ̂ინ სა̈უ̂ია̈ ლაშგა̈რ ალმა̈̄ზ. ალა მჷლხა̈რს ჟ'ოხბაჟახ სგუ̂ებნაუ̂ ი
Line of edition: 17 ა̈მჩედხ ტუ̈ბე̄რთე. ტუ̈ბე̄რ შუ̂ანა̈რს ოთგახ ჲერუ ჴუ̂ილა ჟიბა̈ჲჩუჟი,
Line of edition: 18 ნე̄სგაჩუ ნახწუ̂იდ ლოხცუ̂ი̄რახ ა̈დგილ შუკუ̂ი გუ̂ა̈რდ, მინ ჟ'ა̈მჩედხ
Line of edition: 19 ჟიბოუ̂ (\\ ჟიბაუ̂), ეჩე ში̄რა̄ლე გუ̂ა̈რდ ოთფჷტჷ̄რახ ბაჩა̈რდ, ღო ეჯჲა̈რ
Line of edition: 20 მეგმა̈რდ ლოხსუ̂ახ ეჩხა̈ნ-ამხა̈ნ. ამკა̈ლიბ მეგმა̈რ ი ში̄რა̈̄ლ ფიშირ
Line of edition: 21 ანსყა̄ლეხ. სა̈უ̂ჲა̈რ ა̈მჴედხ, ქა̈̄მჴედხ შუკუ̂თექა, ჲარუ̂ ჭუ̂ა̈დ ნე̄სგათექა.
Line of edition: 22 ჩუბოუ̂ ესჭო̄ნახ ი თხუ̂იმ ხუ̂ილა̄ლე ჰოკერ ხორდახ ი კა̈ცხ-თხუმ, ეჩქა
Line of edition: 23 ქო̄ხგურნახ მეგმა̈რ ი ბაჩა̈რ. სა̈უ̂ჲა̈რს ნახწუ̂ი შუკუ̂ჩუ ქა ლახა̄სდხ
Line of edition: 24 მეგმა̈რ ი მა̈გ ჟ'ანხუ̂იტ სა̈უ̂ჲა̈რ: ჲერ ლჷცთე აშიდ, ჲერ იმთე ი
Line of edition: 25 ჲერ იმთე. ეჩუნღო სა̈უ̂ჲა̈რს ხოშა მაყალ ხა̄დხ შუ̂ანრეშ ი შუ̂ა̈ნთე
Line of edition: 26 ლიჴედს დეშ ა̈ბდა̈უ̂დახ.
Line of edition: 27 ამჟი̄ნ ა̈მკედე̄ლი ლიჲმახუ̂ა̈̄ლ სა̈უ̂ჲარეშ შუ̂ა̈ნთე.
Line of edition: 28 (მულახი)
Text: 5
Page of edition: 3
Line of edition: 29
5. ჴალდე̄ ჴაცობ
Line of edition: 30 ალა იმ ა̈ხფას: რუსა̈ლ ა̈მჴედე̄ლიხ. რუსი ჯა̈რ ბეჩუ̂ის ლჷმჷრდე̄ლიხ.
Line of edition: 31 ეჩქა ჴალდე̄შა̈რ, სემი მა̄რე, მთაუ̂რობთე ლჷჰერ ლჷმა̈̄რე̄ლიხ.
Line of edition: 32 ეჩქა შუ̂ანა̈რს მა̄მა ხოცხა̈̄ნხ რუსლე ლიჴედ: რუსი ხელწიფ მა̄დ
Line of edition: 33 ხეკუ̂ა̈დხ ი დე იშგენ მახუ̂ში, მინე თხუმჷნქა. ეჩქა ჴეუ̂ობ ა̈ნსყა̈̄ნ ი
Page of edition: 4 Line of edition: 1 ბა̈̄ლ ზაგა̈რჷნ ლეჟა̈̄ შუ̂ანა̈რ მა̈გ აშხუ̂თე ლა̈სუ̂ხ ი ხეკუ̂ეს ერე რუსა̈ლ
Line of edition: 2 მო̄დ ა̈მჴედე̄ლესუ̂ხ შუ̂ა̈ნთე. ეჩქა ანჴა̈დხ ი ჟ'ა̈ნნა̈ზუ̂რა̈̄ნხ ი კა̄ლს
Line of edition: 3 ა̈ნყუ̂ა̄ბა̈̄ნხ ჟი. იმუ̂ა̈̄ჲჟი შუ̂ა̈ნისგა ლაჯრა̈უ̂ შა̈ლია̈̄ნი̄ ხა̈ტ ლა̈სუ̂, ამეჩუ
Line of edition: 4 ლალხორა̈ ნაკა̈რისგა შუ̂ა̈ნ ხა̈ტ ჩუქუ̂ა̄ნქა [აჩა̈დ]. აშხუ̂ხა̈ნ შა̈ლია̈̄ნი
Line of edition: 5 ხოსგუ̂ეჯდახ, მე̄რმახა̈ნ-სურ. ათხე შუ̂ა̈ნ უშხუ̂ა̄რ ლა̈ხნაბნა̈̄ნ, ერე
Line of edition: 6 უშხუ̂ა̄რე თხუ̂იმი უცუ̂რუნა ლჷმა̈̄რლესუ̂ხ ხინშუ̂ ი ჭირშუ̂.
Line of edition: 7 ათხე რუსა̈ლდ ჩოთღორუ̂ეხ ჲერხი თხუ̂იმ მა̄რა̈̄ლს ი ჩუ̂ადყუჩუ̄რეხ
Line of edition: 8 შუ̂ა̈ნ. ალა ლა̈სუ̂ თენგიზ უ̂ოთარშა. ეჯნე̄მ ანსახთე (\ ანჴჷრჴე).
Line of edition: 9 ათხე ჴალდე̄შა̈რ მახე ღუ̂აჟა̈რ ეზერ ლა̈სუ̂ხ, ადო ჲერუ̂ეშდ ი უ̂ოხუ̂იშდ
Line of edition: 10 მა̄რე გარ ლა̈სუ̂ხ მეშია̈̄ლ ი იმედი ხა̄დხ, ერე ხა̈ტს დე̄მ ა̈კუ̂შეხ
Line of edition: 11 მე̄რმე შუ̂ანა̈რ, "ადო ხა̈ტი ლიკუ̂შეს, მა̈ჲ დო ირა, თხუ̂იმ ეში̄ მა̄მ
Line of edition: 12 გუ̂აკუჩ ლჷჲა̈რ ამჟი". ჟ'ა̈ნბინეხ ლიშია̈̄ლ, სგა̄ჩა̈დხ ჴალდეთე. ეჩქა ჩხჷტა̈რ
Line of edition: 13 ოხშჷ̄დხ მურყუ̂ამხა̈ნჩუ ლა̈სჷნჯა̈უ̂ჟი. ეჩქა მა̈ჲორდ ესქაქნე (უკამანდრა)
Line of edition: 14 სალდათა̈რს. ეჯჲა̈რ ჟ'ესფხა̈ჟხ სოფელს, ი ჲერუ ზურალა̈̄რ
Line of edition: 15 [კუმში] ლა̈გნახა̈ნ ანტიხდახ, ი ეჯჲა̈რს ი სალდათა̈რს დაგრობ ოხჩჷ̄დხ
Line of edition: 16 გიმჟი ი ეჩქა მურყუ̂მა̈ლხა̈ნქა ოხბინეხ ლითოფ ი მესმე ნა̈̄თი
Line of edition: 17 დეშ აცუ̂ირხ ლჷია̈რ: ჲერხი თოფშუ̂ ადგანხ, ჲერხი ლაგუ̂რანუშ
Line of edition: 18 ესღჷრდახ, ჴალდე̄შა̈რს ხეღროუ̂ა̄ლდახ: ლაღუ̂თაუ̂შ თუ̂ეფი ნა̈ყირ ხა̄რა̈̄ნხ
Line of edition: 19 ი ქა იგუ̂რანო̄ლდახ დაბა̈რ ლექუ̂ა, მარე ქა შყედენდახ კოჯქა
Line of edition: 20 ი თუ̂ეფურ იდა̄უ̂შო̄ლდახ ჩუ. ჟ'ანჴჷრჴეხ ლე̄თშუ̂ რუსა̈ლდ მურყუ̂მალე
Line of edition: 21 ძირთე ლიჴუ̂ესგ ი ეჯა ჟ'ახბა̈ჟხ ჴალდე̄ ღუ̂აჟა̈რდ. "ლემესგს ესერ
Line of edition: 22 დე̄მ ხენხიხ, ეჩას ესერ ლიშია̈̄ლ ხოცხახ" ი ლე̄თშუ̂ ქა̄ნჴა̈დხ მურყუ̂ამხა̈ნქა,
Line of edition: 23 ქო̄ხჩა̈დხ ი რუსა̈ლდ გუ̂იანდ [გარ] ა̈ნბა̈ჟხ. ეჩქა ლითოფ
Line of edition: 24 ოხბინეხ ი ბა̈დრის ჰაგუ̂ს თუ̂ეფ ოხუ̂რა̈კ, ჟ'ესჭუ̂ე̄ნ. "ჲაღო, ჯ' ე̄სერ
Line of edition: 25 ჟი ხოჭუ̂ე̄ნი ი თხუ̂იმს ამეჩუ იწუ̂რი!" ი ეჩქა გეგი, მიჩა მუხუ̂ბე, მა̄დ
Line of edition: 26 ა̈თყუ̂ა̈ლ. ალჲა̈რ მეჩი მა̄რა̈̄ლ ლა̈სუ̂ხ. სგა̄ტა̈ხხ მურყუ̂ამთეისგა.
Line of edition: 27 მე̄რმა ლადეღ რუსა̈ლ ქა̄ნჴა̈დხ ქა̈̄მთე. ლახე ჩუ̂ა̈დჯჷრუ̂ეხ, ერე
Line of edition: 28 ჴალდე̄შა̈რ მურყუ̂მა̈ლისგა დო̄რ ა̈რიხ, ხეწრა̄ლდახ ჴალდე̄შა̈რს. ეჩქა
Line of edition: 29 ახთოფეხ მურყუ̂ამხა̈ნქა ი ალ მეჩი მა̄რა̈̄ლდ უ̂ოხუ̂იშდ აფიცერ მა̈გ
Line of edition: 30 ჩუ̂ადგა̈რხ ი ჲერუ სალდათა̈რ ი მინი სგა̈̄თნახა̈̄ნხ.
Line of edition: 31 -- ო, ეზერდ ოთწორახ თხუ̂იმ! -- უ̂ოთარდ ხე̄ქუ̂, გალფხა̄ნშა,
Line of edition: 32 ხედუ̂ა̈̄ჲ ჯა̈რს ხონჴერდა.
Line of edition: 33 (კალა)
Line of edition: 35 თელ შუ̂ა̈ნ ლჷმა̈რდ ეშხუ ამბა̈უ̂ჟი: უშხუ̂ა̄რ ლახღუ̂ერე̄ნახ. ამხა̈ნისგა
Line of edition: 36 რუ̈სი ჯა̈რ ა̈მჴედე̄ლი ჩო̄ლირდ, ეჩხა̈ნ შუ̂ანე მუთხუ̂მია̈რ ახჟოღუ̂ახ
Line of edition: 37 შუ̂ანე ჯა̈რს, ლეცხკე̄რას ლჷმგენ შუ̂ანე ჯა̈რ. შუ̂ანე ჯა̈რი მუთხუ̂მია̈რდ
Page of edition: 5 Line of edition: 1 ხოშგუ̂მინახ რუ̈სი ჯა̈რი მუთხუ̂მია̈რს: "ხაჰუ̂დიხ საჩქუ̂ა̈რს, შუ̂ა̈ნ ესერ
Line of edition: 2 თანახმადუ ანჴიდხ რუ̈სიშ. მინს ესერ საჩქუ̂ა̈რს ხაჰუ̂დიხ ხუ̂ა̈ჲს, ჩინს
Line of edition: 3 ი მინდა̈ლს ესერ". ათხე შუ̂ანე მუთხუ̂მია̈რ სგა̄ნჴა̈დხ რუ̈სი ჯა̈რთე̄ჲსგა.
Line of edition: 4 ხუ̂ა̈ჲ ნუკუ̂იშ ოთბაცეხ. ეჯჲა̈რ (შუ̂ანე მუთხუ̂მია̈რ) ქა̄ტა̈ხხ შუ̂ა̈ნთე,
Line of edition: 5 ჯა̈რ ჩუ̂აფხიჟხ.
Line of edition: 6 ათხე რუ̈სი ჯა̈რ ქა̄ჩად შუ̂ა̈ნთე. სგა̄ხა̄გა̈̄ნხ ჴალდეს, ოხბინეხ
Line of edition: 7 ლიშია̈̄ლ. რუ̈სი ჯა̈რ ჟ'ანკიდხ ეშდოხუ̂იშდ მა̄რად. ათხე თუში ჯა̈რ
Line of edition: 8 ანჴიდხ. ეჯჲა̈რ ი ჟ'ანკიდხ. ეჩუნღო შუ̂ანე ჯა̈რ ახა̄გა̈̄ნხ. შუ̂ანე ჯა̈რს
Line of edition: 9 მა̄დ ა̈ხცუ̄დხ ი ქე̄სუ̂ქა̈ხხ სოფელხა̈ნქა. ეჩქას შუ̂ანე ჯა̈რ ჩუ აფხა̈ჟხ.
Line of edition: 10 ეჩუნღო ლიმციქულ ოხბინეხ, ეჩქას სგა̄ნჴა̈დხ თანახმოუ̂შ, ჩუ̂ანჴიდხ
Line of edition: 11 ლჷჲრაღდ ქუთა̈̄შთე მინე ნაშგომჟი. ამეჩუ ჩოთღორუ̂ეხ. ამეჩუ სგო̄ხგუდუ̈რდახ
Line of edition: 12 ი ჩუ̂ადქარუ̂ეხ. ეჩეჩუ ჩხარა ზა̈ჲ ათრა̄გჷნხ. ეჩუნღო ჲერუ
Line of edition: 13 ჟ'ანტა̈ხხ. ეშხუ მიშგუ მუ არდა ციმბილს. ეჩხა̈ნ ანტა̈ხ. ეჩუნღუ̂ე̄
Line of edition: 14 გეზალ მი ხუ̂ი, სემეშდ ი უ̂ოხუ̂იშდ ლჷზა̈ჲ.
Line of edition: 15 (კალა)
Line of edition: 2 ჯუ̂ინალდ ხა̈მთქუ̂ე̄ნახ შუ̂ა̈ნისგა, ლახე მა̄რა-ჲ მა̄რა უშხუ̂ა̄რე თხუ̂იმ
Line of edition: 3 ხალტე̄ნახ ი ლა̈ხხუ̂ა ღანაუ̂ ხა̄რახ, ეჩქას ჩუ ლჷმსკიბუ̈ნხ: "ხედუ̂ა̈̄ჲს
Line of edition: 4 ესერ ჭყინტ ა̈ხთაუ̂ე̄ნხ, ეჩნე̄მ ესერ, დი̄ნა მე̄რმა ლახ ა̈ხთაუ̂ე̄ნს, ჩუ̄უ̂
Line of edition: 5 ა̈დყედა̄ნე". ამჟი̄ნ ჩუ ლჷმსკიბუ̈ნხ. ეჩქანღო გაცხა̈ჲდ აშხუ̂ ლახ ჭყინტ
Line of edition: 6 ხათუ̂ო̄ლნა ი მე̄რმა-დი̄ნა, ხეხუ̂-ჭა̈შჲა̄ქ ლჷმა̈̄რხ. ეჯგუ̂ა̈რ-ამგუ̂ა̈რ ხოლა
Line of edition: 7 მა̈̄ჲ ა̈ხფასო̈̄ლ აშხუ̂, ედ მა̈სსგა̈̄რ ი̄რო̈̄ლხ, ეში̄ ჩუ დეშ ყუ̂ელენდახ,
Line of edition: 8 დე̄ჲ ჩუ მოშ ცუ̂ირახ, ადო ეჩქას დაგრობ ხეჭმენდა.
Line of edition: 9 ათხე ძუ̂ირდ გარ ლი ამკა̈ლიბ ლიყდა̈̄ნი. ათხე ქა ხეშგუ̂ემხ დი̄ნა̈̄
Line of edition: 10 ფუსდს, დი̄ნას ი მიჩა ქორშა̈რს. ხეცხე̄ნიხ, ჰა მა̄დე, ჟ' ეში̄ და̈̄რ
Line of edition: 11 ხექრჷნი. ლახე უ̂არ ხესმი ჭყინტს, ეჩქას დი̄ნა̈̄ ფუსდს ნიშა̈ნს ხოკუ̂ა̄ნეხ,
Line of edition: 12 ეჩქანღო ლიმციქუ̂ლიე̄ლ ხა̄რხ უშხუ̂ა̄რ ნე̄სგა ი შომუ̂ა̄ლე გუ̂ეშ
Line of edition: 13 ჩუ ისკეთი, ლა̈ყდა̈̄ნთე ღჷრიხ ეჩქას, ნიშა̈ნს ხოჴდეხ. ჯუ̂ინალდ ფინდიხ
Line of edition: 14 ხემთქუ̂ა̈̄ნხ ნიშა̈ნდ, ათხე ჲედ უ̂არჩხილ ლიზ ი ჲედ იშგენ. აშხუ̂
Line of edition: 15 ჲედ ჲარუ̂ ზაუნღო დი̄ნას ჭიშხს ხა̈ფშდუნეხ ლა̈მთილ. ეჩქას ეზერ
Line of edition: 16 ქუ̂ერწილ ლი ლეჩუ̂მე. ნა̈ყდა̄ნუ̂ი̄რ ჲედ ხოჩა ფირუ̂ ლიზ, მა̄დეჲ ჴა̈ნ.
Line of edition: 17 ეჯას ეშხუ ზა̈ჲ ქა ხეჭმენი, ეჩქას ნაჭუ̂ლაშ ლი ლეჴდე. ნაჭუ̂ლაშუ̂დ
Line of edition: 18 ჯუ̂ინელ აშირ მანთიშ ლი წეს: ერხი ლექუ̂ა̄უ̂ ეშდჲარუ̂ ფურ იკედხ,
Line of edition: 19 ერხი გიმსი იკედხ, ღო დი̄ნა̈̄ ფუსნა̈̄დუ, ჲედ ჯუ̂ინალდ ი ჲედ მახად,
Line of edition: 20 ნა̈ხრინუ̂ ლახ ლიხ, ეჩქას მა̈̄ღუ̂რას იკედხ მასა̈რდ ჲედ კუმაშუ̂შ ი
Line of edition: 21 ჲედ გჷმშუ̂. ამჟ' ერე, ჭაშუ̂ მასა̈რდ ხა̄რ ლეჴდე ნა̈ყდა̄ნუ̂ი̄რ, ნაჭუ̂ლაშ
Line of edition: 22 ი მა̈̄ღუ̂რა̈̄ლ.
Line of edition: 23 აშხუ̂ ზაუნღო მუჟღუ̂ერ ქა ფიშუ̂დეხ დი̄ნას ლა̈მთილთე. ეჩქას ჩიქე
Line of edition: 24 დი̄ნა̈̄ ქორთე მჷ̄ყა ღჷრიხ. ეჩეჩუ̄ნ გუნ ლითრე ლი ქუ̂ერწილჟი̄ნ, ეჩქანღო
Line of edition: 25 სერ ჟი იგნა̈̄ლხ, დი̄ნას ყუ̂ელფ გჷრკდა̈ნ სუმინ ქა ხა̈ცხპეხ ლაღრა̄ლუშ,
Line of edition: 26 ჩუ ხა̈მზჷრა̈̄უ̂ნეხ ქორს ი ა̈იხ ლა̈მთილთე. ამეჩუ̄ნ ჰა̈დურდ
Line of edition: 27 გუნ ეზერ ქუ̂ერწილ ლი ლეჩუ̂მე: ლე̄თ-ლადა̈ღ ლითრე ი ლიხი̄რულ
Line of edition: 28 ლიზ. ეჩქანღო ღი̄ნას ლა̈მთილსი ჩუ ა̈მზჷრიხ ქუ̂ერწლა̈რ ი ღჷრიხ
Line of edition: 29 მინე ქორთე.
Line of edition: 30 (ლენჯერი)
Line of edition: 2 იმჟი̄ნ ხუ̂ა̈ყრინედ
Line of edition: 3 ლეგდმერდე ღალ ლახ ჟი დოშ იხუ̂ჩოუ̂ა̈̄ლ ი ჩუ იდგა̈რი, ქორისგა̈̄შ
Line of edition: 4 მა̈გ ლიგუ̂ნის ი ლილჭა̈̄ლს იბნეხ. მუგუ̂ა̈̄ნე ზურა̄ლ ი ღუ̂ეჟმა̄რე
Line of edition: 5 ჴედნი ჩი̄ხა̈ნ ი მა̈გ ჩუ იგუ̂ა̈̄ნე. ესუ̂ა̈̄ჲ ლეტკლებე ლჷდგა̈რ ხადგარა,
Line of edition: 6 ეჯა ხაშგურა̄ნე მახა ლჷდგა̈რს: მა̄დილუ ესერ ხე̄რა ი მინე ლჷდგარუს
Line of edition: 7 ამჟი ი ამჟი̄უ̂ ხა̈̄ქუ̂.
Line of edition: 8 სერ ესუ̂ა̈̄ჲ ლენყე ი ჰარა̈ყ მო̄დ ხო̄გ ქორისგა, ეჯა ედ გიმს
Line of edition: 9 ჰა̈დი ღალ ი ჲედ ქუ̂ილჷმგენა̈̄ლს. ლჷდჷა̈რი ჭირისუფა̈ლს ეჩქას ფასუ̂
Line of edition: 10 მა̈გ ხოხუ̂რა̄მ გარ ხაჭრა̈ჟი ი ჩი̄ გუ ხა̄რ, ესუ̂ა̈̄ჲ ჰარა̈ყ ი კუ̂ეცენ ჩუ
Line of edition: 11 ხო̄გ, ერე გუნ ეფდ მოშ ა̈დხუ̂ჲას ლეყდი. ჰარყარე მჷდა იზელა̈̄ლხ
Line of edition: 12 ჩია̈̄გ ი ჰარა̈ყს ხეთხე̄ლიხ ლეყდიდ. ლახ სოფელისგა დო̄ს ხო̄გ, ეჩქას
Line of edition: 13 მე̄რმა სოფლა̈რთე ღჷრიხ ი ეჩე იყდიხ. მე̄რმა ჲედ მე̄სმა ლე̄თ ხედუ̂ა̄ლე̄შ,
Line of edition: 14 ტჷტა̈დია̈რს იჩომხ, მესუ̂ფელ მა̈გ თუ̂ით ერუ̂ეშდ დია̈რს ჴიდე
Line of edition: 15 მეზგახა̈ნქა. აშხუ̂ ი ედ ჲარუ̂ კუ̂იდო̄ლს ჭირისუფა̈ლი ქორ ანყე, ერხი
Line of edition: 16 ქა ხეჭმენიხ სოფელს ი ესუ̂ა̈̄ჲ ჟი მჷსყე ხა̄რ ლინწუ̂ერი, თუ̂ით კარა̈ნ
Line of edition: 17 ჭჷმინს ქა ხოზუ̂რი მა̈გ. ნა̈ბოზს სერ ჩუ ისგუ̂რი მა̈გ, მეგნა̈̄ლ დია̈რს
Line of edition: 18 ი ნა̈̄ყუნს ა̈რგიუ̂ეხ ტაბგა̈რჟი̄ნ; ჰარყი მეგნა̈̄ლს შედა̈რ ხუღუ̂ეხ ჰარაყშუ̂
Line of edition: 19 გუ̂ეში ი ეჯას ხათრეხ ჩი̄, ესუ̂ა̈̄ჲ ხაკუჩ. სერ ჟი იგნა̈̄ლხ ი ღჷრიხ
Line of edition: 20 ერხი. ეჩქანღო მეგნა̈̄ლ ისგუ̂რიხ. ეჯჲა̈რუნღო აჯაღ სუმინ ი ო̄შთხუ̂ინ
Line of edition: 21 ჩუ̄დ ისგუ̂რიხ ი ეჩქანღო გარ ფხეჟნი მა̈გ ჩუ. ბა̄ზი დი̄რი მჷნყა
Line of edition: 22 ლაშდღუ̂ა̄ლა̈ დია̈რს ანყეხ მე̄რმა ლა̄დღიშდ.
Line of edition: 23 მე̄რმა ლადა̈ღ ისგლადა̈ღუნღო მა̈გ იბნე ლინზო̄რა̈̄ლს ლაშდღუ̂ა̄ლთე.
Line of edition: 24 ჩიქი მჷზრა ზა̈რს ყჷლეხ, ეჩქანღო ღუ̂ეჟმა̄რე̄მი ლაგუ̂ა̈̄ნას ასყე̄ნეხ.
Line of edition: 25 ღუ̂აჟა̈რ მეჰერ ერუ̂ა̈̄ჲ ლიხ, ეჯჲა̈რ ქა ისკუ̂ე̄რიხ ყუ̂ელფი ჲარუ̂
Line of edition: 26 ფოყხა̈ნ ი იბნეხ: "ი̄ უ̂ა̈ჲ, ი̄ უ̂ა̈ჲ, ი̄ უ̂ა̈ჲ. მიშკუ̂ა ქუნე ლიგნა̈̄ლს უ̂ა̈ჲ!" ამის
Line of edition: 27 ამჟი̄ნ სამინ ყჷლეხ. ეჩქანღო სერ მეჴჷ̄რა̄ლა ჴედნიხ. ლიჴჷ̄რა̈̄ლ ხაჟხა
Line of edition: 28 ეჯას-ე, ლახ მუგუ̂ა̈̄ნა ჩუ ლჷგხ, ეჩქას მოჭირსუფლა ერუ̂ა̈̄ჲ ლიხ,
Line of edition: 29 ეჯჲა̈რ ლაგუ̂ა̈̄ნოშ გჷრკიდ ქა ხეცხპენიხ ქორს ჩიქე ღუ̂აჟა̈რ ი ღო
Line of edition: 30 ზურალა̈̄რ. ალ ლიჴჷ̄რა̈̄ლ ქა ისრული, ეჩქას აჯაღ ყჷლეხ "ი̄ უ̂ა̈ჲ"ს ი
Line of edition: 31 მუგუ̂ა̈̄ნა ქა ღჷრიხ ქა̄მაუ̂. ლაჴჷ̄რა̄ლჟი ზა̈რს დე̄მის ქუ̂იცეხ მჷზრა.
Line of edition: 32 ეჩქანღო ზურა̄ლა̈ ლაგუ̂ა̈̄ნა ისყი. ეშხუ ზურა̄ლ თხუმხა̈ნ იგნი, მე̄რმა̈̄ლ
Line of edition: 33 მა̈გ ქა ლჷჭა̄რუ̂ე ლიხ. ზურა̄ლ მუჟუ̂ეღ ერუ̂ა̈̄ჲ ლიზ, ეჯა ჟი იბნე ლილჭა̈̄ლს
Line of edition: 34 ი მე̄რმე ზურალა̈̄რ გურჰუ̄ნს ხაყლეხ. მუჟუ̂ეღ ზურა̄ლ, ერუ̂ა̈̄ჲ
Line of edition: 35 ესამა ლჷდგა̈რ ჩუ ხაშყიდ სოფელისგა, ჩი̄ ქა იშჷლდა̈ნი. ისგთექა ქა
Line of edition: 36 ჴედნი, ეჩქას ჩუ იჩქეეუ̂იხ ზურალა̈̄რ ი მეჴჷ̄რა̄ლა ქა̄დ ჴედნიხ, ჩიქე
Page of edition: 8 Line of edition: 1 ღუ̂აჟა̈რ ი ღო ზურალა̈̄რ. ნაჴჷ̄რა̄ლუნღონ მუჟუ̂ეღ ზურა̄ლ ჩი̄ ქა იშჷლდა̈ნი
Line of edition: 2 ლგდგა̈რს ი ქა̄სრულ' ე̄ჩქას სერ ბაპრე ლიჴდა̈̄ლი ლიზ. ბაპა̈რ
Line of edition: 3 წეს-აგებას ხა̈ჩოხ ლჷდგა̈რს ი ქა ხოჟუ̂ეღხ ქა̄მაუ̂. კუბს ჟი იკო̄დეხ
Line of edition: 4 მახე ღუ̂აჟა̈რ. ქორისგა̈̄ ღუ̂ეჟმა̄რე ერუ̂ა̈̄ჲ ლიზ ხოშა, ეჯა იკედ მა̈ნკუ̂ი
Line of edition: 5 ჰერს ი ეჩქას სერ ზურა̄ლ ი ღუ̂ეჟმა̄რე, ლჷდგა̈რი ფუსდ ერუ̂ა̈̄ჲ ლიზ,
Line of edition: 6 მა̈გ ლიგუ̂ნის ი ლილჭა̈̄ლს იბნეხ. ზურალა̈̄რ კი̄ლიხ ი ფა̄თუ̂ა̈რს იწა̄ნეხ
Line of edition: 7 ი ჰა̈ყბა̈̄რს იკანჭუ̄რეხ.
Line of edition: 8 ამჟი̄ნ ესღრიხ სერ ლაშდიღუ̂თექა ლაზრუშ ი ლაგუ̂ა̈̄ნოშ. ერხი ზურალა̈̄რ
Line of edition: 9 საფლა̈უ̂თე̄სგა სგა̈̄სკნეხ ი ეჩეჩუ̄ნ იკანჭუ̄რა̈̄ლხ: "ლჷდგა̈რს
Line of edition: 10 ესერ ამუნღო მა̄მ ხეყუ̂ლი̄ნნი". ლჷდგა̈რ ჩუ იშდღუ̂ი, ეჩქას სერ (ა̈გითე
Line of edition: 11 ჴედნიხ ი) ჩუ ისგუ̂რი მა̈გ, ერ კაჩ ლჷგ. მეგნა̈̄ლ ლაშდღუ̂ა̄ლა̈ დია̈რს
Line of edition: 12 აჰუ̂და̈̄ლიხ, ჰარყი მეგნა̈̄ლ ჰარა̈ყს ათუ̂ნა̈̄ლიხ ი ჩუ იშდმი მა̈გ. ობა̈შინ
Line of edition: 13 ლიცუ̂ა̈̄ლ ი ლიყა̈̄რიე̄ლ ინჩჷდი ი მასა̈რდ ტჷნტე̄უ̂ა იბნი. ნა̈ბოზს
Line of edition: 14 მა̈გ ჩუ ფხეჟნი ი ა̈გის გუნ სგახი̄შ გარ ხესდენი ლჷდგა̈რი
Line of edition: 15 ჭირისუფა̈ლს.
Line of edition: 16 ნა̈ბოზს საფლა̈უ̂ს იწუ̂ე̄ნეხ ლაგუ̂ა̈̄ნოშ. ეჩეჟი̄ნ ლემასგუ̂ ა̄შუ̂ეხ ი
Line of edition: 17 ჰარა̈ყს ათუ̂ნა̈̄ლიხ. მე̄რმა ლადა̈ღ ჰამს აჯაღ იწუ̂ე̄ნეხ საფლა̈უ̂ს ი
Line of edition: 18 აჯაღ ჰარყი ლითუ̂ნა̈̄ლი ლიზ.
Line of edition: 19 აშხუ̂ ნაგზანღო ლაშრაუ̂ა̄ლს იჩოხ, ერ ხოშა გუ̂იანდ, ი ჩუ̂აშრა̈უ̂ი
Line of edition: 20 მა̈გ. ლაშრაუ̂ა̄ლჟი̄ნ ლა̈ჲსა̈̄ლ ლიხ ლეჲსენი, დია̈რ ი ჰარა̈ყ მასა̈რდ.
Line of edition: 21 ღო ო̄შთხუ̂ეშდ ლადა̈ღჟი̄ნ ხაკუჩ ლა̈ჲსა ი ჰარა̈ყ. ჩი̄ მე̄რმა საფტინს
Line of edition: 22 სამ დია̈რს ი ნა̈̄ყუნს ხოჯგრი მა̈გ ლჷდგა̈რს საფლა̈უ̂ჟი̄ნ აშხუ̂
Line of edition: 23 დუ̂რეუ̂ ჩიქდ ი ეჩქანღო მა̄მა. ეშხუ ზა̈ჲ ქა ღჷრი, ეჩქას კათტაბა̈გს
Line of edition: 24 ხა̈ჩომ მა̈გ ლჷდგა̈რს: ჴანა̈რს ა̈ჲსენიხ, ჰარა̈ყს ი დია̈რს მასა̈რდ ამა̄რეხ
Line of edition: 25 ი ერუ̂ა̈̄ჲ ხაკა̈ფხ, ეჯას ქა̈̄წსიხ.
Line of edition: 26 კათტაბა̈გუნღო სერ ერხი დე̄მგუ̂აშ ხა̈ჩო ლჷდგა̈რს, ერხი თამფა̈
Line of edition: 27 სა̈ხს ი ლაგუ̂ა̈ნს ხა̈ჩომ. ეჩქას ჰა̈დურდ ობა̈შ დია̈რ, ჰარა̈ყ ი ლა̈ჲსა̈̄ლ
Line of edition: 28 ლიხ სა̈ჭირო. ლჷდგა̈რს შუ̂ა̈ნისგა ობა̈შ ხა̈რჯ ხაკუჩ ი ერხი
Line of edition: 29 მეზგე მასა̄რდ ისბრა̈ლი, ლახე ალამაგ ხა̈რჯს ჩუ ხა̈ჩომ ლჷდგა̈რს.
Line of edition: 30 ლაშდღუ̂ა̄ლ ეჯღა ხაბჟახ ნიშგუ̂ეჲმჷყ სა̈ჭირო, ერე "ეჩაბუა̄დ
Line of edition: 31 ესერ ქა ლეჰუ̂და̈̄ლი ხა̄რ, ეშუ̂ა̈̄ი დია̈რ ხე̄მი ლჷდგა̈რს".
Line of edition: 32 (ლენჯერი)
Text: 9
Page of edition: 8
Line of edition: 33
9. ქუ̂ინი ლიტხე
Line of edition: 34 ლახე მუშუ̂ა̈ნ ჯუ̂ე̄დიას ჩუ იდგა̈რი ი ლჷდგა̈რს ა̈გითე ჴიდეხ ი
Line of edition: 35 ღო ჩუ̂აშდღუ̂იხ, ეჩქანღო ქუ̂ინი ლა̈ტხათე ღჷრიხ. ინჴრინეხ აშხუ̂ მა̄რა
Line of edition: 36 ჭირისუფა̈ლს. ალ მა̄რა ხაკუჩ ერე ქუ̂ინი ლიტხე̄მი ლოც ხოხალდე̄დს.
Page of edition: 9 Line of edition: 1 ქუ̂ინი მჷტხე ჩა̈ნგს ა̈ე̄სგი, მამილუ̂ს იყდა̈̄ნი ი ჩუ ნადგარუ̂ ა̈დგილმჷყ
Line of edition: 2 ქა ღჷრიხ. ეჩქას ლოცს ყჷლე, მამილუ̂ს ლა̈ღლია̈შ იჩხინე, ჩა̈ნგს შჷნჟი
Line of edition: 3 იყდა̈̄ნი ი იბნეხ ლიჴედს თა̄მა̈შდ: "ქუ̂ინს ესერ ჟი ნო ა̈ხფეშს!,
Line of edition: 4 შუკუ̂ჟი̄ნ ჩა̈ნგს აშუ̂მეხ, იმე-იმე ჟი იშუ̂მინეხ: "ჩუ̂ ესერ დო ა̈დყა̄ლუ̂ე̄ნს
Line of edition: 5 ქუ̂ინ ენასდ ლაჴა̈დჟი̄ნ!" ამჟი თა̄მა̈შდ ანღრიხ, (უ̂)ოდ ა̈გიდ დო
Line of edition: 6 აჰიხ. ობა̈შინ ჯუ̂ე̄დია ქუ̂ეყანახა̈ნი ჴიდეხ ამჟი̄ნ ქუ̂ინს.
Line of edition: 7 (ლენჯერი)
Line of edition: 8 შომუ̂ა̈ჲ მა̄რე ჩუ̂ა̈დყიმი ლჷცისგა, ეჩქას ლჷდგა̈რ იმუ̂ა̈ჲ ა̈ხბეგუ̂ნიხ,
Line of edition: 9 ლჷდგა̄რს ა̈გითე ა̈ნჴდეხ ი ეჩუნღო მე̄რმა ლადეღ ქუ̂ინი ლა̈ტხათე
Line of edition: 10 ადრინეხ. ჭუ̄ნირს ი ჩა̈ნგს ადჲე̄სგიხ ი იმუ̂ა̈ჲ ლჷდგა̈რ ა̈ხბა̈გუ̂ხ, ეჩჩუ̄ნ
Line of edition: 11 ლა̈ჲბინიხ ლიჭნურის, ჩა̈ნგი ლიშუ̂მეს. ქორდ ამჟი̄ნ ჴედნიხ ლაჭნურუშ
Line of edition: 12 ი ჩა̈ნგი ლიშუ̂მეუ̂შ. ეჩნოშ ხაბჟახ ქუ̂ინ ქორთე მეტხე.
Line of edition: 13 (იფარი)
Text: 10
Page of edition: 9
Line of edition: 14
10. ლილჭა̈̄ლ
Line of edition: 15 უ̂ოჲ საბრალ ბუბა~ჲ, ა̄~ჲ!
Line of edition: 16 ხოჩა ლი̄ზა̈̄ლ ჯა̈̄ცხ, ეჩჟი ახსყედ, ი̄ა̄~ჲ!
Line of edition: 17 ა̄, მი საბრალ, მა̈ჲ უ̂ობ ა̈მჰი̄დ, ი̄ა̄~ჲ!
Line of edition: 18 მეშხა ლაჩქი მჷფრენი და̈̄რ ა̈ჯსა̈დხ, ი̄ა̄~ჲ!
Line of edition: 19 ლახუ̂ბაჲ ეჩე ჯაყა მა̈გ, ი̄ა̄~ჲ!
Line of edition: 20 საბრალ გუშგუ̂ეჲ ლეუ̂ან ი ემჷზაჲ, ა̄~ჲ!
Line of edition: 21 გუშგუ̂ეჲ აღა̈თი ი ანუსჲა̈ჲ, ი̄ა̄~ჲ!
Line of edition: 22 (მესტია)
Line of edition: 23 უ̂ოჲ, დედე, მა̈ჲ ჯეწდუ̈ნნი, ი ა̄-ჲ!
Line of edition: 24 ჯა̈წდუნი მა? უ̂ოჲ, დედე̄, ა̄~ჲ!
Line of edition: 25 უ̂ოჲ, დედე, გუშგუ̂ეჲდ ხოშა საცუ̂დუ̈ლ და̈̄რ ა̈რი სერ, უ̂ოჲ, დედე̄~!
Line of edition: 26 თე̄რა̈ლ ქა̈̄ხუ̂ხჷპი̄რ ლაგუ̂ა̈ნს ი, უ̂ოჲ, დედე̄~!
Line of edition: 27 მია̈ჲ მა̄მა ლა̄ჯეშდ ი სია̈ჲ ჩუ ა̈მქარუ̂ა̈ნ, უ̂ოჲ, დედე̄~!
Line of edition: 28 მიშგუ̂ათე ლიჴედ ესერ ჯალა̈ტ, უ̂ოჲ, დედე̄~!
Line of edition: 29 ჯა̈̄ზნუნი მა ა̈გითე ი, უ̂ოჲ დედე̄~!
Line of edition: 30 უ̂ოჲ, დედე, ხა̈რი მა ხოჩე̄ლდ, ი ა̄~ჲ!
Line of edition: 31 ...................................
Line of edition: 32 მარე ნაჯგრუნ გარ ა̈ჯზჷზე, ჯა დეშ ანჴა̈დ ი, უ̂ოჲ, დედე̄~!
Line of edition: 33 "ლეგდ ესერ ა̈რი, მა̄მ მჷრე̄ს ხა̈მჲედა", ი, უ̂ოჲ, დედე̄~!
Line of edition: 34 მი ლახ ლეგდ ხუ̂ა̈რი, ჯიჟრი მა, უ̂ოჲ, დედე̄~?
Line of edition: 35 ეჩქა მე̄უ̂არ ჯიჟინდა̈ს, ე̄, ამე ხარდა̈ს ი, უ̂ოჲ, დედე̄~!
Line of edition: 36 (მესტია)
Text: 11
Page of edition: 10
Line of edition: 1
11. ლიფა̄ნა̈̄ლი
Line of edition: 2 უ̂ოხუ̂იშდ ია̈ნუ̂ა̈რს (ქუ̂ა̈ხს) ხუ̂იბნედ ლიფა̄ნა̈̄ლის. ეჯ ლადეღ ადგომს
Line of edition: 3 ხუ̂აყლედ. მიჟ ლახ ჩუ ხეჰუ̂რენი, ეჩქა ლუ̂მზჷრა̈ლს ხუ̂ანყედ, ქა ხუ̂ა̈იდ
Line of edition: 4 ლაჴუ̂ა̄მთე ი ჟი ხუ̂ა̈მზჷრიდ ი ლჷდგარუს სგა ხუ̂ა̈ცწჰიდ. ეჯ ლე̄თიშდ
Line of edition: 5 ხუ̂ა̈ჲ დია̈რს ხუ̂ანყედ, სამარხუ̂ს გარ ჩი̄ ხუ̂ამა̄რედ, მა̈ჲ ჲა̈ს მა ხუღუ̂ა.
Line of edition: 6 ეჯ ლე̄თ და̈̄რ იმის აზა̄რე: ჰარა̈ყი, ნა̈̄ყუნი, დია̈რი, ხილი, ლუბჴუ̂უ̂ლე,
Line of edition: 7 ქჷნა̈ში -- მა̈გ ნუკუ̂იშ ჰა̈დურდ დეკემბერი ლი̄ზა̈̄ლს ჟაჴუ̂რა̈ ჴულს
Line of edition: 8 ხუ̂იქჩედ ი კალუ̈სგა ჩუ ხუ̂ალჯენიდ, მუსს ხუ̂ახუ̄პედ ი ჟი ხუ̂ამურყუ̂ა̈მიდ.
Line of edition: 9 ეჩეჟი̄ნ ჩუ ხუ̂აჴლედ ჴულს. ეჯას ადგომ ლე̄თ სგა ხუ̂ა̈იდ ქორთე
Line of edition: 10 ჲერუ მა̄რე, აშხუ̂ ბეფშუ̂ს ჟი ხუ̂ასგუ̂რედ ჩა̈̄ჟდ ეჩეჟი ი სუმინ გირკიდ
Line of edition: 11 ქა ჴუ̂ედნიდ ყუ̂ელფს ი მეყულფა ხაპუნწკო̄რეხ ი ეჯას მასხუ̂რა̈პ
Line of edition: 12 ხუღუ̂ა ლაუ̂ეჩდ ი ჴული მჷჴდა̄ლა ტუ̄ლიხ: "ჴიშინ-ჴიშინ ბა̈̄მბღუ,
Line of edition: 13 კუმში ნა̈ფშირი, მა̄რე̄მი ნა̈შდო̈ბი, ზა̈ჲა̈ მაჴა̈დ, კიბდონა̈რ გუ̂ეში ი
Line of edition: 14 ჰამ". ათხე კიბდონა̈რჟი ლემზჷრა̈ლს დო̈̄სგიდ, ლაჴუ̂რა̈̄ლჟი, ლაჰჷრდუმა̈̄ლისგა,
Line of edition: 15 ყო̄რა̈ლჟი, გუ̂ალა̈რჟი, ლაუ̂ულჲა̄ქი̄რჟი(ლაღოლჲა̄ქირჟი),
Line of edition: 16 ლახმი̄რჟი. აშხუ̂ ლემზირს ჴულჟი დო̈̄სგიდ ი მა̈ტყი კალს ეჩეჟი̄ნ
Line of edition: 17 (ლემზირიჟი), აშხუ̂ ნა̄პუ ნაცმუნს ი ეჩეჟი თეტე̄ნს ხუ̂ა̈იდ ი ხუ̂აკჷრტჷნედ
Line of edition: 18 [ი] "ჴა̈ნ, ჴან, ჴა̈ნ"ს ტუ̄ლიდ აშხუ̂ ქუ̂ინი ლილტხუ̂ა̄ლ, მე̄რმა
Line of edition: 19 ქუ̂ინი ლილტხუ̂ა̄ლ "ფუ̈რ, ფუ̈რ"ს, მე̄სმა -- "ჩა̈̄ჟ, ჩა̈̄ჟ"ს ი ამჟი
Line of edition: 20 ჩი̄ სერ. ეჩუნღო ტაბა̈გს ხუ̂იგემდ ი ჟი ხუ̂ამა̄რედ ლაფა̄ნას ი ლეტუ̂რა̈̄ლს
Line of edition: 21 ხუ̂ატუ̂რედ ხუ̂ა̈ჲს: ჲერუ̂ეშდს ი სემეშდს ი ხოშა̄მი, ჰა̄ლ მოშ ხუ̂ა̈ჲ
Line of edition: 22 ჲა̈ს ხუღუ̂ა. ღუ̂აჟა̈რ ფაყუ̂ა̈რს ჩუ ხუ̂იკდჷრედ ი ზურალა̈რ ჩუ იქქუ̂იხ
Line of edition: 23 ი ეჯჟი ხოფა̄ნედ ხუ̂ა̈ჲ ხა̈ნს. ეჩქა უ̂ეშგიმპილს აშხუ̂ კათხს ღოჟმა̄რე
Line of edition: 24 იყდა̈̄ნი ი მე̄რმა ჭიქს ზურა̄ლ, ხოშჷნდებიხ ი ბიდეხ ჰარა̈ყს. ეჩქანღო
Line of edition: 25 ჩუ ხუ̂ისგუ̂რიდ ი ხუ̂იდიარა̈̄ლდ ი ხუ̂იმქარა̈̄ლდ: ჲერუ̂ა̈̄ჲ მოშ
Line of edition: 26 ხუ̂ა̈ჲს ლა̈ხუ̂ზუ̂ებნედ ლემზჷრა̈ლს ი ჟი ხუ̂იშჷლდა̈ნიდ, უ̂ოშუ̂ა̈̄ჲდ ლემზირს
Line of edition: 27 ხუ̂იზბიდ თუ̂ითჟი. ეჩუნღო ჟეღს ხოდიდ ლემზჷრა̈ლს, უ̂ოშუ̂ა̈̄ჲდს
Line of edition: 28 [დო] ლა̈ჲზუ̂ებნე, ეჩქად აშ ხოდიდ ი ჟი ხუ̂იშჷლდა̈ნიდ, უ̂ოშა̈̄ჲ ლემზირს
Line of edition: 29 იზბი.
Line of edition: 30 ამჟინ ნა̈მთქუ̂ა უ̂ოხუ̂იშდ ქუ̂ა̈ხუნღო ი ეჩას და̈შდიშ ა̈ხჭემნი ეჩქად
Line of edition: 31 ი ეჩქა რიჰდ ეშხუ საა̈თ ირდი, ეჩქა ჟი ხუ̂იგნა̈̄ლდ ი ეჯგუ̂ა̈ჲ ნაფა̄ნუნს
Line of edition: 32 ხუ̂ამა̄რედ უ̂ოხდრისს, კუ̂ახს ი ჩი̄, ლჷჯე̄მი ქაქსი. ეჩქა ეშხუ მა̄რე
Line of edition: 33 ქა მუსგუ̂ჯინად ქა ნითრა ი ეჯნა̈რ აშხუ̂ ფიჩქს ჟი ხუ̂ამა̄რედ ჩინუკუ̂ი
Line of edition: 34 ლეზუ̂ებ-ლეთრა, აშხუ̂ ფაკა̈ნ ლჷჯე̄მი ქაქს ი სამ ლეტუ̂რა̈̄ლს ხუ̂ატუ̂რედ
Line of edition: 35 ი ქა ისგუ̂ჯინე ეჯა ყო̄რა̈ლქა. წყნა̈̄რო̄ლდ ღჷრი, სუმინ ჟი
Page of edition: 11 Line of edition: 1 ისპუნი ლერსგუ̂ანთე, ჩუ იჩქუ̂ეუ̂ი, ლეტუ̂რა̈̄ლს ქაშა̈̄ლიდ ყო̄რა̈ლქა ჟი
Line of edition: 2 ხალწჷ̄რე ი ყო̄რა̈ლს ლჷჯე̄მი ქაქუ̂შ ჩუ̂ა̈ჭრელე, შდაუ̂ლა̈რს ხა̈გნე.
Line of edition: 3 ამჟი ნაზნა ლიფა̄ნა̈̄ლი შუ̂ანა̈რს ჩი̄.
Line of edition: 4 (იფარი)
Line of edition: 5 განცხდა̈ბ სგუ̂ებნე ლადეღ ადგომს ხუ̂აყლედ. ადგომ მა̈̄ნკუ̂ი̄ ლიფა̄ნე
Line of edition: 6 ლი ლიფა̄ნა̈̄ლი̄შ. ადგომ ლადეღ ქა უშყუ̂დას ი ქა უსა̄უ̂ჭმას
Line of edition: 7 დე̄მგუ̂აშ ცუ̂ირედ ი ეჯ ლადეღ ლიტმე ნიხა. ესუ̂ა̈̄ჲს ქუ̂ინ ჩუ ხანწა̈მ,
Line of edition: 8 მა̈̄გ იტმეხ. ადგომ ლე̄თ ხუ̂ა̈ჲ დია̈რს ხუ̂ანყედ ი იშგან სამარხუ̂ს
Line of edition: 9 ხუ̂ამა̄რედ. საჴსნილ მა̄დ ნიშიდ, ეჯღა ერე ქუ̂ინს ესერ მა̄დ ხოცხა
Line of edition: 10 ეჯ ლე̄თი საჴსნილ. ეჯ ლე̄თ ჩუ ხუგემდ ტაბგა̈რს ი ეჯჲა̈რჟი̄ნ
Line of edition: 11 ჩი̄ ჩუ დო̄სგიდ, მა̈̄ჲ ლეფა̄ნად ნეკუ̂დენი ი ხუ̂ა̈ჲ ლეტუ̂რა ხუ̂აჴლენიდ
Line of edition: 12 ტაბგა̈რჟი. ეჯ ლე̄თ ხუ̂ა̈ჲ ხა̈ნს ლიფა̄ნე ნა̈მთქუ̂ა, ეჯღა ერე მუშუ̂ა̈ნ
Line of edition: 13 მა̄რა მე̄უ̂არ ხანწა̈მ ლჷდგა̈რი ქუ̂ინ ი ეჯ ლე̄თ ოხღელიხ ჩი̄, მა̈̄ჲ
Line of edition: 14 ესამა ლჷდგა̈რ ჩუ ხერდიხ ჯუ̂ინალდ ი მახად, "მა̈გ ესერ ჴედნიხ
Line of edition: 15 ეჯ ლე̄თ ი იდიარა̈̄ლხ ესერ". გუ̂იანდი უ̂ონაქა აზგჷრეხ ლიფა̄ნეს.
Line of edition: 16 ხოშა̈̄ლ ყჷლეხ, ერე "სგა მეჴედს ესერ ყო̄რისგა ხა̄რხ ლაჴა̈დ ი ქა
Line of edition: 17 მე̄ზას სგა მეჴედი ბა̈დშუ̂ ყო̄რქა მა̄მ ხა̄რხ ლა̄ზ ი ლაჴუ̂რაქა ესერ
Line of edition: 18 ხა̄რხ ლე̄ზი".
Line of edition: 19 ადგომ ლე̄თუნღო ეშხუ ნაგზი ხო̄ზი ლიჰლომა̈̄ლიდ ი ეჩქად ჩიგარ
Line of edition: 20 ეჩჟი ლიფა̄ნე ნა̈მთქუ̂ა. ლიჰლომა̈̄ლი ლადეღ ერ იგნი, ეჩქა ხუ̂იგნა̈̄ლდ დო̄სგ, ჩუ
Line of edition: 21 ლირჰა̄ლ (ჩუ ლირჰა̈̄ლდ). ლემესგს ხუ̂ა̄შუ̂ედ,
Line of edition: 22 ქა ხუ̂ირბიე̄ლდ ი ლეღუ̂ს ხუ̂აჯა̈ბდ ი ქა ხოფა̄ნედ. ლიფა̄ნე ეჯ ლე̄თი
Line of edition: 23 ხუ̂ა̈ჲ ხა̈ნს ნა̈მთქუ̂ა, ადგომ ლე̄თი გუ̂ა̈რდ. ეჯ ლე̄ თქუნა̈რუს ქა იმშგუ̂ა̄ნეხ.
Line of edition: 24 ლიფა̄ნე̄ ლიზგჷრა̈̄ლთე მჷფა̄ნე ჟი იკედ აშხუ̂ ფაკა̈ნ ლჷჯე̄მი ქაქს ი ყო̄შს,
Line of edition: 25 ეჩუნღო ათხკჷ̄რა̈̄ლი ყო̄რა̈ლქა ი ხეჴჷ̄რა̈̄ლ მიჩა ქუნა̄რუს, ერე "ნოუ̂ ესერ
Line of edition: 26 ხენდრა̈უ̂ხ ი, მა̈დილუ ხე̄რახ, მა̈̄ჲ ესერ ამე
Line of edition: 27 ქა̄თკუ̂ა̈დუ̂ნე̄ნხ, ეჯა ესერ ეჩეუ̂ ოხტჷრხნახ ი ქრისდე̄ ნარჰადუ ესერ
Line of edition: 28 ხოგა̈დხ". მჷფა̄ნა ხოხა, ერე მუგუ̂დაჲ ესერ ქუნა̄რუ ყო̄რქ ე̄სყა.
Line of edition: 29 ეჩუნღო ჩუ ირჰი სერ ი სოფლი ბოფშა̈რ მა̈გ ჟი ინზო̄რა̈̄ლხ
Line of edition: 30 ი ლაჯღე̄უ̂ას ხაჭიმხ. ბოფშა̈რ ითშიხ მჷმზჷრა̈̄ლის. მჷმზჷრა̈̄ლი ესუ̂ა̈̄ჲს
Line of edition: 31 სგა ხეგნი ყო̄რს ჩია̈̄გ ამჟი ყჷლე: "ქრისდე ფუსდ, ჰა̄ლ ლა̈ჯჴჷ̄რნე̄ნს
Line of edition: 32 იშგუ̂იდ ლჷნგა̈ზ ჩიჩუ̂ლი ქუ̂ინ, აშ ლა̈ხჴჷ̄რინ ალ ქორა̈ მეცლა̈ბი
Line of edition: 33 ქუ̂ინ ი ამე̄ნ". მე̄რმე ბოფშა̈რ ი ყჷლეხ მა̈გ აშხუდ: "ამე̄ნ". მჷმზჷრა̈̄ლი
Line of edition: 34 ყჷლე აჯაღ: "უმუ̂ა̈̄ჲთე ალ ქორა̈ მჷშა̈ჲ მა̄რე ქა̄ჩეს, ჩია̈̄გ სი ლოხჴე,
Line of edition: 35 ჯგჷრა̈̄გ ჩა̈̄ნი̄შ, ლერსგუ̂ან მეჴა̈რხა̈ნ ი ამე̄ნ". ბოფშა̈რი ყჷლეხ აჯაღ:
Page of edition: 12 Line of edition: 1 "ამე̄ნ". მჷმზჷრა̈̄ლი ყჷლე აჯაღ: "გჯჷრა̈̄გ ჩა̈̄ნი̄შ, ალ ქორა̈̄ ხოშა̄მ
Line of edition: 2 ხოჩა ლიმა̈ჩუ̂ ხა̈ყრ ი ხოხუ̂რა̄მ სგეჲ ხათხე̄ლინ ი ამე̄ნ". მე̄რმე ბოფშა̈რ
Line of edition: 3 ყჷლეხ აჯაღ: "ამე̄ნ". მჷმზჷრა̈̄ლის მა̄ჲ ხეკფი ლე̄ქუ̂ი̄სგდ. ჩი̄ ყჷლე ი
Line of edition: 4 მე̄რმე ბოფშა̈რი̄ "ამე̄ნ"ს ხაყლეხ.
Line of edition: 5 ლიფა̄ნა̈̄ლინქაი ჩიგარ ნამთქუ̂ა ლიფა̄ნე, მიშლადეღჷნქა. მიშლადეღ
Line of edition: 6 მა̄დ შიდ ლიფა̄ნე.
Line of edition: 7 (მულახი)
Line of edition: 8 ადგომს ქუნა̄რუ ჴედნიხ. ეჯ ლე̄თ ხოჩა ლიფა̄ნეს იჩოხ. კუ̂ეცნა̈
Line of edition: 9 დია̈რს [ანყეხ], ნა̈̄ყუნს [ამა̄რეხ]. ეჯ ლადეღ ჩი̄ ჩ'აშყუ̂დიე̄ლიხ -- ტაბგა̈რს,
Line of edition: 10 ქარხსა̈ლს... ლჷმა̄რად ხეხუ̂ახ ქუნა̄რუს. ეჯ ლე̄თ ხუ̂ა̈ჲ გომიჯს
Line of edition: 11 ანყეხ, ტაბგა̈რს ჩუ იგემხ. ეჩეჟი̄ნ დია̈რს დე̄სგიხ, ნა̈̄ყუნს, ჰარა̈ყს,
Line of edition: 12 ლეტუ̂რა̈̄ლს ატუ̂რეხ. ჟი იგნა̈̄ლხ ხა̈ლხ, ქორისგა ხემსახუ̂ირხ ქუნა̄რუს:
Line of edition: 13 სგა ღჷრი ტაბგა̈რთე̄სგა ქორა̈ მახუ̂ში, ჰარა̈ყს ჩუ ბიდე, ხათრე უ̂ითამ
Line of edition: 14 ქუნა̄რუს. წყჷნა̈̄რო̄ლდ გა̈რგლიხ, დე̄მ ტე̄უ̂ეხ: "ქუნა̄რუს ესერ დო̄სა
Line of edition: 15 ლახყალუ̈̄ნდე̄დხ, ადო ესერ ჩუ აჭთუნეხ".
Line of edition: 16 სერ ქუნა̈რ აჩა̈დხ. მინ ჩუ იდიარა̈̄ლხ. ლემესგს ა̄შუ̂ეხ ძღჷდს:
Line of edition: 17 "ტებდი ესერ ხე̄რახ ქუნა̄რუს". მე̄რმა ლადეღ ჟი იგნა̈̄ლხ, განცხდა̈ბ
Line of edition: 18 ლადეღ, ლა̈ძჰა̈̄ლს ა̈ძჰენიხ, ლეღუ̂ს ხოჯგრიხ ი დია̈რს. ალა [განცხდა̈ბ]
Line of edition: 19 ლიზ, ლჷრა̈̄ქუ̂ედ, თახა̈ ლადეღ. ეჩუნღო̄ნ საფტინ ანჴა̈დ, ლახორთე
Line of edition: 20 აჩა̈დხ ქუნა̄რუ. ლახორს ი̄მბუ̂ა̈̄ლხ ქუნა̄რუ, ეჯჲა̈რს ხაკუხ ერე ხოჩა̄მდ
Line of edition: 21 ხარდე̄დდ სგა̈ჲ.
Line of edition: 22 ეჯ საფტინ ლე̄თ ლახორხა̈ნ ა̈გითე ჴედნიხ. ათხ ა̈̄გის ტაბა̈გ ჩოხგეხ,
Line of edition: 23 ერე "ლახორხა̈ნ ესერ ა̈მჴედე̄ლიხ" ი ა̈დია̈რნეხ. ბა̈ზი ხოშა
Line of edition: 24 ლემესგს ა̄შუ̂ეხ. ამჟი ხოხახ და̈შდი ლადა̈ღუ̂. ეჯ ლადეღ ისგლე̄თი
Line of edition: 25 უ̂ონაქა ჟი̄გნა̈̄ლხ ი ქა ირბიე̄ლხ, ტაბგა̈რს იგემხ, ჩუ ხუფა̄ნეხ. ქუნა̄რუ
Line of edition: 26 იდიარა̈̄ლხ. ფიჩქჷლდს ჟი იკედ ქორა̈ ხოშა, ქა̈̄გნე ქუნა̄რუს ყო̄რთექა. ეჩქა სგა
Line of edition: 27 ჴედნი ქორთე ი ჩუ იდია̄რა̈̄ლხ მინ.
Line of edition: 28 ალა ლიზ.
Line of edition: 29 (მულახი)
Text: 12
Page of edition: 12
Line of edition: 30
12. სუ̈მნიშ
Line of edition: 31 ეშხუ უ̂იქმ ნიხალ ლახრა̈ლს. ალ უ̂იქმ ლი სუ̈მნიშ ი ხეხუ̂ა ლუ̈ნთუ̂ისგა
Line of edition: 32 პირუ̂ელ თებჷრუ̂ა̈ლს. ლახუ̂ს ნი̄გ საყდა̈რ. ეჯას ხუ̂აყლედ მა̈დლია̈ნს,
Line of edition: 33 მო̄დეჲ თა̄რჷნძელს.
Line of edition: 34 სუ̈მნიშ ქა ნიჭიმ სოფელს: აშხუ̂ ზაუ̂ ეშხუ ლი მუსუმნიშ (მჷსუმნიშ)
Line of edition: 35 ი მე̄რმა ზაუ̂ -- მე̄რმე. სუ̈მნი ლადეღ მუსუმნიშ ჟი ღჷრი მა̈დლია̈ნთე
Page of edition: 13 Line of edition: 1 ი ეჩე იმზირ. ეჩუნღო სოფელ ღჷრი, ესუ̂ა̈̄ჲს ჟი ლი̄ზი ხაკუ ი დია̈რს
Line of edition: 2 ი ზედა̈შს ა̈ჲი მა̈გ. დია̈რს ჟი ხა̈მზჷრიხ ი ზედა̈შსი. ეჩუნღო ტაბა̈გს
Line of edition: 3 იგემხ ი ჩუ იდიარა̈̄ლხ, ჰარა̈ყს ითრეხ ი დია̈რს იზბიხ.
Line of edition: 4 ეჩუნღო, ნა̈ბზა̈ პილთე, ჟი იცხემხ ტაბა̈გს, ჩუ ისგუ̂რიხ ი კე̄სარს
Line of edition: 5 ითშიხ. ჲესუ̂ა̈̄ჲს ხოჩა̄მდ ხესგუ, ეჩის გარ ითშიხ კე̄სა̈რდ. კე̄სა̈რს
Line of edition: 6 ჩუ̂აგუ̂ნა̈ჲეხ: ჟი იკედხ შიხს ჲედე გუნა̈ჲს, ეჩის ჟი ხაცუ̂მენიხ ლაწუ̂ეუ̂ჟი
Line of edition: 7 ჩია̈̄გ, თე̄რა̈ლჷნქა: ნებგუ̂აჟი, ჰა̈ყბა̈̄რჟი, ნექჭა̈̄რჟი, ნეფხუ̂ნაჟი, კაპრა̈ჲჟი,
Line of edition: 8 ჩია̈̄გ ხაცუ̂მენიხ გუნა̈ჲს. ეჩუნღო უ̂ა̈ზრა̈ლს ითშიხ. ეჯჲა̈რ ხეკუ̂ეს-ე
Line of edition: 9 ხელჩე̄დხ კე̄სა̈რს. კე̄სა̈რ იბუ̈̄რღუ̂იე̄ლ, იბუ̄ნძგუ̂ა̈̄ლ ი უ̂ა̈ზრა̈ლჷნქა ჩი̄
Line of edition: 10 ხეღუ̂ჭინა̈̄ლ, ჲედ ლემასგუ̂ჟი აცხუ̂ლე, მო̄დეჲ მუსისგა აშდღუ̂ი, აშდღუ̂ი
Line of edition: 11 ი ილგაცა̈̄ლ ამჟი. ეჩუნო სერ ჩუ ინბუზი, ქა ჴედნიხ ი ლამპრა̈ლს
Line of edition: 12 ატუ̂რა̈̄ლიხ. ლამპრალს ა̈გიხა̈ნ ა̈ჲე̄სგიხ, ჩუ ლჷცლჷ̄რა ი ჟი ლჷმა̄რა.
Line of edition: 13 ნა̈ბუზს ჩუ ხაჴლენიხ მუსისგა ი ეჩეჟი̄ნ ნეწუ̂იდდ ლჷმა̄რა ლამპა̈რს ხადიხ,
Line of edition: 14 ამჟ'ა̄. ეჩუნღო ხოჩა̄მდ სგა ხა̈ღუ̂ი̄რეხ ლემესგს. ეჩუნღო ჟი ხებდინი
Line of edition: 15 ლამპა̈რს ი ხოშა ლემესგ ხეფსი. ეჩის ჲერუ̂ა̈̄ჲ ქა ხეწდენი გუშგუ̂ეჲ
Line of edition: 16 სოფელხა̈ნ, ეჩქა შიშდ ჟ'ატუ̂რა̈̄ლიხ სოფელს ლამპრა̈ლს ი ჭჷშხა̈შს
Line of edition: 17 იჩოხ ი იღრა̈̄ლხ. ეჩე, საყდა̈რსი, იჩოხ ჭჷშხა̈შს ი იბუ̄ნძგუ̂ა̈̄ლხ, კე̄სა̈რი
Line of edition: 18 იბუ̄ნძგუ̂ა̈̄ლ ი მიჩა უ̂ა̈ზრა̈ლი. უ̂ა̈ზრა̈ლ კე̄სა̈რს ხეწე̄ნა̈̄ლხ. კე̄სა̈რს
Line of edition: 19 ქა და̈̄რ მოშ ხეტხიე̄ლ ი ფუსდს გარ ხაყლე მა̈გ. ლამპრა̈ლ ჩუ დეგნიხ ი
Line of edition: 20 ეჩქა ა̈გითე ჴედნიხ. ა̈გის შუკუ̂ა̈რჩუ ჩუ ხო̄გ კე̄სა̈რს უ̂ო̄ო̄ო̄, უ̂ო̄ო̄ა̈,
Line of edition: 21 იტუ̈̄ლიე̄ლ ამჟი. უ̂ა̈ზრა̈ლ აზუ̂იხ. კე̄სა̈რ ესუ̂ა̈̄ჲს ქა ხეწდენი, ხეზურიე̄ლ
Line of edition: 22 ფაუშ, მარე უ̂ა̈ზრა̈ლ დე̄მ ხა̈მბეხ ლიყერს. კე̄სა̈რ ჟი̄ბ (საყდა̈რს) ნარდუ̂
Line of edition: 23 ერუ̂ა̈̄ჲ ლი ეჯ ლადეღ, ეჩას დე̄მ ხა̈ჩო.
Line of edition: 24 სერ ჩუ ჴუ̂ედნიდ სოფელთე. ეჩქას მუსუმნიშთე სგა ღურიდ.
Line of edition: 25 ყო̄რჟი ჩუ ხუ̂იგნიდ ლიმციქუ̂ილს ხობნედ. მუმციქუ̂ილ კე̄სა̈რ ლი ი
Line of edition: 26 უ̂ა̄ზრა̈ლი, პასხუ̂ი მჷტხე ალჲა̈რ ლიხ. კე̄სა̈რ ლჷქა̈დ ლი, უ̂იდიე̄რ
Line of edition: 27 ლი მე̄უ̂არ ი ქორხა̈ნ ერუ̂ა̈̄ჲ ლი პასხუ̂ი მჷტხე, ეჩას ჩი̄ ხოლა̄მ გარ ხაყლე,
Line of edition: 28 მარე ქორხა̈ნი ხოლა̄მ ხა̈ტხეხ ეჩქა. მა̈̄ნკუ̂ი კე̄სა̈რ აზზი მეცქუ̂ილს ი
Line of edition: 29 ხაყლე: "ქორხა̄ნქ' ე̄სერ ქაუ̂ ესუ̂ქა̈ხხ, ადო ესერ მიჩა ჯა̈რ-ი-მა̄რა ჲეშდჲერუ
Line of edition: 30 ბერჟა̈ ლაგა̈̄გი ხოჴი̄ჩა ჭჷშხრე ნაგა̈მ ი ეჩჟი ხეშტრე ნა̈ძგრინ,
Line of edition: 31 ეჯა ესერ ახყა ი ქორხა̈ნქა ქაუ̂ ესუ̂ქა̈ხხ. ყო̄რქა ესერ ნო̄რუ ანჴა̈დხ. მა̈გ
Line of edition: 32 ესერ ნანგუ̂ლიქაუ̂ ა̈თცჷყე̄რა̈̄ნხ. ეშხუ ასა̈დხ საფუ̂ა̈რი მჷლჩად. ლეჟა̈̄ნისგა
Line of edition: 33 ამყა ჯა̈რ ეჩზუმ, ერე თხუ̂იმ როქუ̂ ჴე̄რა̈შ ხორი ი კა̈ცხ ჭო̄ლა̈შ; ლექუ̂ა̈̄ნისგა ამყა
Line of edition: 34 ჯა̈რ, ბახსნა̈რ, ეჩზუმ, ერე თხუ̂იმ ქიპიე̄რ ხორი ი კა̈ცხმესტიას".
Line of edition: 35 ათხე სგა ღჷრი მეცქუ̂ილ ი ქა ხო̄მბუ̂ი ქორს. ქორს, ამე, პასხუ̂ი მჷტხა
Line of edition: 36 ითშიხ (პასხუ̂ი მჷტხად ჩიგარ ეჩას ითშიხ, ესუ̂ა̈̄ჲს ხოჩა̄მდ ხოხა
Page of edition: 14 Line of edition: 1 ეჯ ლე̄თი ლიმციქუ̂ილ. ეჯ ლე̄თი ლიმციქუ̂ილ ხოჩა̄მდ ხოხალხ მეჩია̈რს,
Line of edition: 2 ესუ̂ა̈̄ჲს ხუ̂ა̈ინ ხოწუ̂ახ ალა, ი ეჯჲა̈რს ითშიხ). პასხუ̂ი მჷტხე
Line of edition: 3 ხაყლე: "მიჩა ჯა̈რ-ი-მა̄რად ესერ მა̄მ ხაყლუ̄ნიხ, სგაუ̂ ესერ ანჴა̈დ,
Line of edition: 4 ნეზუ̂ი გუ̂ა̈რა ოთჷრშინეხ, ჩა̈̄ჟი გუ̂ა̈რა ჟ'ათქუ̂ემნეხ ი ციცუ̂ი თხუ̂იმს
Line of edition: 5 ჩუ̂ესდუ̈ნეხ ლაგა̈ფდ, ციცუ̂ი ჰაკუ̂ა̈დს ულმაშა̈რ ლა̈კუ̂ცა̈̄ნდ" ათხე ქა
Line of edition: 6 ჴედნი მეცქუ̂ილ ი ქა ხო̄მბუ̂ი კე̄სა̈რს, მა̈̄ჲ ლახტიხხ ქორხა̈ნ ათხე ამის
Line of edition: 7 ხაუ̂შგედ, ხაუ̂შგედ ი ფაუს ხატყცი ქორა̈ ყო̄რა̈ლს ი იზურიე̄ლ, იტუ̈̄ლიე̄ლ:
Line of edition: 8 უ̂ო̄ო̄ო̄ო̄ ჟი̄დ იბნე: უ̂ო̄ო̄ო̄ო̄! ღუ̂ეშგინპილს სგა ლეჴჷ̄რა̈̄ლ ხა̄რხ
Line of edition: 9 ქორხა̈ნ პასხუ̂ი მჷტხა. აშხუ̂ კარუ̂ა ჰარა̈ყს ხოჴდე ი სგა ხაჩქუ̂ეუ̂ი,
Line of edition: 10 ხაყლე, ერე "ხაპა̈ტიუ̂ეუ̂ ესერ, მა̈̄ჲ ესერ ნაქადუ̂ ლე̄სუ̂!" ეჩუნღო ქა
Line of edition: 11 ჴიდეხ ლეტუ̂რა̈̄ლს. ეჩის ჩუ ა̈რგიუ̂ა̈̄ლიხ ი ჩი̄ ხაჰუ̂დიხ თუ̈თს, ერუ̂ა̈̄ჲ
Line of edition: 12 საყდა̈რს ნარდუ̂ ლი. ჩი̄ ჟ'ატუ̂რა̈̄ლიხ (ჟ'ატუ̂რეხ), ჩუ იყდა̈̄ნიხ ტა̈ტისგა,
Line of edition: 13 ჩუ იდა̈̄წყიხ ჯა̈რი გუ̂ა̈̄რდ ი სგა ღჷრიხ ქორთე. (სადამს ლიჴედს
Line of edition: 14 ხუ̂აყლედ ამის, -- სგა ლი̄ზის ქორთე კე̄სრიშ ი მიჩა აფხნეგრეშ).
Line of edition: 15 სგუ̂ებინ ქორხა̈ნ ნაჴა̈დუ̂ ხოჟა̈ღუ̂ ი ეჩუნღო კე̄სა̈რ ი მიჩა უ̂ა̈ზრა̈ლ.
Line of edition: 16 ეჩუნღო აშ ხა̈ლხ ესღრი მა̈გ. ამე, ლა̈ლმესგს, სამინ ქა ხეცხპენიხ
Line of edition: 17 გირკიდ ლაღრა̄ლუშ ( ლაღრა̄ლოშ) მესმა̄მინ სგა ხეფურთუ̈̄ნიხ უშხუ̂ა̄რ
Line of edition: 18 ი იბუ̄ნძგუ̂ა̈̄ლხ. ეჩუნღო ქა ხეყჩენიხ ლაბუ̄ძგუ̂ა̄ლს ი კე̄სა̈რს ი
Line of edition: 19 მიჩა უ̂ა̈ზრა̈ლს ჩუ̂ასგუ̂რეხ აშხუდ, ტაბა̈გს იგემხ ი იდიარა̈̄ლხ, ა̈მზჷრა̈̄ლიხ
Line of edition: 20 ჰარა̈ყს ი ეჩუნღო ლა̈ხხუ̂ას ხოჴდეხ კე̄სა̈რს: ჲარუ̂ ი სამ, მო̄დეჲ
Line of edition: 21 ხოშა̄მ. ლა̈ხხუ̂ა ერ ახყახ, ეჩქა მა̄რა̈̄ლ ი ბოფშა̈რ კეტა̈რს იკედხ ი
Line of edition: 22 ტჷტს აბუ̄რღუ̂ეხ (ქუ̂ერწილ ესერ ხა̄რხ ბა̄ზი კე̄სრიშ). ეჩუნღი ლა̈ხხუ̂ას
Line of edition: 23 ჩუ̂ასგუ̂რეხ კე̄სა̈რცახა̈ნ. კე̄სა̈რ ლა̈ხხუ̂ას ხეტჷა̄შა̈̄ლ, ხეყჰა̈̄ლ. კე̄სა̈რს
Line of edition: 24 ი მიჩ ლა̈ხხუ̂ას თა̈შს ხოხტუ̄რეხ. კე̄სა̈რ ხორგიუ̂ა̈̄ლი ლა̈ხხუ̂ას: აშხუ̂
Line of edition: 25 ნა̄პუს აშხუ̂ ხაჰუ̂დი. მე̄რმა-მე̄რმა. ჩუ სგურხ ეჩჩუ ხუ̂ა̈ჲ ხა̈ნს. ეჩუნღო
Line of edition: 26 ტაბა̈გს ჟი იცხემხ ი ხოჩა̄მ ლარდას ასყე̄ნეხ, ლასუ̈ბს ი ლაღრა̄ლს ი
Line of edition: 27 ღუ̂ეშგინპილს ჩუ ფხეჟნიხ. მაშდმა̈̄რ ღჷრიხ ა̈გითე.
Line of edition: 28 (მულახი)
Line of edition: 29 სუ̈მნიშ ნიხა ნა̈ჲ, იფა̄რა̈ლს, ჲარუ̂ თებერუ̂ა̈ლს. ეჩქა ნა̈მთქუ̂ა თუ̂ით
Line of edition: 30 ხოშა ლამპრი ლიი სუ̈ფთე მეზგახა̈ნქა ი ჟი ხუ̂ატუ̂რედ ჩი აშხუ̂ ა̈გის
Line of edition: 31 ი ეზერ ლარდა ნა̄რ: ხუ̂იყუ̂ა̄ბუნა̈̄ლდ ი ხუ̂იქჷ̄სა̈̄ლდ. მა̈̄ნკუ̂ი ჲერუ̂ა̈̄ჲ
Line of edition: 32 ა̈გითე ღჷრი, ეჩას ხუ̂ა̈ჲ ყუ̂აბს ხუ̂ატყციდ შჷყისგა. ეჩი̄ მაყალშუ̂ ა̈გითე
Line of edition: 33 ლი̄ზი მე̄უ̂არ ხამჭირ ჩი̄.
Line of edition: 34 მე̄რმა ლადეღ ჯგჷრა̈̄გი ნამპრობ ნა̄რ ი ლამა̈̄რია̈̄ ლამპა̈რსი ხუ̂ა̈იდ
Line of edition: 35 ი ჲარუ̂ ა̈გის ჟი ხუ̂ატუ̂რედ ი თუ̂ით ლამპა̈რს აშხუ̂ ა̈გის ხუ̂ატუ̂რედ
Line of edition: 36 ი თუ̂ით -- მე̄რმ' ა̈̄გის, მესმა ლამპა̈რს (კოტო̄ლ ლამპრო̄ლა̈რს) ხუ̂ა̈იდ
Page of edition: 15 Line of edition: 1 ხამა̈რხა̈ნ, მესმა ლადეღ -- დეცე ლამპა̈რს. ეჯას ჯუ̂ე̄დი (ჯო̄დი) ღუ̂ატს
Line of edition: 2 ხუ̂აცუ̂ედ ი ჟი̄ბა̄რქა ხუ̂იყდა̈̄ნიდ: "დეც როქ ჩუ̂ა̈დტებდი" ი ეჯ ლე̄თ
Line of edition: 3 ქა ისრული.
Line of edition: 4 სუ̈მნი ლე̄თ აჯაღ კალუ̈სგა თე̄მი ლამპრა̈ლს ხუ̂ასყე̄ნედ, ესუ̂ა̈̄ჲ
Line of edition: 5 ხაგა̈დ თე̄რა̈ლხა̈ნ, ი ჟი ხუ̂ა̈მზჷრიდ. აშხუ̂ხა̈ნ ტოტისგა სამ ლემზირს
Line of edition: 6 ხუ̂იყდა̈̄ნიდ ი მე̄რმახა̈ნ -- ლუტუ̂რა ლემპა̈რს ი ჟი ხუ̂ა̈მზჷრიდ ეჯასი
Line of edition: 7 ი "მაშედუ გუ̂ა̄რ იფა̄რა̈ლს სუ̈მნი ლე̄თი ნა̈მზჷრ".
Line of edition: 8 (იფარი)
Text: 13
Page of edition: 15
Line of edition: 9
13. ლამპრობ
Line of edition: 10 მესტიას ლემპა̈რს ამა̄რეხ ადგომ ლადა̈ღ. ქა დე̄სგიხ შგილქა ი
Line of edition: 11 სპა̈ნჟი: "ნო̄თაუ̂ როქუ̂ ხუნკუ̂იდ ა̈დფჷრა̈̄ნ". ლემპა̈რ ლამა̄რაჟი ეჩშელდ
Line of edition: 12 თხუ̂იმს იქუ̂ცეხ-ე́, უ̂ოშუ̂ა̈̄ჲდ მა̄რ' ა̈̄რი ქორისგა, ი ჩუ̂ალჟღჷნეხ, "ღო
Line of edition: 13 ხოჩა̄მდ როქუ̂ ა̈ხბიდნი", ეჯღა. ალას ქა დე̄სგიხ შგილქა.
Line of edition: 14 ლიმპა̈რი ლადა̈ღ მესტია მურგუ̂ა̈ლს ჟინჟღლა̈რ ესღუ̂ა ლამპრა̈ლ
Line of edition: 15 ლადა̈̄სგთე, ეჩშელდ-ე́, უ̂ოშუ̂ა̈̄ჲდ მა̄რე ა̈რი ქორისგა. ეჩე ჟი ერ შიდეხ
Line of edition: 16 ჟინჟღლა̈რს ლემასგუ̂თეჟი, ეჩქა მჷშდე ტუ̄ლი: "ამჟი̄უ̂ ალშიხე̄ლი
Line of edition: 17 ალ სოფლი ქუ̂ით, ალ სოფლი ამახუ̂, ჲესუ̂ა̈̄ჲს ალ სოფლი ხოლა ხეკუ̂ეს!
Line of edition: 18 მესტია̈̄ ტკიც მა̄რე მა̈გ ლჷმზჷრე̄უ̂ ლი!" ამეჩუ ისყი მა̈̄ჲ მაშე̄ნე
Line of edition: 19 ლისუ̂ბი-ლიხი̄რულ. ლემსგი გირკიდ ჭჷშხა̈შს იჩოხ; აშხუ̂ ა̈გის ლიბჷრგე̄ლ
Line of edition: 20 ხა̄რხ მახა ღუ̂აჟა̈რს. ამჟი ლი სერ ნა̈ბოზდ ლაღრა̄ლ, ლა̈ხი̄რულ
Line of edition: 21 ი ლასუ̂იბ.
Line of edition: 22 მუბუ̈რჷნღო, ნა̈ბოზს ჲერუ̂ა̈̄ჲს ლიმპა̈რი ხა̄რხ, ლიმპა̈რითე ღჷრიხ.
Line of edition: 23 ლიმპა̈რი სამ ლადა̈ღ ლი. ლიმპა̈რი̄ ლიჩუ̂მე ამჟი ხაზნახ ნიშგუ̂ეჲმჷყ-ა:
Line of edition: 24 ჲორი მეზგე უშხუ̂ა̄რ ხატყუ̂ბახ: აშხუ̂ ზაუ̂ ეშხუ იჩო ლიმპა̈რის, მე̄რმა
Line of edition: 25 ზაუ̂ -- მე̄რმე. უშხუ̂ა̄რთე მე̄ზი ეჯა ლი, ჲესუ̂ა̈̄ჲს მჷქაფ ხაყა, ეჯჟ' ერე
Line of edition: 26 უშხუ̂ა̄რე შელდ ლესუ̂ხ. მჷქაფ ლახ მო̄მ ღჷრი, აშხუ̂ მა̄რე̄მი ნა̈̄თის --
Line of edition: 27 ლაგა̈ფს, დია̈რს ი იშგან ჩი̄ ქა ხოზზიხ მეზგა.
Line of edition: 28 ამუნღო ეშხუ ნაგზი ქა ღჷრი (ხუ̂ა̈ინ ხოშა დო̄სდი̄ ხეხუ̂ა), ჯგჷრა̈̄გი
Line of edition: 29 ლამპრობ ლი. ეშხუ ლამპა̈რ მაშე̄ნე ხა̄რხ წეს. ალას ხაჟხა ჯგჷრა̈̄გი
Line of edition: 30 ლამპა̈რ. ალას ქორს ხა̈ბდინეხ ი მჷბიდს ჯგჷრა̈̄გთე ა̈იხ. სუმინ ჟი
Line of edition: 31 ისპუნიხ ჯგჷრა̈̄გი ჰა̈ზუ̂ისგა, სუმინ გირკიდ ქა ხეცხპენიხ ლემასგუ̂ ი
Line of edition: 32 ეჩანღო ლამპა̈რს ჟ'აკუ̂ა̄ნეხ ლემასგუ̂თეჟი. ამი̄ ჟი ლიკუ̂ა̄ნა̄ლუ̂ ა̈მზჷრიხ
Line of edition: 33 სოფელს ი აჭთუნეხ სოფლი ქუ̂ითს. ალ ნა̈ბოზს ამჩუ გუნ
Line of edition: 34 ლიხი̄რულ ლი. ხაზნახ ლიყუ̂ა̄ბანა̈̄ლ, ლიბჷრგე̄ლ ი ლიმზირ, ახღუ̂ახ
Line of edition: 35 ზედა̈შ ჯგჷრა̈̄გი ნა̈მზჷრუნდ. ჟი მჷმზჷრი მჷლჯგჷრა̄გა ლიხ. ეჩანღო
Line of edition: 36 ითრეხ ზედა̈შს ი ა̈მზჷრიხ ეჩი̄ მჷჴდა. ალ ნა̈ბოზს ამხა̄უ̂ ჩი̄ ახღუ̂ა
Page of edition: 16 Line of edition: 1 ხოხუ̂რა ლამპრა̈ლ, მინე-მინე ლჷდგარუ̂ი̄ საფლაუ̂ა̈რთეჟი. მეხუ̂ბარა̈ლს
Line of edition: 2 ქა ხოთრახ მინე ლაშდღუ̂ია̈რ ი ამეჩუ ატუ̂რეხ უშხუდ ლამპრა̈ლს.
Line of edition: 3 მახა ლჷდგარუ̂ი̄ პატრონა̈რს ჰარა̈ყ ი ლემზრა̈ლ ახღუ̂ახ ლეფა̄ნად
Line of edition: 4 ი ნა̈შუნდუ̂ა̈ბუნდ. ამ ლე̄თ ლირჰი ხაზნახ თებუშე̄რმჷყ (სიმელა̈რმჷყ).
Line of edition: 5 ამეჩუ სერ რიჰდ ლისუ̂ბი-ლიღრა̈̄ლ ი ლიჭშხა̈შ მა̄მა ქუ̂ეცნი ჩუ.
Line of edition: 6 ალ ლადღა̈რუნღო ატუ̂რეხ დეცე ლამპა̈რს, კალუ̂ა̈ ლამპა̈რს
Line of edition: 7 ი დაბრე ლამპა̈რს (დაბრე ლამპა̈რს დაბა̈რთ' ა̈̄იხ). ჲერხის აჯაღ
Line of edition: 8 ხოფშირა ლამპა̈რ ხაგა̈დხ: თე̄მიშ, კუმშიშ (ალას ლანგუ̂ლიჟი̄ნ ატუ̂რეხ)
Line of edition: 9 ი იშგენ ლამპრა̈ლ აჯაღ.
Line of edition: 10 (მესტია)
Line of edition: 12 ლაშთხუ̂ერი თა̄რინგზელ გუნ ლამა̈ზ ლაჴუ̂ა̈მ ლიზ. ეჩის ქა̄მენ ა̈მირანიშ
Line of edition: 13 ი ბაყბაყ-და̈̄უ̂ა̈ ლიშია̈̄ლ ხახტაუ̂ა. ეჩჷნქა ა̈მირან გუ̂ელჲა̈შა̈პს
Line of edition: 14 ოთურტყუ̂ა. ეჩქას ქა̈̄მჴედ, უ̂ე̄რე-ჲ ფა̈თუ̂ ქა̄თყუ̂ეფა. ეჯა ლა̈ჩუ̂ს ათღუ̂ეჭა,
Line of edition: 15 ღო უსუპი ნიბა̈̄შინ ცამცუმ ახხუ̂იე̄ნა. ეჯა მა̈გ ჟი ხახტაუ̂ა. ამი̄
Line of edition: 16 ისტორიას შუ̂ანა̈რ ამჟი ყჷლეხ:
Line of edition: 17 "თამარ დედფა̈ლ შუ̂ა̈ნთე ნამა̈̄ტუ̂ ა̈მჴედე̄ლი. ეჩქას შუ̂ა̈ნისგა ლაჴუ̂მარე
Line of edition: 18 ლიშნა̈უ̂ი ოთბინა, ჩია̈̄გ ჩუ̂ოთშა̈ნუ̂ა ლაჴუ̂მა̈რ. ეჩქას ლენჯა̈̄რთე
Line of edition: 19 ა̈მჴედე̄ლი, ლაშთხუ̂ერი თა̄რინგზელს ლჷმგა̈მინუ̂. ეჩქას ახჴედა ამბა̈უ̂,
Line of edition: 20 ერე "ა̈მირანს ესერ ბაყბაყ-და̈̄უ̂ ჩუ̂ოთდაგრა", ეჩი̄ ლიხიადა̄ლე ლა̈ნშა̈ნდ
Line of edition: 21 ჟ'ოთხატუ̂ა̈̄უ̂ნა ლაშთხუ̂ერი თა̄რინგზელჟი̄ნ ა̈მირანიშ ი ბაყბაყ-და̈̄უ̂ა̈
Line of edition: 22 ლიშია̈̄ლ".
Line of edition: 23 ლაშთხუ̂ერია̈რს ზაუ̂ისგა ხა̈მთქუ̂ახ ეშხუ თა̄რინგზელი წირ აღბა̈
Line of edition: 24 ცა̈̄ლადა̈ღ. სგუ̂ებნე ლადღა̈რს მუსი მურყუ̂ამს იბნეხ. ამი̄ ლიგემს ქა̄სრულეხ
Line of edition: 25 თა̄რინგზელი წირ სგუ̂ებნე ლე̄თ. მე̄რმა ჰამს ჟი ინზო̄რა̈̄ლხ
Line of edition: 26 სოფელ აშხუ̂ მეზგაისგა, ნა̈სია̈ჲშე̄რ ქორისგა. ჰარა̈ყ ჟი ლჷმა̄რე ხა̄რხ,
Line of edition: 27 დია̈რს მა̈გ ქა̄ნყეხ ი სგა ჴიდეხ. ღუ̂აჟა̈რ მურყუ̂მა̈ ფე̄დიას თა̄რინგზელს
Line of edition: 28 მიჩა ძღუ̂იდისგა ჟი ხა̈მზჷრიხ ჰარა̈ყს ი ჩუ ითრეხ. ეჩქანღო სგა
Line of edition: 29 ხეჭუ̂ა̈̄დიხ ხოხუ̂რა̈̄ლ მურყუ̂ამს ი ჩუ რიღუ̂ეხ.
Line of edition: 30 მურყუ̂ამს ჟიქა̄ნ ჯუ̂ა̈რ ხა̄გ. "ეჯას ერუ̂ა̈̄ჲ ქა იღე̄შგი, ეჯას ესერ
Line of edition: 31 ხოჩა ზა̈ჲ ხოჴდენი" ი ლაღე̄შგა̄ლს სგა ხეხუ̂ტენიხ. ეჩქანღო ჟი ინზო̄რა̈̄ლხ
Line of edition: 32 ქორისგა, მა̈გ ჩუ ისგუ̂რიხ, ხოშა̄-ჲ ხოხუ̂რა, ი ხა̄რხ ხინ ი ხიად.
Line of edition: 33 ნა̈ბოზს ჩუ ფხეჟნიხ. მუბუ̈რჟი̄ნ ჟი̄დ იყუ̂ბა̈̄ლხ ქორისგა ი
Line of edition: 34 ლირჰი ხა̄რხ. ლა̈ხი̄რული მასა̈რდ ხა̄რხ.
Line of edition: 35 (ლენჯერი)
Line of edition: 2 ნე̄სგუნა̈რ ეჩქანღო გარ იბნეხ მუსი მურყუ̂მა̈ ლიგემს. ლეღუ̂ი აღაბლე̄თ
Line of edition: 3 ქა̄სრულეხ ლიგემს. ყუ̂ელიერი დუ̂ეშდი ლადა̈ღ ბოფშა̈რ ჟი
Line of edition: 4 ინზო̄რა̄ლხ, ლემზჷრა̈ლს კარუ̂ა̄ლშუ̂ ჟ'ა̈ჲე̄სგიხ მაცხუ̂ა̄რთეჟი̄ნ, სამრაკუ̂ა̈
Line of edition: 5 ჰა̈ზუ̂ისგა კარუ̂ა̈̄ლს ჩუ იგემხ ბეთლა̈მი ყო̄რჟი̄ნ, მა̈გ ჟი ინზო̄რა̈̄ლხ
Line of edition: 6 ეჩქას ყუ̂აბდ, ჟი ხა̈მზჷრიხ ლემზჷრა̈რს. ეჩქანღო ხეგნიხ მურყუ̂ამს ლა̄რღუ̂ას,
Line of edition: 7 ჟიბა̄უ̂იშ-ჟიბაუ̂ ი ჩუბა̄უ̂იშ-ჩუბა̄უ̂. "ხედუ̂ა̄ჲ მოშ
Line of edition: 8 მიჩეშთ' ა̈̄დრიღუ̂ე, ეჯას ესერ ხოჩა ზა̈ჲ ხოჴდენი". მურყუ̂ამ ჩუ
Line of edition: 9 რეღუ̂ნი, ეჩქას ჯუ̂ა̈რი ლიღე̄შგა̈̄ლს იბნეხ ი ერუ̂ა̈̄ჲ ქა ხოღი, ეჯას
Line of edition: 10 ესერ მიჩა ფა̈ყთე ხოჩა ზა̈ჲ ხოჴდენი".
Line of edition: 11 (ლენჯერი)
Text: 16
Page of edition: 17
Line of edition: 12
16. ჯგუ̂იბ
Line of edition: 13 მესტია̄ლა̈რს ხაზნახ თებრუ̂ა̈ლისგა ღჷნ, ხედუ̂ა̈̄ჲს ხაჟხა ჯგუ̂იბ.
Line of edition: 14 ჯგუ̂იბ ლა̈დღიშდ მესტია ჩუ მეყუ̂ლე ლი ისგდ: აშხუ̂ა̈ნ ლიხ ლაღმა̈რ,
Line of edition: 15 მა̈რგია̄ნა̈რ ი ლა̈მბა̄შნა ლაღმარეშ ი მა̈რგია̄ნრეშ, მე̄რმახა̈ნ-მესტია̈̄
Line of edition: 16 მე̄რმე ლექუ̂ა̈̄ სოფლა̈რ.
Line of edition: 17 ჯგუ̂იბდ აშხუ̂ ნაგზა სგუ̂ებინ ლაღმა̈რ ი მა̈რგია̄ნა̈რ იბნეხ ლაღმი
Line of edition: 18 სუ̂იფისგა მუსი მურყუ̂მა̈ ლიგემს. მურყუ̂ამს მა̈̄ნკუ̂ი იხუ̂ნი ეშხუ მა̄რე,
Line of edition: 19 ხედუ̂ა̈̄ჲს ხეხუ̂ ღანაუ̂ ხა̄რ, ეჯღა ერე "ალას ესერ ხოხა ჭყინტი ლითნე",.
Line of edition: 20 ლიხუ̂ნის ლა̈̄თშუ̂ იჩოხ უფგოშ. მურყუ̂ამ ლაგა̈მჟი მუხუ̂ნის ლახ
Line of edition: 21 ჩუ̂ა̈ცხრეხ, მა̈გ ხატყციხ. ლაგა̈მჟი ტუ̄ლიხ: "მუხუ̂ნი, მუხუ̂ნი"ს ი ხატყციხ
Line of edition: 22 ყუ̂აბა̈რს
Line of edition: 23 მუყუ̂ამ ლი ლჷსკრიბა მუსიშ, ნე̄სგაისგა ხონხენიხ ზექა̈რს ლაბგად.
Line of edition: 24 მურყუ̂მა̈ ნაკლა̈თხი ლი ჲარუ̂ მა̄რე̄მი ლაგენ, ნა̈ნგრან -- ჲეშდ ჴა̈ლ.
Line of edition: 25 მურყუ̂მა̈̄ ლიგემს ერ ქა̄ზგჷრეხ, ეჩქას აშხუ̂ ფოყხა̈ნ ისგთე̄სგა სგა
Line of edition: 26 ხა̈ქუ̂ცეხ მურყუ̂ამს ჭერი ნანგრე̄მი ნაზიმს. ეჩე̄სგა ჭერს ჟ'აკჩეხ ეჩჟი̄ნ,
Line of edition: 27 ერე ჭერ ხეხო̄ლდე̄დს ნე̄სგაჟი. ეჩანღო მუსს სგა ხაგემხ, ჭერს ჩუ̂ა̈ნგჭუ̂ეხ
Line of edition: 28 ბჷგიდ. ჭერი ნაკლა̈თხი ლი ეშდოხუ̂იშდ ჴა̈ლ. ჭერს კა̈ცხჟი ხალჯენიხ
Line of edition: 29 ჯუ̂ა̈რს. ჯგუ̂იბდ აშხუ̂ ლადაღშუ̂ სგუ̂ებინ ალას ამჟი ქა̄ზგჷრეხ.
Line of edition: 30 ჯგუ̂იბ ლადაღ მესტია მურგუ̂ა̈ლ, ხოჩა მახე ღუ̂ა̈ჟ ი ხოჩა ზურა̄ლ,
Line of edition: 31 მა̈გ ინზუ̂ე̄რი. აშხუ̂ ფოყხა̈ნ ლიხ ლაღმა̈რ ი მა̈რგია̄ნა̈რ,