TITUS
Svan Chrestomathy
Part No. 3
Previous part

Text: 3 
Page of edition: 9 
Line of edition: 1 
3. ხვა̈̄ლმი ი ლეღვი აღაბ


Line of edition: 2       ხვა̈̄ლმი ლადა̈ღ ნამპარვი ჯჷმალადა̈ღ ლი ი ეჯ ლადა̈ღ ლიმზჷრ ხა̄რხ ჩი̄ჲა̈ ქორისგა.
Line of edition: 3    ხვა̈̄ლმი̄ მეგემ ღვებრა ლექვა̈̄ნჩუ̄ნ ლჷგ. ხოშა გჷგიბ ლი ი ამის ხემზირხ,
Line of edition: 4    ესვა̈̄ჲ ჴვა̈შ ხა̄რ. ხოლა̄მ მუჭვდი პატრონს ი ჴვეშა̈ჲს ამ ლადღიშდ ერს მამილვ ხორი
Line of edition: 5    ნა̈მზურუნდ ი ერს -- ლჷგრა̈̄ლ. ალ ნა̈მზურუნ მოჯლა̈ი ნათორ ხა̄რხ. ხვა̈̄ლმი
Line of edition: 6    ლადა̈ღ ქა ნა̈რბია̄ლუნღო ლემზჷრა̈რს ანყა̈̄ლიხ. ეჩქანღო ესვა̈̄ჲ ხვა̈̄ლმი̄ მამილვ
Line of edition: 7    ი ედ ლჷგრა̈̄ლ ხაგა̈დ, ეჯჲა̈რს მჷმზჷრი ჟი ხა̈მზჷრი ი ხაბიც ხვა̈̄ლმის, ერე "მიჩა
Line of edition: 8    მეფშვდე მა̈ზიგ ათქა̄ბვნას ამი̄ მუძღვნის, ხოლა მე̄კვა̈̄რჲე̄ლ, ჴვა̈შ ი მუჭვდი მა̈თლა
Line of edition: 9    ქ'ა̄თქა̄ბვნას ი ანსიპვნას აშ სგვებდ ი ლერსგვანთე ალ მამვლიშ ი ედ ლჷგრა̄ლე
Line of edition: 10    მუძღვნი". ეჩქანღო მამილვს ჩვა̈ჲსენიხ. ეჩის ი ლჷგრა̈̄ლს ჟ'აჯა̈ბხ ი ჩუ იდჲარა̈̄ლხ.
Line of edition: 11    მოგდა̈̄ნს მამვილ ი ედ ლჷგრა̈̄ლ ლეთხუმდ ხა̄რ ლეყდი ი მუზვებ მა̈გ ლი ქორისგა.
Line of edition: 12    ეჩქანღო კა̄ჟი̄ნ მჷჩხიმისგა ჴიცი კუ̄რპი̄ლა̈რს ა̈ჭიხ სამ. ეჯჲა̈რს შამფვირს ხაცვეხ
Line of edition: 13    ი ქა̈̄მ ჴვილას ხა̈ჩხინეხ. ალ კუ̄რპი̄ლა̈რს მა̄რე დე̄მ იზბი ი მუჟჴვა̈რი̄ლა̈რს ხუღვეხ
Line of edition: 14    ლეზობდ ი ლეკრე̄ნტა̄ლდ.

Line of edition: 15       ლეღვი აღაბ ლე̄თ მა̈̄ნკვი ლეღვს ხაგემხ მა̈გ ი ეჩნოვშ ჩუ იდჲარა̈̄ლხ. ჯიჯვა̈რს
Line of edition: 16    ი გა̈ლმოზა̈რს ნა̈ნკთ' ა̄დე̄სგიხ გელვე ლაგა̈ფია̄ქდ. ნა̈დჲარობენ ფეტვრა̈შ ი ჭყა̈ნი
Line of edition: 17    ცჷრცმას იჩოხ ი ეჩას ხოგა̈̄ლიხ ჩი̄ თვით ფაკა̈ნს. ჟი ხებზიხ, ერხი ლჷფშირ მეზგაისგა
Line of edition: 18    ღვაჟა̈რ ი ზურალა̈̄რ ცჷრცმა̈̄ ნა̄პუვა̈რს ხა̈ფშვდეხ უშხვა̄რ ი ჟი ხოთულვა̈ფიხ
Line of edition: 19    ლერქვა̈რს ი ნიჩვა̈რს მჷჩხმა̈̄რ ცჷრცმოვშ. ეჩქანღო ეშხუ მა̄რე ჟი ღჷრი დე̄ფნი
Line of edition: 20    ყო̄რთეჟი̄ნ, ჯიჯვა̈რს ი გა̈ლმოზა̈რს ქა შიდე ი ტუ̄ლი: "ოო უ გელო, ელოს
Line of edition: 21    ა̈ჯზჷზე გელოდ. ამზავ ალა ჯა̈̄ც ი ზავდ ბარჯს ა̈ჯკვა̄ნე."


Line of edition: 22 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.